Chennai News Today Live Updates: யு.ஜி.சி புதிய விதிகள் – இந்தியா கூட்டணி முதல்வர்களுக்கு ஸ்டாலின் கடிதம்

ஈரோடு கிழக்கு தொகுதி இடைத்தேர்தலில், நாம் தமிழர் கட்சிக்கு ‘மைக்’ சின்னம் ஒதுக்கப்பட்டுள்ளது. அக்கட்சி தரப்பில் இருந்து ‘கரும்பு விவசாயி’ சின்னம் கோரப்பட்ட நிலையில், அதனை வேறு ஒரு கட்சிக்கு ஒதுக்கியதாக விளக்கம் அளிக்கப்பட்டது.

புதிய யு.ஜி.சி வரைவு விதியை திரும்பப் பெற வேண்டும் என மத்திய கல்வி அமைச்சருக்கு, முதலமைச்சர் ஸ்டாலின் கடிதம் எழுதியுள்ளார். இந்த விதிகள் மாநிலங்களின் கல்வி முறை மற்றும் கல்வி கொள்கைகளுக்கு முரணாக இருக்கிறது எனவும் அவர் குறிப்பிட்டுள்ளார்.

கொல்கத்தா பெண் பயிற்சி மருத்துவர் பாலியல் வன்கொடுமைக்கு ஆளாக்கப்பட்டு, படுகொலை செய்யப்பட்ட வழக்கில், குற்றவாளி சஞ்சய் ராய்க்கு ஆயுள் தண்டனை விதித்து சியல்டா நீதிமன்றம் தீர்ப்பு வழங்கியுள்ளது.

சிவகங்கை மாவட்டத்திற்கு முதலமைச்சர் ஸ்டாலின் வருகையை முன்னிட்டு இன்று (ஜன 20) முதல் அடுத்த மூன்று நாட்களுக்கு ட்ரோன்கள் பறக்க தடை விதிக்கப்பட்டுள்ளது. ஜனவரி 21, 22 ஆகிய தேதிகளில் சிவகங்கையில் முதலமைச்சர் ஸ்டாலின் கள ஆய்வு செய்கிறார்.

எடிட் செய்யப்பட்ட போலியான போட்டோவை வைத்து ஏமாற்றி, பல கோடி ரூபாய் திரள் நிதி பெற்று, பிழைப்பு நடத்தி வரும் நாம் தமிழர் கட்சியின் தலைமை ஒருங்கிணைப்பாளர் சீமான் மீது குற்றவியல் நடவடிக்கை எடுக்க வேண்டும் என்று கூறி, மதுரை மாநகர் காவல் ஆணையரிடம், புகார் அளிக்கப்பட்டுள்ளது.

இரட்டை இலை சின்னம் தொடர்பாக தேர்தல் ஆணையம் எந்த முடிவும் எடுக்க கூடாது என்ற உயர்நீதிமன்ற தீர்ப்புக்கு எதிராக, தொடரப்பட்ட வழக்கை உச்சநீதிமன்றம் தள்ளுபடி செய்தது.

சென்னை கடலோரப் பகுதிகளில் ஆமைகள் இறந்து ஒதுங்கியது தொடர்பாக மீனவர்களுடன் மீன்வளத்துறை அதிகாரிகள், கடலோரக் காவல்படை, கடல்சார் அதிகாரிகள், வனத்துறையினர் கூட்டு ஆலோசனையில் ஈடுபட்டுள்ளனர். அதிவேக எஞ்சின் விசைப்படகுகளினால் ஆமைகள் இறப்பதாக அதிகாரிகள் கூறியதற்கு எதிர்ப்பு தெரிவித்த மீனவர்கள் காசிமேடு பகுதியில் அவ்வகை படகுகள் இருந்தால் பறிமுதல் செய்யுங்கள் என்றும் காரைக்கால் பகுதியில் இருந்து அதிவேக எஞ்சின் படகுகளில் வந்து அத்துமீறி மீன்பிடிப்பதால் ஆமைகள் இறப்பதாகவும் மீனவர்கள் குற்றம் சாட்டியுள்ளனர்.

சேலம் மாவட்டம் ஓமலூரில் உள்ள கட்சி அலுவலகத்தில் நிர்வாகிகளுடன் அதிமுக பொதுச்செயலாளர் எடி பழனிசாமி ஆலோடப்பாசனை நடத்துகிறார்.

