അഭ്യൂഹങ്ങള്‍ക്ക് വിരാമം; മുഹമ്മദ് സലായുടെ അടുത്ത തട്ടകം ട്രാബ്സോണ്‍സ്പോര്‍

Source :- SIRAJLIVE NEWS

അങ്കാറ | മാസങ്ങളോളം നീണ്ട അഭ്യൂഹങ്ങള്‍ക്കൊടുവില്‍, ഈജിപ്ഷ്യന്‍ ഫുട്‌ബോളര്‍ മുഹമ്മദ് സലായുടെ അടുത്ത തട്ടകം സ്ഥിരീകരിക്കപ്പെട്ടു. തുര്‍ക്കിഷ് ക്ലബായ ട്രാബ്സോണ്‍സ്പോറുമായി സലാ രണ്ട് വര്‍ഷത്തെ കരാറില്‍ ഒപ്പുവെച്ചു. ആന്‍ഫീല്‍ഡിലെ കരാര്‍ കാലാവധി അവസാനിച്ചതിനെ തുടര്‍ന്നാണ് താരം പുതിയ ക്ലബിലേക്ക് ചേക്കേറിയത്.

വര്‍ഷങ്ങളോളമായി സഊദി പ്രോ ലീഗ് ക്ലബുകള്‍ സലായെ നോട്ടമിട്ടിരുന്നു. ലോക ഫുട്‌ബോളിലെ ഏറ്റവും വലിയ താരങ്ങളിലൊരാളായ അദ്ദേഹത്തിന് മേജര്‍ ലീഗ് സോക്കര്‍ (MLS) സാധ്യതയുള്ള ലക്ഷ്യസ്ഥാനമായും കണക്കാക്കപ്പെട്ടിരുന്നു. എന്നാല്‍, ട്രാബ്സോണ്‍സ്പോറില്‍ ചേര്‍ന്നുകൊണ്ട് 34-കാരനായ താരം യൂറോപ്പില്‍ തന്നെ തുടരാന്‍ തീരുമാനിക്കുകയായിരുന്നു.

അല്‍-ഇത്തിഹാദ് അവസാന നിമിഷം വരെ അദ്ദേഹത്തെ സ്വന്തമാക്കാന്‍ ശ്രമം നടത്തിയിരുന്നു. കൂടാതെ, അമേരിക്കയിലേക്ക് കൊണ്ടുവരാന്‍ താത്പര്യം പ്രകടിപ്പിച്ച എം എല്‍ എസ് ക്ലബുകളില്‍ സ്‌പോര്‍ട്ടിംഗ് കാന്‍സാസ് സിറ്റിയും ഉള്‍പ്പെട്ടിരുന്നു. ഈ രണ്ടിടത്തും വലിയ സാമ്പത്തിക നേട്ടം ലഭിക്കുമായിരുന്നു. എന്നിട്ടും, യൂറോപ്യന്‍ ഫുട്‌ബോളില്‍ തന്നെ തുടരാനാണ് സല തീരുമാനിച്ചത്.

തുര്‍ക്കി ക്ലബില്‍ സലാക്ക് ലഭിക്കുക മികച്ച തുകയായിരിക്കും. തുര്‍ക്കിഷ് സ്റ്റോക്ക് എക്‌സ്‌ചേഞ്ചില്‍ നല്‍കിയ വിവരമനുസരിച്ച്, പ്രതിഫലമായി ഒരു സീസണില്‍ 14.5 ദശലക്ഷം പൗണ്ടും, ‘സല’ ബ്രാന്‍ഡിലുള്ള ഉത്പന്നങ്ങളില്‍ നിന്നുള്ള വരുമാനത്തിന്റെ 20 ശതമാനം വിഹിതവും താരത്തിന് ലഭിക്കുമെന്ന് ട്രാബ്‌സോണ്‍സ്‌പോര്‍ സ്ഥിരീകരിച്ചു.

കഴിഞ്ഞ സീസണിലെ സൂപ്പര്‍ ലിഗില്‍ മൂന്നാം സ്ഥാനത്തെത്തിയ ട്രാബ്‌സോണ്‍സ്‌പോര്‍, ഈ മാസം നടക്കുന്ന യൂറോപ്പ ലീഗ് പ്ലേ-ഓഫില്‍ മത്സരിക്കും. രണ്ട് പാദങ്ങളിലായുള്ള മത്സരങ്ങളില്‍ വിജയിച്ചാല്‍ അവര്‍ക്ക് ലീഗ് ഘട്ടത്തിലേക്ക് യോഗ്യത നേടാം. എന്നാല്‍, പരാജയപ്പെട്ടാല്‍ കോണ്‍ഫറന്‍സ് ലീഗിലേക്ക് മാറേണ്ടിവരും.

തുര്‍ക്കിയിലെ ഏറ്റവും വലിയ ക്ലബുകള്‍ക്കുള്ളതു പോലെയുള്ള ആഗോള പ്രശസ്തി ഇല്ലെങ്കിലും, ട്രാബ്സോണ്‍സ്പോര്‍ ഒട്ടും നിസ്സാരരല്ല. ഏഴ് തവണ തുര്‍ക്കിഷ് ചാമ്പ്യന്മാരായ അവര്‍, 2021-22 സീസണില്‍ സൂപ്പര്‍ ലീഗ് കിരീടവും കഴിഞ്ഞ സീസണില്‍ തുര്‍ക്കിഷ് കപ്പും സ്വന്തമാക്കിയിരുന്നു. ഫാത്തിഹ് ടെക്കെയുടെ നേതൃത്വത്തിലുള്ള ടീം ലീഗില്‍ മൂന്നാം സ്ഥാനത്തെത്തുകയും, അതുവഴി യൂറോപ്യന്‍ മത്സരങ്ങളിലേക്ക് യോഗ്യത നേടാനുള്ള മറ്റൊരു അവസരം സ്വന്തമാക്കുകയും ചെയ്തു.

Content Highlights:
Mohamed Salah transfer rumors have finally come to an end with reports linking him to Trabzonspor. The Egyptian football star is expected to make a major move to the Turkish club. This decision marks a significant new chapter in Salah’s professional football career.