తల తెగినా బొద్దింకలు ఎలా బతుకుతాయి, ఆహారం,నీరు లేకుండా ఎన్నిరోజులు జీవిస్తాయి?

బొద్దింక.. ఈ పేరు వినగానే చాలామంది భయపడతారు. అయితే, వీటి జీవన శైలికి సంబంధించి ఆసక్తికరమైన అంశాలు ఎన్నో ఉన్నాయి.

తల తెగిపోయినా ఆహారం, నీరు తీసుకోకుండా బొద్దింకలు ఎలా బతకగలవనే సందేహాలూ వ్యక్తమవుతున్నాయి. తల తెగినా తర్వాత కూడా ఇవి బతకగలిగే సామర్థ్యానికి, ఆహారం, నీరు లేకుండా ఇవి ఎంత కాలం జీవించగలవనే దానికి మధ్య ఏదైనా సంబంధం ఉందా అని తెలుసుకునేందుకు మేం ప్రయత్నించాం.

దీనికోసం రెండు బొద్దింకలపై ప్రయోగాలు చేశాం. ఈ ప్రయోగ ఫలితాలు, నిపుణుల వివరణలు బొద్దింకల గురించి ఎన్నో ఆసక్తికర విషయాలు తెలుసుకోవడానికి సాయం చేశాయి.

ఫిబ్రవరి 20, మార్చి 4న నేను రెండు బొద్దింకలను పట్టుకున్నాను. వాటికి ఎలాంటి ఆహారం లేదా నీరు ఇవ్వకుండా ఏసీ కంటైనర్‌లో పెట్టి, ప్రతిరోజూ వాటిని గమనించాను.

తొలి వారం అవి చాలా చురుకుగా ఉండి, బయటకి వచ్చేందుకు ప్రయత్నించాయి.

రెండో వారం వాటి ప్రవర్తనలో చాలా తేడా కనిపించింది.

మెల్లమెల్లగా వాటి శరీర కదలికలు తగ్గాయి. చివరికి పూర్తిగా కదలకుండా దాదాపు గాఢ నిద్రలోకి జారుకున్నట్లు అయ్యాయి. కానీ, అవి బతికే ఉన్నాయి. వాటిని కదిపితే మాత్రం కాస్త కదిలేవి. ఆ తర్వాత ఒక మూలకు వెళ్లి మళ్లీ నిశ్చల స్థితిలోకి మారేవి.

రెండు నెలలు బతికిన తర్వాత, ఏప్రిల్ 17న మొదటిసారి పట్టుకున్న బొద్దింక చనిపోయింది. అంటే ఆహారం లేదా నీరు లేకుండా ఈ బొద్దింక 56 రోజులు బతకగలిగింది. అలాగే, రెండో బొద్దింక మే 5న చనిపోయింది. ఇది ఆహారం లేదా నీరు లేకుండా 62 రోజులు బతికింది.

బొద్దింకల శరీరాలకు బయట వైపు వాక్సీ కోటింగ్ (మైనపు పూత) ఉంటుంది.

”ఇది వాటి శరీరం నుంచి నీరు బయటికి రాకుండా సాయపడుతుంది. అందుకే, నీరు లేకుండా అవి ఎక్కువ కాలం బతకగలవు.” అని అమెరికాలోని మసాచుసెట్స్‌ యూనివర్సిటీ ప్రొఫెసర్, బొద్దింకల శరీర నిర్మాణంపై పరిశోధనలు చేసే డాక్టర్ జోసెఫ్ కాంకెల్ చెప్పారు.

ఒకవేళ బొద్దింకలు తమ ప్రారంభ జీవితంలో పెద్ద మొత్తంలో ఆహారాన్ని పొందగలిగి, బాగా తింటే, అవి ప్రతి సీజన్‌లో కేవలం 4 గంటలే తింటాయనే వాస్తవాన్ని ఆయన గుర్తించారు.

బొద్దింకలు తమ శరీరంలో నిల్వ ఉంచిన వ్యర్థాలను రీసైకిల్ చేసుకుంటాయి. వాటిని ప్రొటీన్ లేదా ఎనర్జీ వనరుగా వాడుకుంటాయని డాక్టర్ జోసెఫ్ అన్నారు.

అదనంగా ట్రెహలోజ్ అని పిలిచే గ్లూకోజ్ అణువులతో తయారయ్యే రక్తంలోని చక్కెర కూడా వాటికి శక్తినిచ్చేదిగా ఉపయోగపడుతుందని చెప్పారు.

బొద్దింకల కొవ్వు కణజాలంలో నివసించే బ్యాక్టీరియా కూడా విటమిన్ ఫ్యాక్టరీలాగా ఉపయోగపడుతుందన్నారు.

