Source :- BBC PUNJABI
ਤਸਵੀਰ ਸਰੋਤ, Getty Images
ਪ੍ਰਕਾਸ਼ਿਤ
ਪੜ੍ਹਨ ਦਾ ਸਮਾਂ: 7 ਮਿੰਟ
ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ 18ਵੇਂ ਬ੍ਰਿਕਸ ਸੰਮੇਲਨ ਵਿੱਚ ਸ਼ਾਮਲ ਹੋਣ ਲਈ ਭਾਰਤ ਆ ਰਹੇ ਹਨ।
12 ਤੋਂ 13 ਸਤੰਬਰ ਨੂੰ ਨਵੀਂ ਦਿੱਲੀ ਦੇ ਭਾਰਤ ਮੰਡਪਮ ਵਿੱਚ ਹੋਣ ਜਾ ਰਹੇ ਇਸ ਸੰਮੇਲਨ ਤੋਂ ਪਹਿਲਾਂ ਹੀ ਉਹ ਭਾਰਤ ਪਹੁੰਚ ਰਹੇ ਹਨ। ਪੁਤਿਨ ਬੀਤੇ ਸਾਲ ਦਸੰਬਰ ਵਿੱਚ ਪੂਰੇ ਚਾਰ ਸਾਲ ਬਾਅਦ ਦੁਵੱਲੇ ਸੰਮੇਲਨ ਲਈ ਭਾਰਤ ਆਏ ਸਨ।
ਕ੍ਰੈਮਲਿਨ ਦੇ ਬੁਲਾਰੇ ਦਿਮਿਤਰੀ ਪੇਸਕੋਵ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਇਸ ਯਾਤਰਾ ਦੌਰਾਨ ਰੂਸੀ ਰਾਸ਼ਟਰਪਤੀ ਅਤੇ ਭਾਰਤ ਦੇ ਪ੍ਰਧਾਨ ਮੰਤਰੀ ਵਿਚਕਾਰ ਇੱਕ ਹੋਰ ਦੁਵੱਲੀ ਬੈਠਕ ਦੀ ਉਮੀਦ ਹੈ ਅਤੇ ਇਹ ਬੈਠਕ ਸ਼ੁੱਕਰਵਾਰ (11 ਸਤੰਬਰ) ਨੂੰ ਹੋਣੀ ਹੈ।
ਪੇਸਕੋਵ ਨੇ ਦੱਸਿਆ ਕਿ ਹਮੇਸ਼ਾ ਵਾਂਗ, ਦੋਵੇਂ ਦੇਸ਼ ਦੁਵੱਲੇ ਏਜੰਡੇ ‘ਤੇ ਚਰਚਾ ਕਰਨਗੇ।
ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਕਿਹਾ, “ਕਈ ਮੁੱਦਿਆਂ ‘ਤੇ ਜਨਤਕ ਤੌਰ ‘ਤੇ ਚਰਚਾ ਨਹੀਂ ਕੀਤੀ ਜਾ ਸਕਦੀ, ਕਿਉਂਕਿ ਕੁਝ ਅਜਿਹੇ ਦੇਸ਼ ਹਨ ਜੋ ਸਾਡੇ ਸਹਿਯੋਗ ਨੂੰ ਹੋਰ ਅੱਗੇ ਵਧਾਉਣ ਵਿੱਚ ਰੁਕਾਵਟ ਪਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਸ ਲਈ, ਇਨ੍ਹਾਂ ‘ਤੇ ਗੁਪਤ ਤਰੀਕੇ ਨਾਲ, ਪਰ ਬਹੁਤ ਹੀ ਰਚਨਾਤਮਕ ਢੰਗ ਨਾਲ ਚਰਚਾ ਕੀਤੀ ਜਾ ਰਹੀ ਹੈ।”
