ਇਨਕਮ ਟੈਕਸ ਰਿਟਰਨ ਫਾਈਲ ਕਰਨਾ ਕਿਸਦੇ ਲਈ ਲਾਜ਼ਮੀ ਹੈ, ਨਾ ਕਰਨ ‘ਤੇ ਕੀ ਹੋਵੇਗਾ, ਅਜਿਹੇ ਹੀ ਕਈ ਭੁਲੇਖਿਆਂ ਤੇ ਸਵਾਲਾਂ ਦੇ ਜਵਾਬ

ਆਮਦਨ ਟੈਕਸ ਰਿਟਰਨ ਦਾਖਲ ਕਰਨ ਦੇ ਦਿਨ ਹਾਲੇ ਚੱਲ ਰਹੇ ਹਨ ਅਤੇ 31 ਜੁਲਾਈ, 2025 ਆਈਟੀ ਰਿਟਰਨ ਦਾਖਲ ਕਰਨ ਦੀ ਆਖਰੀ ਮਿਤੀ ਹੈ।

ਇਸ ਸਾਲ ਦੇ ਕੇਂਦਰੀ ਬਜਟ ਵਿੱਚ ਲੋਕਾਂ ਨੂੰ ਆਮਦਨ ਟੈਕਸ ਵਿੱਚ ਵੱਡੀ ਰਾਹਤ ਦਿੱਤੀ ਗਈ ਹੈ। ਹੁਣ ਤੋਂ ਤਨਖਾਹਦਾਰ ਵਰਗ ਨੂੰ 12.75 ਲੱਖ ਰੁਪਏ ਤੱਕ ਦੀ ਸਾਲਾਨਾ ਆਮਦਨ ‘ਤੇ ਆਮਦਨ ਟੈਕਸ ਨਹੀਂ ਦੇਣਾ ਹੋਵੇਗਾ, ਜਦਕਿ ਹੋਰ ਟੈਕਸ ਦਾਤਾਵਾਂ ਦੇ ਲਈ 12 ਲੱਖ ਰੁਪਏ ਤੱਕ ਦੀ ਸਾਲਾਨਾ ਆਮਦਨ ਟੈਕਸ-ਮੁਕਤ ਰਹੇਗੀ।

ਇਸੇ ਕਾਰਨ ਇਸ ਵਾਰ ਆਮਦਨ ਟੈਕਸ ਰਿਟਰਨ ਦਾਖਲ ਕਰਨ ਨੂੰ ਲੈ ਕੇ ਕਈ ਲੋਕ ਭੰਬਲਭੂਸੇ ਵਿੱਚ ਹਨ।

ਭਾਰਤ ਵਿੱਚ ਪੈਨ ਕਾਰਡ ਅਤੇ ਆਮਦਨ ਟੈਕਸ ਰਿਟਰਨ ਨੂੰ ਲੈ ਕੇ ਆਮ ਟੈਕਸਦਾਤਾਵਾਂ ਦੇ ਵਿੱਚ ਪਹਿਲਾਂ ਤੋਂ ਹੀ ਕਈ ਗਲਤਫਹਿਮੀਆਂ ਹਨ, ਜਿਵੇਂ ਕਿ ਕਿਸ ਨੂੰ ਆਈਟੀ ਰਿਟਰਨ ਦਾਖਲ ਕਰਨਾ ਚਾਹੀਦਾ ਹੈ, ਰਿਟਰਨ ਦਾਖਲ ਕਰਨ ਦੇ ਲਈ ਕਿੰਨੀ ਆਮਦਨ ਜ਼ਰੂਰੀ ਹੈ, ਰਿਟਰਨ ਦਾਖਨ ਨਾ ਕਰਨ ‘ਤੇ ਕੀ ਹੋਵੇਗਾ, ਆਦਿ।

ਆਈਟੀ ਰਿਟਰਨ ਅਤੇ ਪੈਨ ਕਾਰਡ ਨਾਲ ਜੁੜੇ ਕੁਝ ਮਹੱਤਵਪੂਰਨ ਸਵਾਲਾਂ ਦੇ ਜਵਾਬ ਜਾਣਨ ਦੇ ਲਈ ਬੀਬੀਸੀ ਨੇ ਚਾਟਰਡ ਅਕਾਊਂਟੈਂਟ ਅਤੇ ਟੈਕਸ ਮਾਹਿਰ ਕਰੀਮ ਲਖਾਨੀ ਨਾਲ ਗੱਲਬਾਤ ਕੀਤੀ।

