विराट कोहलीचा आणखी एक विश्वविक्रम, एक दिवसीय सामन्यांत 15,000 हून अधिक धावा

केरळमधील तिरुवनंतपुरम येथे झालेल्या भारत आणि वेस्ट इंडिज यांच्यातील पहिल्या एकदिवसीय सामन्यात भारताने 8 विकेट्सनी दणदणीत विजय मिळवत तीन सामन्यांच्या मालिकेत 1-0 अशी आघाडी घेतली. मात्र या सामन्याची सर्वाधिक चर्चा झाली ती विराट कोहलीच्या ऐतिहासिक विक्रमाची.

टेस्ट क्रिकेट आणि टी-20 आंतरराष्ट्रीय क्रिकेटमधून निवृत्ती घेतल्यानंतर आता केवळ वनडे क्रिकेट खेळणाऱ्या विराटने या सामन्यात 15 हजार वनडे धावांचा टप्पा पार करत नवा इतिहास रचला.

नाणेफेक जिंकून प्रथम फलंदाजी करणाऱ्या वेस्ट इंडिजने 50 षटकांत 7 विकेट्स गमावत 295 धावा केल्या. भारताने हे आव्हान 41.4 षटकांत केवळ 2 विकेट्स गमावत सहज पार केलं.

वेस्ट इंडिजची सुरुवात सावध झाली असली तरी मधल्या षटकांमध्ये त्यांनी डावावर पकड मिळवली.

जस्टिन ग्रेव्ह्सने संयमी पण आक्रमक खेळी करत 101 धावांचं शतक झळकावलं. त्याने भारतीय गोलंदाजांविरुद्ध मोठे फटके खेळत डावाचा कणा सांभाळला. इतर फलंदाजांनीही छोट्या-छोट्या भागीदाऱ्या करत संघाची धावसंख्या वाढवली.

अखेरच्या दहा षटकांत वेस्ट इंडिज 300 धावांचा टप्पा पार करेल, अशी शक्यता निर्माण झाली होती. मात्र भारतीय फिरकीपटूंनी सामन्याचं चित्र बदललं.

कुलदीप यादवने महत्त्वाच्या टप्प्यावर विकेट्स घेत वेस्ट इंडिजचा धावांचा वेग रोखला. त्यामुळे वेस्ट इंडिजला 295 धावांवर समाधान मानावं लागलं.

भारताकडून कुलदीप यादव सर्वात यशस्वी गोलंदाज ठरला. त्याने 4 विकेट्स घेतल्या. प्रसिद्ध कृष्णाने 2, तर नीतीश कुमार रेड्डीने 1 विकेट घेतली.

296 धावांचं लक्ष्य गाठताना भारताने आत्मविश्वासपूर्ण सुरुवात केली.

शुभमन गिलने सुरुवातीपासूनच संयम राखत डाव उभारला, तर विराट कोहलीने सुरुवातीला वेळ घेतल्यानंतर आक्रमक फटकेबाजी सुरू केली.

दोघांनी मिळून वेस्ट इंडिजच्या गोलंदाजांवर वर्चस्व गाजवत मोठी भागीदारी केली.

गिलने 108 चेंडूत 110 धावांची खेळी करत आपलं शतक पूर्ण केलं. त्याच्या खेळीत चौकार आणि धावांमधील सातत्य दोन्ही दिसून आलं.

दुसऱ्या बाजूला विराट कोहलीने अवघ्या 88 चेंडूत 139 धावांची तुफानी खेळी केली. भारताने 41.4 षटकांत लक्ष्य गाठलं आणि मालिकेची विजयी सुरुवात केली.

विराट कोहलीचं वनडे क्रिकेटमधील हे 55वं शतक आहे. त्याने अवघ्या 74 चेंडूत 7 चौकार आणि 6 षटकारांच्या मदतीने शतक पूर्ण केलं. त्यानंतरही त्याने आक्रमक फलंदाजी कायम ठेवत नाबाद 139 धावा केल्या. विजयासाठी आवश्यक धावाही त्याने षटकार ठोकत पूर्ण केल्या.

टेस्ट आणि टी-20 आंतरराष्ट्रीय क्रिकेटमधून निवृत्तीनंतर विराट आता भारतासाठी फक्त एकदिवसीय क्रिकेट खेळत आहे. त्यामुळे त्याच्या वनडे कारकिर्दीतील प्रत्येक मोठा टप्पा आता विशेष महत्त्वाचा मानला जात आहे.

या सामन्यात विराट कोहलीने एकदिवसीय क्रिकेटमधील 15 हजार धावांचा टप्पा पार केला. हा पराक्रम करणारा तो भारताचा सचिन तेंडुलकरनंतर आणि जगातील केवळ दुसराच फलंदाज ठरला आहे.

याहून महत्त्वाचं म्हणजे विराटने हा टप्पा केवळ 303 डावांत गाठला. याआधी सचिन तेंडुलकरला 15 हजार धावांपर्यंत पोहोचण्यासाठी 377 डाव खेळावे लागले होते. त्यामुळे वनडे क्रिकेटमध्ये सर्वात कमी डावांत 15 हजार धावा करणारा फलंदाज हा नवा विश्वविक्रम विराटच्या नावावर नोंदवला गेला.

वनडे क्रिकेटमध्ये सर्वाधिक धावा करणाऱ्या फलंदाजांच्या यादीत सचिन तेंडुलकर अव्वल स्थानावर आहे. विराट आता त्या विक्रमाच्या आणखी जवळ पोहोचला असून त्याच्या नावावर आधीच सर्वाधिक वनडे शतकांचा विक्रम आहे.

15 हजार धावांचा टप्पा गाठण्यासोबतच विराट कोहलीच्या नावावर एकदिवसीय क्रिकेटमध्ये अनेक मोठे विक्रम आहेत.

वनडे क्रिकेटमध्ये 55 शतकं झळकावणारा तो जगातील सर्वाधिक शतकं करणारा फलंदाज आहे. त्याने 2023 च्या विश्वचषकात सचिन तेंडुलकरचा 49 वनडे शतकांचा विक्रम मोडला होता.

विराट हा वनडेत 8 हजार, 9 हजार, 10 हजार, 11 हजार, 12 हजार, 13 हजार, 14 हजार आणि आता 15 हजार धावा सर्वात कमी डावांत पूर्ण करणारा फलंदाज आहे. सातत्याने मोठे टप्पे सर्वात वेगाने गाठण्याचा विक्रमही त्याच्या नावावर आहे.

धावांचा पाठलाग करताना विराटची कामगिरी विशेष ठरते. लक्ष्याचा पाठलाग करताना त्याने सर्वाधिक वनडे शतकं झळकावली असून, त्यामुळे त्याला क्रिकेटविश्वात ‘चेस मास्टर’ म्हणूनही ओळखलं जातं.

18 ऑगस्ट 2008 रोजी कोहलीने श्रीलंकेविरुद्धच्या मालिकेतून आंतरराष्ट्रीय क्रिकेटमध्ये पदार्पण केले. त्याच्या कारकिर्दीची सुरुवातच एकदिवसीय सामन्यांपासून झाली होती.

मात्र योगायोग असा की विराटने श्रीलंकेविरुद्धच डिसेंबर 2009 त्याच्या वयाच्या 21व्या वर्षी पहिलं शतक केलं होतं. भारताकडून खेळायला सुरुवात केल्यानंतर पहिलं शतक करायला विराट कोहलीला पंधरा सामने थांबावं लागलं होतं.

या विजयामुळे भारताने तीन सामन्यांच्या वनडे मालिकेत 1-0 अशी आघाडी घेतली आहे.

फलंदाजांनी लक्ष्याचा पाठलाग करताना दाखवलेला आत्मविश्वास आणि गोलंदाजांनी मधल्या ओव्हर्समध्ये केलेली अचूक कामगिरी या दोन्ही गोष्टी भारतासाठी सकारात्मक ठरल्या.

आता मालिकेतील दुसरा सामना दोन्ही संघांसाठी महत्त्वाचा असणार आहे. भारताला मालिका जिंकण्याची संधी असेल, तर वेस्ट इंडिजसमोर मालिकेत बरोबरी साधण्याचं आव्हान असेल.

बीबीसीसाठी कलेक्टिव्ह न्यूजरूमचे प्रकाशन.