‘तुझ्या छातीवर चेटकीण बसलीय’, असं सांगून उकळले पैसे; तरुणीच्या मृत्यूनंतर 7 महिन्यांनी तांत्रिक अटकेत

“साडेसात महिन्यांपूर्वी एका तरुणीनं विष प्राशन करून आत्महत्या केली होती. ती जीवन-मरणाच्या संघर्षात असताना आरोपी तांत्रिकही तिच्याबरोबर होता. प्रथमदर्शनी हे आत्महत्येचं प्रकरण असल्याचं वाटत होतं, मात्र तरुणीने आत्महत्या करण्यामागे दुसरं काही कारण असावं, असा पोलिसांना संशय आला. आम्ही तिचा फोन, व्हिसेरा आणि इतर फॉरेन्सिक तपासणीसाठी पाठवले. त्यातून समोर आलं की एका तांत्रिकानं भूत-प्रेतांची भीती दाखवून, मानसिक आणि शारीरिक छळ करून या तरुणीकडून पैसे उकळले होते. वैज्ञानिक पुराव्यांवरून हे स्पष्ट झाल्यानंतर आम्ही लोकांची दु:खं दूर करण्याच्या नावाखाली हे तांत्रिक प्रकार करणाऱ्या या आरोपीला अटक केली.”

ही माहिती दिलीय, बडोदा एच विभागाचे एसीपी जी. बी. बाम्भणिया यांनी. बीबीसी गुजरातीशी बोलताना त्यांनी या घटनेच्या तपासाबद्दल सांगितले.

तरुणीच्या मृत्यूनंतर सात महिन्यांनी आलेल्या एफएसएल (फॉरेन्सिक सायन्स लॅबोरेटरी) अहवालानंतर बडोदा पोलिसांनी स्वतःला ‘तांत्रिक’ म्हणवणाऱ्या एका व्यक्तीविरोधात आत्महत्येस प्रवृत्त केल्याचा गुन्हा दाखल केला आहे.

या तांत्रिकानं अत्यंत गरीब कुटुंबातील मुलीला ‘तुझ्या छातीवर चेटकीण बसली आहे’, ‘भूत-प्रेतांचा प्रभाव आहे’, तुझ्यावर ‘जादूटोणा करीन’ अशा धमक्या देऊन घाबरवल्याचा आरोप आहे.

या प्रकरणातील आरोपी आणि स्वयंघोषित ‘तांत्रिक’ गिरीशला पोलिसांनी 18 ऑगस्ट रोजी अटक केली असून तो सध्या न्यायालयीन कोठडीत आहे.

या प्रकरणात पोलिसांनी ‘आत्महत्येस प्रवृत्त केल्याचे’ पुरावे कसे गोळा केले, याचा बीबीसी गुजरातीनं मागोवा घेतला.

(आत्महत्या ही एक गंभीर मानसिक आणि सामाजिक समस्या आहे. जर तुम्हीदेखील तणावात असाल तर भारत सरकारच्या जीवनसाथी हेल्पलाइन 18002333330 ची मदत घेऊ शकता. तुम्ही तुमच्या मित्रांशी आणि नातेवाईकांशी देखील बोललं पाहिजे.)

आत्महत्येस प्रवृत्त केल्याचा आरोप असलेल्या 28 वर्षीय तृप्ती फतेहगंज भागातील आरए स्टुडिओमध्ये व्यवस्थापक म्हणून काम करत होती. तिचं घर तिथून साधारण दहा मिनिटांच्या अंतरावर होतं. याशिवाय ती लहान-मोठ्या उत्पादनांसाठी मॉडेलिंगही करत होती.

बडोद्यात तुळशीवाडी परिसरात राहणाऱ्या तृप्तीच्या आई हंसाबेन खुमाण सांगतात, “दोन वर्षांपूर्वी तृप्तीची तब्येत बिघडू लागली. तिला छातीत दुखत होतं. औषधांनी काही फरक पडत नव्हता. तेव्हा एका परिचिताने आमची ओळख तांत्रिक गिरीश परमारशी करून दिली. त्याने काही विधी केले, त्यानंतर तृप्तीला थोडं बरं वाटलं.”

