‘ഉന്നതി’യില്ല; ആദിവാസി ഊരുകളുടെ പേര് ‘ഊര്’ എന്ന് മാറ്റി

Source :- SIRAJLIVE NEWS

ന്യൂഡല്‍ഹി|ആദിവാസി ഊരുകളുടെ പേര് ‘ഉന്നതി’ എന്നാക്കിയത് മാറ്റുന്നുവെന്ന് പട്ടികജാതി-പട്ടികവര്‍ഗ വികസന മന്ത്രി കെ എ തുളസി. ഊര് എന്ന പഴയ പേര് തന്നെ നിലനിര്‍ത്താന്‍ തീരുമാനിച്ചത് ഊര് മൂപ്പന്‍മാരുടെ അഭ്യര്‍ഥന മാനിച്ചാണെന്ന് മന്ത്രി പറഞ്ഞു. പിണറായി സര്‍ക്കാരാണ് സംസ്ഥാനത്തെ ആദിവാസി ഊരുകളുടെ പേര് ഉന്നതി എന്നാക്കിയത്. വികസന പ്രവര്‍ത്തനങ്ങളുമായി ബന്ധപ്പെട്ട ബ്രാന്റിങിന്റെ ഭാഗമാണ് പേരുമാറ്റം.

ഈ തീരുമാനത്തിനെതിരെ സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള ഊര് മൂപ്പന്മാരും ആദിവാസി സംഘടനകളും സര്‍ക്കാരിന് പരാതി നല്‍കിയിരുന്നു. തങ്ങളുടെ പാരമ്പര്യത്തിന്റേയും സംസ്‌കാരത്തിന്റേയും അവിഭാജ്യ ഘടകമാണ് ഊര് എന്ന് മൂപ്പന്‍മാര്‍ സര്‍ക്കാരിനെ അറിയിച്ചിരുന്നു.

പേരുമാറ്റം ആദിവാസി സമൂഹത്തിന്റെ ആത്മാഭിമാനത്തിനും സ്വത്വത്തിനും കോട്ടം തട്ടിക്കുമെന്നാണ് അവര്‍ പറയുന്നത്. ഈ വാദം പരിഗണിച്ചാണ് സര്‍ക്കാര്‍ പഴയ പേര് തിരികെ നല്‍കാന്‍ തീരുമാനിച്ചതെന്ന് മന്ത്രി പറഞ്ഞു. ആദിവാസി സമൂഹങ്ങളുടെ ആത്മാഭിമാനവും സംസ്‌കാരവും സംരക്ഷിച്ചു കൊണ്ട് തന്നെ വികസന പ്രവര്‍ത്തനങ്ങളുമായി മുന്നോട്ടുപോകും. വികസനം എന്നത് പേര് മാറ്റുന്നത് മാത്രമല്ല. അവരുടെ ജീവിതനിലവാരം ഉയര്‍ത്തുന്നതും അടിസ്ഥാന സൗകര്യങ്ങള്‍ എത്തിക്കുന്നതുമാണെന്നും മന്ത്രി കെ എ തുളസി കൂട്ടിച്ചേര്‍ത്തു.

Content Highlights:
Kerala Minister KA Thulasi announced that tribal settlements will regain their traditional name Ooru instead of Unnathi. The decision follows requests from tribal chieftains and organizations citing cultural identity. The government emphasized that development is about improving lives, not renaming.