Source :- BBC PUNJABI
ਤਸਵੀਰ ਸਰੋਤ, YT/@ShekharSuman
ਪ੍ਰਕਾਸ਼ਿਤ
ਪੜ੍ਹਨ ਦਾ ਸਮਾਂ: 6 ਮਿੰਟ
ਫ਼ਿਲਮ ਅਦਾਕਾਰ ਸੰਜੇ ਦੱਤ ਸ਼ੇਖਰ ਸੁਮਨ ਦੇ ਸ਼ੋਅ ‘ਸ਼ੇਖਰ ਟੁਨਾਈਟ’ ਵਿੱਚ ਦੇਸ਼ ਦੇ ਮੌਜੂਦਾ ਹਾਲਾਤ ‘ਤੇ ਆਪਣੀ ਟਿੱਪਣੀ ਨੂੰ ਲੈ ਕੇ ਚਰਚਾ ਵਿੱਚ ਹਨ। ਗਾਂਧੀ ਜਯੰਤੀ ਦੇ ਮੌਕੇ ‘ਤੇ ਪ੍ਰਸਾਰਿਤ ਇਸ ਵਿਸ਼ੇਸ਼ ਐਪੀਸੋਡ ਵਿੱਚ ਸੰਜੇ ਦੱਤ ਨੇ ਕਿਹਾ ਕਿ ਉਨ੍ਹਾਂ ਨੂੰ ਹੁਣ ਭਾਰਤ ਵਿੱਚ ਪਹਿਲਾਂ ਵਰਗੀ ਸ਼ਾਂਤੀ ਮਹਿਸੂਸ ਨਹੀਂ ਹੁੰਦੀ।
ਉਨ੍ਹਾਂ ਕਿਹਾ ਕਿ ਭਾਰਤ ਦੇ ਲੋਕ ਬਹੁਤ ਚੰਗੇ, ਵੱਡੇ ਦਿਲ ਵਾਲੇ ਅਤੇ ਮਹਿਮਾਨ-ਨਵਾਜ਼ ਹਨ ਅਤੇ ਦੇਸ਼ ਵਿੱਚ ਸ਼ਾਂਤੀ ਹੋਣੀ ਚਾਹੀਦੀ ਹੈ।
ਸੰਜੇ ਦੱਤ ਨੇ ਕਿਹਾ, “ਮੈਨੂੰ ਹੁਣ ਸਾਡੇ ਦੇਸ਼ ਵਿੱਚ ਉਹ ਸ਼ਾਂਤੀ ਮਹਿਸੂਸ ਨਹੀਂ ਹੁੰਦੀ।” ਉਨ੍ਹਾਂ ਨੇ ਪ੍ਰਾਰਥਨਾ ਕੀਤੀ ਕਿ ‘ਉਹ ਦਿਨ ਮੁੜ ਵਾਪਸ ਆਉਣ।’
ਇਸ ਤੋਂ ਬਾਅਦ ਸ਼ੋਅ ਵਿੱਚ ਸੰਜੇ ਦੱਤ ਨੂੰ ਕਿਹਾ ਗਿਆ ਕਿ ਉਹ ਪੰਜ ਮਿੰਟ ਲਈ ਖ਼ੁਦ ਨੂੰ ਦੇਸ਼ ਦਾ ਪ੍ਰਧਾਨ ਮੰਤਰੀ ਮੰਨ ਕੇ ਲੋਕਾਂ ਨੂੰ ਸੰਬੋਧਨ ਕਰਨ।
ਇਸ ‘ਤੇ ਸੰਜੇ ਦੱਤ ਨੇ ਆਪਣੇ ਚਰਚਿਤ ਕਿਰਦਾਰ ‘ਮੁੰਨਾ ਭਾਈ’ ਦੇ ਅੰਦਾਜ਼ ਵਿੱਚ ਇੱਕ ਵਿਅੰਗਮਈ ਭਾਸ਼ਣ ਦਿੱਤਾ।
