‘ബെത്‌ലഹേം കുടുംബ യൂണിറ്റ്’ മികച്ച പ്രതികരണവുമായി മുന്നേറുന്നു; തിയറ്റർ ദൃശ്യങ്ങൾ പങ്കുവെക്കരുതെന്ന് അണിയറപ്രവർത്തകർ

നിവിൻ പോളിയെയും മമിത ബൈജുവിനെയും പ്രധാന കഥാപാത്രങ്ങളാക്കി ഗിരീഷ് എഡി സംവിധാനം ചെയ്ത ‘ബെത്‌ലഹേം കുടുംബ യൂണിറ്റ്’ മികച്ച പ്രേക്ഷക പ്രതികരണവുമായി തിയറ്ററുകളിൽ മുന്നേറുന്നു. ബോക്സ് ഓഫീസിലും ചിത്രം മികച്ച പ്രകടനമാണ് കാഴ്ചവയ്ക്കുന്നത്. ഇതിനിടെ സിനിമയുടെ അണിയറപ്രവർത്തകർ പ്രേക്ഷകർക്ക് മുന്നറിയിപ്പുമായി സമൂഹമാധ്യമങ്ങളിൽ കുറിപ്പ് പങ്കുവെച്ചു.

തിയറ്ററിൽ നിന്ന് സിനിമയിലെ ദൃശ്യങ്ങൾ പകർത്തി സമൂഹമാധ്യമങ്ങളിൽ പങ്കുവെക്കരുതെന്നാണ് നിർമാതാക്കളായ ഭാവന സ്റ്റുഡിയോസ് അഭ്യർഥിച്ചിരിക്കുന്നത്. സിനിമയിലെ പ്രധാന രംഗങ്ങളും സർപ്രൈസുകളും തിയറ്ററിൽ തന്നെ ആസ്വദിക്കാൻ മറ്റ് പ്രേക്ഷകർക്ക് അവസരം നൽകണമെന്നാണ് അണിയറപ്രവർത്തകരുടെ ആവശ്യം.

‘ബെത്‌ലഹേം കുടുംബ യൂണിറ്റ്’ എന്ന ചിത്രത്തിന് നൽകുന്ന വലിയ വരവേൽപ്പിന് നന്ദി അറിയിച്ചുകൊണ്ടാണ് ഭാവന സ്റ്റുഡിയോസ് കുറിപ്പ് പങ്കുവെച്ചത്. പ്രേക്ഷകരുടെ ആവേശം മനസിലാക്കുന്നുവെന്നും എന്നാൽ തിയറ്ററിൽ നിന്നുള്ള ദൃശ്യങ്ങൾ സമൂഹമാധ്യമങ്ങളിൽ പ്രചരിപ്പിക്കുന്നത് സിനിമ കാണാനിരിക്കുന്നവരുടെ ആസ്വാദനത്തെ ബാധിക്കുമെന്നും അണിയറപ്രവർത്തകർ വ്യക്തമാക്കി.

സിനിമയിലെ സർപ്രൈസുകൾ എല്ലാവരും തിയറ്ററിൽ തന്നെ ആസ്വദിക്കണമെന്നും നിർമാതാക്കൾ അഭ്യർഥിച്ചു.