ਹਾਲਾਂਕਿ ਇਨ੍ਹਾਂ ਸਭ ਦੇ ਵਿਚਕਾਰ ਰਾਸ਼ਟਰਪਤੀ ਪੁਤਿਨ ਦੀ ਸੁਰੱਖਿਆ ਦੀ ਹਮੇਸ਼ਾ ਚਰਚਾ ਰਹਿੰਦੀ ਹੈ। ਹੁਣ ਜਾਣਦੇ ਹਾਂ ਕਿ ਪੁਤਿਨ ਕਿਵੇਂ ਇੱਕ ਸਖ਼ਤ ਸੁਰੱਖਿਆ ਘੇਰੇ ਵਿੱਚ ਰਹਿੰਦੇ ਹਨ।
ਪੁਤਿਨ ਦੇ ਹਰ ਕਦਮ ‘ਤੇ ਸੈਂਕੜੇ ਬਾਡੀਗਾਰਡ
ਤਸਵੀਰ ਸਰੋਤ, Getty Images
ਵਲਾਦੀਮੀਰ ਪੁਤਿਨ ਸਾਲ 2000 ਤੋਂ ਸੱਤਾ ਵਿੱਚ ਹਨ। ਸੋਵੀਅਤ ਤਾਨਾਸ਼ਾਹ ਜੋਸੇਫ਼ ਸਟਾਲਿਨ ਤੋਂ ਬਾਅਦ ਕ੍ਰੈਮਲਿਨ ਦੇ ਕਿਸੇ ਵੀ ਨੇਤਾ ਦੇ ਮੁਕਾਬਲੇ ਉਨ੍ਹਾਂ ਦਾ ਕਾਰਜਕਾਲ ਸਭ ਤੋਂ ਲੰਬਾ ਰਿਹਾ ਹੈ।
ਤਕਰੀਬਨ 73 ਸਾਲ ਦੀ ਉਮਰ ਵਿੱਚ ਉਹ ਰਾਸ਼ਟਰਪਤੀ ਵਜੋਂ ਆਪਣੇ ਪੰਜਵੇਂ ਕਾਰਜਕਾਲ ਵਿੱਚ ਹਨ। ਉਨ੍ਹਾਂ ਦੇ ਸ਼ਾਸਨ ਦਾ ਵਿਰੋਧ ਕਰਨ ਵਾਲੀ ਕੋਈ ਵੀ ਤਾਕਤ ਹੁਣ ਨਹੀਂ ਬਚੀ ਹੈ ਅਤੇ ਜੇ ਉਹ ਚਾਹੁਣ, ਤਾਂ 2036 ਤੱਕ ਸੱਤਾ ਵਿੱਚ ਬਣੇ ਰਹਿਣ ਤੋਂ ਉਨ੍ਹਾਂ ਨੂੰ ਸ਼ਾਇਦ ਹੀ ਕੋਈ ਰੋਕ ਸਕੇਗਾ।
ਪੁਤਿਨ ਦੀ ਸੁਰੱਖਿਆ ਦੀ ਗੱਲ ਕਰੀਏ ਤਾਂ ਉਨ੍ਹਾਂ ਦੇ ਹਰ ਕਦਮ ‘ਤੇ ਸੈਂਕੜੇ ਬਾਡੀਗਾਰਡ ਬਾਰੀਕੀ ਨਾਲ ਨਜ਼ਰ ਰੱਖਦੇ ਹਨ, ਜੋ 24 ਘੰਟੇ ਉਨ੍ਹਾਂ ਦੇ ਨਾਲ ਰਹਿੰਦੇ ਹਨ।