ਸੰਜੇ ਦੱਤ ਦੇ ਇਨ੍ਹਾਂ ਬਿਆਨਾਂ ਦੀ ਸੋਸ਼ਲ ਮੀਡੀਆ ‘ਤੇ ਕਾਫ਼ੀ ਚਰਚਾ ਹੋ ਰਹੀ ਹੈ। ਕਈ ਲੋਕ ਇਸ ਨੂੰ ਮੋਦੀ ਸਰਕਾਰ ‘ਤੇ ਤੰਜ ਦੇ ਤੌਰ ‘ਤੇ ਦੇਖ ਰਹੇ ਹਨ। ਸੋਸ਼ਲ ਮੀਡੀਆ ‘ਤੇ ਬਹਿਸ ਤੋਂ ਬਾਅਦ ਸੰਜੇ ਦੱਤ ਨੇ ਫੇਸਬੁੱਕ ‘ਤੇ ਸਫ਼ਾਈ ਦਿੰਦੇ ਹੋਏ ਕਿਹਾ ਕਿ ਉਨ੍ਹਾਂ ਦੇ ਬਿਆਨ ਨੂੰ ਵੱਖਰੇ ਸੰਦਰਭ ਵਿੱਚ ਦੇਖਿਆ ਗਿਆ।
ਉਨ੍ਹਾਂ ਲਿਖਿਆ, “ਮੈਂ ਇਹ ਸਪਸ਼ਟ ਕਰਨਾ ਚਾਹੁੰਦਾ ਹਾਂ ਕਿ ਕਿਸੇ ਵੀ ਵਿਅਕਤੀ, ਭਾਈਚਾਰੇ ਜਾਂ ਸੰਸਥਾ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣਾ, ਉਨ੍ਹਾਂ ਦਾ ਅਪਮਾਨ ਕਰਨਾ ਜਾਂ ਉਨ੍ਹਾਂ ਦਾ ਅਨਾਦਰ ਕਰਨਾ ਮੇਰਾ ਉਦੇਸ਼ ਕਦੇ ਨਹੀਂ ਰਿਹਾ ਹੈ।
ਮੇਰੀਆਂ ਟਿੱਪਣੀਆਂ ਇੱਕ ਸਕ੍ਰਿਪਟਿਡ ਗੱਲਬਾਤ ਦੇ ਸੰਦਰਭ ਵਿੱਚ ਕੀਤੀਆਂ ਗਈਆਂ ਸਨ, ਜਿਸ ਦਾ ਉਦੇਸ਼ ਹਲਕਾ-ਫੁਲਕਾ ਅਤੇ ਹਾਸੇ-ਮਜ਼ਾਕ ਵਾਲਾ ਸੰਵਾਦ ਕਰਨਾ ਸੀ। ਇਸ ਪਿਛਲੀ ਭਾਵਨਾ ‘ਮੁੰਨਾ ਭਾਈ’ ਵਰਗੀਆਂ ਫ਼ਿਲਮਾਂ ਵਿੱਚ ਦਿਖਾਈ ਗਈ ਹਾਸੇ ਅਤੇ ਵਿਅੰਗ ਦੀ ਸ਼ੈਲੀ ਵਰਗੀ ਸੀ, ਖ਼ਾਸ ਤੌਰ ‘ਤੇ ‘ਗਾਂਧੀਗਿਰੀ’ ਦੀ ਉਸ ਸੋਚ ਤੋਂ ਪ੍ਰੇਰਿਤ ਸੀ, ਜਿਸ ਦਾ ਉਦੇਸ਼ ਪਿਆਰ, ਏਕਤਾ ਅਤੇ ਸਦਭਾਵਨਾ ਦਾ ਸੰਦੇਸ਼ ਦੇਣਾ ਸੀ। ਬਦਕਿਸਮਤੀ ਨਾਲ, ਮੇਰੀਆਂ ਗੱਲਾਂ ਨੂੰ ਉਸ ਮੂਲ ਸੰਦਰਭ ਤੋਂ ਵੱਖਰੇ ਤਰੀਕੇ ਨਾਲ ਸਮਝਿਆ ਗਿਆ।”
‘ਪ੍ਰਧਾਨ ਮੰਤਰੀ ਬਣਿਆ ਤਾਂ ਦੇਸ਼ ਵਿੱਚ ਰਹਾਂਗਾ’
ਤਸਵੀਰ ਸਰੋਤ, YT/@ShekharSuman
