ગુજરાત હવામાન : વરસાદની નવી સિસ્ટમ ક્યાં ફંટાઈ? જાણો આવનારા દિવસમાં તમારા વિસ્તારમાં વરસાદ પડશે કે નહીં

અપડેટેડ એક કલાક પહેલા

ગુજરાતમાંથી ચોમાસું વિદાય લઈ રહ્યું છે ત્યારે ગુજરાતમાં શુક્રવારે એકદમ નહિવત્ વરસાદ નોંધાયો છે.

સપ્ટેમ્બર મહિનાના મધ્યભાગમાં આવેલા વરસાદે ગુજરાતમાં લોકોને આંશિક રાહતનો અનુભવ કરાવ્યો હતો.

પરંતુ હવે સપ્ટેમ્બર મહિનાના અંત સુધી નોંધપાત્ર વરસાદની શક્યતાઓ ખૂબ ઓછી અને એકદમ નહિવત્ છે.

આમ 30 સપ્ટેમ્બર સુધી ગુજરાતમાં વરસાદ આવે તેવી લગભગ કોઈ શક્યતા નથી. જોકે, હવામાન વિભાગના કહેવા પ્રમાણે, કેટલાંક સ્થળોએ છુટોછવાયો વરસાદ પડી શકે છે.

આમ ભલે સપ્ટેમ્બરમાં વરસાદની સંભાવના ઓછી છે પરંતુ ઑક્ટોબર મહિનામાં ગુજરાતમાં વરસાદ પાડવાની સંભાવનાઓ દેખાઈ રહી છે. હવામાન વિભાગનાં મૉડલો અનુસાર, 1 ઑક્ટોબરથી ગુજરાતમાં ફરી વરસાદ થવાની શક્યતાઓ છે. જોકે. તેમાં હજુ ફેરફાર થવાની શક્યતાઓ છે.

1 ઑક્ટોબરથી લઈને 5 ઑક્ટોબર સુધી પશ્ચિમ ભારતમાં વેસ્ટર્ન ડિસ્ટર્બન્સને કારણે એક સાયક્લોનિક સર્ક્યુલેશન સર્જાવાને લઈને ગુજરાત પર પણ તેની અસરો થાય તેવી શક્યતા છે. ત્યારે ગુજરાતમાં કેટલાક વિસ્તારમાં છૂટોછવાયો અને હળવાથી મધ્યમ પ્રકારના વરસાદ પાડવાની શક્યતાઓ છે.

બીજી તરફ, બંગાળની ખાડીની સિસ્ટમ આગળ વધીને ભારતની જમીન પર જોવા મળી રહી છે, ત્યારે હવે આ સિસ્ટમની અસર ઓછી થશે પણ શું તેના પછી કોઈ સિસ્ટમ સર્જાશે? ગુજરાતમાં હવે કોઈ વરસાદ પાડવાની શક્યતા છે? જાણીશું આ અહેવાલમાં.