‘मुंबई आणि महाराष्ट्रात आंदोलन होणारच, इथे हुकुमशाही खपवून घेणार नाही’ – आदित्य ठाकरे

अपडेटेड 5 तासांपूर्वी

आज (11 ऑक्टोबर) मुंबईतील शिवाजी पार्क परिसरात सीजेपीने आंदोलन करण्याचा इशारा दिला होता. त्या पार्श्वभूमीवर आंदोलकांनी परिसरात एकत्रित व्हायला सुरुवात केली होती. मात्र, पोलिसांनी त्यांची धरपकड सुरू केली आहे. अशातच युवासेना प्रमुख आणि आमदार आदित्य ठाकरेदेखील कार्यकर्त्यांसह रस्त्यावर उतरले आहेत.

आदित्य ठाकरेंनी आज पत्रकार परिषद घेत सरकार तसेच पोलीस प्रशासनाला प्रश्न उपस्थित करत निशाणा साधला.

“सीजेपीची मुलं, तरूण मुलं, सेनेचे, मनसेचे कार्यकर्ते पार्क पोलीस स्टेशनला नेलं. ही दडपशाही कोणाविरुद्ध करत आहात. काल तुषार गांधी यांना सोडत नव्हते. आजही आम्ही वेळेत आलो नसतो तर ह्यांनाही पकडून नेलं असतं. ही अघोषित आणीबाणी आहे. आज तुम्हाला मला कोणालाही अटक होऊ शकते, ही दादागिरी चालणार नाही, आम्ही हे हाल मुंबईचे होऊ देणार नाही”, असे ठाकरे म्हणाले.

यासह मुंबईत उद्याचं आंदोलन कसं राहील हे थोड्यावेळात जाहीर करू, असंही त्यांनी सांगितलं आहे. उद्या आंदोलन असेल. हे देशप्रेमींचं आंदोलन आहे. ज्ञानेश कुमार विरोधात आंदोलन आहे यात भाजपला लागण्यासारखं काही नाही. तुम्ही दाबण्याचा प्रयत्न केला तर ज्वलंत आंदोलन करणार, असा इशाराही ठाकरेंनी दिला.

दरम्यान, सीजेपी आंदोलकांसह, शिवसैनिकही रस्त्यावर उतरल्याने दादरमध्ये तणावाचे वातावरण पाहायला मिळत आहे. शिवसेना भवनासमोर छावणीचे स्वरुप आलं आहे. पोलिसांनी सेनाभवनाच्या अंगणातून कार्यकर्त्यांना उचलून ताब्यात घेतलं आहे.

आदित्य ठाकरेदेखील आक्रमक झाले असून शिवसैनिकांना पोलिसांनी ताब्यात घेऊन ज्या वाहनात कोंबले ती गाडी आदित्य ठाकरेंनी अडवून ठेवली. आदित्य ठाकरेंनी या वाहनावर चढून आपला विरोध दर्शवला.

निवडणूक आयुक्त ज्ञानेश कुमार यांच्या राजीनाम्याची मागणी करत सीजेपीनं 10 ऑक्टोबररोजी दिल्लीत आंदोलनाची हाक दिली होती. त्या पार्श्वभूमीवर मुंबईतही काल शनिवारी आंदोलन पार पडलं, यावेळी पोलिसांनी अनेक आंदोलकांना ताब्यात घेतलं होतं.

कालप्रमाणे आजही मुंबईत शिवाजी पार्क परिसरात आंदोलकांनी जमण्यास सुरुवात केली असता पोलिसांनी त्यांची धरपकड सुरू केली. या घडामोडींना वेग आला असतानाच आदिवत्य ठाकरेदेखील रस्त्यावर उतरले आहेत. दादरमधील शिवसेना भवनाबाहेर शिवसैनिकांनी गर्दी केली असून काहींनी पोलिसांनी ताब्यात घेतलं आहे.