ਸੰਜੇ ਦੱਤ ਸ਼ੇਖਰ ਸੁਮਨ ਦੇ ਇਸ ਸ਼ੋਅ ਵਿੱਚ ਜਿਵੇਂ ਹੀ ਬੋਲਣ ਲਈ ਖੜ੍ਹੇ ਹੋਏ, ਉਨ੍ਹਾਂ ਨੇ ਮਾਈਕ ਚੈੱਕ ਕਰ ਕੇ ਕਿਹਾ, “ਚਲ ਰੇਲਾ ਹੈ, ਚਲੋ ਦੇਸ਼ ਮੇਂ ਕੁਝ ਤੋਂ ਚਲ ਰੇਲਾ ਹੈ (ਚੱਲ ਰਿਹਾ ਹੈ। ਚਲੋ, ਦੇਸ਼ ਵਿੱਚ ਕੁਝ ਤਾਂ ਚੱਲ ਰਿਹਾ ਹੈ)।”
ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਬਣਨ ਤੋਂ ਬਾਅਦ ਉਹ ਦੇਸ਼ ਦੇ ਲੋਕਾਂ ਵਿਚਕਾਰ ਰਹਿਣਗੇ ਅਤੇ ਵਿਦੇਸ਼ ਜਾ ਕੇ ਜਸ਼ਨ ਨਹੀਂ ਮਨਾਉਣਗੇ।
ਸੰਜੇ ਦੱਤ ਨੇ ਕਿਹਾ, “ਮੇਰੇ ਪਿਆਰੇ ਦੇਸ਼ਵਾਸੀਓ, ਅੱਜ ਮੈਂ ਤੁਹਾਡਾ ਪ੍ਰਧਾਨ ਮੰਤਰੀ ਬਣ ਕੇ ਬਹੁਤ ਖੁਸ਼ ਹਾਂ। ਇੰਨਾ ਵੱਡਾ ਦੇਸ਼ ਹੈ ਅਤੇ ਇੰਨੇ ਸਾਰੇ ਲੋਕ ਹਨ… ਪਰ ਤੁਸੀਂ ਲੋਕ ਬਿਲਕੁਲ ਟੈਂਸ਼ਨ ਨਾ ਲਓ। ਮੈਂ ਇਸ ਖੁਸ਼ੀ ਨੂੰ ਮਨਾਉਣ ਵਿਦੇਸ਼ ਨਹੀਂ ਜਾਣ ਵਾਲਾ। ਮੈਂ ਇੱਥੇ ਹੀ ਰਹਾਂਗਾ।”
ਉਨ੍ਹਾਂ ਕਿਹਾ ਕਿ ਦੇਸ਼ ਵਿੱਚ ਰਹਿਣ ਤੋਂ ਬਾਅਦ ਹੀ ਪ੍ਰਧਾਨ ਮੰਤਰੀ ਅਤੇ ਜਨਤਾ ਵਿਚਕਾਰ ਸਿੱਧਾ ਸੰਪਰਕ ਬਣ ਸਕੇਗਾ। ਇਸ ਲਈ ਸਾਡੀ ਸਰਕਾਰ ਵਿੱਚ ਸਭ ਤੋਂ ਵੱਧ ਜ਼ੋਰ ਭਾਈਚਾਰੇ ‘ਤੇ ਹੋਵੇਗਾ।
‘ਗਾਂਧੀ ਜੀ ਦਾ ਚੌਥਾ ਬਾਂਦਰ ਵੀ ਚਾਹੀਦਾ ਹੈ’
ਸੰਜੇ ਦੱਤ ਨੇ ਮਹਾਤਮਾ ਗਾਂਧੀ ਦੇ ਤਿੰਨ ਬਾਂਦਰਾਂ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਅੱਜ ਇੱਕ ਚੌਥੇ ਬਾਂਦਰ ਦੀ ਵੀ ਲੋੜ ਹੈ, ਜੋ ਬੁਰਾ ਦੇਖੇਗਾ ਤਾਂ ਉਸ ਨੂੰ ਠੀਕ ਕਰੇਗਾ। ਜੇ ਬੁਰੀਆਂ ਚੀਜ਼ਾਂ ਨੂੰ ਠੀਕ ਨਹੀਂ ਕੀਤਾ ਜਾਵੇਗਾ ਤਾਂ ਦੇਸ਼ ਕਿਵੇਂ ਚੱਲੇਗਾ।