ఈ కారణాల వల్లనే ఆహారం లేదా నీరు లేకుండా ఈ రెండు బొద్దింకలు సుమారు రెండు నెలల పాటు బతకగలిగాయని తాను గమనించినట్లు డాక్టర్ జోసెఫ్ చెప్పారు.

గోవాలోని పర్యావరణ పరిశోధన సంస్థలో పనిచేసే కీటక శాస్త్రవేత్త డాక్టర్ ప్రనోయ్ బైద్య చెప్పిన ప్రకారం.. శీతాకాలాల్లో కొన్ని జంతువులు తమ శక్తిని కాపాడుకునేందుకు చేపట్టే పనిని ఈ బొద్దింకలు కూడా చేసి ఉంటాయని చెప్పారు.

సుప్తావస్థ అనేది చాలా జంతువులు, ఉభయచరాలు, కీటకాలలో సాధారణ ప్రక్రియ. ఆహారం లభించని శీతాకాల నెలల్లో ఇవి గాఢ నిద్రలోకి వెళుతుంటాయి. శీతాకాలం పూర్తయ్యాక ఈ జీవులు నిద్రనుంచి లేచి, తమ జీవనాన్ని కొనసాగిస్తాయి.

గాఢ నిద్రలో జంతువుల శరీర ఉష్ణోగ్రతలు 1 నుంచి 5 డిగ్రీల సెల్సియస్‌కు పడిపోతాయి. వాటి హృదయ స్పందన రేటు కూడా నిమిషానికి 8 నుంచి 50 సార్లకు పడిపోతుంది. వాటి శక్తిని వృథా చేయకుండా ఈ గాఢ నిద్ర శీతాకాలంలో వాటికి ఉపయోగపడుతుంది.

”ఇతర జీవుల మాదిరి బొద్దింకలు నీటిని తాగినప్పటికీ, గాలిలోని తేమను కూడా ఇవి పీల్చుకోగలవు. అలా, నీటి పోషకాలను పొంది జీవిస్తాయి.” అని కేరళ అగ్రికల్చర్ యూనివర్సిటీ కీటకాల శాస్త్రవేత్త డాక్టర్ ప్రతాపన్ చెప్పారు.

ప్రయోగం ప్రారంభంలోనే, ఆహారం లేకుండా కొన్ని వారాల పాటు బొద్దింకలు బతకగలిగే సామర్థ్యానికి, తల తెగినా అవి జీవించే సామర్థ్యానికి మధ్య ఏదైనా సంబంధం ఉందా అనే దానిపై సందేహం వ్యక్తమైంది.

అయితే, ఈ రెండింటికి కారణం ఒకటి కానప్పటికీ, అవి తలలు లేకుండా తినలేవని కీటక శాస్త్రవేత్త డాక్టర్ ప్రియదర్శన్ ధర్మరాజన్ చెప్పారు. కానీ, తినకుండా జీవించగలిగేలా వాటికున్న సామర్థ్యం అవి అంత తేలికగా మరణించకుండా కాపాడుతుందని ధర్మరాజన్ తెలిపారు.

బొద్దింకలకు ఉండే డీసెంట్రలైజ్డ్ నెర్వస్ సిస్టమ్ (వికేంద్రీకృత నాడీ వ్యవస్థ) వల్ల, తల తెగిన తర్వాత కూడా కొంత సమయం పాటు అవి బతకగలుగుతాయని చెప్పారు.

బొద్దింకల శరీర నిర్మాణం మనుషులు, ఇతర జంతువుల మాదిరి ఉండదు.

” మనుషుల, ఇతర జంతువుల నాడీ వ్యవస్థ కేంద్రీకృతంగా ఉంటుంది. నాడీ వ్యవస్థకు చెందిన నియంత్రణ అంతా ఒక ప్రాంతంలోనే ఉంటుంది. కానీ, కీటకాల విషయంలో అలా కాదు. వాటికి వికేంద్రీకృత నాడీ వ్యవస్థ ఉంటుంది. వాటి మెదడు శ్వాస తీసుకోవడాన్ని లేదా శరీరమంతా ఆక్సీజన్ సరఫరాను నియంత్రించదు” అని వివరించారు.

”ఈ రకమైన నిర్మాణం ఉన్నప్పుడు, శరీర కదలికలను నియంత్రించే న్యూట్రాన్లు శరీరమంతా వ్యాపించే ఉంటాయి. అందుకు తల తెగినా, మొత్తం కదలికలు వెంటనే ఆగిపోవు. శరీరమంతా పూర్తిగా క్రియారహితంగా మారేందుకు కొన్ని గంటల నుంచి కొన్ని రోజుల వరకు పట్టొచ్చు” అని డాక్టర్ ప్రియదర్శన్ చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)