हंसाबेन सांगतात की, या विधीनंतर ‘तांत्रिक’ गिरीश त्यांच्या घरी येऊ लागला आणि स्वतःला ‘जादूटोण्याचा तज्ज्ञ’ म्हणवत त्यांना घाबरवू लागला.

त्यांच्या म्हणण्यानुसार, 27 डिसेंबरपासून तृप्तीची तब्येत आणखी खालावली.

त्या सांगतात, “29 डिसेंबर रोजी गिरीशचा फोन आला. त्यानं तृप्तीला मोठ्या रुग्णालयात घेऊन जाण्यास सांगितलं. त्यामुळे आम्ही त्याच्यासोबत तिला रुग्णालयात नेलं. एसएसजी रुग्णालयात पोहोचल्यानंतर मी गिरीशला डॉक्टरांना सांगताना ऐकलं की तृप्तीनं उंदराचं विष घेतलं आहे. त्यावेळी तृप्तीचा मोबाईल मिळाला नाही म्हणून गिरीश रागावला आणि रुग्णालयातून निघून गेला. जाताना तो तृप्तीला म्हणाला, ‘माझं नाव बाहेर आलं तर मी तुझ्या कुटुंबावर जादूटोणा करेन.'”

अखेर 6 जानेवारी रोजी तृप्तीचा मृत्यू झाला.

तृप्तीच्या आई सांगतात, “त्यावेळी तृप्तीनं उंदराचं विष प्राशन करून आत्महत्या केली आहे, अशी तक्रार पोलिसात दिली होती.”

“नंतर सांगितलेल्या तांत्रिक विधींचे पुरावे मिळाले. मृत्यूनंतर सात महिन्यांनी एफएसएलचा अहवाल आल्यानंतर गिरीशनं तिला धमक्या दिल्याचंही स्पष्ट झालं. सामाजिक बदनामीच्या भीतीमुळे मी सुरुवातीला तक्रार केली नव्हती. पण माझी दुसरी मुलगी श्वेता हिनं समजावून सांगितल्यानंतर, गिरीशकडून तृप्तीला आत्महत्येस प्रवृत्त करण्यात आल्याची तक्रार दाखल केली.”

मुलीच्या मृत्यूनंतर साडेसात महिन्यांनी हंसाबेन यांनी पोलिसांकडे दिलेल्या तक्रारीत स्पष्टपणे नमूद केलं की, “तृप्तीनं मृत्यूपूर्वी माझी दुसरी मुलगी श्वेताला सांगितलं होतं की गिरीश तिच्या छातीवर बसल्याचं नाटक करत तांत्रिक विधी करत असे आणि वारंवार पैशांची मागणी करत असे. इतकंच नाही तर तो शारीरिक संबंधासाठीही मागण्या करत होता. तृप्तीनं नकार दिला तर तो जादूटोणा करून त्रास देण्याची धमकी देत असे. तृप्तीने मृत्यूपूर्वी सांगितलेल्या माहितीनुसार, तांत्रिक विधींसाठी वापरलेला कथि मंतरलेला दगड, अत्तराची बाटली, मधाची बाटली, माळ, नाणं आणि तृप्तीचे कापलेले केसही घरातून सापडले.”

तृप्तीच्या आई पुढे सांगतात, “तृप्ती मृत्यूशी झगडत असतानाही गिरीश वारंवार धमक्या देत होता. पोलिसांना त्याचं नाव सांगू नको, असं म्हणत होता. तो तृप्तीचा फोनही मागत होता. तृप्तीच्या मृत्यूनंतर आम्ही पोलिसांना तांत्रिक विधींसाठी वापरलेलं साहित्य, आत्महत्येसाठी वापरलेल्या उंदराच्या विषाची रिकामी ट्यूब आणि तिचा मोबाईल फोन पुरावा म्हणून दिला. गिरीशने माझ्या मुलीचा मानसिक आणि शारीरिक छळ करून पैसे उकळले आणि त्याच छळामुळे तिनं उंदराचं विष प्राशन करून आत्महत्या केली.”

