ബംഗാള്‍ മുന്‍ ഡെപ്യൂട്ടി സ്പീക്കറും ടി എം സി നേതാവുമായ ആശിഷ് ബാനര്‍ജി പാര്‍ട്ടി ഓഫീസില്‍ മരിച്ച നിലയില്‍

Source :- SIRAJLIVE NEWS

കൊല്‍ക്കത്ത | പശ്ചിമ ബംഗാള്‍ നിയമസഭാ മുന്‍ ഡെപ്യൂട്ടി സ്പീക്കറും തൃണമൂല്‍ കോണ്‍ഗ്രസ്സ് മുതിര്‍ന്ന നേതാവുമായ ആശിഷ് ബാനര്‍ജിയെ പാര്‍ട്ടി ഓഫീസില്‍ മരിച്ച നിലയില്‍ കണ്ടെത്തി. ബിര്‍ഭും ജില്ലയിലെ രാംപുര്‍ഹട്ട് ഹത്തല പാരയിലുള്ള അദ്ദേഹത്തിന്റെ വസതിക്ക് സമീപത്തെ പാര്‍ട്ടി ഓഫീസിലാണ് മൃതദേഹം കണ്ടെത്തിയത്. മൃതദേഹത്തിനരികില്‍ നിന്ന് ആത്മഹത്യയാണെന്ന് സംശയമുയര്‍ത്തുന്ന കുറിപ്പ് കണ്ടെടുത്തു. മൃതദേഹം പോസ്റ്റ്മോര്‍ട്ടത്തിനയച്ചു.

2001 മുതല്‍ 2026 വരെ പശ്ചിമ ബംഗാള്‍ നിയമസഭയില്‍ രാംപുര്‍ഹട്ടിനെ പ്രതിനിധീകരിച്ച ബാനര്‍ജി, ഡെപ്യൂട്ടി സ്പീക്കറായും മമത ബാനര്‍ജി സര്‍ക്കാരില്‍ സ്‌കൂള്‍ വിദ്യാഭ്യാസം, കൃഷി തുടങ്ങിയ വകുപ്പുകള്‍ കൈകാര്യം ചെയ്യുന്ന മന്ത്രിയായും സേവനമനുഷ്ഠിച്ചിട്ടുണ്ട്. 2026-ലെ നിയമസഭാ തിരഞ്ഞെടുപ്പില്‍ രാംപുര്‍ഹട്ടില്‍ നിന്ന് ടി എം സി സ്ഥാനാര്‍ഥിയായി മത്സരിച്ചെങ്കിലും, ബി ജെ പിയുടെ ധ്രുവ് സാഹയോട് 24,000-ത്തിലധികം വോട്ടിന് പരാജയപ്പെട്ടു. തിരഞ്ഞെടുപ്പ് പരാജയത്തിന് ശേഷം ബാനര്‍ജി രാഷ്ട്രീയത്തില്‍ അത്ര സജീവമായിരുന്നില്ലെന്ന് പാര്‍ട്ടി വൃത്തങ്ങള്‍ പറഞ്ഞു.

ടി എം സിയുടെ ശക്തനായ നേതാവായ അനുബ്രത മൊണ്ടാല്‍ ജില്ലാ പ്രസിഡന്റായിരുന്ന കാലയളവില്‍ ബിര്‍ഭുമിലെ പ്രമുഖ പാര്‍ട്ടി നേതാവായിരുന്നു ബാനര്‍ജി. 15 വര്‍ഷത്തെ ഭരണത്തിന് അന്ത്യം കുറിച്ചുകൊണ്ട് 2026-ലെ നിയമസഭാ തിരഞ്ഞെടുപ്പില്‍ ടി എം സി പരാജയപ്പെട്ടതിനെ തുടര്‍ന്ന് പശ്ചിമ ബംഗാളില്‍ വലിയ രാഷ്ട്രീയ മാറ്റങ്ങള്‍ സംഭവിക്കുന്നതിനിടയിലാണ് ആശിഷ് ബാനര്‍ജിയുടെ മരണം.

(ശ്രദ്ധിക്കുക, ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടാം. Helpline 1056. 0471 2552056).   

Content Highlights:
Former West Bengal Deputy Speaker and Trinamool Congress leader Ashish Banerjee was found dead inside a party office. The unexpected demise has shocked the state political circles. Authorities have initiated an investigation into the incident to determine the cause of death.