Source :- BBC PUNJABI
ਕਾਕੀਨਾੜਾ ਜ਼ਿਲ੍ਹੇ ਦੇ ਡੋਂਡਾਵਕਾ ਪੰਚਾਇਤ ਸੀਐੱਚ ਅਗਰਹਾਰਮ ਵਿੱਚ ਇੱਕ ਪਾਮ ਦੇ ਤੇਲ ਦੇ ਬਾਗ ਵਿੱਚ ਆਪਣੇ ਪਿਤਾ ਦੀ ਤਲਾਸ਼ ਕਰਦੇ ਹੋਏ ਲਾਪਤਾ ਹੋਈ ਦੋ ਸਾਲਾ ਗਿਆਨੇਸ਼ਵਰੀ ਦੀ ਭਾਲ ਜਾਰੀ ਹੈ।
ਕਈ ਦਿਨ ਬੀਤ ਚੁੱਕੇ ਹਨ ਅਤੇ ਉਸਦਾ ਕੁਝ ਪਤਾ ਨਹੀਂ ਚੱਲ ਸਕਿਆ ਹੈ। ਐੱਸਡੀਆਰਐੱਫ, ਐੱਨਡੀਆਰਐੱਫ ਦੀਆਂ ਟੀਮਾਂ, ਡਰੋਨ ਆਪਰੇਟ ਕਰਨ ਵਾਲੀਆਂ ਟੀਮਾਂ, ਪੁਲਿਸ ਅਤੇ ਸਥਾਨਕ ਲੋਕ 40 ਏਕੜ ਦੇ ਪਾਮ ਦੇ ਤੇਲ ਦੇ ਬਾਗਾਂ ਅਤੇ 500 ਏਕੜ ਦੇ ਪਹਾੜੀ ਖੇਤਰ ਵਿੱਚ ਬੱਚੀ ਦੀ ਤਲਾਸ਼ ਕਰ ਰਹੇ ਹਨ।
ਖਰਾਬ ਮੌਸਮ ਦੇ ਬਾਵਜੂਦ ਤਲਾਸ਼ੀ ਮੁਹਿੰਮ ਜਾਰੀ ਹੈ।
ਪਾਮ ਦੇ ਤੇਲ ਦੇ ਬਾਗਾਂ, ਝਾੜੀਆਂ, ਨਹਿਰਾਂ, ਤਲਾਬ, ਖੂਹ, ਖਾਲੀ ਘਰ, ਹਰ ਉਸ ਥਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ, ਜਿੱਥੇ ਕਿਸੇ ਬੱਚੇ ਦੇ ਮੌਜੂਦ ਹੋਣ ਦੀ ਸੰਭਾਵਨਾ ਹੋ ਸਕਦੀ ਹੈ।
ਆਮ ਗੁਮਸ਼ੁਦਾ ਲੋਕਾਂ ਦੇ ਮਾਮਲਿਆਂ ਦੇ ਉਲਟ ਇਸ ਮਾਮਲੇ ਵਿੱਚ ਪੁਲਿਸ ਵੱਲੋਂ ਵੱਡੇ ਪੱਧਰ ‘ਤੇ ਤਲਾਸ਼ੀ ਮੁਹਿੰਮ ਚਲਾਉਣ ਦੇ ਬਾਵਜੂਦ ਬੱਚੀ ਦਾ ਕੋਈ ਸੁਰਾਗ ਕਿਉਂ ਨਹੀਂ ਮਿਲਿਆ ਹੈ?
ਹੁਣ ਤੱਕ ਤਲਾਸ਼ੀ ਮੁਹਿੰਮ ਕਿਵੇਂ ਚੱਲ ਰਹੀ ਹੈ? ਪੁਲਿਸ ਦੀ ਅਗਲੀ ਯੋਜਨਾ ਕੀ ਹੈ?
ਉਸ ਦਿਨ ਕੀ ਹੋਇਆ ਸੀ?