ਕੇਜੀਬੀ ਦੇ ਸਾਬਕਾ ਅਧਿਕਾਰੀ ਪੁਤਿਨ ਦੇ ਆਲੇ-ਦੁਆਲੇ ਮੌਜੂਦ ਖ਼ਤਰਿਆਂ ਬਾਰੇ ਚੰਗੀ ਤਰ੍ਹਾਂ ਜਾਣਦੇ ਹਨ।
ਕੌਣ ਕਰਦਾ ਹੈ ਪੁਤਿਨ ਦੀ ਰੱਖਿਆ
ਤਸਵੀਰ ਸਰੋਤ, Getty Images
ਰੂਸ ਦੀਆਂ ਕਈ ਸੁਰੱਖਿਆ ਸੇਵਾਵਾਂ ਵਿੱਚੋਂ ਇੱਕ ਖ਼ਾਸ ਤੌਰ ‘ਤੇ ਰਾਸ਼ਟਰਪਤੀ ਅਤੇ ਉਨ੍ਹਾਂ ਦੇ ਪਰਿਵਾਰ ਦੀ ਸੁਰੱਖਿਆ ਲਈ ਸਮਰਪਿਤ ਹੈ। ਇਸ ਨੂੰ ‘ਰੂਸੀ ਰਾਸ਼ਟਰਪਤੀ ਸੁਰੱਖਿਆ ਸੇਵਾ’ ਜਾਂ ਐੱਸਬੀਪੀ ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ।
ਇਹ ਰੂਸ ਦੀ ਸੰਘੀ ਸੁਰੱਖਿਆ ਸੇਵਾ (ਐੱਫ਼ਐੱਸਓ) ਨੂੰ ਰਿਪੋਰਟ ਕਰਦੀ ਹੈ, ਜਿਸ ਦਾ ਗਠਨ ਰੂਸ ਦੀ ਖ਼ੁਫ਼ੀਆ ਏਜੰਸੀ ਕੇਜੀਬੀ ਤੋਂ ਹੋਇਆ ਹੈ। ਕਾਲੇ ਸੂਟ ਪਹਿਨੇ, ਕੰਨਾਂ ਵਿੱਚ ਇਅਰਫ਼ੋਨ ਲਗਾਏ ਐੱਸਬੀਪੀ ਦੇ ਗਾਰਡ ਪਰਛਾਵੇਂ ਵਾਂਗ ਦਿਨ-ਰਾਤ ਪੁਤਿਨ ਦੇ ਨਾਲ ਰਹਿੰਦੇ ਹਨ।
ਰੂਸ ਦੀ ਸਰਕਾਰੀ ਮਾਲਕੀਅਤ ਵਾਲੀ ਮੀਡੀਆ ਰਸ਼ੀਆ ਬਿਯੌਂਡ ਮੁਤਾਬਕ, “ਜਦੋਂ ਇਹ ਏਜੰਟ ਵਿਦੇਸ਼ ਵਿੱਚ ਗਤੀਵਿਧੀਆਂ ਦੌਰਾਨ ਪੁਤਿਨ ਦੇ ਨਾਲ ਜਾਂਦੇ ਹਨ, ਤਾਂ ਉਹ ਖ਼ੁਦ ਨੂੰ ਚਾਰ ਘੇਰਿਆਂ ਵਿੱਚ ਵੰਡ ਲੈਂਦੇ ਹਨ।”
“ਉਨ੍ਹਾਂ ਦਾ ਪਹਿਲਾ ਅਤੇ ਸਭ ਤੋਂ ਨੇੜਲਾ ਘੇਰਾ ਉਨ੍ਹਾਂ ਦੇ ਆਪਣੇ ਨਿੱਜੀ ਗਾਰਡਾਂ ਦਾ ਹੁੰਦਾ ਹੈ।
“ਦੂਜਾ ਘੇਰਾ ਉਨ੍ਹਾਂ ਗਾਰਡਾਂ ਤੋਂ ਬਣਾਇਆ ਜਾਂਦਾ ਹੈ, ਜਿਨ੍ਹਾਂ ‘ਤੇ ਜਨਤਾ ਦਾ ਧਿਆਨ ਨਹੀਂ ਜਾਂਦਾ।”