ਕਰੀਮ ਲਖਾਨੀ ਨੇ ਕਿਹਾ ਕਿ ਜੇ ਤੁਹਾਡੀ ਕੁੱਲ ਆਮਦਨ ਮੂਲ ਛੋਟ ਸੀਮਾ ਤੋਂ ਜ਼ਿਆਦਾ ਹੈ, ਤਾਂ ਤੁਹਾਨੂੰ ਆਈਟੀ ਰਿਟਰਨ ਦਾਖਲ ਕਰਨੀ ਹੋਵੇਗੀ। ਯਾਨਿ ਜੇ ਕਿਸੇ ਆਮ ਕਰਦਾਤਾ (60 ਸਾਲ ਤੋਂ ਘੱਟ ਉਮਰ) ਦੀ ਸਾਲਾਨਾ ਆਮਦਨ 2.50 ਲੱਖ ਰੁਪਏ ਤੋਂ ਜ਼ਿਆਦਾ ਹੈ, ਜੇ ਕਿਸੇ ਸੀਨੀਅਰ ਨਾਗਰਿਕ (60 ਤੋਂ 80 ਸਾਲ) ਦੀ ਆਮਦਨ 3 ਲੱਖ ਰੁਪਏ ਤੋਂ ਜ਼ਿਆਦਾ ਹੈ, ਜੇ ਕਿਸੇ ਅਤਿ ਸੀਨੀਅਰ ਨਾਗਰਿਕ (80 ਸਾਲ ਤੋਂ ਜ਼ਿਆਦਾ) ਦੀ ਸਾਲਾਨਾ ਆਮਦਨ 5 ਲੱਖ ਰੁਪਏ ਤੋਂ ਜ਼ਿਆਦਾ ਹੈ ਤਾਂ ਉਸ ਨੂੰ ਆਈਟੀ ਰਿਟਰਨ ਦਾਖਲ ਕਰਨਾ ਲਾਜ਼ਮੀ ਹੈ।

ਅਜਿਹੇ ਮਾਮਲੇ ਵਿੱਚ ਜੇ ਕੁਲ ਆਮਦਨ (ਧਾਰਾ 80 ਦੇ ਤਹਿਤ ਕਟੌਤੀ ਤੋਂ ਪਹਿਲਾਂ) ਉਕਤ ਛੋਟ ਸੀਮਾ ਤੋਂ ਜ਼ਿਆਦਾ ਹੈ ਤਾਂ ਰਿਟਰਨ ਦਾਖਲ ਕਰਨਾ ਹੋਵੇਗਾਾ।

ਇਸ ਤੋਂ ਇਲਾਵਾ ਹਰੇਕ ਕੰਪਨੀ ਅਤੇ ਫਰਮ ਦੇ ਲਈ ਆਈਟੀ ਰਿਟਰਨ ਦਾਖਲ ਕਰਨਾ ਲਾਜ਼ਮੀ ਹੈ, ਚਾਹੇ ਉਸ ਨੂੰ ਲਾਭ ਹੋਇਆ ਹੋਵੇ ਜਾਂ ਘਾਟਾ।

ਸੀਏ ਕਰੀਮ ਲਖਾਨੀ ਦਾ ਕਹਿਣਾ ਹੈ ਕਿ ਜਿਨ੍ਹਾਂ ਵਿਅਕਤੀਆਂ ਜਾਂ ਫਰਮਾਂ ਦੇ ਖਾਤਿਆਂ ਦਾ ਆਡਿਟ ਕਰਨ ਦੀ ਲੋੜ ਨਹੀਂ ਹੈ, ਉਨ੍ਹਾਂ ਲਈ ਆਈਟੀ ਰਿਟਰਨ ਭਰਨ ਦੀ ਆਖਰੀ ਮਿਤੀ ਆਮ ਤੌਰ ‘ਤੇ 31 ਜੁਲਾਈ ਹੁੰਦੀ ਹੈ।

