‘ज्ञानेश कुमार, राजीनामा द्या’; राहुल गांधींच्या नेतृत्वात दिल्लीत इंडिया आघाडीचा मोर्चा

मतदार याद्यांच्या विशेष पुनरीक्षण (SIR) प्रक्रियेवरून निवडणूक आयोग कचाट्यात सापडला असून आज मंगळवारी (6 ऑक्टोबर) विरोधी पक्षांच्या ‘इंडिया’ आघाडीनं केंद्रीय निवडणूक आयोगावर मोर्चा काढला आहे.

दिल्लीतील निवडणूक आयोगाच्या मुख्यालयापासून साधारण 100 मीटर अंतरावर पोलीसांकडून हा मोर्चा अडवण्यात आला असून राहुल गांधींसहित विरोधी पक्षातील खासदारांनी अडवलेल्या जागीच ठिय्या दिला आहे.

गेल्या तीन वर्षांपासून काँग्रेसचे नेते आणि लोकसभेतील विरोधी पक्षनेते राहुल गांधी हे निवडणूक आयोगाच्या कामकाजाच्या पद्धतीवर पुरावे देऊन टीका करत होते.

‘इंडियन एक्सप्रेस’ या वृत्तपत्रानं केलेल्या इन्व्हेस्टीगेटीव्ह रिपोर्टनंतर राहुल गांधींच्या मुद्द्यांना एकप्रकारे बळकटी मिळालेली आहे.

कॉक्रोच जनता पार्टी, डाव्या संघटना, एनएसयूआय आणि ठाकरे बंधूंनी केलेल्या आंदोलनानंतर आता सगळ्या विरोधी पक्षांनी एकत्र येत हा मोर्चा काढला आहे.

विरोधी पक्षांच्या खासदारांनी आज (6 ऑक्टोबर) दिल्लीत एकत्र येत मुख्य निवडणूक आयुक्त ज्ञानेश कुमार यांच्या राजीनाम्यासाठी निवडणूक आयोग कार्यालयावर धडक मोर्चा काढण्याची आणि त्यानंतर राष्ट्रपती द्रौपदी मुर्मू यांची भेट घेऊन आपली भूमिका मांडण्याची घोषणा केली आहे.

या मोर्चाच्या पार्श्वभूमीवर राजधानी दिल्लीतील निवडणूक आयोगाच्या मुख्यालयाभोवती आणि महत्त्वाच्या संवेदनशील भागात सुरक्षा यंत्रणांनी चोख बंदोबस्त तैनात केला आहे.

या आंदोलनामुळे दिल्लीतील सुरक्षेत कमालीची वाढ करण्यात आली आहे.

निवडणूक आयोगाकडून राबवल्या जाणाऱ्या SIR प्रक्रियेत गंभीर प्रकारच्या गडबडी असल्याचा आरोप विरोधकांचा आहे.

निवडणूक आयोगानं ‘फॉर्म 6’ मध्ये बदल करून भाजपाला अनुकूल अशी भूमिका घेतल्याचा आरोपही राहुल गांधींनी केला आहे.

मात्र, निवडणूक आयोगाने हे सर्व आरोप फेटाळून लावले आहेत.

(बीबीसीसाठी कलेक्टिव्ह न्यूजरूमचे प्रकाशन.)