“ਤੀਜਾ ਘੇਰਾ ਲੋਕਾਂ ਦੇ ਇਕੱਠਾ ਨੂੰ ਘੇਰਦਾ ਹੈ ਅਤੇ ਇਸ ਵਿੱਚ ਸ਼ੱਕੀ ਲੋਕਾਂ ਨੂੰ ਆਉਣ ਤੋਂ ਰੋਕਿਆ ਜਾਂਦਾ ਹੈ।”
“ਅਤੇ ਚੌਥਾ ਅਤੇ ਸਭ ਤੋਂ ਆਖ਼ਰੀ ਘੇਰਾ, ਆਲੇ-ਦੁਆਲੇ ਦੀਆਂ ਇਮਾਰਤਾਂ ਦੀਆਂ ਛੱਤਾਂ ‘ਤੇ ਮੌਜੂਦ ਸਨਾਈਪਰਾਂ ਦਾ ਹੁੰਦਾ ਹੈ।”
ਮਾਰਕ ਗੈਲਿਤੋ ਰੂਸੀ ਸੁਰੱਖਿਆ ਦੇ ਮਾਹਰ ਅਤੇ ਦੇਸ਼ ਵਿੱਚ ਸੁਰੱਖਿਆ ਮੁੱਦਿਆਂ ਦਾ ਵਿਸ਼ਲੇਸ਼ਣ ਕਰਨ ਵਾਲੀ ਕੰਸਲਟਿੰਗ ਫ਼ਰਮ, ਮਾਯਾਕ ਇੰਟੈਲੀਜੈਂਸ ਦੇ ਨਿਰਦੇਸ਼ਕ ਹਨ।
ਉਨ੍ਹਾਂ ਨੇ ਬੀਬੀਸੀ ਮੁੰਡੋ ਸਰਵਿਸ ਨਾਲ ਗੱਲ ਕਰਦਿਆਂ ਕਿਹਾ ਸੀ, “ਪੁਤਿਨ ਨੂੰ ਹੈਲੀਕਾਪਟਰ ਪਸੰਦ ਨਹੀਂ ਹੈ, ਉਹ ਆਮ ਤੌਰ ‘ਤੇ ਮੋਟਰਸਾਈਕਲ ਸਵਾਰਾਂ, ਕਈ ਵੱਡੀਆਂ ਕਾਲੀਆਂ ਕਾਰਾਂ ਆਦਿ ਦੇ ਨਾਲ ਇੱਕ ਵੱਡੇ ਕਾਫ਼ਲੇ ਵਿੱਚ ਯਾਤਰਾ ਕਰਦੇ ਹਨ। ਇਸ ਲਈ ਕਈ ਵਾਰ ਹਵਾਈ ਖੇਤਰ ਵਿੱਚ ਕੋਈ ਵੀ ਡਰੋਨ ਉਡਾਉਣ ‘ਤੇ ਪਾਬੰਦੀਆਂ ਲਗਾ ਦਿੱਤੀਆਂ ਜਾਂਦੀਆਂ ਹਨ। ਆਵਾਜਾਈ ਰੋਕ ਦਿੱਤੀ ਜਾਂਦੀ ਹੈ।”
ਰਾਸ਼ਟਰਪਤੀ ਦੀ ‘ਨਿੱਜੀ ਫ਼ੌਜ’
ਤਸਵੀਰ ਸਰੋਤ, Getty Images
‘ਰੂਸੀ ਰਾਸ਼ਟਰਪਤੀ ਸੁਰੱਖਿਆ ਸੇਵਾ’ ਜਾਂ ਐੱਸਬੀਪੀ ਨੂੰ ‘ਰੂਸੀ ਨੈਸ਼ਨਲ ਗਾਰਡ’ ਜਾਂ ਰੋਸਗਵਾਰਦੀਆ ਦਾ ਸਮਰਥਨ ਪ੍ਰਾਪਤ ਹੈ। ਕੁਝ ਲੋਕ ਇਸ ਨੂੰ ਰਾਸ਼ਟਰਪਤੀ ਦੀ “ਵਿਅਕਤੀਗਤ ਫ਼ੌਜ” ਦੱਸਦੇ ਹਨ।
