દોડ વખતે કપડામાં મળત્યાગ થઈ જતાં ઍથ્લીટનો વીડિયો વાઇરલ, ખેલાડીઓ માફી કેમ માગી?

એક ઑસ્ટ્રેલિયન ઍથ્લીટે હાયરૉક્સ સ્પર્ધા દરમિયાન કપડાં ગંદાં થઈ જવા છતાં રેસ ચાલુ રાખવા બદલ માફી માગી છે. તેમણે જણાવ્યું છે કે હવે તેઓ આ સ્પર્ધામાં મળેલી પોતાની જીતને ત્યજી રહ્યાં છે.

રેસ દરમિયાન તેઓ અચાનક બીમાર પડી ગયાં અને અજાણતાં તેમનાં કપડાંમાં જ મળત્યાગ થઈ ગયો હતો.

હાયરૉક્સ એક ઇનડોર ફિટનેસ રેસ છે, જેમાં દોડ અને વિવિધ શક્તિ આધારિત કસરતોને જોડીને સ્પર્ધા યોજવામાં આવે છે.

જોઆના વિએત્રઝિકે શનિવારે ચીનના બેઇજિંગમાં યોજાયેલી ઇનડોર ફિટનેસ સ્પર્ધા દરમિયાન બનેલી આ ઘટના માટે “હૃદયપૂર્વક માફી” માગી હતી. તેમણે સ્વીકાર્યું કે તેમને અલગ નિર્ણય લેવો જોઈએ હતો અને સ્પર્ધા વચ્ચેથી જ બહાર નીકળી જવું જોઈતું હતું.

કપડાં ગંદાં થઈ ગયાં પછી પણ વિએત્રઝિક રેસમાં ભાગ લેતાં રહ્યાં હતાં. તેનો વીડિયો પણ સોશિયલ મીડિયા પર વાઇરલ થયો હતો.

આ ઘટના બાદ સ્વચ્છતા અને આરોગ્ય સંબંધિત નિયમો અંગે અનેક સવાલો ઊભા થયા હતા. હાયરૉક્સના સહ-સ્થાપક મોરિટ્ઝ ફ્યુર્સ્ટેએ પણ આ સમગ્ર મામલાને સંભાળવાની રીત બદલ માફી માગી હતી.

ગુરુવારે જાહેર કરેલા એક નિવેદનમાં વિએત્રઝિકે જણાવ્યું, “મને ખબર છે કે મારા આ નિર્ણયની અસર ફક્ત મારા સુધી સીમિત રહી નહોતી. જે કોઈ પણ આ ઘટનાથી પ્રભાવિત થયું હોય, તેમની હું દિલથી માફી માગું છું.”

ટીકા-ટિપ્પણીઓ બાદ બેઇજિંગ સ્પર્ધાનાં વિજેતા બનેલાં વિએત્રઝિકે જણાવ્યું કે તેઓ પોતાની જીત છોડવા માગે છે.

સોશિયલ મીડિયા પર કરેલી પોસ્ટમાં તેમણે લખ્યું, “હું ચીનના લોકો, મારાં સાથી ખેલાડીઓ, દર્શકો અને હાયરૉક્સના આયોજકોની બેઇજિંગમાં રેસ દરમિયાન બનેલી ઘટના માટે દિલથી માફી માગું છું.”

તેમણે વધુમાં જણાવ્યું કે રેસ શરૂ થઈ ત્યારે તેઓ સંપૂર્ણપણે ફિટ અને સ્વસ્થ હતાં અને બીમાર પડવાનું કોઈ કારણ તેમને જણાતું નહોતું.

વિએત્રઝિકે લખ્યું, “હવે પાછળ વળી જોઉં છું ત્યારે અફસોસ થાય છે કે મેં ટ્રૅક છોડવાનો નિર્ણય લીધો નહોતો. હવે સમજાય છે કે મારે બીજો નિર્ણય લેવો જોઈતો હતો.”

