Source :- SIRAJLIVE NEWS
“ആഹാരമായിരിക്കട്ടെ നിങ്ങളുടെ ഔഷധം, ഔഷധം നിങ്ങളുടെ ആഹാരവും’ വൈദ്യശാസ്ത്രത്തിന്റെ പിതാവ് ഹിപ്പോക്രാറ്റസിന്റെ വാക്കുകള്‍ അന്വര്‍ഥമാക്കുന്ന കാലഘട്ടത്തിലൂടെയാണ് നാം കടന്നു പോകുന്നത്. ആഹാരമാണ് ഔഷധം എന്ന് ആയുര്‍വേദവും അടിവരയിടുമ്പോള്‍ ലോകത്ത് പത്തില്‍ ഒരാള്‍ക്ക് ഭക്ഷ്യജന്യ രോഗങ്ങള്‍ പിടിപെടുന്നു എന്ന വാര്‍ത്ത അക്ഷരാര്‍ഥത്തില്‍ ഞെട്ടലാണ് ഉളവാക്കിയത്. ഭക്ഷണം ശ്രദ്ധിച്ചില്ലെങ്കില്‍ 200ലധികം രോഗങ്ങള്‍ മനുഷ്യരെ പിടികൂടും എന്ന അവസ്ഥ വിസ്മരിക്കാന്‍ പാടില്ല. വീട്ടില്‍ ഉണ്ടാക്കുന്ന ഭക്ഷണം വളരെ കുറച്ച് കഴിച്ച്, ഹോട്ടലുകളിലെ വ്യത്യസ്ത രുചിക്കൂട്ടുകളിലെ ആകര്‍ഷകമായ ചേരുവകളില്‍ ഉള്ളത് ഓര്‍ഡര്‍ ചെയ്യുമ്പോള്‍ ജാഗ്രത പാലിക്കുക. അല്ലെങ്കില്‍ നമ്മുടെ ഏറ്റവും വലിയ സമ്പത്തായ ആരോഗ്യത്തിന് വലിയ ക്ഷതമുണ്ടാകുമെന്ന് തിരിച്ചറിയേണ്ട സമയം അതിക്രമിച്ചിരിക്കുന്നു. ലോകത്തിലെ എല്ലാ ജീവജാലങ്ങളുടെയും നിലനില്‍പ്പിന് ആഹാരം ആവശ്യമാണ്. ആഹാരം ഒരു സംസ്‌കാരമായിരുന്നു. പക്ഷേ ഇപ്പോള്‍ അത് സ്വാദില്‍ അധിഷ്ഠിതമായ ഒരു ബിസിനസ്സായി മാറിയിരിക്കുന്നു. പ്രകൃതിയിലെ കാലാവസ്ഥ കണക്കാക്കി ഭക്ഷണം ശീലിച്ചവര്‍ക്ക് കാലത്തിന്റെ മാറ്റങ്ങളായി വന്ന വിദേശ പേരുകളിലുള്ള ഭക്ഷണം വലിയ വില്ലനായി മാറിയിരിക്കുന്നു. ശരീരത്തില്‍ ഭക്ഷണം എന്ത് മാറ്റങ്ങളുണ്ടാക്കുന്നു എന്ന് നോക്കാതെ കഴിക്കുന്ന ന്യൂജന്‍ ശീലങ്ങള്‍ നമ്മുടെ ജീവിതത്തെ വരിഞ്ഞു മുറുക്കിയിരിക്കുന്നു.