दिल्ली पोलिसांनी पत्रकार परिषद घेऊन केलेल्या दाव्यांवर अभिजीत दिपकेंनी प्रतिक्रिया दिली आहे. सोशल मीडिया प्लॅटफॉर्म ‘एक्स’वर केलेल्या पोस्टमध्ये दिपके म्हणतात, “मी माझ्या आजीसोबत राहणाऱ्या चुलत भावाशी बोलू देण्याची विनंती केली होती. किमान त्याचा फोन नंबर तरी मिळवता यावा, यासाठी मी फक्त दोन मिनिटांसाठी माझा फोन मागितला होता.

दिल्ली पोलिसांनी मला माझा फोन वापरू का दिला नाही? मी वकिलाशी बोलण्याचीही विनंती केली होती, पण तीही नाकारण्यात आली.”

दिपके पुढे लिहितात, “पहाटे साडेतीन वाजता दिल्ली पोलिसांनी मला वडिलांना फोन करून सांगायला सांगितले की, दुसऱ्या दिवशी मला बराच काळ तुरुंगात राहावे लागणार आहे. माझे वडील नुकतेच त्यांची आई, म्हणजेच माझी आजी, गमावून बसले होते. आजीच्या निधनामुळे आम्ही आधीच दुःखात असताना, माझ्या कुटुंबाला आणखी किती मानसिक त्रास द्यायचा होता?

पहाटे साडेतीन वाजता माझ्या आई-वडिलांना फोन करण्यास सांगण्यामागे नेमका काय उद्देश होता? त्यांना मानसिक त्रास देऊन छळायचा होता का?”, असा सवालही दिपकेंनी उपस्थित केला.

10 ऑक्टोबर रोजी अभिजीत दिपके यांना विमानाने नेऊन ताब्यात घेतल्याच्या प्रकरणावरून टीकेचा सामना करणाऱ्या दिल्ली पोलिसांनी रविवारी संध्याकाळी पत्रकार परिषद घेऊन आपली बाजू मांडली.

दिल्ली पोलिसांच्या शाहदरा विभागाच्या डीसीपी नेहा यादव यांनी ही पत्रकार परिषद घेतली. यावेळी त्यांनी काही तासांपूर्वी सीजेपीने घेतलेल्या पत्रकार परिषदेत करण्यात आलेल्या आरोपांना प्रत्युत्तर दिले.

दिपके आणि त्यांच्या दोन सहकाऱ्यांना प्रतिबंधात्मक कारवाईअंतर्गत ताब्यात घेण्याबाबत बोलताना डीसीपी म्हणाल्या की, त्यांना दिल्लीत आंदोलन करण्याची परवानगी नव्हती. त्यामुळे त्यांना ताब्यात घेण्यात आले.

डीसीपींनी एक रेकॉर्ड केलेला व्हीडिओ दाखवून दावा केला की, दिपके यांच्या आजीचे निधन झाल्याची माहिती मिळताच पोलीस अधिकाऱ्यांनी त्यांच्याकडे जाऊन त्यांना याबाबत सूचना दिली. तसेच त्यांना विमानाने त्यांच्या गावी पोहोचवण्याची व्यवस्था करण्याची ऑफरही देण्यात आली होती.

मात्र, दिपके यांनी गावी जाण्यास नकार दिल्याचा दावा डीसीपी नेहा यादव यांनी केला. पोलिसांनी त्यांना निर्णयाचा पुन्हा विचार करण्यासाठी वेळही दिला होता. तरीही त्यांनी आपला निर्णय बदलला नाही, असंही त्या म्हणाल्या.

दिल्ली पोलिसांनी दिपके यांना त्यांच्या आई-वडिलांशी बोलण्याची संधी देऊ केली होती, मात्र त्यांनी ती स्वीकारली नाही, असाही दावा करण्यात आला आहे.

दिल्ली पोलिसांनी म्हटले की, सीजेपीने पोलिसांची चुकीची प्रतिमा निर्माण केली आहे. तसेच, दिपके यांनी मागील आंदोलनातही कायद्याचे पालन केले नव्हते, असा आरोप पोलिसांनी केला. यावेळीही सीजेपीने कायद्याचे पालन केले नाही. दिपके यांना आंदोलनाची परवानगी देण्यात आली नव्हती आणि दिल्लीतील नागरिकांच्या सुरक्षेसाठी निर्बंध लागू करण्यात आले होते, असे पोलिसांनी स्पष्ट केले.

