मुख्य निवडणूक आयुक्त ज्ञानेश कुमार यांच्या विरोधात सर्वोच्च न्यायालयात याचिका, SIR वरुन राज्यात काँग्रेसकडून आंदोलन

मुख्य निवडणूक आयुक्त ज्ञानेश कुमार यांच्या विरोधात सर्वोच्च न्यायालयात याचिका दाखल करण्यात आली आहे.

मुख्य निवडणूक आयुक्त ज्ञानेश कुमार हे निवडणूक आयुक्त सुखबीर सिंग संधू आणि विवेक जोशी यांच्या मंजुरीशिवाय निवडणूक आयोगाच्या नावाने निर्णय घेत असल्याचा आरोप त्यांच्या विरोधात सर्वोच्च न्यायालयात दाखल केलेल्या याचिकेत करण्यात आला आहे.

‘लाईव्ह लॉ‘नं दिलेल्या वृत्तानुसार, मुख्य निवडणूक आयुक्त ज्ञानेश कुमार यांच्या निलंबनाची मागणी करणारी याचिका सर्वोच्च न्यायालयात दाखल करण्यात आली आहे.

‘बार अँड बेंच’च्या मते, राकेश कुमार सिंह यांच्या याचिकेत ‘क्वो वारंटो’ आदेशाची मागणी करण्यात आली आहे. घटनेच्या अनुच्छेद 324 अंतर्गत आयोगाला प्रदान केलेला सामूहिक निर्णय घेण्याचा अधिकार केवळ आपल्यालाच आहे, अशा अविर्भावात मुख्य निवडणूक आयुक्तांनी कोणत्या अधिकाराखाली निर्णय घेतले आहेत आणि घेत आहेत, याचे स्पष्टीकरण देण्यास या याचिकेत त्यांना सांगण्यात आलं आहे.

भारतीय संविधानाच्या तरतुदींनुसार, ‘क्वो वारंटो’ (Quo Warranto) सह पाच प्रकारचे रिट सर्वोच्च न्यायालयात किंवा उच्च न्यायालयात दाखल केले जाऊ शकतात.

जेव्हा एखादी व्यक्ती अधिकाराशिवाय सार्वजनिक पद धारण करते, तेव्हा हा आदेश प्रामुख्यानं जारी केला जातो.

भारतीय निवडणूक आयोगामध्ये मुख्य निवडणूक आयुक्त आणि दोन निवडणूक आयुक्तांचा समावेश असतो.

सध्या ज्ञानेश कुमार हे मुख्य निवडणूक आयुक्त असून, सुखबीर सिंग संधू आणि विवेक जोशी हे इतर दोन निवडणूक आयुक्त आहेत.

जेव्हा कोणत्याही मुद्द्यावर तिघांमध्ये एकमत होत नाही, तेव्हा बहुमताच्या आधारावर निर्णय घ्यावा लागतो.

मात्र, ‘इंडियन एक्सप्रेस’ या इंग्रजी वृत्तपत्रातील ताज्या वृत्तानुसार, ज्ञानेश कुमार यांनी दोन निवडणूक आयुक्तांचा विरोध असूनही अनेक निर्णय घेतले.