ജീവിക്കുന്ന ചുറ്റുവട്ടങ്ങളില്‍ വളരുന്ന സസ്യങ്ങള്‍ ഉള്‍പ്പെടെയുള്ള ആരോഗ്യകരമായ വസ്തുക്കള്‍ ഭക്ഷണത്തില്‍ ഉള്‍പ്പെടുത്തണമെന്ന സാംസ്‌കാരികമായ കാഴ്ചപ്പാടിന് ഭംഗം വന്നത് കൂണുകള്‍ പോലെ മുളച്ചു പൊങ്ങുന്ന ഫാസ്റ്റ് ഫുഡ് / ജങ്ക് ഫുഡ് സംസ്‌കാരം വന്നതിനുശേഷമാണ്. നാം കഴിക്കുന്ന ഭക്ഷണമാണ് ദിവസവും നമ്മെ മുന്നോട്ട് നയിക്കുന്നത്. കൃത്യസമയത്ത് ഭക്ഷണം കഴിക്കുന്നത് ഊര്‍ജ നഷ്ടം ഇല്ലാതാക്കാനും രോഗങ്ങളെ അകറ്റി നിര്‍ത്താനും സഹായിക്കുന്നു എന്ന കാര്യം പാടെ മറന്ന് പുലരുവോളം പ്രവര്‍ത്തിക്കുന്ന തട്ടുകടയില്‍ രാത്രിയുടെ അന്ത്യയാമങ്ങളില്‍ പോലും ഭക്ഷണം കഴിക്കുന്നവരുടെ എണ്ണം പെരുകി വരുന്നു. 80 അവയവങ്ങള്‍ ഉള്ള ഒരു യന്ത്രമാണ് മനുഷ്യശരീരം എന്നതും പ്രതിദിനം 2,400 കലോറി ഊര്‍ജത്തിനുള്ള ഭക്ഷണമേ ശരീരത്തിന് ആവശ്യമുള്ളൂ എന്ന കാര്യവും മലയാളികള്‍ വിസ്മരിച്ചിട്ട് വര്‍ഷങ്ങള്‍ ഏറെയായി.
എന്താണ് നല്ല ഭക്ഷണം
നല്ല ആരോഗ്യം മനുഷ്യന്റെ അടിസ്ഥാന അവകാശമാണ്. പോഷകാഹാരവും ന്യൂട്രിയന്‍സും ശരീരത്തിന്റെ വളര്‍ച്ചക്ക് അത്യന്താപേക്ഷിതമാണ്. കാര്‍ബോ ഹൈഡ്രേറ്റുകള്‍ (അന്നജം), പ്രോട്ടീന്‍, ധാതുക്കള്‍, മത്സ്യം, വിറ്റാമിനുകള്‍, ചെറു ധാന്യങ്ങള്‍, നാരുകള്‍, പഴങ്ങള്‍, പച്ചക്കറികള്‍, ഇലക്കറികള്‍ എന്നിവ ആഹാരത്തില്‍ ഉള്‍പ്പെടുത്തിയാല്‍ ആഹാരം സമീകൃതമാകും. ലോകാരോഗ്യ സംഘടനയുടെ അഭിപ്രായത്തില്‍ പ്രതിദിനം 400 ഗ്രാം പച്ചക്കറികള്‍, പഴവര്‍ഗങ്ങള്‍ എന്നിവ ആഹാരത്തില്‍ ഉള്‍പ്പെടുത്തേണ്ടത് മനുഷ്യ ശരീരത്തിന്റെ വളര്‍ച്ചക്ക് ആവശ്യമാണ്. നാം കഴിക്കുന്ന ഭക്ഷണത്തിന്റെ ഒരു ഭാഗം ശരീരത്തിന് ആവശ്യമില്ലാത്തതും ഉപകാരമില്ലാത്തതുമാണ്. പ്രതിദിനം 10 മുതല്‍ 15 ഗ്ലാസ് വെള്ളം കുടിക്കുന്നതും അര മണിക്കൂര്‍ വ്യായാമം ചെയ്യുന്നതും നല്ല ആരോഗ്യ ശീലമാണ്. ഭക്ഷണം പതുക്കെ ചവക്കുക, ഓരോ കഷണവും ആസ്വദിച്ച് കഴിക്കുക എന്നതും നിത്യമായി ശീലിക്കേണ്ടതാണ്. ഭക്ഷണം കഴിക്കുമ്പോള്‍ ഫോണ്‍ ഉപയോഗം ഒഴിവാക്കണം. ടി വിയുടെയും കമ്പ്യൂട്ടറിന്റെയും മുന്നിലിരുന്ന് ഭക്ഷണം കഴിക്കുന്നത് ഭക്ഷണവും ശരീരവും തമ്മിലുള്ള ജൈവിക രസതന്ത്രത്തെ ഇല്ലാതാക്കുന്നതാണ്.