ਇਹ ਰੂਸੀ ਹਥਿਆਰਬੰਦ ਬਲਾਂ ਤੋਂ ਵੱਖਰੀ ਹੈ, ਹਾਲਾਂਕਿ ਇਸ ਦਾ ਅਧਿਕਾਰਤ ਮਿਸ਼ਨ ਰੂਸੀ ਸਰਹੱਦਾਂ ਦੀ ਸੁਰੱਖਿਆ ਕਰਨਾ, ਅੱਤਵਾਦ ਨਾਲ ਲੜਨਾ ਅਤੇ ਜਨਤਕ ਕਾਨੂੰਨ-ਵਿਵਸਥਾ ਦੀ ਰੱਖਿਆ ਕਰਨਾ ਹੈ।
ਵਿਹਾਰਕ ਤੌਰ ‘ਤੇ ਇਸ ਦਾ ਸਭ ਤੋਂ ਮਹੱਤਵਪੂਰਨ ਕੰਮ ਖ਼ਤਰਿਆਂ ਤੋਂ ਪੁਤਿਨ ਦੀ ਰੱਖਿਆ ਕਰਨਾ ਹੈ।
ਬ੍ਰਿਟੇਨ ਦੀ ਬਾਥ ਯੂਨੀਵਰਸਿਟੀ ਵਿੱਚ ਰੂਸ ਦੇ ਅਕਾਦਮਿਕ ਮਾਹਰ ਸਟੀਫ਼ਨ ਹਾਲ ਨੇ ਬੀਬੀਸੀ ਮੁੰਡੋ ਨੂੰ ਦੱਸਿਆ, “ਹਰ ਕੋਈ ਜਾਣਦਾ ਹੈ ਕਿ ਰੂਸੀ ਨੈਸ਼ਨਲ ਗਾਰਡ ਕਾਫ਼ੀ ਹੱਦ ਤੱਕ ਪੁਤਿਨ ਦੇ ਨਿੱਜੀ ਗਾਰਡ ਹਨ।”
“ਅਤੇ ਰਾਸ਼ਟਰਪਤੀ ਆਪਣੀਆਂ ਬਾਕੀ ਸੁਰੱਖਿਆ ਸੇਵਾਵਾਂ ਦੇ ਘੇਰੇ ਵਿੱਚ ਬਹੁਤ ਸੁਰੱਖਿਅਤ ਹਨ।”
ਮੌਜੂਦਾ ਸਮੇਂ ਵਿੱਚ ਨੈਸ਼ਨਲ ਗਾਰਡ ਦੀ ਅਗਵਾਈ ਪੁਤਿਨ ਦੇ ਸਾਬਕਾ ਬਾਡੀਗਾਰਡ ਵਿਕਟਰ ਜ਼ੋਲੋਤੋਵ ਕਰ ਰਹੇ ਹਨ। ਉਹ ਰਾਸ਼ਟਰਪਤੀ ਦੇ ਵਫ਼ਾਦਾਰ ਸਹਿਯੋਗੀ ਮੰਨੇ ਜਾਂਦੇ ਹਨ।
ਹਾਲ ਹੀ ਦੇ ਸਾਲਾਂ ਵਿੱਚ ਇਸ ਸੁਰੱਖਿਆ ਬਲ ਵਿੱਚ ਸੈਨਿਕਾਂ ਦੀ ਗਿਣਤੀ ਵਿੱਚ ਲਗਭਗ ਚਾਰ ਲੱਖ ਦਾ ਵਾਧਾ ਕੀਤਾ ਗਿਆ ਹੈ।
ਹਾਲ ਕਹਿੰਦੇ ਹਨ, “ਇਹ ਇੱਕ ਵੱਡੀ ਗਿਣਤੀ ਹੈ, ਅਮਰੀਕਾ ਦੇ ਰਾਸ਼ਟਰਪਤੀ ਦੀ ਸੁਰੱਖਿਆ ਇਕਾਈ ਵਿੱਚ ਗਾਰਡਾਂ ਦੀ ਗਿਣਤੀ ਇਨ੍ਹਾਂ ਅੰਕੜਿਆਂ ਦੇ ਆਸ-ਪਾਸ ਵੀ ਨਹੀਂ ਹੈ।”
ਪੁਤਿਨ ਦੀ ਸੁਰੱਖਿਆ ਕਿਸ ਤਰ੍ਹਾਂ ਕਰਦੇ ਹਨ?