“રેસ ચાલુ રાખવાનો નિર્ણય મારી જવાબદારી હતી. તેનાથી લોકોને જે અસુવિધા થઈ અને સ્પર્ધામાં જે વિક્ષેપ આવ્યો, તેના માટે મને ખૂબ ખેદ છે.”

હાયરૉક્સે જણાવ્યું કે તેની પાસે બાયૉકન્ટામિનેન્ટ અને તબીબી પરિસ્થિતિને સંભાળવા માટે સ્પષ્ટ પ્રક્રિયા છે.

સંસ્થાના જણાવ્યા અનુસાર, સ્પર્ધા દરમિયાન એક અણધારી પરિસ્થિતિ સર્જાઈ હતી. તે સમયે નિર્ધારિત નિયમો અને પ્રક્રિયા અંગે ગૂંચવણ પેદા થઈ હતી, જેના કારણે તેને અમલમાં મૂકવાની રીત અંગે પણ અસ્પષ્ટતા ઊભી થઈ હતી.

હાયરૉક્સના સહ-સ્થાપક મોરિટ્ઝ ફ્યુર્સ્ટેએ ઇન્સ્ટાગ્રામ પર જારી કરેલા નિવેદનમાં જણાવ્યું હતું કે સ્પર્ધાની પ્રક્રિયાઓમાં સુધારા કરવામાં આવશે, જેથી આવી ઘટના ફરી ન બને.

વિએત્રઝિકની ઓળખ સોશિયલ મીડિયા પર જાહેર થયા બાદ હાયરૉક્સે જણાવ્યું કે ઍથ્લીટને ગાળો આપનાર અથવા ધમકી આપનાર લોકોને ભવિષ્યમાં યોજાનારી કોઈ પણ સ્પર્ધામાં ભાગ લેવા દેવામાં નહીં આવે.

હાયરૉક્સે સોમવારે જણાવ્યું, “અમારા સમુદાયમાં હિંસાની ધમકી આપનાર અથવા કોઈ ખેલાડીને નુકસાન પહોંચાડવા માટે ઉશ્કેરનાર લોકો માટે કોઈ સ્થાન નથી.”

હાયરૉક્સની દરેક રેસમાં સ્પર્ધકોએ એક પછી એક એક કિલોમીટર દોડવું પડે છે અને સાથે વિવિધ પ્રકારની ફિટનેસ કસરતો કરવી પડે છે.

આ કસરતોમાં સ્લેજ પુશ, બર્પી જમ્પ, ઇનડનર રોઇંગ અને રેતીની થેલી લઈને લન્જેસ જેવી પ્રવૃત્તિઓનો સમાવેશ થાય છે.

વર્ષ 2017માં જર્મનીના હેમ્બર્ગ શહેરમાં શરૂ થયેલી હાયરૉક્સ સ્પર્ધા છેલ્લાં કેટલાંક વર્ષોમાં ખૂબ લોકપ્રિય બની છે. હવે તેનું આયોજન વિશ્વના અનેક દેશોમાં થાય છે. ચીનમાં આ સ્પર્ધાની શરૂઆત 2024ના અંતમાં થઈ હતી.

ઘણા લોકોએ સવાલ ઉઠાવ્યો છે કે ગયા અઠવાડિયે બેઇજિંગમાં યોજાયેલી સ્પર્ધા દરમિયાન અધિકારીઓએ ઍથ્લીટને રોકી કેમ નહોતી.

ખાસ કરીને ત્યારે, જ્યારે હાયરૉક્સ થૂંકવું, નાક સાફ કરીને ગંદકી ફેલાવવી, કચરો ફેંકવો અથવા પાણીનો ગેરવપરાશ કરવો જેવી બાબતો માટે દંડ ફટકારે છે.

બીબીસી માટે કલેક્ટિવ ન્યૂઝરૂમનું પ્રકાશન