ਉਨ੍ਹਾਂ ਦਾ ਕਹਿਣਾ ਸੀ ਕਿ ਜੇ ਕੋਈ ਗ਼ਲਤ ਚੀਜ਼ ਨਜ਼ਰ ਆਵੇ ਤਾਂ ਉਸ ਨੂੰ ਠੀਕ ਕਰਨ ਦੀ ਕੋਸ਼ਿਸ਼ ਵੀ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਸਵਾਲ ਕੀਤਾ ਕਿ ਜੇ ਲੋਕ ਅੱਖਾਂ, ਕੰਨ ਅਤੇ ਮੂੰਹ ਬੰਦ ਕਰਕੇ ਬੈਠੇ ਰਹਿਣਗੇ ਤਾਂ ਦੇਸ਼ ਕਿਵੇਂ ਚੱਲੇਗਾ।
ਸੰਜੇ ਦੱਤ ਨੇ ਆਗੂਆਂ ਦੀਆਂ ਤਸਵੀਰਾਂ ਨੂੰ ਲੈ ਕੇ ਵੀ ਤੰਜ ਕੀਤਾ। ਉਨ੍ਹਾਂ ਕਿਹਾ ਕਿ ਜਿੱਥੇ ਉਨ੍ਹਾਂ ਦੀ ਤਸਵੀਰ ਲਗਾਉਣ ਦਾ ਮਨ ਹੋਵੇ, ਉੱਥੇ ਮਹਾਤਮਾ ਗਾਂਧੀ ਦੀ ਤਸਵੀਰ ਲਗਾਉਣੀ ਚਾਹੀਦੀ ਹੈ ਕਿਉਂਕਿ ਲੋਕਾਂ ਲਈ ਕਿਸੇ ਆਗੂ ਦੀ ਤਸਵੀਰ ਤੋਂ ਜ਼ਿਆਦਾ ਉਸ ਦੇ ਵਿਚਾਰ ਮਾਅਨੇ ਰੱਖਦੇ ਹਨ।
ਉਨ੍ਹਾਂ ਕਿਹਾ ਕਿ ਦੇਸ਼ ਨੂੰ ਸਭ ਤੋਂ ਪਹਿਲਾਂ ‘ਫ੍ਰੇਮ’ ਵਿੱਚ ਰੱਖਿਆ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਜੇ ਦੇਸ਼ ਨੂੰ ਫ੍ਰੇਮ ਵਿੱਚ ਲਿਆਉਣਾ ਹੈ ਤਾਂ ਦੁਨੀਆ ਨੂੰ ਵੀ ਫ੍ਰੇਮ ਵਿੱਚ ਲਿਆਉਣਾ ਹੋਵੇਗਾ।
ਟਰੰਪ ਨੂੰ ‘ਗਾਂਧੀਗਿਰੀ’ ਦੀ ਸਲਾਹ
ਤਸਵੀਰ ਸਰੋਤ, Chip Somodevilla/Getty Images
ਆਪਣੇ ਭਾਸ਼ਣ ਵਿੱਚ ਸੰਜੇ ਦੱਤ ਨੇ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਦਾ ਵੀ ਜ਼ਿਕਰ ਕੀਤਾ।
ਉਨ੍ਹਾਂ ਕਿਹਾ, “ਮੈਂ ਦੇਖ ਰਿਹਾ ਹਾਂ ਕਿ ਟਰੰਪ ਮਾਮੂ ਪੂਰੀ ਦੁਨੀਆ ਨੂੰ ਆਊਟ ਆਫ਼ ਫ੍ਰੇਮ ਕਰਨ ‘ਤੇ ਲੱਗੇ ਹੋਏ ਹਨ। ਇਸ ਲਈ ਮੈਂ ਸਭ ਤੋਂ ਪਹਿਲਾਂ ਟਰੰਪ ਮਾਮੂ ਨੂੰ ਮਿਲਣ ਅਮਰੀਕਾ ਜਾਵਾਂਗਾ। ਟਰੰਪ ਮਾਮੂ ਥੋੜ੍ਹੇ ਭਟਕ ਗਏ ਹਨ ਨਾ। ਮੈਂ ਉਨ੍ਹਾਂ ਨੂੰ ਪੂਰੀ ਨਿਮਰਤਾ ਨਾਲ ਸਮਝਾਵਾਂਗਾ।”