ਤਸਵੀਰ ਸਰੋਤ, Getty Images
ਇਹ ਜਾਣਨਾ ਮੁਸ਼ਕਲ ਹੈ ਕਿ ਪੁਤਿਨ ਦੀ ਰੱਖਿਆ ਲਈ ਕਿਹੜੇ-ਕਿਹੜੇ ਉਪਾਅ ਕਿਸ ਹੱਦ ਤੱਕ ਵਰਤੇ ਜਾਂਦੇ ਹਨ, ਪਰ ਕ੍ਰੈਮਲਿਨ ਅਤੇ ਰੂਸੀ ਸੁਰੱਖਿਆ ਮਾਹਰਾਂ ਨੇ ਇਸ ਮਾਮਲੇ ‘ਤੇ ਕੁਝ ਰੌਸ਼ਨੀ ਪਾਈ ਹੈ।
ਜਿਸ ਚੀਜ਼ ਨੂੰ ਲੈ ਕੇ ਪੁਤਿਨ ਦਾ ਸੁਰੱਖਿਆ ਘੇਰਾ ਸਭ ਤੋਂ ਜ਼ਿਆਦਾ ਸਖ਼ਤ ਹੈ, ਉਹ ਹੈ ਉਨ੍ਹਾਂ ਦਾ ਖਾਣਾ।
ਮਾਰਕ ਗੈਲੋਤੀ ਮੁਤਾਬਕ, ਜ਼ਹਿਰ ਦੇ ਡਰ ਕਾਰਨ ਪੁਤਿਨ ਕੋਲ ਇੱਕ ਨਿੱਜੀ ਟੇਸਟਰ ਹੈ, ਜੋ ਰਾਸ਼ਟਰਪਤੀ ਕੋਲ ਆਉਣ ਵਾਲੀ ਖਾਣ-ਪੀਣ ਦੀ ਹਰ ਚੀਜ਼ ਦੀ ਜਾਂਚ ਕਰਦਾ ਹੈ।
ਉਨ੍ਹਾਂ ਨੇ ਬੀਬੀਸੀ ਮੁੰਡੋ ਨੂੰ ਦੱਸਿਆ ਸੀ, “ਇਹ ਇੱਕ ਅਜਿਹੀ ਸ਼ੈਲੀ ਦਾ ਹਿੱਸਾ ਹੈ, ਜੋ ਇੱਕ ਆਧੁਨਿਕ ਰਾਸ਼ਟਰਪਤੀ ਦੀ ਬਜਾਏ ਮੱਧਯੁਗੀ ਸਮਰਾਟ ਵਰਗੀ ਹੈ।”
ਇਸ ਦੇ ਨਾਲ ਹੀ, ਜਦੋਂ ਉਹ ਰੂਸ ਤੋਂ ਬਾਹਰ ਯਾਤਰਾ ਕਰਦੇ ਹਨ ਤਾਂ ਰਾਸ਼ਟਰਪਤੀ ਦੀ ਟੀਮ ਉਨ੍ਹਾਂ ਵੱਲੋਂ ਵਰਤੀ ਜਾਣ ਵਾਲੀ ਹਰ ਚੀਜ਼ ਦੀ ਜਾਂਚ ਕਰਦੀ ਹੈ।
ਗੈਲੋਤੀ ਦੱਸਦੇ ਹਨ, “ਉਹ ਖਾਣ-ਪੀਣ ਦੀਆਂ ਉਹ ਸਾਰੀਆਂ ਚੀਜ਼ਾਂ ਲੈ ਕੇ ਜਾਂਦੇ ਹਨ, ਜੋ ਪੁਤਿਨ ਨੇ ਖਾਣੀਆਂ ਹੁੰਦੀਆਂ ਹਨ। ਉਦਾਹਰਨ ਲਈ, ਜੇ ਕੋਈ ਅਧਿਕਾਰਤ ਸ਼ੈਂਪੇਨ ਟੋਸਟ ਹੈ ਤਾਂ ਪੁਤਿਨ ਉਸ ਬੋਤਲ ਤੋਂ ਸ਼ੈਂਪੇਨ ਲੈਂਦੇ ਹਨ, ਜੋ ਉਨ੍ਹਾਂ ਦੀ ਟੀਮ ਉਨ੍ਹਾਂ ਲਈ ਲੈ ਕੇ ਆਉਂਦੀ ਹੈ। ਬਾਕੀ ਬੋਤਲਾਂ ਤੋਂ ਨਹੀਂ।”
ਸਮਾਰਟਫ਼ੋਨ ਦੀ ਵਰਤੋਂ ਨਹੀਂ
ਤਸਵੀਰ ਸਰੋਤ, Getty Images
