Source :- BBC INDIA NEWS
फोटो स्रोत, Mumbai Police
“नजर काढण्याच्या बहाण्याने तो घरात आला आणि माझ्या डोक्यावर हात ठेवून पाणी शिंपडलं. त्यानंतर त्यानं जबरदस्ती केली.”
मुंबईतील महिलेवर एका व्यक्तीनं तृतीयपंथी असल्याचं सांगत घरात घुसून अत्याचार केल्याप्रकरणी केलेल्या तक्रारीत हा आरोप करण्यात आला आहे.
मुंबईतील पवई परिसरात 25 वर्षीय तरुणीवर लैंगिक अत्याचार केल्याच्या आरोपाखाली पोलिसांनी 28 वर्षीय अनिल शेषराव शिंदे या व्यक्तीला अटक केली आहे.
तक्रार दाखल झाल्यानंतर अवघ्या चार तासांत मुंबई पोलिसांनी आरोपीला अटक केली.
पवईतील इमारतीपासून कळव्यापर्यंतच्या त्याच्या हालचालींचा माग काढण्यासाठी पोलिसांनी 100 हून अधिक सीसीटीव्ही कॅमेऱ्यांचे फुटेज तपासत आरोपीला जेरबंद केले.
आरोपीला 25 ऑगस्टपर्यंत पोलीस कोठडी सुनावण्यात आली आहे. आरोपी आणि त्याच्या वकिलांची प्रतिक्रिया जाणून घेण्याचा प्रयत्न केला असता अद्याप प्रतिक्रिया मिळू शकलेली नाही.
नेमकं काय घडलं?
पोलिसांच्या माहितीनुसार, 18 ऑगस्ट रोजी दुपारी सुमारे 12.20 वाजता आरोपी पवईतील संबंधित इमारतीत पोहोचला. त्याने तृतीयपंथी असल्याचं भासवून इमारतीतील सुरक्षा रक्षकाचा विश्वास संपादन केला.
त्यानंतर तो इमारतीतील काही घरांकडं गेला. तिसऱ्या मजल्यावरील संबंधित तक्रारदार महिलेने दरवाजा उघडला.
पोलीस सूत्रांनी दिलेल्या माहितीनुसार, आरोपीने या महिलेला तिच्या पतीच्या प्रकृतीबाबत सांगितले आणि त्यांच्यावर असलेली ‘नजर’ किंवा वाईट प्रभाव दूर करण्याचे आपण करू शकतो, असे सांगितले.
महिलेच्या तक्रारीनुसार, पती रुग्णालयात उपचार घेत असल्यानं त्यांना मदत होईल, या विश्वासानं तिनं आरोपीला घरात प्रवेश दिला.
त्यानंतर आरोपीने महिलेवर पाणी शिंपडलं आणि तिच्या डोक्यावर हात ठेवला. यानंतर तो बेडरूमपर्यंत गेला आणि तिला धमकी देत तिच्यावर अत्याचार केला, असं तिनं तक्रारीत म्हटलं आहे.
महिलेने आरडाओरडा करण्याचा प्रयत्न केल्यानंतर आरोपी घरातून निघून गेला. त्यावेळी त्यानं महिलेकडून 200 रुपये घेतल्याचंही पोलिसांनी सांगितलं.
पोलिसांच्या माहितीनुसार, ही घटना 18 ऑगस्ट 2026 रोजी दुपारी 12.20 ते 12.50 या वेळेत घडली आहे.
महिलेची रात्री पोलिसांत तक्रार
महिलेने मंगळवारी रात्री सुमारे 11 वाजता पोलिसांत तक्रार दाखल केली. त्यानंतर या प्रकरणी पोलिसांनी तत्काळ दखल घेत गुन्हा दाखल केला.
पोलिसांनी भारतीय न्याय संहितेतील 64 (1) आणि 351 (2) या कलमांनुसार गुन्हा दाखल केला आहे. काळी जादू किंवा अंधश्रद्धेशी संबंधित तरतुदीही या प्रकरणात लागू होण्याची शक्यता पोलिसांनी व्यक्त केली आहे.
गुन्हा दाखल झाल्यानंतर वरिष्ठ पोलीस निरीक्षक ए. एस. सावंत, पोलीस निरीक्षक सुषांत बांदगर आणि पोलीस उपनिरीक्षक संदीप पाटील यांच्या पथकाने आरोपीचा शोध सुरू केला.
फोटो स्रोत, Getty Images
सीसीटीव्ही आणि इतर सूत्रांच्या साहाय्याने आरोपीला अटक
तक्रार दाखल झाल्यानंतर आरोपी रिक्षातून साडी परिधान करून जात असल्याचं निष्पन्न झालं होतं. त्यामुळं तपास करताना पोलिसांसमोर आव्हान होतं.
मात्र पवईतील इमारतीपासून कळव्यापर्यंतच्या त्याच्या हालचालींचा माग काढण्यासाठी पोलिसांनी 100 हून अधिक सीसीटीव्ही कॅमेऱ्यांचे फुटेज तपासले.
तपासादरम्यान हाती आलेले पुरावे आणि इतर गुप्तहेर तसेच सूत्रांच्या माहितीनुसार आरोपी कळवा भागात असल्याची माहिती पोलिसांना मिळाली. पोलिसांनी सापळा रचत आरोपीला गोलाई नगर, कळवा झोपडपट्टीतून अटक केली.
आरोपी खरंच तृतीयपंथी आहे का?
पोलिसांच्या प्राथमिक तपासानुसार, आरोपीने तृतीयपंथी असल्याचे भासवून महिलेचा विश्वास संपादन केला होता.
आरोपीने चौकशीदरम्यान त्याच्या कुटुंबातील काही व्यक्ती तृतीयपंथी असल्याचे भासवून भीक मागत असल्याचा दावा केला आहे. मात्र, या दाव्याची स्वतंत्र पडताळणी पोलिसांकडून केली जात आहे.
पोलिसांकडून आरोपीचा यापूर्वी अशाच प्रकारच्या गुन्ह्यांमध्ये सहभाग होता का, याचाही तपास सुरू आहे, ही माहिती मुंबई पोलिसांनी दिली.
आरोपीच्या बाजूने काय?
या प्रकरणातील आरोपी अनिल शिंदे आणि त्यांच्या वकिलांची बाजू जाणून घेण्यासाठी बीबीसी मराठीने संपर्क साधण्याचा प्रयत्न केला. मात्र, त्यांच्याकडून प्रतिक्रिया मिळू शकली नाही.
त्यांची प्रतिक्रिया मिळाल्यास बातमीत अपडेट करण्यात येईल. सध्या आरोपी 25 ऑगस्टपर्यंत पोलिसांच्या कोठडीत आहे. अधिक तपास सुरू असल्याचे पवई पोलिसांनी सांगितले.
मुंबई पोलिसांकडून नागरिकांना आवाहन करण्यात आले आहे की, अशा प्रकारच्या घटना भविष्यात घडू नयेत. याकरिता नागरिकांनी सतर्क राहून अनोळखी व्यक्ती किंवा भीक मागणाऱ्या बहुरूपी व्यक्तींना घरात प्रवेश देऊ नये.
तसेच कोणी संशयित वाटल्यास तात्काळ पोलीस नियंत्रण कक्षातील 100 आणि 112 या संपर्क क्रमांकांवर संपर्क साधावा.
बीबीसीसाठी कलेक्टिव्ह न्यूजरूमचे प्रकाशन.
SOURCE : BBC
