ટ્રમ્પે હવે આઇફોન અને યુરોપિયન સંઘની વસ્તુઓ પર ટેરિફ લાદવાની ધમકી આપી – ન્યૂઝ અપડેટ

અપડેટેડ 3 કલાક પહેલા

અમેરિકન રાષ્ટ્રપતિ ડોનાલ્ડ ટ્રમ્પે ઍપલને અમેરિકાની બહાર બનેલા આઇફોન પર 25 ટકા ટેરિફ લગાડવાની ધમકી આપી છે. તેમણે આ સાથે જ જૂન મહિનાથી યુરોપિયન સંઘ પર 50 ટકા ટેરિફ લાદવાની વાત કરી છે.

ડોનાલ્ડ ટ્રમ્પે શુક્રવારે પોતાના સોશિયલ મીડિયા પ્લૅટફૉર્મ ટ્રુથ સોશિયલ પર એક પોસ્ટમાં કહ્યું, “મેં અગાઉથી જ ઍપલના ટિમ કૂકને કહી દીધેલું કે જે આઇફોન અમેરિકામાં વેચાશે, એ અમેરિકાની બનાવટના જ હોવા જોઈએ, ના કે ભારત કે અન્ય કોઈ દેશમાં બનેલા.”

તેમણે કહ્યું, “જો આવું નહીં થાય તો ઍપલે અમેરિકાને ઓછામાં ઓછો 25 ટકા ટેરિફ ચૂકવવો પડશે.”

ટ્રમ્પે પોતાની બીજી પોસ્ટમાં યુરોપિયન સંઘ પર ટેરિફ લાદવા અંગે કહ્યું, “મૂળે અમેરિકા સાથે વેપારમાં ફાયદો મેળવવા માટે બનાવાયેલા યુરોપિયન સંઘ સાથે સમાધાન કરવાનું ખૂબ જ મુશ્કેલ બનતું જઈ રહ્યું છે.”

તેમણે કહ્યું, “તેમના ટ્રેડ બેરિયર્સ, વેટ ટેક્સ, કારણ વગરની કૉર્પોરેટ પેનલ્ટી, મૉનિટરી મૅન્યુપલેશન અને અમેરિકન કંપનીઓ પર ગેરવાજબી કેસો જવાં કારણોથી અમેરિકાને દર વર્ષે 25 કરોડ ડૉલરની વેપાર ખાધ થઈ રહી છે, જે બિલકુલ અસ્વીકાર્ય છે.”

“તેમની સાથેની અમારી વાતચીત કોઈ નક્કર પરિણામ સુધી નથી પહોંચી રહી. તેથી હું 1 જૂન, 2025થી યુરોપિયન સંઘન પર સીધો જ 50 ટકાનો ટેરિફ લાદવાની ભલામણ કરી રહ્યો છું.”

જોકે, ટ્રમ્પે એ વાત પણ સ્પષ્ટ કરી દીધી કે જો કોઈ વસ્તુ અમેરિકામાં જ બની કે તૈયાર થઈ હોય, તો તેના પર ટેરિફ નહીં લાગે.

અમેરિકાના વિદેશ વિભાગે કહ્યું છે કે સુદાનની સેનાએ તેમના વિરોધી રૅપિડ સપોર્ટ ફોર્સિસ (આરએસએફ) સામે રાસાયણિક હથિયારોનો ઉપયોગ કર્યો છે.

સુદાનના ગૃહયુદ્ધમાં સારાયણિક હથિયારોના ઉપયોગની વાત વહેતી થયા બાદ અમેરિકાએ સુદાન પર નવા પ્રતિબંધો લગાવવાની વાત કરી છે.

અમેરિકાના વિદેશ વિભાગનાં પ્રવક્તા ટૅમી બ્રૂસે જણાવ્યું કે 6ઠ્ઠી જૂનથી સુદાનમાં કોઈ પણ સામાન નહીં જશે.