ਦੋ ਸਾਲਾ ਗਿਆਨੇਸ਼ਵਰੀ 6 ਜੂਨ ਨੂੰ ਲਾਪਤਾ ਹੋ ਗਈ ਸੀ। ਉਸਦੇ ਪਿਤਾ ਸੁਨਕਾਰਗਣੇਸ਼, ਕਾਕੀਨਾੜਾ ਜ਼ਿਲ੍ਹੇ ਦੇ ਡੋਂਡਾਵਕਾ ਪੰਚਾਇਤ ਸੀਐੱਚ ਅਗ੍ਰਾਹਾਰਮ ਵਿੱਚ ਇੱਕ ਪਾਮ ਤੇਲ ਦੇ ਬਾਗ ਵਿੱਚ ਕੇਅਰਟੇਕਰ ਵਜੋਂ ਕੰਮ ਕਰਦੇ ਹਨ। ਉਨ੍ਹਾਂ ਦਾ ਪਰਿਵਾਰ ਉੱਥੇ ਹੀ ਰਹਿੰਦਾ ਹੈ।
ਗਣੇਸ਼, ਉਸਦੀ ਪਤਨੀ ਭਵਾਨੀ, ਉਨ੍ਹਾਂ ਦੀ ਧੀ ਗਿਆਨੇਸ਼ਵਰੀ ਅਤੇ ਉਨ੍ਹਾਂ ਦੀ ਛੇ ਮਹੀਨੇ ਦੀ ਧੀ 40 ਏਕੜ ਦੇ ਬਾਗ ਵਿੱਚ ਰਹਿੰਦੇ ਹਨ। ਗਣੇਸ਼ ਦੇ ਮਾਪੇ ਵੀ ਉਨ੍ਹਾਂ ਦੇ ਨਾਲ ਰਹਿੰਦੇ ਹਨ। ਉਹ ਸਾਰੇ ਬਾਗ ਦੇ ਵਿਚਕਾਰ ਸਥਿਤ ਲਗਭਗ 80 ਵਰਗ ਗੱਜ ਵਿੱਚ ਫੈਲੀ ਦੋ ਮੰਜ਼ਿਲਾ ਕੰਕਰੀਟ ਦੀ ਇਮਾਰਤ ਵਿੱਚ ਰਹਿੰਦੇ ਹਨ।
ਬੱਚੀ ਦੇ ਮਾਪਿਆਂ, ਭਵਾਨੀ ਅਤੇ ਗਣੇਸ਼ ਨੇ ਬੀਬੀਸੀ ਨੂੰ ਦੱਸਿਆ ਕਿ 6 ਜੂਨ ਨੂੰ ਕੀ ਹੋਇਆ ਸੀ।
ਗਿਆਨੇਸ਼ਵਰੀ ਦੀ ਮਾਂ ਸੁਨਕਾਰਾ ਭਵਾਨੀ ਨੇ ਦੱਸਿਆ, “ਸ਼ਨੀਵਾਰ ਦੀ ਸਵੇਰ ਬੱਚੀ ਸਾਡੇ ਨਾਲ ਸੀ। ਉਸਦੇ ਪਿਤਾ ਬਾਗ ਵਿੱਚ ਕੁਝ ਕੰਮ ਕਰਨ ਗਏ ਸਨ। ਉਨ੍ਹਾਂ ਦੇ ਜਾਣ ਤੋਂ ਬਾਅਦ, ਬੱਚੀ ਥੋੜ੍ਹੀ ਦੂਰੀ ਤੱਕ ਉਨ੍ਹਾਂ ਦੇ ਪਿੱਛੇ-ਪਿੱਛੇ ਅੰਬ ਦੇ ਦਰੱਖਤ ਤੱਕ ਚੱਲੀ ਗਈ। ਫਿਰ ਉਹ ਬੱਚੀ ਨੂੰ ਵਾਪਸ ਲੈ ਆਏ। ਜਦੋਂ ਮੈਂ ਆਪਣੀ ਛੋਟੀ ਧੀ ਨੂੰ ਨਵਾ ਰਹੀ ਸੀ, ਤਾਂ ਉਨ੍ਹਾਂ ਨੇ ਗਿਆਨੇਸ਼ਵਰੀ ਨੂੰ ਕੰਧ ਦੇ ਕੋਲ ਛੱਡ ਦਿੱਤਾ ਅਤੇ ਮੈਨੂੰ ਕਿਹਾ ਕਿ ਜਦੋਂ ਤੱਕ ਉਹ ਬਾਗ ਵਿੱਚ ਕੰਮ ਕਰਨ ਜਾ ਰਹੇ ਹਨ, ਉਦੋਂ ਤੱਕ ਉਸ ‘ਤੇ ਨਜ਼ਰ ਰੱਖਣ।”
