Source :- EVARTHA NEWS
(adsbygoogle = window.adsbygoogle || []).push({});
2027-ലെ ഉത്തർപ്രദേശ് നിയമസഭാ തെരഞ്ഞെടുപ്പിൽ 181 സീറ്റുകളിൽ മത്സരിക്കാൻ കോൺഗ്രസ് താൽപര്യം പ്രകടിപ്പിച്ചതായി സമാജ്‌വാദി പാർട്ടി അധ്യക്ഷൻ അഖിലേഷ് യാദവ്. ഡൽഹിയിൽ നടന്ന ഹിന്ദുസ്ഥാൻ ടൈംസ് ലീഡർഷിപ്പ് സമ്മിറ്റിൽ സംസാരിക്കുകയായിരുന്നു അദ്ദേഹം. 403 അംഗ നിയമസഭയിൽ ബിജെപിയെ പരാജയപ്പെടുത്താൻ ഇന്ത്യാ സഖ്യം ഐക്യത്തോടെ മുന്നോട്ടുപോകുമെന്നും നിലവിലെ സഖ്യത്തിൽ മാറ്റങ്ങളൊന്നും പ്രതീക്ഷിക്കുന്നില്ലെന്നും അഖിലേഷ് വ്യക്തമാക്കി. അതേസമയം, ബഹുജൻ സമാജ് പാർട്ടി അധ്യക്ഷ മായാവതിയുമായി സഖ്യമുണ്ടാക്കുന്നതിനെക്കുറിച്ച് ഇപ്പോൾ ആലോചിക്കുന്നില്ലെന്നും അദ്ദേഹം പറഞ്ഞു.
അയോധ്യയിലെ രാമക്ഷേത്രത്തിലേക്ക് ഭക്തർ നൽകിയ സംഭാവനകൾ മോഷ്ടിക്കപ്പെട്ടുവെന്ന ആരോപണം വരാനിരിക്കുന്ന തെരഞ്ഞെടുപ്പിൽ പ്രധാന ചർച്ചയാകുമെന്നും അഖിലേഷ് യാദവ് പറഞ്ഞു. ഭക്തരുടെ മതവികാരം സംരക്ഷിക്കുന്നതിൽ ബിജെപി പരാജയപ്പെട്ടുവെന്ന് ആരോപിച്ച അദ്ദേഹം, മുഖ്യമന്ത്രി യോഗി ആദിത്യനാഥ് അയോധ്യ സന്ദർശിച്ച് റെക്കോർഡുകൾ സൃഷ്ടിക്കുന്നതിനിടെ ക്ഷേത്രത്തിലെ വഴിപാടുകൾ മോഷണം പോകുന്നത് ശ്രദ്ധിച്ചില്ലേയെന്നും ചോദിച്ചു. ആദ്യം ഇറ്റാവയിലെ കേദാരേശ്വർ ധാം സന്ദർശിച്ച ശേഷം അയോധ്യയിലെത്തുമെന്നും 2024-ലെ ലോക്‌സഭാ തെരഞ്ഞെടുപ്പിൽ സമാജ്‌വാദി പാർട്ടിയെ വിജയിപ്പിച്ച ഫൈസാബാദിലെ വോട്ടർമാർക്ക് നന്ദി അറിയിക്കുമെന്നും അദ്ദേഹം കൂട്ടിച്ചേർത്തു.
ബിജെപി സർക്കാരിനെതിരെ രൂക്ഷവിമർശനങ്ങളും അഖിലേഷ് ഉന്നയിച്ചു. സംസ്ഥാനത്ത് 20-ലധികം മത്സരപ്പരീക്ഷകളുടെ ചോദ്യപേപ്പറുകൾ ചോർന്നതായും 69,000 അസിസ്റ്റന്റ് അധ്യാപക നിയമനത്തിൽ സംവരണ അവകാശങ്ങൾ നിഷേധിക്കപ്പെട്ടതായും അദ്ദേഹം ആരോപിച്ചു. അഗ്നിവീർ പദ്ധതി ഉത്തർപ്രദേശിലെ യുവാക്കളുടെ തൊഴിലവസരങ്ങളെ പ്രതികൂലമായി ബാധിച്ചെന്നും വ്യാജ ഏറ്റുമുട്ടലുകളും പോലീസ് അതിക്രമങ്ങളും വർധിച്ചെന്നും കുറ്റപ്പെടുത്തി.
അടിസ്ഥാന സൗകര്യ വികസന പദ്ധതികളിൽ അഴിമതി നടക്കുന്നുവെന്നും അഖിലേഷ് ആരോപിച്ചു. പിന്നാക്ക വിഭാഗങ്ങൾ, ദളിതർ, ന്യൂനപക്ഷങ്ങൾ എന്നിവരെ ഉൾക്കൊള്ളുന്ന ‘പിഡിഎ’ കൂട്ടായ്മയിലൂടെ ഉത്തർപ്രദേശിൽ രാഷ്ട്രീയ മാറ്റം കൊണ്ടുവരുമെന്നും അദ്ദേഹം അവകാശപ്പെട്ടു.