અમેરિકાએ એ પણ ઍલાન કર્યું કે સુદાનને આપવામાં આવેલી લોન પણ સીમિત કરવામાં આવી છે.

સુદાનના ગૃહયુદ્ધમાં બંને પક્ષો પર પહેલાથી જ યુદ્ધ અપરાધના આરોપો લાગેલા છે.

દેશમાં લગભગ બે વર્ષથી સુદાનની સેના અને આરએસએફ વચ્ચે સત્તા માટે ભીષણ સંઘર્ષ ચાલી રહ્યો છે. આ સંઘર્ષમાં અત્યારસુધી દોઢ લાખ લોકો માર્યા ગયા છે.

બીબીસીએ અમેરિકાની કાર્યવાહી પર પ્રતિક્રિયા માટે સુદાનનો સંપર્ક કર્યો છે પરંતુ અધિકારીઓએ જવાબ નથી આપ્યો.

અમેરિકાના રાષ્ટ્રપતિ ડોનાલ્ડ ટ્રમ્પે નવી ટેરિફ નીતિના ઍલાન બાદ અમેરિકા અને ભારત વચ્ચે દ્વિપક્ષીય વેપાર સમજૂતી માટે ગુરુવારે ફરીથી વૉશિંગ્ટનમાં બેઠક થઈ.

બેઠકમાં વાણિજ્ય અ ઉદ્યોગમંત્રી પીયૂષ ગોયલે અમેરિકાના વાણિજ્ય મંત્રી હૉવર્ડ લુટનિક સાથે પ્રસ્તાવિત દ્વિપક્ષીય વેપાર સમજૂતી પર ચર્ચા કરી.

આ પહેલાં 20 મેના રોજ પીયૂષ ગોયલે વેપાર સમજૂતીને લઈને લુટનિક સાથે બેઠક કરી હતી.

પીયૂષ ગોયલે ઍક્સ પર લખ્યું કે “બંને દેશોનાં વ્યાપારિક હિતો માટે અમેરિકાના વાણિજ્ય મંત્રી હૉવર્ડ લુટનિક સાથે સકારાત્મક વાતચીત થઈ. અમે પોતાનાં વ્યવસાયો અને લોકો માટેની તકો વધારવા માટે પ્રતિબદ્ધ છે.”

અમેરિકાએ ભારત પર 26 ટકા ટેરિફ લગાવ્યો હતો. પરંતુ પછી તેના પર 90 દિવસની રોકની ઘોષણા કરી હતી. જે 8મી જુલાઈની મધ્યરાત્રીએ સમાપ્ત થઈ રહી છે.

બાંગ્લાદેશમાં વચગાળાની સરકારના પ્રમુખ સલાહકાર મોહમ્મદ યુનૂસ રાજીનામું આપવા માટે વિચારી રહ્યા છે.

આ મામલાને લઈને વિદ્યાર્થી નેતા અને નૅશનલ સિટિઝન પાર્ટીના સંયોજક નાહિદ ઇસ્લામે મોહમ્મદ યુનૂસના નિવાસસ્થાન જમુના પર જઈને મુલાકાત કરી હતી.

નાહિદ ઇસ્લામે બીબીસીને જણાવ્યું, “અમે દેશની વર્તમાન સ્થિતિને લઈને સાહેબના રાજીનામાની ખબરો સાંભળતા હતા. મુખ્ય સલાહકારે ચિંતા વ્યક્ત કરી કે દેશની વર્તમાન સ્થિતિમાં તેઓ કામ નહીં કરી શકે.”

ઇસ્લામે જણાવ્યું, “તેમણે કહ્યું કે જો રાજનૈતિક પાર્ટી ઇચ્છે તો તેઓ અત્યારે જ રાજીનામું આપવા તૈયાર છે. જ્યાં સુધી તેમને આશ્વાસન નહીં મળે તેઓ શા માટે રોકાય. જે પ્રકારે આંદોલન ચાલી રહ્યું છે કે બંધકો બનાવાઇ રહ્યા છે, હું આ પ્રકારે કામ નહીં કરી શકું.”