ਸਿਰਫ ਇਸ ਲਈ ਕਿ ਤੁਹਾਡੇ ਕੋਲ ਪੈਨ ਕਾਰਡ ਹੈ, ਇਸ ਦਾ ਮਤਲਬ ਇਹ ਨਹੀਂ ਹੈ ਕਿ ਤੁਹਾਨੂੰ ਆਮਦਨ ਕਰ ਰਿਟਰਨ ਦਾਖਲ ਕਰਨਾ ਲਾਜ਼ਮੀ ਹੈ। ਇਹ ਤੁਹਾਡੀ ਕੁੱਲ ਆਮਦਨ ਅਤੇ ਕੁਝ ਹੋਰ ਗੱਲਾਂ ‘ਤੇ ਨਿਰਭਰ ਕਰਦਾ ਹੈ।

ਜਿਵੇਂ ਕਿ ਉਪਰ ਦੱਸਿਆ ਗਿਆ ਹੈ, ਤੁਸੀਂ ਆਪਣੇ ਚਾਲੂ ਖਾਤੇ ਵਿੱਚ ਇੱਕ ਕਰੋੜ ਤੋਂ ਜ਼ਿਆਦਾ ਜਮ੍ਹਾ ਕੀਤਾ ਹੈ, ਤੁਸੀਂ ਬਚਤ ਖਾਤੇ ਵਿੱਚ 50 ਲੱਖ ਤੋਂ ਜ਼ਿਆਦਾ ਜਮ੍ਹਾ ਕੀਤੇ ਹਨ ਤੇ ਵਿਦੇਸ਼ ਯਾਤਰਾ ‘ਤੇ ਦੋ ਲੱਖ ਤੋਂ ਜ਼ਿਆਦਾ ਖਰਚ ਕੀਤਾ ਹੈ।

ਕਰੀਮ ਲਖਾਨੀ ਕਹਿੰਦੇ ਹਨ, “ਇੱਕ ਵਾਰ ਜਦੋਂ ਤੁਸੀਂ ਆਈਟੀ ਰਿਟਰਨ ਦਾਖਲ ਕਰਨਾ ਸ਼ੁਰੂ ਕਰ ਦਿੰਦੇ ਹੋ ਤਾਂ ਹਰ ਸਾਲ ਰਿਟਰਨ ਦਾਖਲ ਕਰਨਾ ਜ਼ਰੂਰੀ ਨਹੀਂ ਹੁੰਦਾ, ਜਦੋਂ ਤੱਕ ਕਿ ਤੁਸੀਂ ਉਸ ਸਾਲ ਆਮਦਨ ਕਰ ਨਿਯਮਾਂ ਦੇ ਅਨੁਸਾਰ ਰਿਟਰਨ ਦਾਖਲ ਕਰਨ ਦੇ ਯੋਗ ਨਾ ਹੋਵੋ।”

“ਇਸ ਦਾ ਅਰਥ ਹੈ ਕਿ ਜੇ ਕਿਸੇ ਸਾਲ ਵਿੱਚ ਕੁੱਲ ਆਮਦਨ ਮੂਲ ਛੋਟ ਸੀਮਾ ਤੋਂ ਘੱਟ ਹੈ ਅਤੇ ਕੋਈ ਹੋਰ ਸ਼ਰਤ ਪੂਰੀ ਨਹੀਂ ਹੁੰਦੀ ਤਾਂ ਉਸ ਸਾਲ ਰਿਟਰਨ ਦਾਖਲ ਕਰਨ ਦੀ ਕੋਈ ਜ਼ਰੂਰਤ ਨਹੀਂ ਹੈ।”

“ਉਦਾਹਰਨ ਦੇ ਲਈ ਜੇ ਤੁਸੀਂ ਮੁਲਾਂਕਣ ਸਾਲ 2023-2024 ਵਿੱਚ ਰਿਟਰਨ ਦਾਖਲ ਕੀਤਾ ਕਿਉਂਕਿ ਤੁਹਾਡੀ ਆਮਦਨ ਤਿੰਨ ਲੱਖ ਰੁਪਏ ਸੀ ਪਰ ਮੁਲਾਂਕਣ ਸਾਲ 2024-25 ਵਿੱਚ ਤੁਹਾਡੀ ਆਮਦਨ ਘੱਟ ਕੇ ਦੋ ਲੱਖ ਰੁਪਏ ਹੋ ਜਾਂਦੀ ਹੈ ਅਤੇ ਤੁਸੀਂ ਅਜਿਹੀ ਕੋਈ ਸ਼ਰਤ ਪੂਰੀ ਨਹੀਂ ਕਰਦੇ ਹੋ ਜੋ ਰਿਟਰਨ ਲਾਜ਼ਮੀ ਬਣਾਉਂਦੀ ਹੈ ਤਾਂ ਉਸ ਸਾਲ ਦੇ ਲਈ ਆਈਟੀ ਰਿਟਰਨ ਦਾਖਲ ਕਰਨਾ ਜ਼ਰੂਰੀ ਨਹੀਂ ਹੈ।”

