ठाण्यात एका कोरोना रुग्णाचा मृत्यू; महाराष्ट्रात आतापर्यंत किती रुग्ण आढळलेत?

ठाण्यामध्ये एका कोरोना रुग्णाचा मृत्यू झाला असल्याची माहिती ठाणे महानगरपालिकेकडून देण्यात आली आहे.

सध्या महाराष्ट्रात 166 रुग्ण सक्रिय आहेत, अशी माहिती सार्वजनिक आरोग्य विभागानं दिली आहे.

आज (24 मे) रोजी एकूण 47 रुग्ण पॉझिटीव्ह आढळले आहेत.

ठाण्यातील मृत तरुण हा 21 वर्षांचा होता. गंभीर स्वरूपाच्या मधुमेहामुळे त्याला गुरुवारी (22 मे) रुग्णालयात दाखल करण्यात आलं होतं.

शुक्रवारी (23 मे) रात्री त्याची कोरोना चाचणी पॉझिटिव्ह आली.

आज (24 मे) सकाळी त्याचं निधन झालं, अशी माहिती छत्रपती शिवाजी महाराज रुग्णालयचे अधीक्षक डॉ. अनिरुद्ध माळगावकर यांनी दिली.

ठाणे महानगरपालिकेतील माहिती व जनसंपर्क विभागाने दिलेल्या माहितीनुसार, आज एकूण 9 नव्या कोरोना रुग्णांची नोंद झाली आहे.

सध्या ठाण्यातील एकूण रुग्णसंख्या 19 वर गेली आहे. तर एकूण महाराष्ट्रात सध्या 56 सक्रिय रुग्ण आहेत.

जिल्हा शल्य चिकित्सक डॉ. कैलास पवार यांनी माध्यमांशी बोलताना सांगितलंय, “सध्या मुंबईला कोरोनाच्या केसेस वाढत आहेत, अशा बातम्या माध्यमांमध्ये येत आहेत. कालही ठाण्यामध्ये तीन अँटीजन पॉझिटीव्ह आले आहेत. कन्फर्म नाहीये. पण आतापर्यंतचा जो काही अनुभव आहे, त्यानुसार, या माईल्ड केसेस आहेत.”

“हा ओमिक्रॉनचाच सब-व्हेरियंट आहे. पण यामध्ये घाबरण्यासारखं काही नाहीये. हा साधा व्हायरस आहे. पण, पावसाळाच्या पार्श्वभूमीवर सतर्कता महत्त्वाची आहे. महासाथ संपुष्टात आली आहे. आपल्याला कोरोनासोबत जगण्याची सवय झालेली आहे. फक्त सतर्कता बाळगणं गरजेचं आहे,” असंही त्यांनी म्हटलं आहे.

सिंगापूर, हाँगकाँगसारख्या अनेक देशांमध्ये कोव्हिड-19 च्या रुग्णांची संख्या पुन्हा एकदा वाढलेली आहे.

मात्र, भारतामधील परिस्थिती नियंत्रणात असल्याचं सांगण्यात आलंय.

थायलंड, हाँगकाँगसोबतच चीनमध्येही गेल्या काही महिन्यांमध्ये कोव्हिड-19 चे रुग्ण वाढले आहेत.

ओमिक्रॉन व्हेरियंटचा उपप्रकार असणाऱ्या JN.1 मुळे ही रुग्णसंख्या वाढल्याचं तज्ज्ञांनी म्हटलंय.

भारत सरकारच्या आरोग्य आणि कुटुंब कल्याण मंत्रालयाच्या वेबसाईटवर 12 मे 2025 पर्यंतच्या कोरोना रुग्णांचे तपशील देण्यात आले आहेत. त्यानुसार, भारतात सध्या एकूण 257 रुग्ण सक्रिय आहेत.

सार्वजनिक आरोग्य विभागानं दिलेल्या माहितीनुसार, जानेवारी 2025 पासून आज पर्यंत महाराष्ट्रातील सहव्याधीने ग्रस्त असलेले 4 रुग्ण दगावले. यापैकी एका रुग्णास नेफ्रोटिक सिंड्रोम सह हायपोकॅल्सिमिक सीझर होते व दुसऱ्या रुग्णास कर्करोग होता. तसेच तिसऱ्या रुग्णास ब्रेन स्ट्रोक (Cerebrovascular Disease)

झाला होता आणि फिट येत होती, आणि चौथ्या रुग्णास डायबेटिक किटोअॅसीडोसीस (DKA with LRTI) आजार होता.

सिंगापूरमध्ये आतापर्यंत ज्या सँपल्सचं जीनोम सिक्वेन्सिंग करण्यात आलं, त्यात बहुतेक प्रकरणं JN.1 व्हेरियंटची आढळल्याचं इकॉनॉमिक टाईम्सने म्हटलंय.

पण हा JN.1 व्हेरियंट नवा नाही.

गेल्या काही काळापासून जगभरात आढळणाऱ्या ओमिक्रॉनचा हा सब-व्हेरियंट म्हणजे उप-प्रकार आहे.

दिल्लीच्या अखिल भारतीय आयुर्विज्ञान संस्था म्हणजे एम्स (AIIMS) चे कम्युनिटी मेडिसिन विभागाचे प्राध्यापक डॉक्टर संजय राय हे कोव्हॅक्सिन या कोव्हिड लशीच्या तीनही टप्प्यांमध्ये प्रमुख संशोधक होते.

बीबीसी प्रतिनिधी चंदन जजवाडे यांनी त्यांच्याकडून कोव्हिड 19 च्या JN.1 व्हेरियंटबद्दल माहिती घेतली.

डॉ. संजय राय सांगतात, “JN.1 कोरोनाच्या ओमिक्रॉन व्हायरसचाच एक व्हेरियंट आहे. याचा शोध लागून वर्षभरापेक्षा अधिक काळ उलटलाय. हा काही नवीन व्हायरस नाही. हा गंभीर ठरू शकतो वा नाही, याबद्दल आपल्याकडे सगळी माहिती आहे. JN.1 व्हेरियंटला घाबरण्याची गरज नाही. तसे कोणतेही पुरावेही नाहीत. आता आढळलेल्या गोष्टींनुसार हा कॉमन सर्दी-खोकल्याप्रमाणे किंवा त्याहीपेक्षा सौम्य असू शकतो.”

जगभरातील अनेक देशांमध्ये कोरोना विषाणूच्या नवीन व्हेरिएंटमुळे पुन्हा एकदा रुग्णसंख्या वाढू लागली आहे.

त्यामुळे, भारतातही सतर्कता वाढवण्यात आली असून, पुणे, मुंबई पाठोपाठ ठाण्यातही कोरोनाचे रुग्ण आढळून आले आहेत.

या पार्श्वभूमीवर ठाणे सिव्हिल रुग्णालयात 40 खाटांचे विशेष कक्ष तातडीने तयार करण्यात आला असून, या मध्ये रुग्णांना लागणाऱ्या सर्व वैद्यकीय यंत्रणा सुसज्ज ठेवण्यात आल्या आहेत.

मुंबईत कोरोनाबाधित रुग्णांची नोंद झाल्यानंतर ठाण्यात देखील दहा रुग्ण कोरोना पॉझिटिव्ह आढळले असून, त्यांच्यावर सध्या उपचार सुरू आहेत.

(बीबीसीसाठी कलेक्टिव्ह न्यूजरूमचे प्रकाशन)