આ પહલાં પણ મોહમ્મદ યુનૂસે ઢાકામાં ઍડવાઇઝરી કાઉન્સિલની બેઠકમાં દેશની હાલત પર ચિંતા વ્યક્ત કરી હતી.

બાંગ્લાદેશ નૅશનલિસ્ટ પાર્ટીએ ગુરુવારે જ વચગાળાની સરકારના બે સલાહકારો મહફૂઝ આલમ અને આસિફ મહમૂદ તથા રાષ્ટ્રીય સુરક્ષા સલાહકાર ખલીલુર રહમાનના રાજીનામાની અથવા તો તેમને સસ્પેન્ડ કરવાની માગ કરી હતી.

વૉશિંગ્ટન ડીસીમાં એક યહૂદી સંગ્રહાલયની બહાર ઇઝરાયલી દૂતાવાસના બે કર્મચારીઓની ગોળી મારીને હત્યા કરનારા સંદિગ્ધ પર હત્યા ઉપરાંત હથિયાર રાખવા સંબંધીત આરોપો પણ લાગ્યા છે.

અમેરિકાના ઍટર્ની જીનિન પિરોએ એક પ્રેસ કૉન્ફરન્સમાં કહ્યું કે બુધવાર રાતના હુમલાની ધૃણા અપરાધના રૂપે તપાસ થઈ રહી છે. હજુ વધુ આરોપો લગાવી શકાય છે.

તેમણે ગુરુવારે કહ્યું કે “આ કેસ મૃત્યુદંડ આપવાને યોગ્ય છે.”

એફબીઆઈએ આ હત્યાને ‘યહૂદી સમુદાયના વિરુદ્ધ એક આંતકવાદી તથા નિર્દેશિત હિંસાનું કૃત્ય’ ગણાવ્યું છે.

પોલીસે જણાવ્યું હતું કે બુધવારે વૉશિંગ્ટન ડીસીમાં કૅપિટલ યહૂદી સંગ્રહાલયના એક કાર્યક્રમમાં યારોન લિસ્ચિંસ્કી તથા સારા લિન મિલગ્રિમની ગોળી મારી હત્યા કરી દેવામાં આવી હતી. પોલીસે એમ પણ જણાવ્યું કે સંદિગ્ઘએ કાર્યક્રમની બહાર નીકળતા ચાર લોકો પર ગોળી ચલાવી હતી. જે પૈકી બેનાં મોત થયાં. પોલીસે સંદિગ્ધની ઓળખ શિકાગો નિવાસી 30 વર્ષીય એલિયાસ રોડ્રીગેઝના રૂપમાં કરી છે.

અમેરિકાથી બીબીસી સંવાદદાતા કાયલા એપસ્ટીન જણાવે છે કે ટ્રમ્પ પ્રશાસને હાર્વર્ડ યુનિવર્સિટીમાં આંતરરાષ્ટ્રીય વિદ્યાર્થીઓને પ્રવેશ આપવાના અધિકારને સમાપ્ત કરી દીધો છે. જેને કારણે અમેરિકાના પ્રશાસનનો હવે તેના સૌથી જૂની યુનિવર્સિટી સાથેનો સંઘર્ષ વધી ગયો છે.

અમેરિકાના ગૃહ સુરક્ષા મંત્રી ક્રિસ્ટી નોએમે સોશિયલ મીડિયા પ્લૅટફૉર્મ ઍક્સ પર લખ્યું કે “પ્રશાસન હાર્વર્ડ દ્વારા કાયદાનું પાલન ન થવાને કારણે આંતરરાષ્ટ્રીય વિદ્યાર્થીઓનો પ્રવેશ કાર્યક્રમને રદ કરી દેવામાં આવ્યો છે.”

તેમણે લખ્યું કે “આ દેશભરનાં તમામ વિશ્વવિદ્યાલયો તથા શૈક્ષણિક સંસ્થાનો માટે ચેતવણી સમાન છે.”

