Source :- EVARTHA NEWS
(adsbygoogle = window.adsbygoogle || []).push({});
സൗദി അറേബ്യയിലെ കിങ് ഖാലിദ് വിമാനത്താവളത്തിൽ ഹൂതികൾ നടത്തിയതായി പറയപ്പെടുന്ന വ്യോമാക്രമണങ്ങളിൽ മൂന്ന് സൗദി പൗരന്മാർ കൊല്ലപ്പെട്ടതായി റിപ്പോർട്ട്. കൊല്ലപ്പെട്ടവരിൽ സൗദി എയർലൈൻസായ സൗദിയയിലെ ഒരു ക്യാപ്റ്റനും ഉൾപ്പെടുന്നതായാണ് വിവരം. രണ്ട് വ്യത്യസ്ത ആക്രമണങ്ങളിലായാണ് ആളപായമുണ്ടായതെന്ന് സൗദി സിവിൽ ഏവിയേഷൻ അതോറിറ്റി സ്ഥിരീകരിച്ചതായി റിപ്പോർട്ടുകൾ പറയുന്നു.
ആദ്യ ആക്രമണം വിമാനത്താവളത്തിലെ സൗകര്യങ്ങൾ ലക്ഷ്യമിട്ടായിരുന്നുവെന്നും രണ്ടാമത്തേത് സൗദിയ വിമാനത്തിന് നേരെയായിരുന്നുവെന്നുമാണ് അധികൃതർ അറിയിച്ചത്. പരിക്കേറ്റവരെ ആശുപത്രിയിൽ പ്രവേശിപ്പിച്ചു. ആക്രമണത്തെത്തുടർന്ന് വിമാനത്താവളത്തിലെ വിമാന സർവീസുകൾ താൽക്കാലികമായി നിർത്തിവച്ചതായും വ്യോമഗതാഗതം വൈകാതെ സാധാരണ നിലയിലാകുമെന്നാണ് പ്രതീക്ഷയെന്നും റിപ്പോർട്ടിൽ പറയുന്നു.
റോയൽ സൗദി വ്യോമസേനയുടെ കിങ് ഖാലിദ് വ്യോമതാവളവും യെമൻ അതിർത്തിക്ക് സമീപമുള്ള നജ്റാൻ വിമാനത്താവളവും ലക്ഷ്യമിട്ട് വ്യാഴാഴ്ച ആക്രമണം നടത്തിയതായി ഹൂതി സംഘം അവകാശപ്പെട്ടിരുന്നു. ക്രൂയിസ്, ബാലിസ്റ്റിക് മിസൈലുകൾ ഉപയോഗിച്ചായിരുന്നു ആക്രമണമെന്നാണ് ഹൂതികളുടെ വാദം. സംഘർഷത്തെത്തുടർന്ന് എയർ ഇന്ത്യ ഉൾപ്പെടെയുള്ള വിമാനക്കമ്പനികൾ റിയാദിലേക്കുള്ള സർവീസുകൾ നിർത്തിവച്ചതായും റിപ്പോർട്ടുകളുണ്ട്.
