Source :- SIRAJLIVE NEWS
ന്യൂഡൽഹി | വിദ്യാർഥി പ്രതിഷേധത്തിനിടെ പോലീസ് എ കെ 47 തോക്ക് ഉപയോഗിച്ച് വെടിവെപ്പ് നടത്തിയ സംഭവത്തിൽ വിവാദം പുകയുന്നതിനിടെ ബീഹാറിൽ 17 ഐ പി എസ് ഉദ്യോഗസ്ഥരെ സ്ഥലം മാറ്റി. ഭോജ്പൂർ, സിവാൻ എന്നിവിടങ്ങളിലെ എസ് പിമാർ ഉൾപ്പെടെ മുതിർന്ന ഉദ്യോഗസ്ഥർക്കെതിരെയാണ് സംസ്ഥാന സർക്കാറിന്റെ നടപടി. അടുത്തിടെ നടന്ന വിദ്യാർത്ഥി പ്രക്ഷോഭങ്ങൾക്കിടെ ഈ ജില്ലകളിൽ പോലീസ് നടത്തിയ നടപടികൾ വലിയ രീതിയിൽ വിവാദങ്ങൾക്ക് വഴിവെച്ചിരുന്നു.
ജൂലൈ 25-ന് സിപാനിൽ പ്രതിഷേധക്കാർ വളഞ്ഞതിനെ തുടർന്ന് അഭിഷേക് കുമാർ എന്ന പോലീസുകാരൻ എ കെ 47 റൈഫിളിൽ നിന്ന് വായുവിൽ നാല് റൗണ്ട് വെടിവെച്ചതായി സംസ്ഥാന സർക്കാർ സുപ്രീം കോടതിയെ അറിയിച്ചതിന് പിന്നാലെയാണ് ഈ നടപടി. വെടിവെപ്പിൽ പ്രതിഷേധക്കാർക്കൊന്നും പരിക്കേറ്റിട്ടില്ലെന്നാണ് സർക്കാർ വ്യക്തമാക്കുന്നത്. എന്നാൽ അന്നേ ദിവസം പോലീസ് നടത്തിയ മറ്റ് നടപടികളിൽ മൂന്ന് പേർക്ക് നിസ്സാരമായ രീതിയിൽ വെടിയേറ്റ് പരിക്കേറ്റിട്ടുണ്ടെന്നും റിപ്പോർട്ടുകൾ സൂചിപ്പിക്കുന്നു.
സംഭവത്തെ തുടർന്ന് എ കെ 47 ഉപയോഗിച്ച് വെടിവെച്ച പോലീസുകാരൻ അഭിഷേക് കുമാറിനെ സർവീസിൽ നിന്ന് സസ്പെൻഡ് ചെയ്യുകയും ഇയാൾക്കെതിരെ വകുപ്പുതല അന്വേഷണം ആരംഭിക്കുകയും ചെയ്തിട്ടുണ്ട്. ജനക്കൂട്ടത്തെ നിയന്ത്രിക്കുന്നതിനുള്ള സാധാരണ നടപടികൾക്കല്ല, മറിച്ച് പ്രത്യേക ഓപ്പറേഷനുകൾക്കായി (Special Operations) മാറ്റിവെച്ചിട്ടുള്ള ആയുധമാണ് എ കെ 47 എന്ന് സർക്കാർ വിശദീകരിച്ചു.
Content Highlights
Bihar government transferred 17 IPS officers following controversy over police action during student protests. The state informed the Supreme Court that a constable fired four AK-47 rounds in air after being surrounded in Siwan. The suspended constable now faces departmental proceedings.