ਹਾਲਾਂਕਿ ਲਖਾਨੀ ਸਲਾਹ ਦਿੰਦੇ ਹਨ ਕਿ ਨਿਯਮਤਤਾ ਲਈ ਆਈਟੀ ਰਿਟਰਨ ਫਾਈਲ ਕਰਨਾ ਉਚਿਤ ਹੈ। ਇਸ ਨਾਲ ਵਿੱਤੀ ਅਨੁਸ਼ਾਸਨ ਬਣਿਆ ਰਹੇਗਾ ਅਤੇ ਭਵਿੱਖ ਵਿੱਚ ਕਰਜ਼ੇ ਲੈਣਾ ਸੌਖਾ ਹੋ ਜਾਵੇਗਾ।

ਇਸ ਤੋਂ ਇਲਾਵਾ ਜਦੋਂ ਤੁਹਾਡਾ ਟੀਡੀਐੱਸ ਕੱਟ ਚੁੱਕਿਆ ਹੋਵੇ ਅਤੇ ਕੁੱਲ ਆਮਦਨ ਕਰ ਯੋਗ ਨਾ ਹੋਵੇ ਤਾਂ ਤੁਹਾਨੂੰ ਰੀਫੰਡ ਪਾਉਣ ਦੇ ਲਈ ਆਈਟੀ ਰਿਟਰਨ ਦਾਖਲ ਕਰਨਾ ਹੋਵੇਗਾ। ਇਕ ਵਾਰ ਜਦੋਂ ਤੁਸੀਂ ਰੀਫੰਡ ਦਾ ਦਾਅਵਾ ਕਰਨ ਦੇ ਲਈ ਰਿਟਰਨ ਦਾਖਲ ਕਰਨਾ ਸ਼ੁਰੂ ਕਰ ਦਿੰਦੇ ਹੋ ਤਾਂ ਤੁਹਾਨੂੰ ਟੀਡੀਐੱਸ ਰੀਫੰਡ ਦੇ ਲ਼ਈ ਹਰ ਸਾਲ ਆਈਟੀ ਰਿਟਰਨ ਦਾਖਲ ਕਰਨੀ ਪੈ ਸਕਦੀ ਹੈ।

ਇਸੇ ਪ੍ਰਕਾਰ ਤੁਹਾਨੂੰ ਭਵਿੱਖ ਦੇ ਸਾਲਾਂ ਵਿੱਚ ਕਾਰੋਬਾਰੀ ਘਾਟੇ ਨੂੰ ਐਡਜਸਟ ਕਰਨ ਲਈ ਹਰ ਸਾਲ ਰਿਟਰਨ ਫਾਈਲ ਕਰਨੀ ਹੋਵੇਗੀ, ਭਾਵੇਂ ਤੁਹਾਡੀ ਆਮਦਨ ਛੋਟ ਸੀਮਾ ਤੋਂ ਘੱਟ ਹੋਵੇ।

ਜੇ ਕਿਸੇ ਵਿਅਕਤੀ ਨੇ ਕਿਸੇ ਸਾਲ ਆਮਦਨ ਦੀ ਘਾਟ ਕਾਰਨ ਆਮਦਨ ਕਰ ਰਿਟਰਨ ਦਾਖਲ ਨਹੀਂ ਕੀਤੀ ਹੈ ਤਾਂ ਉਹ ਰਿਟਰਨ ਅਗਲੇ ਸਾਲ ਵੀ ਦਾਖਲ ਕੀਤੀ ਜਾ ਸਕਦੀ ਹੈ।

ਆਮਦਨ ਟੈਕਸ ਰਿਟਰਨ ਫਾਈਲ ਕਰਨ ਦੀ ਜ਼ਿੰਮੇਵਾਰੀ ਸਿਰਫ਼ ਸੇਵਾਮੁਕਤੀ ਜਾਂ ਨੌਕਰੀ ਛੱਡਣ ‘ਤੇ ਖ਼ਤਮ ਨਹੀਂ ਹੋ ਜਾਂਦੀ।