ബാക്ടീരിയ ഭക്ഷണത്തില്‍ കടന്നാല്‍ ഏതാനും മണിക്കൂറിനുള്ളില്‍ ദശലക്ഷക്കണക്കായി മാറുന്നതിനാല്‍ ഭക്ഷണം കഴിക്കുന്നതിന് മുമ്പ് ബാക്ടീരിയയുടെ സാന്നിധ്യം ഇല്ല എന്ന് ഉറപ്പുവരുത്തേണ്ടതുണ്ട്.
പ്രഭാത ഭക്ഷണം ഒരു കാരണവശാലും ഒഴിവാക്കരുത്. ഇത് തലച്ചോറിന്റെ പ്രവര്‍ത്തനത്തെ ബാധിക്കുന്നതാണ്. 100 ഗ്രാം ചെറു ധാന്യത്തില്‍ നിന്ന് 378 കലോറി ഊര്‍ജം ലഭിക്കുന്നതിനാല്‍, ഭക്ഷണത്തില്‍ ചെറു ധാന്യങ്ങള്‍ ധാരാളം ഉള്‍പ്പെടുത്തേണ്ടതുണ്ട്. ലോകത്ത് പാകം ചെയ്യുന്ന ഭക്ഷണത്തിന്റെ 17 ശതമാനം ആഹാരവും പാഴാക്കപ്പെടുന്നതിനാല്‍ കൃത്യമായ അളവിലും മുന്‍കൂട്ടിയുള്ള ധാരണയിലും ഭക്ഷണം ഉണ്ടാക്കാന്‍ ശ്രദ്ധിക്കണം. റെഡി ടു ഈറ്റ് ഭക്ഷണം ധാരാളമായി വിപണിയില്‍ എത്തിയതോടെ ലോകത്തെ ജനങ്ങളില്‍ മൂന്നില്‍ ഒന്നും അമിതവണ്ണം ഉള്ളവരായി മാറി. ജീവിതത്തിന്റെ പരക്കം പാച്ചിലില്‍ സമയമില്ലാത്തതിനാലും രുചിയുടെ സ്വാധീനം ഭക്ഷണത്തില്‍ അമിതമായി ഉള്‍പ്പെടുത്തിയതിനാലും റെഡി ടു ഈറ്റ് ഭക്ഷണം വ്യാപകമായി മാറി. കൃത്യമായി ലേബലുകള്‍ പരിശോധിക്കാതെ ഇത്തരം ഭക്ഷണം കഴിച്ചാല്‍ നാം അറിയാതെ നമ്മുടെ ആരോഗ്യം ക്ഷയിക്കാന്‍ തുടങ്ങും. ജങ്ക്/ ഫാസ്റ്റ് ഫുഡ് സംസ്‌കാരം പിടിമുറുക്കിയതോടെ നാവിൻ തുമ്പത്ത് മാത്രം അനുഭവപ്പെടുന്ന സ്വാദ് ശരീരത്തിന് വ്യാധിയായി മാറാന്‍ തുടങ്ങി. ലോകാരോഗ്യ സംഘടനയുടെ അഭിപ്രായത്തില്‍ പ്രതിദിനം അഞ്ച് ഗ്രാം ഉപ്പ്, 25 ഗ്രാം പഞ്ചസാര, അഞ്ച് ഗ്രാം ഓയില്‍ എന്നിവ മാത്രമേ ഭക്ഷണത്തില്‍ ഉള്‍പ്പെടുത്താവൂ. സോസുകള്‍, ബിസ്‌ക്കറ്റ്, ബേക്കറി