दिल्ली पोलिसांनी दाखवलेल्या व्हीडिओमध्ये काय आहे?

या व्हीडिओमध्ये अभिजीत दिपके यांच्यासारखी दिसणारी एक व्यक्ती खुर्चीवर बसलेली आहे. दोन महिला पोलीस कर्मचारी त्यांना त्यांच्या आजीच्या निधनाची माहिती देताना दिसतात. त्यानंतर साध्या वेशातील एक पुरुष पोलीस कर्मचारी त्यांना विमानाने गावी जाण्याची व्यवस्था करण्याची ऑफर देतो. त्यावर ती व्यक्ती, ‘आय विल स्टे हिअर’ (मी इथेच थांबेन), असे उत्तर देताना ऐकू येते.

दरम्यान, या व्हीडिओची सत्यता स्वतंत्रपणे पडताळता आलेली नाही. तसेच, या प्रकरणावर सीजेपीकडून अद्याप कोणतीही प्रतिक्रिया आलेली नाही.

दिल्लीतील आंदोलनासंदर्भात सर्वोच्च न्यायालयाने 9 ऑक्टोबर रोजी झालेल्या सुनावणीदरम्यान दिलेल्या आदेशांचे कथित उल्लंघन झाल्याप्रकरणी केंद्रीय गृह मंत्रालयाला नोटीस बजावण्यात आली असल्याची माहिती कायदेशीर घडामोडींवर वृत्तांकन करणाऱ्या ‘लाइव्ह लॉ’ या संकेतस्थळाने दिली आहे.

सुनावणीत दिलेल्या आदेशांचे कथित उल्लंघन झाल्याचे आढळले असून न्यायालयाच्या अवमानाची (कंटेम्प्ट) कारवाई होऊ शकते, असे न्यायालयाने म्हटले आहे.

9 ऑक्टोबर रोजी सर्वोच्च न्यायालयाने कॉकरोच जनता पार्टी आणि अनेक विरोधी पक्षांकडून 10 ऑक्टोबररोजी आयोजित करण्यात येणाऱ्या आंदोलनाच्या पार्श्वभूमीवर दिल्लीकडे येणाऱ्या रेल्वेगाड्या आणि मेट्रो सेवा बंद करण्याऐवजी त्यांचे नियंत्रित पद्धतीने संचालन करण्याचे तोंडी निर्देश दिले होते.

‘लाइव्ह लॉ’च्या वृत्तानुसार, सर्वोच्च न्यायालयाने म्हटले की, न्यायालयाच्या निर्देशांनंतरही मेट्रो स्थानके बंद करण्यात आल्याचे प्रथमदर्शनी पुरेसे पुरावे याचिकाकर्त्यांनी सादर केले आहेत. त्यामुळे न्यायालयाच्या आदेशांचे उल्लंघन झाले असण्याची शक्यता आहे.

या प्रकरणात सर्वोच्च न्यायालयाने केंद्रीय गृह मंत्रालयाचे सचिव गोविंद मोहन, दिल्लीचे पोलीस आयुक्त आणि दिल्ली मेट्रो रेल कॉर्पोरेशनच्या (डीएमआरसी) अध्यक्ष डी. थारा यांना उत्तर दाखल करण्याचे निर्देश दिले आहेत.

न्यायालयाने सर्व संबंधित अधिकाऱ्यांना 13 ऑक्टोबरपर्यंत प्रतिज्ञापत्र आणि अनुपालन अहवाल दाखल करण्यास सांगितले आहे. तूर्तास त्यांना न्यायालयात वैयक्तिकरित्या उपस्थित राहण्यापासून सूट देण्यात आली आहे.