ਇੱਕ ਹੋਰ ਉਪਾਅ ਜਿਸ ਨੂੰ ਪੁਤਿਨ ਦੀ ਸੁਰੱਖਿਆ ਲਈ ਅਹਿਮ ਮੰਨਿਆ ਜਾਂਦਾ ਹੈ, ਉਹ ਹੈ ਕ੍ਰੈਮਲਿਨ ਦੇ ਅੰਦਰ ਸਮਾਰਟਫ਼ੋਨ ਨੂੰ ਬਲਾਕ ਕਰਨਾ।
ਰੂਸੀ ਰਾਸ਼ਟਰਪਤੀ ਨੇ ਖ਼ੁਦ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ ਕਿ ਉਹ ਇਨ੍ਹਾਂ ਉਪਕਰਨਾਂ ਦੀ ਵਰਤੋਂ ਨਹੀਂ ਕਰਦੇ।
2020 ਵਿੱਚ, ਰੂਸੀ ਸਮਾਚਾਰ ਏਜੰਸੀ ਤਾਸ ਨਾਲ ਇੱਕ ਇੰਟਰਵਿਊ ਵਿੱਚ ਉਨ੍ਹਾਂ ਨੇ ਇਸ ਗੱਲ ਨੂੰ ਸਵੀਕਾਰ ਕੀਤਾ। ਇਹ ਵੀ ਦੱਸਿਆ ਕਿ ਜੇ ਉਹ ਕਿਸੇ ਨਾਲ ਸੰਪਰਕ ਕਰਨਾ ਚਾਹੁੰਦੇ ਹਨ ਤਾਂ ਅਜਿਹਾ ਕਰਨ ਲਈ ਇੱਕ ਅਧਿਕਾਰਤ ਲਾਈਨ ਹੁੰਦੀ ਹੈ।
ਉਨ੍ਹਾਂ ਦੇ ਸਲਾਹਕਾਰਾਂ ਨੇ ਵੀ ਇਹ ਮੰਨਿਆ ਹੈ। ਕ੍ਰੈਮਲਿਨ ਦੇ ਬੁਲਾਰੇ ਦਮਿਤਰੀ ਪੇਸਕੋਵ ਨੇ ਵਾਰ-ਵਾਰ ਕਿਹਾ ਹੈ ਕਿ ਪੁਤਿਨ ਮੋਬਾਈਲ ਫ਼ੋਨ ਦੀ ਵਰਤੋਂ ਨਹੀਂ ਕਰਦੇ ਕਿਉਂਕਿ ਉਨ੍ਹਾਂ ਕੋਲ “ਸਮਾਂ ਨਹੀਂ ਹੁੰਦਾ।”
ਪਰ ਸੱਚਾਈ ਇਹ ਹੈ ਕਿ ਪੁਤਿਨ ਅਜਿਹਾ ਇਸ ਲਈ ਨਹੀਂ ਕਰਦੇ ਕਿਉਂਕਿ ਉਨ੍ਹਾਂ ਨੂੰ ਇੰਟਰਨੈੱਟ ‘ਤੇ ਰੱਤੀ ਭਰ ਵੀ ਭਰੋਸਾ ਨਹੀਂ ਹੈ।
ਅਤੀਤ ਵਿੱਚ, ਉਨ੍ਹਾਂ ਨੇ ਇਸ਼ਾਰਿਆਂ ਵਿੱਚ ਕਿਹਾ ਸੀ ਕਿ ਇੰਟਰਨੈੱਟ ਇੱਕ “ਸੀਆਈਏ ਭਾਵ ਅਮਰੀਕੀ ਖ਼ੁਫ਼ੀਆ ਏਜੰਸੀ ਦਾ ਪ੍ਰੋਜੈਕਟ” ਹੈ ਅਤੇ ਰੂਸੀਆਂ ਨੂੰ ਅਪੀਲ ਕੀਤੀ ਸੀ ਕਿ ਗੂਗਲ ਸਰਚ ਦੀ ਵਰਤੋਂ ਨਾ ਕਰਨ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਅਮਰੀਕੀ ਸਾਰੀਆਂ ਸੂਚਨਾਵਾਂ ਦੀ ਨਿਗਰਾਨੀ ਕਰਦੇ ਹਨ।