ഉത്പന്നങ്ങള്‍, അച്ചാറുകള്‍, പപ്പടം എന്നിവയില്‍ ഒളിഞ്ഞിരിക്കുന്ന ഉപ്പ്, പഞ്ചസാര എന്നിവ വലിയ അപകടമാണ് ശരീരത്തിന് ഉണ്ടാക്കുന്നത് എന്ന് നാം തിരിച്ചറിയേണ്ടതുണ്ട്. ഉറങ്ങുന്നതിന് രണ്ട് മണിക്കൂര്‍ മുമ്പെങ്കിലും ഭക്ഷണം കഴിക്കാന്‍ ശീലിക്കണം. കുടിക്കുന്ന വെള്ളം വളരെ ശ്രദ്ധിക്കണം. പുറത്ത് പോകുമ്പോള്‍ കുപ്പിയില്‍ വെള്ളം കരുതുന്നത് ആരോഗ്യത്തിന് കവചം ഒരുക്കാന്‍ കാരണമാകും. ഒരു വ്യക്തിയുടെ ആരോഗ്യത്തെ നിലനിര്‍ത്തുന്നതില്‍ അയാള്‍ കഴിക്കുന്ന ഭക്ഷണത്തിന് വലിയ പങ്കുണ്ട്. കഴിക്കുന്ന ഭക്ഷണം ശരീര വളര്‍ച്ചക്കും ശരീര സംരക്ഷണത്തിനും ഊര്‍ജം ലഭിക്കുന്നതിനും ആയിരിക്കണം. ആധുനിക കാലഘട്ടം രുചി വൈവിധ്യത്തിന് വലിയ പ്രാധാന്യം നല്‍കുകയും അനാരോഗ്യ ഭക്ഷണശീലങ്ങള്‍ ചുറ്റുവട്ടത്ത് വ്യാപിക്കുകയും ചെയ്യുമ്പോള്‍ ഇമവെട്ടാതെ ശ്രദ്ധിച്ചില്ലെങ്കില്‍ പ്രമേഹം, രക്തസമ്മര്‍ദം, ക്യാന്‍സര്‍, ഹൃദ്രോഗം, പക്ഷാഘാതം, കരള്‍ രോഗങ്ങള്‍, അമിതവണ്ണം എന്നിവയുടെ നീരാളി പിടിത്തത്തില്‍ നിന്ന് നമുക്ക് മോചനം ലഭിക്കില്ല.
എന്താണ്
ആരോഗ്യം
ലോകാരോഗ്യ സംഘടനയുടെ അഭിപ്രായത്തില്‍ രോഗങ്ങള്‍ ഇല്ലാത്ത അവസ്ഥയാണ് ആരോഗ്യം എന്നത് കൊണ്ട് ഉദ്ദേശിക്കുന്നത്. സമ്പൂര്‍ണ ശാരീരിക- മാനസിക -സാമൂഹിക സുസ്ഥിതി കൂടിയാണ് ആരോഗ്യം എന്ന് തിരിച്ചറിയാന്‍ നാം ഇനിയും വൈകിക്കൂടാ. അടുക്കും ചിട്ടയുമില്ലാത്ത ജീവിതരീതിയും ഭക്ഷണ ശീലവുമാണ് മിക്ക രോഗങ്ങള്‍ക്കും കാരണം. ഇനി നമുക്ക് തീരുമാനിക്കാം, നമ്മുടെ ശരീരം സൂക്ഷിക്കണോ അതോ രോഗങ്ങള്‍ക്ക് വിട്ടുകൊടുക്കണമോ എന്ന്.