ਸੰਜੇ ਦੱਤ ਨੇ ਕਿਹਾ ਕਿ ਉਹ ਪੀਐੱਮ ਬਣੇ ਤਾਂ ਟਰੰਪ ਨੂੰ ਕਹਿਣਗੇ ਕਿ ‘ਮਾਮੂ, ਸਭ ਪੇ ਹਮਲਾ-ਵਮਲਾ ਨਾ ਕਰੋ। ਦੁਨੀਆ ਕੀ ਵਾਟ ਨਹੀਂ ਲਗਾਨੀ। ਆਪ ਕਿਸੇ ਦੇਸ਼ ਪੇ ਹਮਲਾ ਕਰੋਗੇ ਤਾਂ ਕੋਈ ਦੇਸ਼ ਕਿਸੇ ਹੋਰ ਦੇਸ਼ ਪੇ ਹਮਲਾ ਕਰੇਗਾ ਅਤੇ ਫਿਰ ਸਾਰੇ ਮਿਲ ਕੇ ਕਹੇਂਗੇ – ਵੈਸ਼ਵਿਕ ਸ਼ਾਂਤੀ, ਵੈਸ਼ਵਿਕ ਸ਼ਾਂਤੀ।’
ਉਨ੍ਹਾਂ ਕਿਹਾ ਕਿ ‘ਇੰਨੇ ਝਗੜੇ ਕਰਨ ਤੋਂ ਬਾਅਦ ਸ਼ਾਂਤੀ ਕਿੱਥੋਂ ਆਏਗੀ, ਸ਼ਾਂਤੀ ਕੋਈ ਬਟਨ ਦਬਾ ਦੇਣ ਨਾਲ ਤਾਂ 10 ਮਿੰਟ ਵਿੱਚ ਨਹੀਂ ਆਏਗੀ। ਸ਼ਾਂਤੀ ਆਉਂਦੀ ਹੈ ਪਿਆਰ ਨਾਲ। ਅਤੇ ਪਿਆਰ ਆਉਂਦਾ ਹੈ ਗਾਂਧੀਗਿਰੀ ਨਾਲ। ਟਰੰਪ ਮਾਮੂ ਨੂੰ ਥੋੜ੍ਹੀ ਗਾਂਧੀਗਿਰੀ ਸਿਖਾਉਣੀ ਪਵੇਗੀ।’
ਸੰਜੇ ਦੱਤ ਨੇ ਕਿਹਾ, ”ਮੈਂ ਕਹਾਂਗਾ ਕਿ ਦੇਖੋ ਟਰੰਪ ਮਾਮੂ, ਦੁਨੀਆ ਵਿੱਚ ਪਹਿਲਾਂ ਹੀ ਬਹੁਤ ਮਿਜ਼ਾਈਲਾਂ ਹਨ ਅਤੇ ਹੁਣ ਪਿਆਰ ਨੂੰ ‘ਐਕਸਪੋਰਟ’ ਕਰਨ ਦੀ ਲੋੜ ਹੈ।”
ਉਨ੍ਹਾਂ ਨੇ ਮਜ਼ਾਕੀਆ ਅੰਦਾਜ਼ ਵਿੱਚ ਕਿਹਾ ਕਿ ਜੇ ਕਿਸੇ ਨੂੰ ਮਿਜ਼ਾਈਲ ਭੇਜਣ ਦਾ ਮਨ ਕਰੇ ਤਾਂ ਪਹਿਲਾਂ ਗੁਲਦਸਤਾ ਭੇਜਣਾ ਚਾਹੀਦਾ ਹੈ ਅਤੇ ਕਿਸੇ ਨੂੰ ਧਮਕੀ ਦੇਣ ਦੀ ਬਜਾਏ ਉਸ ਨੂੰ ਫ਼ੋਨ ਕਰਕੇ ਚਾਹ ‘ਤੇ ਬੁਲਾ ਕੇ ਗੱਲਬਾਤ ਰਾਹੀਂ ਮਾਮਲਾ ਸੁਲਝਾਉਣਾ ਚਾਹੀਦਾ ਹੈ।