முல்லைப் பெரியாறு அணையில் பராமரிப்பு பணி செய்ய கேரளா முட்டுக்கட்டையாக உள்ளது என்று, உச்ச நீதிமன்றத்தில் தமிழ்நாடு அரசு வாதம் செய்துள்ளது. இது தொடர்பான வழக்கு இன்று நீதிபதி பி.ஆர்.கவாய் தலைமையிலான அமர்வில் விசாரணைக்கு வந்த நிலையில், அணையில் எந்த புனரமைப்பு பணிகளையும் செய்ய கேரளா தடையாக உள்ளது என தமிழ்நாடு அரசு தரப்பில் தெரிவிக்கப்பட்டுள்ளது. அணையில் பராமரிப்பு பணிகளை செய்ய விடாமல், அணையை பாதுகாக்க நிபுணர்கள் அமைக்க வேண்டும் என கேரள அரசு இங்கே கூறுகிறது. ஆய்வு நடத்தலாம். ஆனால், அணையில் பராமரிப்பு பணிகளை மேற்கொள்ள கேரளா அனுமதிக்க வேண்டும் என தமிழ்நாடு அரசு பதில் அளித்துள்ளது,

காணும் பொங்கல் அன்று விடுமுறையை ரத்து செய்ய வேண்டும் என்று தமிழக அரசுக்கு பரிந்துரைப்போம் என்று பசுமை தீர்ப்பாயம் கூறியுள்ளது, காணும் பொங்கல் அன்று மெரினா கடற்கரை குப்பை கூளமாக மாறுவதறங்கு மக்கள் தான் காரணம். அதனால் அன்றைய தினம் அரசு விடுமுறையை ரத்து செய்ய பரிந்துரைப்போம் என்று கூறியுள்ளது. 

சென்னை கடலோரப் பகுதிகளில் கடல் ஆமைகள் அதிகளவில் இறந்த நிலையில் கரை ஒதுங்க காரணம் என்ன என்பது குறித்து, தமிழ்நாடு அரசு விளக்கம் அளிக்க தென்மண்டல பசுமைத் தீர்ப்பாயம் உத்தரவிட்டுள்ளது. மீனவர்கள் பயன்படுத்தும் ஒரு குறிப்பிட்ட வலைதான் கடல் ஆமைகள் உயிரிழக்க காரணமா?” எனவும் பசுமைத் தீர்ப்பாயம் கேள்வி எழுப்பியுள்ளது. மெரினா முதல் கோவளம் வரை கடலோரப் பகுதியில் ஆமைகள் இறந்து ஒதுங்குவது தொடர்பாக, பசுமைத் தீர்ப்பாயம் தாமாக முன்வந்து விசாரணை மேற்கொண்டுள்ளது.

காவிரி – குண்டாறு இணைப்புத் திட்டத்திற்கு இடைக்கால தடை விதிக்க உச்ச நீதிமன்றம் மறுப்பு தெரிவித்துள்ளது. இத்திட்டத்திற்கு தடை கோரிய கர்நாடக அரசின் கோரிக்கையும் நிராகரித்துள்ளது. இத்திட்டத்திற்காண முதற்கட்ட அனுமதி கூட ஒன்றிய அரசு வழங்காத நிலையில், தமிழ்நாடு அரசு இதை செயல்படுத்த தடை விதிக்க முடியாது என நீதிபதிகள் அபய் ஓஹா, உஜ்ஜல் புயான் அமர்வு கருத்து தெரிவித்துள்ளார்கள். 

புதுக்கோட்டை மாவட்டம் திருமயத்தில் சட்டவிரோத குவாரிக்கு எதிராக புகார் அளித்தவர் கொலை செய்யப்பட்ட வழக்கில் 4 பேருக்கு 15 நாட்கள் நீதிமன்ற காவல் வழங்கப்பட்டுள்ளது. குவாரி உரிமையாளர் ராசு, அவரது மகன் சதிஷ், லாரி உரிமையாளர் முருகானந்தம், லாரி ஓட்டுநர் காசிக்கு பிப் 3 ஆம் தேதி வரை காவல் விதித்து திருமயம் நீதிமன்றம் உத்தரவிட்டுள்ளது. 

தமிழகத்தில் 1 மணி வரை 9 மாவட்டங்களில் லேசான மழை பெய்ய வாய்ப்பு. சென்னை, திருவள்ளூர், செங்கல்பட்டு, காஞ்சிபுரம், ராணிப்பேட்டை, திருநெல்வேலி, கன்னியாகுமரி ஆகிய மாவட்டங்களில் மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது. 