सर्वोच्च न्यायालयाने स्पष्ट केले की, या प्रकरणाच्या पुढील सुनावणीदरम्यान दाखल करण्यात आलेली उत्तरे आणि अनुपालन अहवाल यांच्या आधारे पुढील कारवाईचा विचार केला जाईल.

सध्या भारत सरकार हे आपल्याच देशातील नागरिकांविरोधात युद्ध करत आहेत, असं कॉक्रोच जनता पार्टीच्या प्रवक्त्यांनी आपल्या पत्रकार परिषदेत सांगितले.

गेल्या तीन दिवसात देशात जे काय झालं ते एखाद्या अघोषित आणीबाणी सारखं आहे असं सीजेपीचे प्रवक्ते सौरभ दास यांनी म्हटले.

सीजेपीच्या नेत्यांनी ताब्यात घेताना कोणत्याही कायद्याचे पालन करण्यात आले नाही. आम्हाला आमच्या वकिलांशी बोलू दिले नाही.

सध्या भारत सरकार हे आपल्याच देशातील नागरिकांविरोधात युद्ध करत आहे, असे सौरभ दास यांनी म्हटले.

सरकारने आमचे फोन घेतले आणि ते त्यांनी हॅक केले असावेत अशी आम्हाला भीती आहे, असे सौरभ दास यांनी म्हटले.

ज्ञानेश कुमार यांना वाचवण्यासाठी हे सर्व काही होत आहे, ज्ञानेश कुमार यांनी SIR मधून 13 कोटी मतदारांना वगळले. तरुणांनी मतदान करू नये म्हणून त्यांनी ही नावे वगळली असे सौरभ दास यांनी म्हटले.

सीजेपी प्रवक्ते आशुतोष रांका यांनी सांगितले की ताब्यात घेतलेल्या कार्यकर्त्यांना पोलिसांनी मारहाण केली.

सीजेपीच्या लीगल अफेअर्स हेड रत्ना सिंह यांनी सांगितले की आम्हाला ताब्यात घेताना कोणतेही कारण देण्यात आले नाही. जेव्हा पोलिसांनी विचारले की मला ताब्यात घेण्याचे कारण काय तर त्यावर त्यांनी उत्तर दिले की आम्हाला वरतून ऑर्डर आहे. ताब्यात घेतलेल्या लोकांना मारहाण करण्यात आली आहे.

ज्या पद्धतीने सरकार आमच्याविरोधात एकत्र आलंय यावरुन हे लक्षात येतंय की आमचा मुद्दा योग्य आहे.

एसआयआरच्या विरोधात सातत्याने आंदोलन करणाऱ्या आयसाच्या राष्ट्रीय अध्यक्षा नेहा बोरा रविवारी (11 ऑक्टोबर) आंदोलकांसह आर. के. आश्रम मार्गावर पोहोचल्या.

घटनास्थळी उपस्थित असलेले बीबीसीचे प्रतिनिधी राघवेंद्र राव यांनी नेहा बोरा यांना पोलिसांनी ताब्यात घेतल्याची पुष्टी केली आहे.

नेहा बोरा यांनी त्यांच्या इंस्टाग्राम अकाउंटवर एक व्हीडिओ पोस्ट केला. या व्हीडिओत त्या इतर लोकांसोबत धावताना दिसत आहे.

2 ऑक्टोबरपासून दिल्लीत मुख्य निवडणूक आयुक्त ज्ञानेश कुमार यांच्या विरोधात सुरू असलेल्या आंदोलनात नेहा बोरा एक प्रमुख चेहरा म्हणून समोर आल्या आहेत. हे आणि जवळपास प्रत्येक आंदोलनानंतर त्यांना पोलिसांनी ताब्यात घेतलं आहे.

शनिवारी (10 ऑक्टोबर) दिल्लीतील जंतर मंतरकडे जाणाऱ्या रस्त्यांवर कडक सुरक्षा व्यवस्था असताना नेहा बोरा अचानक दिल्ली हाट येथे पोहोचल्या आणि त्यांनी तेथे आंदोलन केले. त्यानंतर त्यांना पोलिसांनी ताब्यात घेतले.