ਸੋਸ਼ਲ ਮੀਡੀਆ ‘ਤੇ ਕੀ ਕਹਿ ਰਹੇ ਹਨ ਲੋਕ
ਤਸਵੀਰ ਸਰੋਤ, YT/@ShekharSuman
ਸ਼ੇਖਰ ਸੁਮਨ ਦੇ ਸ਼ੋਅ ਵਿੱਚ ਸੰਜੇ ਦੱਤ ਦੀਆਂ ਇਨ੍ਹਾਂ ਮਜ਼ਾਕੀਆ ਟਿੱਪਣੀਆਂ ਨੂੰ ਲੈ ਕੇ ਸੋਸ਼ਲ ਮੀਡੀਆ ‘ਤੇ ਵੀ ਕਾਫ਼ੀ ਚਰਚਾ ਹੋ ਰਹੀ ਹੈ।
ਗਗਨ ਚੌਧਰੀ ਨਾਮ ਦੇ ਇੱਕ ਯੂਜ਼ਰ ਨੇ ਲਿਖਿਆ ਕਿ ਵਿਦੇਸ਼ ਦੌਰਿਆਂ, ਭਾਈਚਾਰੇ ਅਤੇ ਪੋਸਟਰ ਲਗਾਉਣ ਨੂੰ ਲੈ ਕੇ ਸੰਜੇ ਦੱਤ ਦੀਆਂ ਟਿੱਪਣੀਆਂ ਕੀ ਪੀਐੱਮ ਮੋਦੀ ਨੂੰ ਲੈ ਕੇ ਹਨ।
ਅਮਿਤ ਕੁਮਾਰ ਸਿੰਧੀ ਨੇ ਲਿਖਿਆ, ਸੰਜੇ ਦੱਤ ਕਿਸ ਤਰ੍ਹਾਂ ਦੀ ਸ਼ਾਂਤੀ ਦੀ ਗੱਲ ਕਰ ਰਹੇ ਹਨ।
ਸਚਿਨ ਵਰਮਾ ਨਾਮ ਦੇ ਇੱਕ ਯੂਜ਼ਰ ਨੇ ਐਕਸ ‘ਤੇ ਲਿਖਿਆ, “ਸੰਜੇ ਦੱਤ ਨੇ ਪੰਜ ਮਿੰਟ ਦਾ ਪ੍ਰਧਾਨ ਮੰਤਰੀ ਬਣ ਕੇ ਕੱਸਿਆ ਤੰਜ। ਉਨ੍ਹਾਂ ਨੇ ਪੰਜ ਮਿੰਟ ਲਈ ਖ਼ੁਦ ਨੂੰ ਭਾਰਤ ਦਾ ਪ੍ਰਧਾਨ ਮੰਤਰੀ ਮੰਨਿਆ ਅਤੇ ‘ਮੁੰਨਾ ਭਾਈ’ ਸਟਾਈਲ ਵਿੱਚ ਮੈਸੇਜ ਦਿੱਤਾ।”
ਅਦਾਕਾਰ ਕਮਾਲ ਖ਼ਾਨ ਨੇ ਐਕਸ ‘ਤੇ ਲਿਖਿਆ, “ਸੰਜੇ ਦੱਤ ਨੇ ਇਹ ਕਹਿਣ ਦੀ ਹਿੰਮਤ ਦਿਖਾਈ ਕਿ ਉਹ ਭਾਰਤ ਵਿੱਚ ਸ਼ਾਂਤੀ ਮਹਿਸੂਸ ਨਹੀਂ ਕਰਦੇ ਹਨ।”
ਜਦਕਿ ਦਿਲੀਪ ਅਨਜਾਨਾ ਨਾਮ ਦੇ ਇੱਕ ਯੂਜ਼ਰ ਨੇ ਤੰਜ ਕੀਤਾ, “ਸੰਜੇ ਦੱਤ ਨੂੰ ਉਹੀ ਪੁਰਾਣੀ ਸ਼ਾਂਤੀ ਚਾਹੀਦੀ ਹੈ ਜਿਸ ਵਿੱਚ ਉਹ ਆਪਣੇ ਘਰ ਵਿੱਚ ਹਥਿਆਰ ਰੱਖ ਸਕਣ।”
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
source : BBC PUNJABI