ਗੈਲੋਤੀ ਕਹਿੰਦੇ ਹਨ, “ਪੁਤਿਨ ਸ਼ਾਇਦ ਹੀ ਇੰਟਰਨੈੱਟ ਦੀ ਵਰਤੋਂ ਕਰਦੇ ਹਨ, ਇਹ ਗੱਲ ਤਾਂ ਸਾਰੇ ਜਾਣਦੇ ਹਨ ਕਿ ਉਨ੍ਹਾਂ ਨੂੰ ਫ਼ੋਨ ਪਸੰਦ ਨਹੀਂ ਹਨ। ਅਤੇ ਇਹ ਠੀਕ ਹੈ। ਉਹ ਸੁਰੱਖਿਆ ਦੇ ਲਿਹਾਜ਼ ਨਾਲ ਇਮਾਨਦਾਰ ਹਨ। ਪੁਤਿਨ ਬਿਲਕੁਲ ਸਹੀ ਹਨ। ਸਮਾਰਟਫ਼ੋਨ ਬਹੁਤ ਸੁਰੱਖਿਅਤ ਨਹੀਂ ਹਨ।”
ਜਾਣਕਾਰ ਦੱਸਦੇ ਹਨ ਕਿ ਪੁਤਿਨ ਨੂੰ ਕਾਗ਼ਜ਼ੀ ਫ਼ਾਈਲਾਂ ਰਾਹੀਂ ਸੂਚਿਤ ਕੀਤਾ ਜਾਂਦਾ ਹੈ, ਜੋ ਉਨ੍ਹਾਂ ਦੇ ਸਲਾਹਕਾਰ ਉਨ੍ਹਾਂ ਨੂੰ ਦਿੰਦੇ ਹਨ।
ਹਾਲ ਕਹਿੰਦੇ ਹਨ, “ਪੁਤਿਨ ਆਪਣੇ ਦਿਨ ਦੀ ਸ਼ੁਰੂਆਤ ਤਿੰਨ ਸੁਰੱਖਿਆ ਬ੍ਰੀਫ਼ਿੰਗਾਂ ਨਾਲ ਕਰਦੇ ਹਨ। ਇੱਕ ਜੋ ਪੂਰੀ ਦੁਨੀਆ ਨਾਲ ਸਬੰਧਤ ਹੈ। ਇੱਕ ਉਸ ਬਾਰੇ ਜੋ ਰੂਸ ਵਿੱਚ ਚੱਲ ਰਿਹਾ ਹੈ ਅਤੇ ਤੀਜੀ ਉਹ ਜੋ ਕੁਲੀਨ ਵਰਗ ਵਿੱਚ ਚੱਲ ਰਿਹਾ ਹੈ।”
“ਉਨ੍ਹਾਂ ਲਈ, ਇਹ ਸਭ ਤੋਂ ਮਹੱਤਵਪੂਰਨ ਜਾਣਕਾਰੀ ਹੈ ਅਤੇ ਇਹ ਉਨ੍ਹਾਂ ਦੇ ਦਿਨ ਦਾ ਏਜੰਡਾ ਤੈਅ ਕਰਦੀ ਹੈ।”
ਉਹ ਦੱਸਦੇ ਹਨ, “ਮੈਨੂੰ ਯਾਦ ਹੈ ਕਿ ਮੈਂ ਡਿਪਲੋਮੈਟਾਂ ਅਤੇ ਵਿਦੇਸ਼ ਮੰਤਰਾਲੇ ਦੇ ਅਧਿਕਾਰੀਆਂ ਨਾਲ ਗੱਲ ਕੀਤੀ ਸੀ। ਉਨ੍ਹਾਂ ਨੇ ਮੈਨੂੰ ਕਿਹਾ ਸੀ ਕਿ ਜੇ ਉਨ੍ਹਾਂ ਕੋਲ ਅਜਿਹੀ ਜਾਣਕਾਰੀ ਹੈ ਜੋ ਉਨ੍ਹਾਂ ਦੀਆਂ ਖ਼ੁਫ਼ੀਆ ਸੇਵਾਵਾਂ ਨੂੰ ਸਹੀ ਨਹੀਂ ਲੱਗਦੀ ਤਾਂ ਪੁਤਿਨ ਇਹ ਮੰਨ ਲੈਂਦੇ ਹਨ ਕਿ ਉਨ੍ਹਾਂ ਦੇ ਜਾਸੂਸ ਸਹੀ ਹਨ ਅਤੇ ਡਿਪਲੋਮੈਟ ਗ਼ਲਤ ਹਨ।”
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
source : BBC PUNJABI
