విదేశీ సంపన్నుల కోసం ‘గోల్డ్ కార్డ్’ వీసా స్కీమ్ ప్రారంభించిన ట్రంప్, దీని ధర ఎంతంటే..

సంపన్న విదేశీయులకు వేగంగా అమెరికా వీసాలను అందించే పథకాన్ని అధ్యక్షుడు డోనల్డ్ ట్రంప్ ప్రారంభించారు. ఈ వీసా పొందేందుకు 1 మిలియన్ డాలర్లు అంటే, భారత కరెన్సీలో దాదాపు 9 కోట్ల రూపాయలకు పైగా చెల్లించాల్సి ఉంటుంది.

ఈ కార్డు “అర్హత కలిగిన, అన్ని రకాల వెరిఫికేషన్లు పూర్తయిన వారికి నేరుగా అమెరికా పౌరసత్వం పొందే మార్గం. చాలా ఉత్సాహకరం, మన గొప్ప అమెరికన్ కంపెనీలు తమ అమూల్యమైన ప్రతిభను నిలుపుకోగలవు” అని ట్రంప్ బుధవారం సోషల్ మీడియాలో రాశారు.

ఈ ఏడాది ప్రారంభంలో ప్రకటించిన ది ట్రంప్ గోల్డ్ కార్డ్ అమెరికాకు “భారీ ఎత్తున ప్రయోజనం” కలుగుతుందని నిరూపించుకోగలిగిన వారికి ఇచ్చే వీసాగా ఈ స్కీమ్ అధికారిక వెబ్‌సైట్ పేర్కొంది.

వర్క్ వీసా ఫీజుల పెంపు, ఎలాంటి అధికారిక పత్రాలు లేకుండా అమెరికాలో ఉంటున్న వారిని తిప్పిపంపడం వంటి వలస నియంత్రణ చర్యలను తీవ్రతరం చేస్తున్న సమయంలో ఈ స్కీమ్‌ను ప్రకటించారు.

గోల్డ్ కార్డ్ స్కీమ్ కింద “రికార్డు సమయం”లో అమెరికాలో నివాస హక్కు లభిస్తుందని, అందుకోసం 1 మిలియన్ డాలర్లు చెల్లించాల్సి ఉంటుందని, “ఇది ఆ వ్యక్తి అమెరికాకు పెద్ద ఎత్తున ప్రయోజనం చేకూరుస్తారనేందుకు సాక్ష్యం” అని వెబ్‌సైట్ పేర్కొంది.

కంపెనీలైతే ఉద్యోగుల కోసం 2 మిలియన్ డాలర్లు అంటే దాదాపు 18 కోట్ల రూపాయాలు చెల్లించాల్సి ఉంటుంది. దానితో పాటు అదనపు ఫీజులు కూడా ఉంటాయి. ప్రత్యేక పన్ను రాయితీలు కల్పించే “ప్లాటినం” వెర్షన్ త్వరలో 5 మిలియన్ డాలర్లకు(సుమారు రూ.45 కోట్లు) అందుబాటులోకి వస్తుందని వెబ్‌సైట్ తెలిపింది.

ప్రభుత్వ అదనపు ఫీజులు వ్యక్తిని బట్టి మారొచ్చు. అలాగే దరఖాస్తు పరిశీలనకు ముందు నాన్‌రీఫండ్ కింద 15,000 డాలర్లు ప్రాసెసింగ్ ఫీజుగా చెల్లించాల్సి ఉంటుంది.

ఫిబ్రవరి మొదట్లో ఈ గోల్డ్ కార్డ్ స్కీమ్‌ ప్రకటించినప్పటి నుంచి దీనిపై విమర్శలు వస్తున్నాయి. ఇది అన్యాయమైనదిగా, సంపన్నులకు అనుకూలమైనదిగా కొందరు డెమోక్రాట్లు పేర్కొన్నారు.

ఈ వీసాలు కూడా వివిధ ఆదాయ స్థాయిలు కలిగిన వలసదారులకు అమెరికాలో శాశ్వత నివాసం, పనిచేసుకునే అవకాశం కల్పించే గ్రీన్ కార్డుల వంటివేనని ఈ స్కీమ్ ప్రకటించిన సమయంలో ట్రంప్ అభివర్ణించారు. సాధారణంగా, గ్రీన్‌కార్డులు పొందిన వారు ఐదేళ్లకు అమెరికా పౌరసత్వానికి అర్హలవుతారు.

కానీ, ఈ గోల్డ్ కార్డ్ లక్ష్యం “హై లెవెల్ ప్రొఫెషనల్స్” అని ట్రంప్ చెప్పారు. “మాకు ఉత్పాదకత పెంచేవారు కావాలి” అన్నారు.

“5 మిలియన్ డాలర్లు చెల్లించగలిగేవారు ఉద్యోగాలను సృష్టించగలరు. అవి బాగా అమ్ముడవుతాయి. ఇదో మంచి ఒప్పందం” అని ట్రంప్ అన్నారు.

అయితే, ఈ స్కీమ్ అక్రమ వలసదారులను దేశం నుంచి తిప్పి పంపించేందుకు గణనీయంగా నిధులు వెచ్చిస్తున్న సమయంలో వచ్చింది.

గత సెప్టెంబర్‌లో హెచ్ 1బీ వీసా ఫీజులను లక్ష డాలర్లకు పెంచుతూ అధ్యక్షుడు ట్రంప్ ఆదేశాలు జారీ చేశారు.

ఈ నిర్ణయం అమెరికాలో చదువుకుంటున్న విద్యార్థులు, టెక్ కంపెనీలకు ఆందోళన కలిగించింది. ఆ తర్వాత, ఈ పెంచిన ఫీజు ప్రస్తుతం విదేశాల్లో ఉన్న కొత్త దరఖాస్తుదారులకు మాత్రమే వర్తిస్తుందని స్పష్టం చేసింది.

( బీబీసీ కోసం కలెక్టివ్ న్యూస్‌రూమ్ ప్రచురణ)