ਸੇਵਾ ਮੁਕਤੀ ਤੋਂ ਬਾਅਦ ਜਾਂ ਨੌਕਰੀ ਛੱਡਣ ਤੋਂ ਬਾਅਦ ਵੀ ਤੁਹਾਨੂੰ ਆਮਦਨ ਕਰ ਰਿਟਰਨ ਦਾਖਲ ਕਰਨੀ ਹੈ ਜਾਂ ਨਹੀਂ, ਇਹ ਕੁਝ ਗੱਲਾਂ ਉਪਰ ਨਿਰਭਰ ਕਰਦਾ ਹੈ।

ਆਮਦਨ: ਸੇਵਾ ਮੁਕਤੀ ਤੋਂ ਬਾਅਦ ਤੁਹਾਡੀ ਆਮਦਨ ਦੇ ਸਰੋਤ ਕੀ ਹਨ? ਕੀ ਤੁਹਾਨੂੰ ਪੈਨਸ਼ਨ ਮਿਲਦੀ ਹੈ? ਕੀ ਤੁਹਾਡੀ ਕੋਈ ਹੋਰ ਆਮਦਨ ਹੈ, ਜਿਵੇਂ ਬੈਂਕ ਵਿਆਜ, ਕਿਰਾਏ ਦੀ ਆਮਦਨ, ਸ਼ੇਅਰ ਬਾਜ਼ਾਰ ਤੋਂ ਆਮਦਨ ਆਦਿ? ਜੇ ਇਸ ਸਾਰੀ ਆਮਦਨ ਦਾ ਕੁੱਲ ਛੋਟ ਸੀਮਾ ਤੋਂ ਜ਼ਿਆਦਾ ਹੈ ਤਾਂ ਆਮਦਨ ਕਰ ਰਿਟਰਨ ਦਾਖਲ ਕਰਨੀ ਪਵੇਗੀ।

ਪੈਨਸ਼ਨ: ਸੇਵਾ ਮੁਕਤੀ ਦੇ ਬਾਅਦ ਪ੍ਰਾਪਤ ਪੈਨਸ਼ਨ ਨੂੰ ਵੀ ਆਮਦਨ ਮੰਨਿਆ ਜਾਂਦਾ ਹੈ ਅਤੇ ਇਹ ਆਮਦਨ ਕਰ ਦੇ ਅਧੀਨ ਹੈ। ਜੇ ਪੈਨਸ਼ਨ ਆਮਦਨ ਛੋਟ ਸੀਮਾ ਤੋਂ ਜ਼ਿਆਦਾ ਹੈ ਤਾਂ ਆਮਦਨ ਕਰ ਰਿਟਰਨ ਦਾਖਲ ਕਰਨੀ ਹੋਵੇਗੀ।

ਬੈਂਕ ਲੈਣ-ਦੇਣ: ਜੇ ਸੇਵਾ ਮੁਕਤੀ ਤੋਂ ਬਾਅਦ ਬੈਂਕ ਖਾਤੇ ਵਿੱਚ ਵੱਡੇ ਲੈਣ-ਦੇਣ ਹੁੰਦੇ ਹਨ, ਜਿਵੇਂ ਖਾਤੇ ਵਿੱਚ ਇੱਕ ਕਰੋੜ ਰੁਪਏ ਤੋਂ ਜ਼ਿਆਦਾ ਜ਼ਮ੍ਹਾ ਹੋਣਾ ਜਾਂ ਵਿਦੇਸ਼ ਯਾਤਰਾ ‘ਤੇ ਦੋ ਲੱਖ ਰੁਪਏ ਤੋਂ ਜ਼ਿਆਦਾ ਖਰਚ ਹੋਣਾ, ਤਾਂ ਕਰਦਾਤਾ ਨੂੰ ਆਈਟੀ ਰਿਟਰਨ ਦਾਖਲ ਕਰਨੀ ਹੋਵੇਗੀ, ਭਲੇ ਹੀ ਉਸ ਦੀ ਆਮਦਨ ਛੋਟ ਸੀਮਾ ਤੋਂ ਘੱਟ ਹੋਵੇ।