“ਮੈਂ ਗਿਆਨੇਸ਼ਵਰੀ ਨੂੰ ਗੋਦੀ ਚੁੱਕਿਆ। ਉਹ ਰੋਣ ਲੱਗ ਪਈ ਕਿਉਂਕਿ ਉਸਦੇ ਪਿਤਾ ਜਾ ਰਹੇ ਸਨ। ਉਸੇ ਸਮੇਂ, ਮੇਰੀ ਛੋਟੀ ਧੀ ਘਰ ਦੇ ਅੰਦਰ ਉੱਚੀ-ਉੱਚੀ ਰੋ ਰਹੀ ਸੀ। ਮੈਂ ਛੋਟੀ ਧੀ ਨੂੰ ਦੁੱਧ ਪਿਆਉਣ ਲਈ ਅੰਦਰ ਗਈ ਕਿਉਂਕਿ ਵੱਡੀ ਧੀ ਆਮ ਤੌਰ ‘ਤੇ ਖੇਡਦੀ ਰਹਿੰਦੀ ਹੈ ਜਾਂ ਆਪਣੇ ਪਿਤਾ ਨਾਲ ਰਹਿੰਦੀ ਹੈ।”
ਮਾਪਿਆਂ ਨੇ ਬੀਬੀਸੀ ਨੂੰ ਦੱਸਿਆ ਕਿ ਬੱਚੀ ਆਪਣੇ ਪਿਤਾ ਦੇ ਪਿੱਛੇ-ਪਿੱਛੇ ਚੱਲੀ ਗਈ ਅਤੇ ਬਾਗ ਦੇ ਵਿਚਕਾਰੋਂ ਲੰਘਦੇ ਰਸਤੇ ਤੋਂ ਗਾਇਬ ਹੋ ਗਈ।
6 ਜੂਨ ਤੋਂ ਤਲਾਸ਼ਣ ਦੇ ਬਾਵਜੂਦ…
ਗ੍ਰਹਿ ਮੰਤਰੀ ਵੰਗਾਲਪੁਡੀ ਅਨੀਤਾ ਨੇ ਖੋਜ ਮੁਹਿੰਮ ਦੇ ਵੇਰਵੇ ਦਿੰਦੇ ਹੋਏ ਦੱਸਿਆ, “ਬੱਚੀ ਦੇ ਲਾਪਤਾ ਹੋਣ ਦਾ ਸਮਾਂ ਲਗਭਗ 11 ਵਜ ਕੇ 50 ਮਿੰਟ ਸੀ। ਉਸ ਸਮੇਂ ਉਸ ਨੂੰ ਆਖਰੀ ਵਾਰ ਘਰੋਂ ਬਾਹਰ ਨਿਕਲਦੇ ਦੇਖਿਆ ਗਿਆ ਸੀ ਅਤੇ ਉਸ ਤੋਂ ਬਾਅਦ ਉਹ ਵਾਪਸ ਨਹੀਂ ਆਈ। ਐੱਸਡੀਆਰਐੱਫ ਦੀਆਂ ਟੀਮਾਂ ਤਾਇਨਾਤ ਕੀਤੀਆਂ ਗਈਆਂ ਹਨ। ਅਸੀਂ ਜ਼ਿਲ੍ਹੇ ਦੇ ਸਾਰੇ ਖੇਤਰਾਂ ਦੇ ਪੁਲਿਸ ਕਰਮਚਾਰੀਆਂ ਨੂੰ ਖੋਜ ਮੁਹਿੰਮ ਵਿੱਚ ਸ਼ਾਮਲ ਕੀਤਾ ਹੈ।”
