SOURCE :- BBC NEWS
பட மூலாதாரம், Getty Images
காஸா போர் நிறுத்தம் மற்றும் பணயக்கைதிகளை விடுவிப்பது குறித்து இஸ்ரேலுக்கும் ஹமாஸுக்கும் இடையேயான பேச்சுவார்த்தை 90% நிறைவடைந்துள்ளது, ஆனால் இன்னும் முக்கிய பிரச்னைகளுக்கு தீர்வு காண வேண்டியுள்ளது என்று இந்த பேச்சுவார்த்தையில் ஈடுபட்ட பாலத்தீன மூத்த அதிகாரி ஒருவர் பிபிசியிடம் தெரிவித்துள்ளார்.
ஃபிலடெல்பி பாதையில் இஸ்ரேல் ராணுவம் தொடர்ந்து இருப்பது முழு போர் நிறுத்தம் கொண்டு வருவதற்கு முட்டுக்கட்டையாக இருக்கிறது.
தெற்கு காஸாவின் எகிப்து எல்லையில் உள்ள இந்த ஃபிலடெல்பி பாதையானது, ஒரு முக்கியத்துவம் வாய்ந்த பகுதியாகும்.
தோஹாவில் நடைபெற்ற இந்த பேச்சுவார்த்தையின் விவரங்களை பாலத்தீன மூத்த அதிகாரி ஒருவர் பகிர்ந்து கொண்டார். இதில் காஸாவுடனான இஸ்ரேலின் எல்லை முழுவதும், பல கிலோமீட்டர் அகலத்தில் ஒரு ராணுவ மோதலற்ற மண்டலத்தை உருவாக்குவதும் அடங்கும்.
இந்தப் பகுதியில் இஸ்ரேல் ராணுவம் தொடர்ந்து இருக்கும் என அந்த அதிகாரி கூறினார்.
மேலும், இந்த பிரச்னைகளுக்கு தீர்வு காணப்பட்டால், மூன்று கட்ட போர் நிறுத்தமானது சில நாட்களிலே ஒப்புக்கொள்ளப்படலாம் என்று அவர் தெரிவித்தார்.
மூன்று கட்ட போர் நிறுத்தத்தில் முதல் கட்டமாக ஒவ்வொரு பெண் இஸ்ரேலிய ராணுவ வீரருக்கும் 20 பாலத்தீன கைதிகள் விடுவிக்கப்படுவார்கள்
எந்தெந்த கைதிகள் விடுவிக்கப்பட உள்ளனர் என்பது குறித்து இன்னும் முடிவெடுக்கப்படவில்லை. ஆனால் இஸ்ரேலில் 25 ஆண்டுகள் அல்லது அதற்குள் மேலாக சிறைத் தண்டனை அனுபவிக்கும் சுமார் 400 பேர்களில் இருந்து அவர்கள் தேர்வு செய்யப்படுவார்கள்.
இவர்களில் மூத்த ஃபத்தா தலைவர் மர்வான் பர்கௌட்டியின் பெயர் இருப்பதாக தெரியவில்லை. அவரை விடுவிப்பதை இஸ்ரேல் நிராகரிக்கும் என்று எதிர்பார்க்கப்படுகிறது.
பட மூலாதாரம், Reuters
காணாமல் போன பணயக்கைதிகளில் சிலரை ஹமாஸ் இன்னும் கண்டுபிடிக்க வேண்டும் என்று நம்பி வருகிறது, அதனால் இஸ்ரேலின் பணயக்கைதிகளை ஹமாஸ் படிப்படியாக விடுவிக்கும்.
காஸாவில் தற்போது உள்ள 96 பணயக்கைதிகளுள், 62 பேர் இன்னும் உயிருடன் இருப்பதாக இஸ்ரேல் கருதுகிறது.
எகிப்து/ கத்தார் நாட்டின் மேற்பார்வையின் கீழ், பொதுமக்கள் காஸாவின் வடக்கு பகுதிக்கு செல்ல முடியும். மேலும் நாளொன்றுக்கு சுமார் 500 டிரக்குகள் காஸா முனைக்கு உதவி பொருட்களை கொண்டு வரும் என்று அதிகாரி கூறினார்.
மூன்று கட்டமாக நடைபெற உள்ள போர் நிறுத்தத்தின் கடைசி கட்டத்திற்கு பிறகு, 14 மாதங்கள் நடைபெற்று வந்த இஸ்ரேல் – பாலத்தீன போர் நிறுத்தம் முடிவுக்கு வரும்.
அரசியல் சார்பு இல்லாத, ஆனால் அனைத்து பாலத்தீன பிரிவுகளின் ஆதரவையும் பெற்றிருக்கும் நிபுணர்கள் குழுவால் காஸா பகுதி மேற்பார்வை செய்யப்படும்.
– இது, பிபிசிக்காக கலெக்டிவ் நியூஸ்ரூம் வெளியீடு.
SOURCE : THE HINDU