ਟੈਕਸ ਰੀਫੰਡ ਕਲੇਮ: ਜੇ ਸੇਵਾ ਮੁਕਤੀ ਤੋਂ ਪਹਿਲਾਂ ਸੈਲਰੀ ਤੋਂ ਜ਼ਿਆਦਾ ਟੀਡੀਐੱਸ ਕੱਟ ਗਿਆ ਹੈ ਅਤੇ ਤੁਸੀਂ ਉਸ ਦਾ ਰੀਫੰਡ ਪਾਉਣਾ ਚਾਹੁੰਦੇ ਹੋ ਤਾਂ ਤੁਹਾਨੂੰ ਆਈਟੀ ਰਿਟਰਨ ਦਾਖਲ ਕਰਨੀ ਹੋਵੇਗੀ।

ਹਾਂ ਜੇ ਕਿਸੇ ਸੇਵਾਮੁਕਤ ਵਿਅਕਤੀ ਦੀ ਆਮਦਨ ਛੋਟ ਸੀਮਾ ਤੋਂ ਘੱਟ ਹੈ ਅਤੇ ਕੋਈ ਹੋਰ ਸ਼ਰਤ ਪੂਰੀ ਨਹੀਂ ਹੁੰਦੀ ਹੈ, ਤਾਂ ਰਿਟਰਨ ਦਾਖਲ ਕਰਨੀ ਲਾਜ਼ਮੀ ਨਹੀਂ ਹੈ, ਪਰ ਰੀਫੰਡ ਦਾ ਦਾਅਵਾ ਕਰਨ ਜਾਂ ਹੋਰ ਕਾਰਨਾਂ ਕਰਕੇ ਮਰਜ਼ੀ ਨਾਲ ਰਿਟਰਨ ਦਾਖਲ ਕੀਤੀ ਜਾ ਸਕਦੀ ਹੈ।

ਆਮਦਨ ਕਰ ਮਾਹਰ ਨਿਯਮਿਤ ਰੂਪ ਤੋਂ ਅਤੇ ਸਮੇਂ ਸੀਮਾ ਦੇ ਅੰਦਰ ਆਮਦਨ ਕਰ ਰਿਟਰਨ ਦਾਖਲ ਕਰਨ ਦੀ ਸਲਾਹ ਦਿੰਦੇ ਹਨ। ਇਸ ਦੇ ਕੁਝ ਕਾਰਨ ਹਨ:

ਨਿਯਮਤ ਆਮਦਨ ਕਰ ਰਿਟਰਨ ਦਾਖਲ ਕਰਨ ਦੇ ਕੁਝ ਫਾਇਦੇ ਹਨ, ਜਦਕਿ ਰਿਟਰਨ ਦਾਖਲ ਨਾ ਕਰਨ ਦੇ ਕੁਝ ਨੁਕਸਾਨ ਵੀ ਹਨ। ਜਿਵੇਂ ਕਿ-

ਆਮਦਨ ਕਰ ਰਿਟਰਨ ਅਤੇ ਪੈਨ ਕਾਰਡ ਦੇ ਸਬੰਧ ਵਿੱਚ ਭਾਰਤੀ ਕਰਦਾਤਾਵਾਂ ਵਿੱਚ ਕਈ ਗਲਤਫਹਿਮੀਆਂ ਹਨ। ਸੀਏ ਕਰੀਮ ਲਖਾਨੀ ਨੇ ਕੁਝ ਅਜਿਹੀਆਂ ਹੀ ਗਲਤਫਹਿਮੀਆਂ ਗਿਣਾਈਆਂ ਹਨ।

ਗਲਤਫਹਿਮੀ: ਜੇ ਕੰਪਨੀ ਨੇ ਟੀਡੀਐੱਸ ਕੱਟ ਲਿਆ ਹੈ ਤਾਂ ਰਿਟਰਨ ਦਾਖਲ ਕਰਨ ਦੀ ਕੋਈ ਜ਼ਰੂਰਤ ਨਹੀਂ ਹੈ।

ਤੱਥ: ਜੇ ਤੁਹਾਡੀ ਕੁੱਲ ਆਮਦਨ ਮੂਲ ਛੋਟ ਸੀਮਾ ਤੋਂ ਜ਼ਿਆਦਾ ਹੈ ਤਾਂ ਰਿਟਰਨ ਦਾਖਲ ਕਰਨਾ ਲਾਜ਼ਮੀ ਹੈ, ਭਾਵੇਂ ਹੀ ਟੀਡੀਐੱਸ ਕੱਟ ਲਿਆ ਗਿਆ ਹੋਵੇ।