“ਅਸੀਂ ਪਹਾੜੀ ਤੋਂ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਅਸੀਂ ਜੰਗਲੀ ਜੀਵ ਸੰਭਾਲ ਮਾਹਿਰਾਂ ਨੂੰ ਵੀ ਸ਼ਾਮਲ ਕੀਤਾ ਹੈ, ਜਿਨ੍ਹਾਂ ਨੂੰ ‘ਹਨੂਮਾਨ ਟੀਮ’ ਕਿਹਾ ਜਾਂਦਾ ਹੈ। ਐੱਸਪੀ ਦਾ ਕਹਿਣਾ ਹੈ ਕਿ ਇਸ ਜੰਗਲ ਵਿੱਚ ਹੇਠਾਂ ਜਾਣ ਦਾ ਕੇਵਲ ਇੱਕ ਹੀ ਰਾਹ ਹੈ।”
‘ਇੱਕ ਵੀ ਸੁਰਾਗ ਨਹੀਂ ਮਿਲ ਸਕਿਆ’
ਗ੍ਰਹਿ ਮੰਤਰੀ ਨੇ ਕਿਹਾ ਕਿ ਕੁੜੀ ਨੂੰ ਲੱਭਣ ਲਈ ਇੱਕ ਵਿਸ਼ਾਲ ਖੋਜ ਮੁਹਿੰਮ ਚਲਾਈ ਜਾ ਰਹੀ ਹੈ।
ਉਨ੍ਹਾਂ ਕਿਹਾ, “ਅਸੀਂ ਵੱਖ-ਵੱਖ ਲੋਕਾਂ ਦੁਆਰਾ ਦਿੱਤੇ ਗਏ ਸੁਝਾਵਾਂ ‘ਤੇ ਵਿਚਾਰ ਕਰ ਰਹੇ ਹਾਂ। ਘਰ-ਘਰ ਜਾ ਕੇ ਤਲਾਸ਼ੀ ਲੈਣ ਨਾਲ ਬਹੁਤ ਸਾਰੇ ਪਿੰਡ ਵਾਸੀਆਂ ਨੂੰ ਪ੍ਰੇਸ਼ਾਨੀ ਹੋਈ ਹੈ ਅਤੇ ਕੁਝ ਨੇ ਸਾਡੀ ਅਤੇ ਵਿਭਾਗ ਦੀ ਆਲੋਚਨਾ ਵੀ ਕੀਤੀ। ਫਿਰ ਵੀ ਅਸੀਂ ਆਲੇ-ਦੁਆਲੇ ਦੇ ਸਾਰੇ ਪਿੰਡਾਂ ਦੀ ਚੰਗੀ ਤਰ੍ਹਾਂ ਤਲਾਸ਼ੀ ਲੈ ਰਹੇ ਹਾਂ।”
ਮੰਤਰੀ ਨੇ ਅੱਗੇ ਕਿਹਾ ਕਿ ਉਹ ਇਹ ਵੀ ਜਾਂਚ ਕਰ ਰਹੇ ਹਨ ਕਿ ਕੀ ਬੱਚੀ ਨੂੰ ਕਿਸੇ ਜੰਗਲੀ ਜਾਨਵਰ ਨੇ ਚੁੱਕ ਲਿਆ ਹੈ ਜਾਂ ਉਸ ਨੂੰ ਅਗਵਾ ਕੀਤਾ ਗਿਆ ਹੈ।
ਆਮ ਤੌਰ ‘ਤੇ ਲਾਪਤਾ ਵਿਅਕਤੀਆਂ ਨਾਲ ਸਬੰਧਤ ਮਾਮਲਿਆਂ ਵਿੱਚ ਕੁਝ ਘੰਟਿਆਂ ਦੇ ਅੰਦਰ-ਅੰਦਰ ਕੋਈ ਨਾ ਕੋਈ ਸੁਰਾਗ ਮਿਲ ਜਾਂਦਾ ਹੈ। ਪਰ ਕਈ ਦਿਨਾਂ ਬਾਅਦ ਵੀ ਕੋਈ ਸਬੂਤ ਨਾ ਮਿਲਣ ਕਾਰਨ ਜਾਂਚ ਅਧਿਕਾਰੀਆਂ ਲਈ ਇੱਕ ਚੁਣੌਤੀ ਖੜ੍ਹੀ ਹੋ ਗਈ ਹੈ।
ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਤੁਨੀ ਕਸਬੇ ਦੇ ਆਲੇ ਦੁਆਲੇ ਦੇ ਇਲਾਕਿਆਂ ਵਿੱਚ ਇਸ ਪੱਧਰ ਦੀ ਤਲਾਸ਼ੀ ਮੁਹਿੰਮ ਪਹਿਲਾਂ ਕਦੇ ਨਹੀਂ ਚਲਾਈ ਗਈ ਅਤੇ ਨਾ ਹੀ ਉਨ੍ਹਾਂ ਨੂੰ ਇਸ ਗੱਲ ਦੀ ਵੀ ਜਾਣਕਾਰੀ ਨਹੀਂ ਹੈ ਕਿ ਬੱਚਿਆਂ ਦੇ ਅਗਵਾ ਹੋਣ ਵਰਗੀ ਕੋਈ ਘਟਨਾ ਇੱਥੇ ਦਰਜ ਕੀਤੀ ਗਈ ਹੈ।
ਵਾੜ ਨਾਲ ਬੰਨ੍ਹੀਆਂ ਗੁੱਡੀਆਂ
ਪੁਲਿਸ ਇਸ ਗੱਲ ਦੀ ਵੀ ਜਾਂਚ ਕਰ ਰਹੀ ਹੈ ਕਿ ਕੀ ਕੋਈ ਜਾਨਵਰ ਬੱਚੀ ਨੂੰ ਚੁੱਕ ਕੇ ਲੈ ਗਿਆ ਸੀ ਕਿਉਂਕਿ ਇਹ ਜੰਗਲ ਦਾ ਇਲਾਕਾ ਹੈ ਅਤੇ ਘਟਨਾ ਪਾਮ ਤੇਲ ਦੇ ਬਾਗ ਵਿੱਚ ਵਾਪਰੀ ਹੈ। ਪੁਲਿਸ ਨੇ ਇਹ ਪਤਾ ਲਗਾਉਣ ਲਈ ਕੁਝ ਖਿਡੌਣੇ ਲਗਾਏ ਹਨ। ਉਨ੍ਹਾਂ ਨੇ ਇਨ੍ਹਾਂ ਖਿਡੌਣਿਆਂ ਨੂੰ ਬਾਗ ਦੀ ਵਾੜ ਨਾਲ ਬੰਨ੍ਹ ਦਿੱਤਾ ਹੈ।
ਹਾਲਾਂਕਿ, ਵਾੜ ਨਾਲ ਲਟਕਦੀਆਂ ਇਨ੍ਹਾਂ ਗੁੱਡੀਆਂ ਦੀ ਮੌਜੂਦਗੀ ਨੇ ਸੋਸ਼ਲ ਮੀਡੀਆ ‘ਤੇ ਕਾਫ਼ੀ ਅਟਕਲਾਂ ਪੈਦਾ ਕਰ ਦਿੱਤੀਆਂ ਹਨ।
ਗਿਆਨੇਸ਼ਵਰੀ ਦੀ ਮਾਂ ਸੁਨਕਾਰਾ ਭਵਾਨੀ ਨੇ ਕਿਹਾ ਕਿ ਪੁਲਿਸ ਨੇ ਉਸ ਨੂੰ ਦੱਸਿਆ ਕਿ ਜਾਨਵਰਾਂ ਦੇ ਸੰਭਾਵੀ ਆਉਣ ਦੀ ਜਾਂਚ ਕਰਨ ਲਈ ਇਹ ਖਿਡੌਣੇ ਉੱਥੇ ਲਗਾਏ ਗਏ ਹਨ।
ਪੁਲਿਸ ਪਹਿਲਾਂ ਹੀ ਆਲੇ ਦੁਆਲੇ ਦੇ ਇਲਾਕਿਆਂ ਤੋਂ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰ ਰਹੀ ਹੈ, ਸ਼ੱਕੀ ਵਿਅਕਤੀਆਂ ਅਤੇ ਵਾਹਨਾਂ ਦੀਆਂ ਗਤੀਵਿਧੀਆਂ ‘ਤੇ ਵਿਸ਼ੇਸ਼ ਧਿਆਨ ਦੇ ਰਹੀ ਹੈ।
