दिल्लीत आंदोलकांवर हिंदुत्ववादी संघटनांच्या लोकांनी हल्ला केल्याची चर्चा का होतीये?

भारताचे मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी काढण्यात आलेल्या मोर्चादरम्यान शनिवारी आंदोलकांना शिवीगाळ करताना, त्यांच्यावर हल्ले करताना काही ग्रुप्सचे व्हीडिओ समोर आले आहेत. या समूहातील लोक स्वतःची ओळख हिंदुत्ववादी संघटनांचे स्वयंसेवक अशी सांगत आहेत.

स्वतःला हिंदुत्ववादी म्हणवून घेणाऱ्या एका समूहाने आंदोलकाला मारहाण केल्याचा व्हीडिओ समोर आला आहे. या व्हीडिओतील व्यक्ती सांगते की त्यांना या समूहाकडून मारहाण करण्यात आली. ती व्यक्ती व्हीडिओत रडताना दिसत आहे. जेव्हा पत्रकाराने या आंदोलकाला विचारले की तुम्हाला पोलिसांनी संरक्षण दिले का त्यावर ‘नाही’ असे उत्तर आंदोलकाकडून आले आहे.

त्या व्यक्तीवर हल्ला करणारे लोक हे ‘आपल्याच संघटने’तील आहेत असा दावा हिंदुत्ववादी संघटना ‘हिंदू रक्षा दला’चे राष्ट्रीय अध्यक्ष भूपेंदर चौधरी ऊर्फ पिंकी भैय्याने केला आहे.

या व्हीडिओवर पिंकी भैय्याने ट्विट केले आहे. त्यात ते म्हणतात, “झुरळांना (कॉक्रोचेस) वठणीवर आणण्यासाठी हिंदू रक्षा दल सक्षम आहे आणि पुढे देखील आम्ही हे करत राहू.”

ज्या पत्रकार मुलीने या घटनेचं वार्तांकन केलं ती ‘या’ आंदोलकाला ‘छोटी बच्ची’ म्हणताना दिसते.

सोशल मीडियावर जेव्हा या व्हीडिओची चर्चा झाली तेव्हा पोलिसांनी या घटनेची दखल घेत रमन सैनी विवेकानंद उर्फ विवेक, कपिल कुमार, रविंदर सिंह ऊर्फ गोविंद हिंदू यांच्याविरोधात एफआयआर दाखल केली आहे.

कमला मार्केट पोलीस स्टेशन येथील एका वरिष्ठ पोलीस अधिकाऱ्याने बीबीसीला माहिती दिली आहे की या चारही जणांना पोलिसांनी अटक केली आहे.

व्हीडिओत मार खाताना दिसणारी आंदोलक व्यक्ती अल्पवयीन होती की नाही याबाबत पोलीस अधिकाऱ्याकडून पुष्टी झालेली नाही. या प्रकरणाचा आम्ही तपास करत आहोत आणि पीडितेशी संपर्क साधण्याचा प्रयत्न होत आहे असे त्यांनी सांगितले.

भारतीय न्यायसंहितेच्या कलम 126 (शांतता टिकवण्यासाठी घेतलेली हमी), 115 (स्वेच्छेने दुखापत करणे) आणि 130 ( हल्ला) तसेच इतर संबंधित कलमानुसार पोलिसांनी FIR दाखल केली आहे. पुढील तपासानंतर आणखी कलमे लावली जातील असे पोलिसांनी सांगितले.

बीबीसीकडे एफआयआरची कॉपी नाहीये.

संबंधित हल्ल्याचा व्हीडिओ व्हायरल झाल्यानंतर अनेक सोशल मीडिया अकाउंटवरुन तो फिरवण्यात आला आणि संबंधितांची ओळख करुन देण्यात यावी असे आवाहन करण्यात आले. भारतीय युवा काँग्रेसने देखील हा व्हीडिओ शेअर केला.

घटनेचा विरोधाभास असा की हल्लेखोरांवर एका बाजूने तीव्र टीका होत असताना या हल्लेखोरानींच समोर येऊन आपली ओळख जाहीर केली.

या घटनेतील आरोपी कपिल कुमार याने आपल्या इन्स्टाग्राम अकाउंटवर व्हीडिओ पोस्ट करत सांगितले त्याने आणि दुसरा आरोपी रविंदर सिंह याने आम्ही झुरळांचा नीट बंदोबस्त केला अशा शीर्षकाचा व्हीडिओ टाकला.

व्हीडिओत ते म्हणताना दिसतात की आम्ही मोदी आणि दिल्ली पोलिसांचे समर्थक आहोत. तरी देखील आम्हाला त्यांनी ताब्यात घेतले. त्यांच्या आदराच्या रक्षणार्थ आम्ही उतरलो असताना त्यांनी आम्हाला ताब्यात घेतले आहे.

बीबीसीने आणखी एक आरोपी रमन सैनीशी संपर्क साधण्याचा प्रयत्न केला पण त्याचा फोन स्विच ऑफ आला.

बीबीसीने पिंकी भैय्या यांच्याशी संपर्क साधला आणि त्यांची प्रतिक्रिया जाणून घेण्याचा प्रयत्न केला. त्यांनी यावर भाष्य करणे टाळले. मी हे निश्चितपणे सांगू शकत नाही के ते लोक आमच्या संघटनेशी संबंधित आहेत की नाहीत असं त्यांनी सांगितले.