છોકરીઓ અચાનક હસવા-રડવા લાગતી, ચીસો પાડતી, ‘ભૂત દેખાયા’ની અફવા ફેલાતાં 600 વિદ્યાર્થીઓએ આશ્રમશાળા છોડી – ગ્રાઉન્ડ રિપોર્ટ

ભૂત દેખાયાની અફવાને કારણે અમરાવતી જિલ્લાના દુર્ગમ વિસ્તાર મેળઘાટમાં આવેલા ડોમા ગામની એક આદિવાસી આશ્રમશાળા સાવ સૂની પડી ગઈ છે.

ભયને કારણે આશ્રમશાળાના 606 વિદ્યાર્થી-વિદ્યાર્થિનીઓ પોતપોતાનાં ઘરે પરત ફરી ગયાં છે. તેમાં 263 છોકરાઓ અને 343 છોકરીઓનો સમાવેશ થાય છે.

અહીંની વિદ્યાર્થીનીઓના જણાવ્યા અનુસાર, છોકરીઓના હૉસ્ટેલમાં કેટલીક વિદ્યાર્થીનીઓ અચાનક કોઈ કારણ વિના હસવા-રડવા લાગી હતી. તેઓ એકીટશે તાકી રહેતી, ચીસો પાડતી, તેમના હાથ-પગ તંગ થઈ જતા અને તેઓ કોઈ પણ બાબતનો પ્રતિસાદ આપતી નહોતી. આવી ઘટનાઓને કારણે અન્ય વિદ્યાર્થીનીઓમાં ભય ફેલાયો.

વિશેષ વાત એ છે કે આ હૉસ્ટેલની બાજુમાં જ વિદ્યાર્થીઓની હૉસ્ટેલ છે. જો કે, વિદ્યાર્થીઓમાં આવી કોઈ ઘટના જોવા મળી નથી. અંધશ્રદ્ધા નિર્મૂલનના કાર્યકર્તાઓ પણ આ બાબત તરફ ધ્યાન દોરે છે.

ડોમા આશ્રમશાળા અમરાવતીથી 100 કિલોમીટરના અંતરે આવેલી છે. આ આશ્રમશાળામાં પાંચડુંગરી, એકતાઈ, ચુનખડી અને આસપાસનાં ગામોના વિદ્યાર્થીઓ નિવાસી શિક્ષણ પ્રાપ્ત કરી રહ્યાં છે.

અહીં ઉત્તમ શિક્ષણ મળતું હોવાથી અન્ય સરકારી આશ્રમશાળાઓની સરખામણીએ વિદ્યાર્થીઓની સંખ્યા સારી છે. આ આશ્રમશાળામાં નિવાસી વિદ્યાર્થીઓ સહિત કુલ વિદ્યાર્થીઓની સંખ્યા લગભગ 800 છે. જો કે, 300થી વધુ છોકરીઓને રહેવા માટે માત્ર ત્રણ જ ઓરડા છે. છોકરીઓને રહેવા માટે આ ઓરડા અપૂરતા છે. છોકરાઓની હૉસ્ટેલની સ્થિતિ પણ એવી જ છે.

હૉસ્ટેલની મોટી ઇમારત તૈયાર છે. જો કે, કમ્પાઉન્ડ વૉલના વિવાદનો કેસ કોર્ટમાં હોવાથી આ ઇમારત વિદ્યાર્થીઓ માટે ખુલ્લી કરવામાં આવી નથી. તેથી તેમણે જૂની અને અપૂરતી જગ્યામાં જ રહેવું પડે છે.

100 મીટરના અંતરે આવેલું મહુડાનું ઝાડ છેલ્લાં અનેક વર્ષોથી અહીં હતું. નવી ઇમારતના બાંધકામ માટે આ ઝાડ કાપવામાં આવ્યું. ત્યારથી ભૂતપ્રેતની અફવાને વેગ મળ્યો.

આ ઝાડ પર ભૂતોનું એક કુટુંબ રહેતું હતું. ઝાડ કાપી નાખવામાં આવતાં ભૂતોનું એ કુટુંબ હૉસ્ટેલમાં રહેવા આવ્યું હોવાની અંધશ્રદ્ધા કેટલાક વિદ્યાર્થીઓમાં ફેલાઈ છે.

ગામથી થોડા મીટરના અંતરે આ આશ્રમશાળા આવેલી છે. શાળાની આસપાસના વિસ્તારમાં તદ્દન શાંતિ રહે છે. શાળાની નવી ઇમારતનું બાંધકામ કરતી વખતે કેટલાંક ઝાડ કાપવામાં આવ્યાં હતાં. તેના કારણે શાળામાં ભૂતપ્રેતની અંધશ્રદ્ધા ફેલાઈ.

ડોમાથી લગભગ 40 કિલોમીટર દૂર એકતાઈ ગામ છે. અહીં રહેતી ઘણી છોકરીઓ આ આશ્રમશાળામાં અભ્યાસ કરે છે. આ ચોક્કસ ગામમાં રહેતી છોકરીઓમાં વિચિત્ર લક્ષણો જોવા મળ્યાં હતાં. અમે આ ગામમાં પહોંચ્યા.

ગામમાં દરેક જગ્યાએ આ બાબતે ચર્ચા ચાલી રહી હતી. આમાંથી એક છોકરીના પિતા શંકર ધિકારનું ઘર શોધીને અમે ત્યાં પહોંચ્યા.

તેમની પુત્રીમાં પણ વિચિત્ર લક્ષણો જોવા મળ્યાં હતાં.

બીબીસી મરાઠી સાથે વાત કરતાં શંકર ધિકારે કહ્યું, “શાળાનું પરિસર હાલમાં મારી દીકરી માટે અનુકૂળ નથી.”

“જો કે, તે આમાંથી સાજી થશે એ પછી હું તેને શાળાએ મોકલીશ. તે શાળાએ જવા માટે અમારી પાછળ પડી છે.”

શંકરની દીકરીને તે દિવસે બનેલી ઘટના વિશે કંઈ જ યાદ નથી. જો કે, શાળામાં ચાલી રહેલી ચર્ચા તેના કાને પડી હતી.

મહુડાનું ઝાડ કાપ્યા પછી ફેલાયેલી અફવાને કારણે આ બધું થઈ રહ્યું છે, એવી અંધશ્રદ્ધા જાણ્યે-અજાણ્યે તેના મનમાં ઘર કરી ગઈ હોવી જોઈએ. આવા ભયમાંથી આ પ્રકારની ઘટના બની હોવાની શક્યતા છે, એવું ડૉક્ટરોએ પણ જણાવ્યું.