अभिनेता सैफ अली खानवर चाकूने हल्ला, लिलावती रुग्णालयात उपचार सुरू

बॉलिवूड अभिनेता सैफ अली खान याच्यावर चाकूने हल्ला झाला आहे.

मध्यरात्री 2.30 च्या सुमारास घरात शिरलेल्या चोराने त्याच्यावर चाकूने हल्ला केला आणि यात त्याला दुखापत झाली आहे.

सध्या त्याच्यावर लिलावती रुग्णालयात उपचार सुरू आहेत, अशी प्राथमिक माहिती पोलिसांनी दिली आहे.

“अभिनेता सैफ अली खानच्या घरात अज्ञात व्यक्ती घुसला. त्यानंतर सैफ अली खान आणि घुसखोर यांच्यात बाचाबाची झाली. यात सैफ जखमी झाला असून त्याच्यावर उपचार सुरू आहेत. या घटनेचा तपास सुरू आहे,” अशी माहिती परिमंडळ 8 चे पोलीस उपायुक्त दीक्षित गेडाम यांनी दिलीय.

अभिनेता सैफ अली खानच्या टीमने या प्रकरणावर अधिकृत निवेदन जारी केलं आहे.

त्यात म्हटलंय, “सैफ अली खानच्या निवासस्थानी घरफोडीचा प्रयत्न झाला होता. त्याच्यावर सध्या रुग्णालयात शस्त्रक्रिया सुरू आहे. पोलीस घटनेचा तपास करत आहे.”

सैफ अली खानची पत्नी करीना कपूरच्या पीएआर एजन्सीने म्हटलंय की, “काल रात्री सैफ अली खान आणि करीना कपूर खान यांच्या घरी घरफोडीचा प्रयत्न झाला. सैफच्या हाताला दुखापत झाली असून तो हॉस्पिटलमध्ये उपचार घेत आहे. बाकीचे कुटुंबीय चांगल्या स्थितीत आहे.

“आम्ही मीडिया आणि सैफ अली खानच्या चाहत्यांना धीर धरण्याची विनंती करतो. पोलीस तपास करत आहेत त्यामुळे इतर प्रकारचे अंदाज लावू नयेत.”

तर मुंबई पोलिसांनी दिलेल्या माहितीनुसार, “काल रात्री उशिरा अभिनेता सैफ अली खानच्या घरी अज्ञात व्यक्तीने प्रवेश केला आणि त्याच्या मोलकरणीसोबत वाद घातला. जेव्हा सैफने हस्तक्षेप करून त्या व्यक्तीला शांत करण्याचा प्रयत्न केला तेव्हा त्याने सैफ अली खानवर हल्ला करून त्याला जखमी केले. पोलीस या प्रकरणाचा तपास करत आहेत.”

लीलावती हॉस्पिटलचे सीओओ डॉ. नीरज उत्तमनी यांनी हिंदुस्तान टाईम्सला सांगितलं की, “सैफवर त्याच्या घरात अज्ञात व्यक्तीनं हल्ला केला. त्याला साडेतीन वाजता लीलावती हॉस्पिटलमध्ये आणण्यात आलं.

“त्याला सहा ठिकाणी जखमा झाल्या आहेत, त्यापैकी दोन जखमा खोलवर आहेत. एक जखम मणक्याजवळ आहे. त्याच्यावर शस्त्रक्रिया सुरू आहे. जखम किती खोल आहे हे शस्त्रक्रियेनंतर कळेल.”

सैफच्या मानेवरही जखम असल्याचं डॉक्टर उत्तमनी यांनी सांगितलं. दुखापत किती खोलवर आहे हे पाहिले जात आहे. सकाळी साडेपाच वाजता शस्त्रक्रिया सुरू झाल्याचं त्यांनी सांगितलं.

राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांनी या घटनेनंतर माध्यमांशी बोलताना म्हटलं, “सैफ अली खान यांच्यावरील हल्ला ही चिंताजनक घटना आहे. याप्रकरणी पोलिसांकडून अधिकृत निवेदन येऊ द्या.”

काँग्रेस खासदार वर्षा गायकवाड यांनी या घटनेवर प्रतिक्रिया दिली.

एक्स या समाजमाध्यमावर त्यांनी लिहिलं, “या हल्ल्यानं मला अत्यंत धक्का बसला. मुंबईत काय चाललंय? सुरक्षित क्षेत्र म्हणून ओळखल्या जाणाऱ्या वांद्रामध्ये हे घडते, ही सर्वांत चिंतेची बाब आहे. मग सामान्य माणसाला कोणत्या सुरक्षेची अपेक्षा आहे?”

“दिवसेंदिवस आपण मुंबईमध्ये हिंसाचार, दरोडे, चाकूहल्ले अशा घटनांबद्दल ऐकतो आहोत आणि सरकारकडं उत्तरं नाहीत. आम्हाला उत्तरं हवी आहेत,” असंही गायकवाड यांनी म्हटलं आहे.

(ही बातमी सतत अपडेट होत आहे.)

(बीबीसीसाठी कलेक्टिव्ह न्यूजरूमचे प्रकाशन)