હાર્વર્ડ યુનિવર્સિટીએ એક નિવેદનમાં ટ્રમ્પ પ્રશાસનના આ નિર્ણયને ‘ગેરકાયદે’ ગણાવ્યો છે.

હાર્વર્ડ યુનિવર્સિટીએ ટ્રમ્પ પ્રશાસનને આ મામલે પ્રતિક્રિયા આપતાં કહ્યું, “અમે પોતાના આંતરરાષ્ટ્રીય વિદ્યાર્થીઓ તથા વિદ્વાનોના પ્રવેશ આપવાની ક્ષમતા રાખવાના સંકલ્પ પર કાયમ છીએ, એ વિદ્યાર્થીઓ તથા વિદ્વાનો માટે કે જેઓ 140 દેશોથી અહીં આવે છે અને વિશ્વવિદ્યાલયને તથા આ રાષ્ટ્રને સમૃદ્ધ બનાવે છે.”

હાર્વર્ડે વધુમાં કહ્યું, “અમે પોતાના સમુદાયના સભ્યોને માર્ગદર્શન અને સહાયતા આપવા માટે ઝડપથી કામ કરી રહ્યા છીએ. આ પ્રતિશોધાત્મક કાર્યવાહીથી હાર્વર્ડ સમુદાય ને આપણા દેશને ગંભીર નુકસાન પહોંચવાનું જોખમ છે. આ હાર્વર્ડનાં શૈક્ષણિક તથા સંશોધનના મિશનને નબળું પાડવાનો પ્રયાસ છે.”

ટ્રમ્પ પ્રશાસનના આ નિર્ણયને કારણે હાર્વર્ડમાં અભ્યાસ કરનારા હજારો આંતરરાષ્ટ્રીય વિદ્યાર્થીઓ પર તેની અસર પડી શકે છે.

હાર્વર્ડ યુનિવર્સિટીના આંકડા પ્રમાણે છેલ્લા શૈક્ષણિક વર્ષમાં છ હજાર સાતસોથી વધુ આંતરરાષ્ટ્રીય વિદ્યાર્થીઓએ અહીં પ્રવેશ મેળવ્યો હતો. આ સંખ્યા કુલ વિદ્યાર્થીઓની સંખ્યાના 27 ટકા છે.

અમેરિકાના સૅન ડિયાગોમાં ગુરુવારે સવારે એક પ્લેન ક્રૅશ થઈ ગયું હતું, વિમાન રહેણાક વિસ્તારમાં પડ્યું જેને કારણે 2 લોકોનાં મૃત્યુ થઈ ગયાં હતાં. જેમાં વિખ્યાત મ્યુઝિક એજન્ટ ડેવી શાપ્રિયોનું પણ મૃત્યુ થયું છે. જોકે, હજુ કેટલા લોકો હતાહત થયા છે તેની ચોક્ક્સ જાણકારી નથી મળી રહી.

આ વિમાન રહેણાક વિસ્તારમાં ઘણાં ઘરો સાથે ટકરાયું હતું. જેને કારણે ઘરોમાં આગ લાગી ગઈ. અધિકારીઓએ ઘણા લોકોને આ અકસ્માતમાંથી સુરક્ષિત બહાર કાઢ્યા છે.

આ અકસ્માતમાં ઘણી ગાડીઓમાં પણ આગ લાગી ગઈ હતી. સ્થાનિક સમય પ્રમાણે આ ઘટના 3-45 પર ઘટી.

જણાવાય છે કે આ વિસ્તારમાં ધુમ્મસને કારણે આ વિમાન અકસ્માત થયો છે. જે વિમાન આ અકસ્માતનો શિકાર થયું તે સેસના 550 હતું, આ નાના વિમાનમાં 8થી 10 લોકો મુસાફરી કરી શકે છે.

બીબીસી માટે કલેક્ટિવ ન્યૂઝરૂમનું પ્રકાશન