சென்னை அமைந்தகரையில் மாஞ்சா நூல் அறுத்து, இரு சக்கர வாகனத்தில் வந்த பெண் காவலரான ரம்யா என்பருக்கு பலத்த காயம். பணிக்குச் செல்லும் போது ஸ்கைவாக் அருகே உள்ள மேம்பாலத்தில் மாஞ்சா நூல் அறுத்ததில் கழுத்து மற்றும் கைவிரலில் காயம் ஏற்பட்டுள்ளது. போலீசார் தீவிர விசாரணை நடத்தி வருகின்றனர். 

சேலம் மாவட்டத்தில் இரவு நேர வாகனத் தணிக்கைப் பணியில் மெத்தனம் காட்டியதாக பெண் காவல் உதவி ஆய்வாளர், 3 சிறப்பு உதவி ஆய்வாளர்கள் மற்றும் காவலர்கள் என 10 பேரை ஆயுதப்படைக்கு மாற்றம் செய்து மாவட்ட எஸ்.பி. உத்தரவு செய்துள்ளார். 

பருவம் தவறி பெய்த கனமழையால் பாதிக்கப்பட்ட விவசாயிகளுக்கு ஏக்கருக்கு  ₹35,000 இழப்பீடு வழங்க வேண்டும் என மார்க்சிஸ்ட் கட்சி மாநில செயலாளர் சண்முகம் வலியுறுத்தல். 

கனிமவளக் கொள்ளை தொடர்பாக புகார் அளித்த நிலையில் ஜெபகர் அலி கொலை செய்யப்பட்டுள்ளார். உண்மை குற்றவாளிகளை விட்டுவிட்டு, லாரி டிரைவர் உள்ளிட்டவர்களை மட்டும் கைது செய்து வழக்கை அரசு திசை திருப்புகிறது மதுரம் கொலை வழக்கில் உரிய விசாரணை நடத்தி, அனைவர் மீதும் நடவடிக்கை எடுக்க வேண்டும் என்று அதிமுக பொதுச்செயலாளர் எடப்பாடி பழனிசாமி கூறியுள்ளார். 

நெல்லை மாவட்டம் ஆரோக்கியநாதபுரத்தில் குடும்ப தகராறில் மாமனார், மாமியாரை வெட்டி கொன்றுள்ளார் மருமகன். மாமனார் பாஸ்கர், மாமியார் செல்வராணியை வீட்டிக்கொன்ற மரியகுமாரை கைது செய்து பெருமாள்புரம் போரிலீஸார் விசாரணை நடத்தி வருகின்றனர். 

வானகரம் – கோயம்பேடு சாலையில் 5 கி.மீ. தூரத்திற்கு போக்குவரத்து நெரிசல். பொங்கல் விடுமுறைக்கு பின் சென்னை திரும்பும் மக்கள். 

ஆவடி அருகே சகோதரர்கள் இரண்டு பேர் கொல்லப்பட்ட வழக்கில் 5 பேர் கைதான நிலையில், மேலும் 3 பேரை போலீசார் தேடி வருகின்றனர். இந்த வழக்கு தொடர்பாக தனிப்படை அமைத்த போலீசார் பிரவீன், பாலாஜி, கார்த்திக், நவீன்குமார், சத்யா ஆகிய 5 பேரை கைது செய்தனர். இந்நிலையில் கணேஷ் என்பவருடன் ஏற்பட்ட வாக்குவாதத்தால், சகோதர்கள் இருவரும் கொல்லப்பட்டது போலீசாரின் விசாரணையில் தெரியவந்துள்ளது. இதையடுத்து முக்கிய குற்றவாளிகளான கணேஷ், மாதேஷ், தருண் ஆகிய 3 பேரை போலீசார் தீவிரமாக தேடி வருகின்றனர்.

ஈரோடு கிழக்கு தொகுதி இடைத்தேர்தலில் வேட்புமனுக்களை திரும்ப பெறுவதற்கான கால அவகாசம் இன்று மாலை 3 மணியுடன் நிறைவுபெறுகிறது. சின்னம் ஒதுக்கீடு செய்யப்பட்டு இறுதி வேட்பாளர் பட்டியல் இன்று வெளியிடப்படும். 

பொங்கல் தொடர் விடுமுறை முடிந்து சொந்த ஊருக்கு சென்ற பொதுமக்கள் சென்னை திரும்புவதால் கடும் போக்குவரத்து நெரிசல் ஏற்பட்டுள்ளது. ஒரே நேரத்தில் அதிக அளவிலான வாகனங்கள் வருகை காரணமாக சிங்கப் பெருமாள் கோயில் பகுதியை கடக்க நீண்ட வரிசையில் வாகனங்கள் காத்திருக்கின்றன.