ദുബൈ; താമസസ്ഥലം വിഭജിച്ച് നൽകാൻ മുൻകൂർ അനുമതി നിർബന്ധം

ഷെയേർഡ് അക്കമഡേഷൻ നിയന്ത്രിക്കുന്ന 2026 ലെ പുതിയ നിയമം പ്രാബല്യത്തിൽ വന്നെങ്കിലും പുതിയ ചട്ടങ്ങളുടെ അടിസ്ഥാനത്തിലുള്ള പ്രത്യേക പരിശോധനകളോ ഒഴിപ്പിക്കലുകളോ ഉടനടി ആരംഭിക്കില്ലെന്ന് ദുബൈ മുനിസിപ്പാലിറ്റി വ്യക്തമാക്കി. പ്രത്യേക വികസന മേഖലകളും ഫ്രീ സോണുകളും ഉൾപ്പെടെ ദുബൈ എമിറേറ്റിലുടനീളം പുതിയ നിയമം ബാധകമാണ്. എന്നാൽ തൊഴിലാളികൾക്കായി പ്രത്യേകം അംഗീകരിച്ചിട്ടുള്ള കൂട്ടത്താമസ കേന്ദ്രങ്ങളെ (ലേബർ ക്യാമ്പുകൾ) ഇതിന്റെ പരിധിയിൽ നിന്ന് ഒഴിവാക്കിയിട്ടുണ്ട്.

നിയമവിരുദ്ധമായ പാർട്ടിഷനുകൾ, പരിധിയിൽ കവിഞ്ഞുള്ള താമസം എന്നിവ കണ്ടെത്താനുള്ള സാധാരണ പരിശോധനകൾ ഇപ്പോഴും തുടരുന്നുണ്ടെങ്കിലും പുതിയ നിയമപ്രകാരമുള്ള പ്രത്യേക പെർമിറ്റുകൾ, രജിസ്‌ട്രേഷൻ, താമസ മാനദണ്ഡങ്ങൾ എന്നിവ വിലയിരുത്തുന്ന പരിശോധനകൾ ഭരണപരമായ എല്ലാ സംവിധാനങ്ങളും പൂർത്തിയായ ശേഷമേ നടപ്പിലാക്കൂ.

നിലവിൽ പങ്കിട്ട താമസ സൗകര്യം നടത്തുന്ന വസ്തു ഉടമകൾക്കും കമ്പനികൾക്കും പുതിയ നിയമത്തിന് കീഴിൽ രജിസ്റ്റർ ചെയ്ത് കാര്യങ്ങൾ ക്രമപ്പെടുത്തുന്നതിനായി  ആഗസ്റ്റ് 26 മുതൽ ഒരു വർഷത്തെ സാവകാശം അനുവദിച്ചിട്ടുണ്ട്. ആവശ്യമെങ്കിൽ ദുബൈ മുനിസിപ്പാലിറ്റി ഡയറക്ടർ ജനറലിന് ഈ ഇളവുകാലാവധി ഒരു തവണ കൂടി നീട്ടിനൽകാൻ അധികാരമുണ്ട്. പങ്കിട്ട താമസത്തിനുള്ള പ്രവർത്തനാനുമതി തേടുന്നതിനുള്ള ഡിജിറ്റൽ സംവിധാനം ദുബൈ മുനിസിപ്പാലിറ്റിയും ദുബൈ ലാൻഡ് ഡിപ്പാർട്ട്‌മെന്റും ചേർന്ന് പിന്നീട് ഔദ്യോഗികമായി പ്രഖ്യാപിക്കും.

വാടക കരാറുകൾ, കെട്ടിട മാനേജ്‌മെന്റ്കരാറുകൾ, താമസക്കാരുടെ കൃത്യമായ വിവരങ്ങൾ എന്നിവ രേഖപ്പെടുത്തുന്നതിനുള്ള പ്രത്യേക “ഷെയേർഡ് അക്കമഡേഷൻ രജിസ്റ്റർ’ സംവിധാനവും സജ്ജമായി വരുന്നതേയുള്ളൂ. പുതിയ നിയമപ്രകാരം കരാറുകൾ ഈ ഔദ്യോഗിക രജിസ്റ്ററിൽ ഉൾപ്പെടുത്തിയാൽ മാത്രമേ അവക്ക് നിയമ സാധുത ലഭിക്കൂ.

Content Highlights:
Dubai has officially enforced a new law requiring prior permits for sharing or partitioning residential properties. Violators face heavy fines ranging from 500 Dirhams to 10 lakh Dirhams for repeated offenses. A one-year grace period starting August 26 is provided for property owners to register and comply.