ਮੋਬਾਈਲ ਡੇਟਾ, ਕਾਲ ਰਿਕਾਰਡ ਅਤੇ ਸਥਾਨਕ ਜਾਣਕਾਰੀ ਦਾ ਵੀ ਵਿਸ਼ਲੇਸ਼ਣ ਕੀਤਾ ਜਾ ਰਿਹਾ ਹੈ।
ਚਿੰਨਾ ਰਾਓ ਨਾਮ ਦੇ ਇੱਕ ਸਥਾਨਕ ਨਿਵਾਸੀ ਨੇ ਕਿਹਾ, “ਇੱਥੇ ਸਿਰਫ਼ ਸਥਾਨਕ ਲੋਕ ਰਹਿੰਦੇ ਹਨ। ਜ਼ਿਆਦਾਤਰ ਲੋਕ 10 ਕਿਲੋਮੀਟਰ ਦੇ ਘੇਰੇ ਤੋਂ ਆਉਂਦੇ ਹਨ। ਇਸ ਪਾਸੇ ਦੇ ਪਿੰਡਾਂ ਤੋਂ ਲਗਭਗ ਦਸ ਲੋਕ ਆਉਂਦੇ ਹਨ ਅਤੇ ਦੂਜੇ ਪਾਸੇ ਤੋਂ ਦਸ ਹੋਰ। ਇਸ ਖੇਤਰ ਤੋਂ ਬਾਹਰ ਕੋਈ ਵੀ ਇੱਥੇ ਨਹੀਂ ਆਉਂਦਾ।”
ਕੁੱਤੇ ਦੀ ਮੌਤ ਨਾਲ ਰਹੱਸ ਡੂੰਘਾ ਹੋਇਆ
ਇਸ ਮਾਮਲੇ ਵਿੱਚ ਬੱਚੇ ਦੇ ਨਾਲ ਵਾਪਸ ਆਏ ਪਾਲਤੂ ਕੁੱਤੇ ਦੀ ਮੌਤ ਇੱਕ ਹੋਰ ਰਹੱਸ ਬਣ ਗਈ ਹੈ।
ਗਿਆਨੇਸ਼ਵਰੀ ਦੀ ਮਾਂ ਨੇ ਕਿਹਾ, “ਕੁੱਤੇ ਦੀ ਅਚਾਨਕ ਮੌਤ ਨੇ ਮੇਰੀਆਂ ਚਿੰਤਾਵਾਂ ਨੂੰ ਹੋਰ ਵਧਾ ਦਿੱਤਾ ਹੈ ਕਿ ਕੀ ਬੱਚੀ ਵਾਪਸ ਆਵੇਗੀ ਵੀ ਜਾਂ ਨਹੀਂ ਅਤੇ ਇਹ ਕਿ ਉਹ ਕਿੱਥੇ ਹੈ ਅਤੇ ਕਿਵੇਂ ਹੈ।”
ਉਨ੍ਹਾਂ ਨੇ ਕਿਹਾ, “ਮੈਨੂੰ ਕਿਸੇ ‘ਤੇ ਸ਼ੱਕ ਨਹੀਂ ਹੈ।”
ਉਹ ਇਹ ਵੀ ਕਹਿੰਦੇ ਹਨ ਕਿ ਉਹ ਆਸਪਾਸ ਕਿਸੇ ਨੂੰ ਨਹੀਂ ਜਾਣਦੀ ਸੀ ਅਤੇ ਉਸ ਦਿਨ ਕੀ ਹੋਇਆ ਹੋਵੇਗਾ, ਉਸਦੀ ਉਹ ਕਲਪਨਾ ਵੀ ਨਹੀਂ ਕਰ ਸਕਦੀ ਸੀ।
ਗ੍ਰਹਿ ਮੰਤਰੀ ਅਨੀਤਾ ਅਨੀ ਨੇ ਕਿਹਾ, “ਛੇ ਮਹੀਨਿਆਂ ਤੋਂ ਜਿਸ ਪਾਲਤੂ ਕੁੱਤੇ ਨੂੰ ਉਹ ਪਾਲ ਰਹੇ ਸਨ, ਘਰ ਵਾਪਸ ਆਉਣ ਤੋਂ ਬਾਅਦ ਉਸਦਾ ਵਿਵਹਾਰ ਅਸਾਧਾਰਨ ਹੋ ਗਿਆ। ਬਾਅਦ ਵਿੱਚ ਉਸਦੀ ਮੌਤ ਹੋ ਗਈ। ਅਸੀਂ ਕੁੱਤੇ ਦੀ ਮੌਤ ਦੇ ਕਾਰਨ ਦਾ ਪਤਾ ਲਗਾਉਣ ਲਈ ਪੋਸਟਮਾਰਟਮ ਰਿਪੋਰਟ ਦੀ ਉਡੀਕ ਕਰ ਰਹੇ ਹਾਂ। ਅਸੀਂ ਲਾਸ਼ ਨੂੰ ਫੋਰੈਂਸਿਕ ਜਾਂਚ ਲਈ ਵੀ ਭੇਜ ਦਿੱਤਾ ਹੈ। ਜਦੋਂ ਡਾਕਟਰਾਂ ਤੋਂ ਪੁੱਛਿਆ ਗਿਆ ਕਿ ਕੀ ਇਸਨੂੰ ਸੱਪ ਨੇ ਡੰਗਿਆ ਸੀ, ਤਾਂ ਮੁੱਢਲੀ ਰਿਪੋਰਟ ਤੋਂ ਬਾਅਦ ਉਨ੍ਹਾਂ ਕਿਹਾ ਕਿ ਅਜਿਹਾ ਕੁਝ ਨਹੀਂ ਹੈ।”
ਤਕਨੀਕੀ ਸਬੂਤਾਂ ਦਾ ਵਿਸ਼ਲੇਸ਼ਣ
ਹਾਲਾਂਕਿ, ਇਨ੍ਹਾਂ ਸਾਰੀਆਂ ਕੋਸ਼ਿਸ਼ਾਂ ਦੇ ਬਾਵਜੂਦ, ਗਿਆਨੇਸ਼ਵਰੀ ਦਾ ਅਜੇ ਤੱਕ ਪਤਾ ਨਾ ਲੱਗਣਾ ਇਸ ਮਾਮਲੇ ਨੂੰ ਹੋਰ ਵੀ ਰਹੱਸਮਈ ਬਣਾਉਂਦਾ ਹੈ।
ਜਿਵੇਂ-ਜਿਵੇਂ ਦਿਨ ਬੀਤਦੇ ਜਾ ਰਹੇ ਹਨ, ਗਿਆਨੇਸ਼ਵਰੀ ਦੀ ਸਿਹਤ ਪ੍ਰਤੀ ਪਰਿਵਾਰ ਦੀ ਚਿੰਤਾ ਵਧਦੀ ਜਾ ਰਹੀ ਹੈ।
ਸੈਂਕੜੇ ਜਵਾਨ, ਡਰੋਨ, ਖੋਜ ਦਸਤੇ, ਐੱਸਡੀਆਰਐੱਫ ਅਤੇ ਐੱਨਡੀਆਰਐੱਫ ਟੀਮਾਂ, ਤਕਨੀਕੀ ਜਾਂਚ, ਪੁਲਿਸ ਨੇ ਲਗਭਗ ਹਰ ਉਪਲਬਧ ਸਰੋਤ ਦੀ ਵਰਤੋਂ ਕੀਤੀ ਹੈ। ਫਿਰ ਵੀ, ਗਿਆਨੇਸ਼ਵਰੀ ਦਾ ਕੁਝ ਪਤਾ ਨਹੀਂ ਲੱਗ ਸਕਿਆ।
ਪੇਡਾਪੁਰਮ ਦੇ ਡੀਐਸਪੀ ਏਬੀਜੀ ਤਿਲਕ ਨੇ ਬੀਬੀਸੀ ਨੂੰ ਦੱਸਿਆ ਕਿ ਪੁਲਿਸ ਲਈ ਅੱਗੇ ਵਧਣ ਦਾ ਮੁੱਖ ਤਰੀਕਾ ਭਾਲ ਵਾਲੇ ਖੇਤਰ ਦਾ ਹੋਰ ਵਿਸਤਾਰ ਕਰਨਾ ਅਤੇ ਤਕਨੀਕੀ ਸਬੂਤਾਂ ਦਾ ਵਧੇਰੇ ਡੂੰਘਾਈ ਨਾਲ ਵਿਸ਼ਲੇਸ਼ਣ ਕਰਨਾ ਹੈ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
source : BBC PUNJABI