बडोदा एच विभागाचे एसीपी जी. बी. बाम्भणिया यांनी बीबीसी गुजरातीला सांगितलं, “सुरुवातीला आम्हाला आत्महत्येची तक्रार मिळाली होती. मात्र मृत तरुणीच्या कुटुंबीयांशी आणि परिचितांशी बोलल्यानंतर छळामुळे ही आत्महत्या झाल्याचा संशय आला. त्यामुळे आम्ही तृप्तीचा व्हिसेरा (शरीरातील अवयवांचे नमुने) आणि मोबाईल फोन फॉरेन्सिक तपासणीसाठी पाठवला. तपासादरम्यान तृप्ती आणि गिरीश यांच्यातील व्हॉट्सॲप चॅट, व्हॉट्स कॉल्स आणि व्हीडीओ कॉल्स आढळले. त्यातून पैसे मागितल्याचे, तसेच भूत-प्रेत आणि चेटकिणींची भीती दाखवल्याचे अनेक ठिकाणी वैज्ञानिक पुरावे मिळाले. याशिवाय तृप्तीने जी-पेद्वारे गिरीशला वारंवार पैसे पाठवल्याचेही पुरावे सापडले.”

एसीपी बाम्भणिया म्हणाले, “सध्या गिरीश परमार न्यायालयीन कोठडीत आहे. त्याचा दावा आहे की तृप्तीसारखे लोक त्याच्याकडे उपायांसाठी येत असत आणि तिने त्याला मदत म्हणून पैसे दिले. धमकावून पैसे उकळल्याचा आरोप त्याने नाकारलेत. मात्र सरकारी रुग्णालयात गिरीशने डॉक्टरांना तृप्तीनं उंदराचं विष घेतल्याचं सांगितलं होतं, असं तृप्तीची आईनं स्पष्टपणे तक्रारीत नमूद केलंय. याशिवाय आमच्याकडे आणखी काही पुरावे आहेत, मात्र तपासावर परिणाम होऊ नये म्हणून ते सध्या उघड केले जाणार नाहीत. न्यायालयात ते सादर केले जातील. सध्या गिरीशविरोधात आत्महत्येस प्रवृत्त करणे, तसेच भूत-प्रेत, चेटकीण किंवा दैवी शक्तींची भीती दाखवून त्रास देणे आणि धमकावणे यासंदर्भात भारतीय न्याय संहितेच्या कलम 108 आणि 354 अंतर्गत गुन्हा दाखल करण्यात आला आहे. गिरीश परमारच्या इतर महिलाही बळी ठरल्या असतील, तर त्यांनी पुढे येऊन तक्रार करावी, असे आवाहन आम्ही केले आहे. त्यांची ओळख गोपनीय ठेवली जाईल.”

स्वतःला तांत्रिक विधींचा तज्ज्ञ म्हणवणारा गिरीश बडोद्यातील चाणी जकात नाका परिसरातील एकतानगर भागातील एका छोट्या घरात राहतो.

या भागातील सामाजिक कार्यकर्ते परेश पटेल सांगतात, “गिरीश परमार स्वतःला ‘भुवा’ म्हणवतो. मुख्यतः गरीब कुटुंबांतील लोक त्याच्याकडे धागा बांधण्यासाठी किंवा उपायांसाठी येत असत. तो स्वतःला भुवा आणि तांत्रिक म्हणवून घेत असे. लोकांना समोर बसवून विविध विधी करत असे. पूर्वी तो रिक्षा चालवत होता. मात्र त्याच्याविरोधात यापूर्वी कोणतीही तक्रार झाली नव्हती. ही पहिलीच तक्रार आहे. त्यामुळे आता त्याच्या भीतीपोटी गप्प बसलेले आणखी लोकही पुढे येऊन तक्रार करू शकतात.”

या प्रकरणात गिरीश परमार किंवा त्याच्या कुटुंबाशी संपर्क होऊ शकला नाही. त्यांची प्रतिक्रिया मिळाल्यानंतर या वृत्तात अपडेट करण्यात येईल.

(बीबीसीसाठी कलेक्टिव्ह न्यूजरूमचे प्रकाशन)