ਗਲਤਫਹਿਮੀ: ਮੇਰੀ ਆਮਦਨ ਕਰ ਯੋਗ ਨਹੀਂ ਹੈ, ਇਸ ਲਈ ਮੈਨੂੰ ਰਿਟਰਨ ਦਾਖਲ ਕਰਨ ਦੀ ਜ਼ਰੂਰਤ ਨਹੀਂ ਹੈ।

ਤੱਥ: ਜੇ ਤੁਹਾਡੀ ਆਮਦਨ ਮੂਲ ਛੋਟ ਸੀਮਾ ਤੋਂ ਘੱਟ ਹੈ ਤਾਂ ਆਮ ਤੌਰ ‘ਤੇ ਰਿਟਰਨ ਦਾਖਲ ਕਰਨਾ ਜ਼ਰੂਰੀ ਨਹੀਂ ਹੈ ਪਰ ਜਿਵੇਂ ਕਿ ਉਪਰ ਦੱਸਿਆ ਗਿਆ ਹੈ, ਜੇ ਤੁਹਾਡੇ ਕੋਲ ਬੈਂਕ ਲੈਣ-ਦੇਣ, ਵਿਦੇਸ਼ ਯਾਤਰਾ ਆਦਿ ਵਰਗੇ ਵੱਡੇ ਖਰਚ ਹਨ ਤਾਂ ਰਿਟਰਨ ਦਾਖਲ ਕਰਨਾ ਲਾਜ਼ਮੀ ਹੈ।

ਗਲਤਫਹਿਮੀ: ਆਈਟੀ ਰਿਟਰਨ ਭਰਨਾ ਇੱਕ ਬਹੁਤ ਹੀ ਗੁੰਝਲਦਾਰ ਅਤੇ ਜ਼ਿਆਦਾ ਸਮਾਂ ਲੈਣ ਵਾਲਾ ਕੰਮ ਹੈ।

ਤੱਥ: ਰਿਟਰਨ ਦਾਖਲ ਕਰਨ ਦੀ ਪ੍ਰਕਿਰਿਆ ਹੁਣ ਆਨਲਾਈਨ ਅਤੇ ਬਹੁਤ ਆਸਾਨ ਹੈ। ਜੇ ਤੁਹਾਡੀ ਆਮਦਨ ਸਾਧਾਰਨ ਹੈ ਤਾਂ ਤੁਸੀਂ ਖੁਦ ਵੀ ਰਿਟਰਨ ਦਾਖਲ ਕਰ ਸਕਦੇ ਹੋ। ਜੇ ਜ਼ਰੂਰਤ ਹੋਵੇ ਤਾਂ ਤੁਸੀਂ ਪੇਸ਼ੇਵਰਾਂ ਤੋਂ ਸਹਾਇਤਾ ਲੈ ਸਕਦੇ ਹੋ।

ਗਲਤਫਹਿਮੀ: ਤੋਹਫਿਆਂ ‘ਤੇ ਕੋਈ ਕਰ ਨਹੀਂ ਲੱਗਦਾ, ਇਸ ਲਈ ਉਨ੍ਹਾਂ ਨੂੰ ਰਿਟਰਨ ਵਿੱਚ ਦਿਖਾਉਣ ਦੀ ਜ਼ਰੂਰਤ ਨਹੀਂ ਹੈ।

ਤੱਥ: ਕੇਵਲ ਕੁਝ ਰਿਸ਼ਤੇਦਾਰਾਂ ਤੋਂ ਪ੍ਰਾਪਤ ਤੋਹਫੇ ਹੀ ਕਰ ਮੁਕਤ ਹੁੰਦੇ ਹਨ। ਕੁਝ ਤੋਹਫੇ ਕਰ ਯੋਗ ਹੁੰਦੇ ਹਨ ਅਤੇ ਉਨ੍ਹਾਂ ਨੂੰ ਤੁਹਾਡੇ ਰਿਟਰਨ ਵਿੱਚ ਐਡ ਕੀਤਾ ਜਾਣਾ ਚਾਹੀਦਾ ਹੈ।

ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