Source : BBC NEWS
ઇમેજ સ્રોત, Getty Images
વાંચવાનો સમય: 2 મિનિટ
એશિયન ગેમ્સમાં સિલ્વર મેડલ જીતનારાં આ મહિલા ખેલાડીને ક્યારેક ‘પુરુષ’ બનીને રહેવું પડ્યું હતું
હાશિમી (મધ્યમાં) 2021માં અફઘાનિસ્તાનમાંથી ભાગી ગયાં હતાં.
અફઘાનિસ્તાનનાં મહિલા સાઇકલિસ્ટ ફરીબા હાશિમીએ જાપાનમાં યોજાઈ રહેલી એશિયન ગેમ્સમાં સિલ્વર મેડલ જીત્યો છે.
રમતગમતમાં કારકિર્દી બનાવવા માટે તેમણે એક સમય એવો પણ જોયો હતો જ્યારે તેમને પુરુષનો વેશ ધારણ કરીને તાલીમ લેવી પડતી હતી.
ફરીબા હાશિમી 2021માં તાલિબાન ફરી સત્તામાં આવ્યા બાદ અફઘાનિસ્તાન છોડીને વિદેશ ચાલી ગયાં હતાં.
તેઓ કહે છે કે તે પહેલાં તેમણે મજબૂરીવશ પુરુષનો વેશ ધારણ કરીને તાલીમ લીધી હતી. હુમલાઓથી બચવા માટે તેમણે આવું કરવું પડતું હતું. અફઘાનિસ્તાનમાં મહિલાઓ પર અનેક પ્રકારના કડક પ્રતિબંધો લાગુ છે.
હાશિમીએ મંગળવારે જાપાનના નાગોયા નજીક યોજાયેલી રેસમાં સિલ્વર મેડલ જીત્યો હતો.
23 વર્ષનાં હાશિમી રવિવારે મહિલાઓની વ્યક્તિગત ટાઇમ ટ્રાયલ સ્પર્ધામાં સાતમા સ્થાને રહ્યાં હતાં.
તેમણે પોતાના સિલ્વર મેડલને “અત્યંત ખાસ” ગણાવ્યો છે. તેમને આશા છે કે તેમની આ સિદ્ધિ અફઘાનિસ્તાનની બીજી મહિલાઓને પણ પોતાનાં સપનાં સાકાર કરવા માટે પ્રેરિત કરશે.
તેમણે કહ્યું, “મારો જન્મ એવા દેશમાં થયો છે જ્યાં સપનાં જોતી મહિલાઓ પર હુમલા થાય છે. મને ખૂબ આનંદ છે કે મેં તેની સામે લડત આપી છે.”
તેમણે વધુમાં કહ્યું, “મને આશા છે કે આગામી પેઢી અહીં આવશે અને કોઈપણ ડર વગર પોતાના દેશનું પ્રતિનિધિત્વ કરશે.”
હાશિમીએ પોતાનાં બહેન યુલદુજના પગલે ચાલતાં 15 વર્ષની ઉંમરે સાઇકલ ચલાવવાનું શરૂ કર્યું હતું.
યુલદુજ પણ આંતરરાષ્ટ્રીય સ્તરનાં સાઇકલિસ્ટ છે. જોકે, તેમના વતન પ્રાંત ફરયાબમાં સાઇકલ ચલાવવું જોખમી માનવામાં આવતું હતું.
હાશિમીએ અગાઉ રૉયટર્સને જણાવ્યું હતું, “હું પુરુષ બનીને તાલીમ લેતી હતી. લોકો મને ઓળખી ન શકે અને મારા પર હુમલો ન કરે તે માટે હું બે કે ત્રણ અલગ-અલગ માસ્ક પહેરતી હતી.”
તેમણે જણાવ્યું કે તેમને હંમેશાં ડર રહેતો હતો કે સાઇકલ ચલાવતી વખતે લોકો તેમની તરફ પથ્થર ન ફેંકે.
ઇટાલીનાં ભૂતપૂર્વ વિશ્વ ચૅમ્પિયન અલેસાન્દ્રા કપેલોટ્ટોની મદદથી હાશિમી હવે ઇટાલીમાં રહે છે અને ત્યાં જ તાલીમ લે છે.
અફઘાનિસ્તાનમાં પોતાના જીવનને યાદ કરતાં હાશિમીએ કહ્યું કે તાલિબાને “અમારી સ્વતંત્રતા છીનવી લીધી.”
તેમણે કહ્યું, “આ સિલ્વર મેડલ અફઘાન મહિલાઓના સાહસ અને સંઘર્ષનું પ્રતીક છે. હું આથી ખૂબ ખુશ છું.”
તેમણે વધુમાં ઉમેર્યું, “હું એકલી નથી. મને ખબર છે કે ઘણા દેશોની લાખો મહિલાઓ મારી પાછળ ઊભી છે. તેમનું પણ એ જ સપનું છે અને તેઓ મારી સાથે છે.”
હાશિમી અને તેમનાં બહેને 2024ના પેરિસ ઑલિમ્પિક્સમાં ભાગ લીધો હતો. હવે તેમની નજર 2028ના લૉસ ઍન્જેલસ ઑલિમ્પિક્સ પર છે.
હાશિમીએ કહ્યું, “હું ક્યારેય હાર માનવા માંગતી નથી. આશા છે કે લૉસ ઍન્જેલસમાં આપણે ફરી જોઈ શકીશું કે શું શક્ય છે.”
બીબીસી માટે કલેક્ટિવ ન્યૂઝરૂમનું પ્રકાશન
SOURCE : BBC NEWS
