Source :- BBC PUNJABI
ਤਸਵੀਰ ਸਰੋਤ, Getty Images
ਹਾਲ ਹੀ ਦੇ ਸਾਲਾਂ ਵਿੱਚ ਮੈਟਾ ਨੂੰ ਅਦਾਲਤਾਂ ਵਿੱਚ ਲਗਾਤਾਰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਅਦਾਲਤਾਂ ਨੇ ਕਿਹਾ ਹੈ ਕਿ ਉਸ ਦੇ ਸੋਸ਼ਲ ਮੀਡੀਆ ਪਲੇਟਫ਼ਾਰਮਾਂ ਨੇ ਛੋਟੀ ਉਮਰ ਦੇ ਯੂਜ਼ਰਜ਼ ਨੂੰ ਨੁਕਸਾਨ ਪਹੁੰਚਾਇਆ ਹੈ।
ਪਰ ਮੰਗਲਵਾਰ ਤੋਂ ਸ਼ੁਰੂ ਹੋਣ ਵਾਲਾ ਜਿਊਰੀ ਟ੍ਰਾਇਲ ਮੈਟਾ ਲਈ ਹੁਣ ਤੱਕ ਦਾ ਸਭ ਤੋਂ ਵੱਡਾ ਖਤਰਾ ਸਾਬਿਤ ਹੋ ਸਕਦਾ ਹੈ।
2003 ਵਿਚ ਕੈਲੀਫੋਰਨੀਆ ਅਤੇ ਨਿਊਯਾਰਕ ਸਮੇਤ ਤੀਹ ਅਮਰੀਕੀ ਰਾਜਾਂ ਨੇ ਮੈਟਾ ‘ਤੇ ਇੱਕ ਮੁਕੱਦਮਾ ਦਾਇਰ ਕੀਤਾ ਸੀ। ਇਹ ਕੇਸ ਉਸੇ ਨਾਲ ਜੁੜਿਆ ਹੈ। ਇਨ੍ਹਾਂ ਸੂਬਿਆਂ ਨੇ ਇਲਜ਼ਾਮ ਲਗਾਇਆ ਹੈ ਕਿ ਮੈਟਾ ਨੇ ਬੱਚਿਆਂ ਨਾਲ ਜੁੜੇ ਫੈਡਰਲ ਅਤੇ ਸਟੇਟ ਦੇ ਕਾਨੂੰਨਾਂ ਦੀ ਉਲੰਘਣਾ ਕੀਤੀ ਹੈ ਅਤੇ ਉਨ੍ਹਾਂ ਦੀ ਪ੍ਰਾਈਵੇਸੀ ਨੂੰ ਖਤਰੇ ਵਿਚ ਪਾਇਆ ਹੈ।
ਇਹ ਸੂਬੇ ਨਾ ਸਿਰਫ਼ ਮੈਟਾ ਤੋਂ ਇੱਕ ਟ੍ਰਿਲੀਅਨ ਡਾਲਰ ਤੋਂ ਜ਼ਿਆਦਾ ਦੀ ਮੰਗ ਕਰ ਰਹੇ ਹਨ ਬਲਕਿ ਉਹ ਇੰਸਟਾਗ੍ਰਾਮ ਅਤੇ ਫੇਸਬੁੱਕ ਵਿੱਚ ਬਦਲਾਅ ਕਰਨ ਦੀ ਵੀ ਮੰਗ ਕਰ ਰਹੇ ਹਨ ਜਿਸ ਵਿੱਚ ‘ਲਾਈਕ’ ਕਾਊਂਟ ਅਤੇ ਲਗਾਤਾਰ ਸਕ੍ਰੌਲ ਨੂੰ ਖਤਮ ਕਰਨਾ ਸ਼ਾਮਲ ਹੈ।
ਜੇ ਮੈਟਾ ਇਸ ਤਰ੍ਹਾਂ ਦੇ ਵੱਡੇ ਮਾਮਲੇ ਵਿੱਚ ਹਾਰ ਜਾਂਦੀ ਹੈ ਤਾਂ ਨੌਜਵਾਨਾਂ ਦਾ ਸੋਸ਼ਲ ਮੀਡੀਆ ਐਕਸਪੀਰੀਐਂਸ ਹਮੇਸ਼ਾ ਲਈ ਬਦਲ ਸਕਦਾ ਹੈ।
ਮੈਟਾ ‘ਤੇ ਮੁਕੱਦਮਾ ਕਰਨ ਵਾਲੇ ਸੂਬੇ ਇੰਸਟਾਗ੍ਰਾਮ ਅਤੇ ਫੇਸਬੁੱਕ ਆਪ੍ਰੇਸ਼ਨ ਦੇ ਤਰੀਕੇ ਵਿੱਚ ਬਦਲਾਅ ਦੀ ਮੰਗ ਕਰ ਰਹੇ ਹਨ ਤਾਂ ਕਿ ਉਹ ਘੱਟ ਉਮਰ ਦੇ ਯੂਜ਼ਰਸ ਅਤੇ ਬੱਚਿਆਂ ਲਈ ਸੁਰੱਖਿਅਤ ਬਣ ਸਕੇ।
- ਕਿਸ਼ੋਰ ਯੂਜ਼ਰਸ ਦੇ ਮਾਂ-ਬਾਪ ਦੇ ਵੈਰੀਫਿਕੇਸ਼ਨ ਦੀ ਪ੍ਰਕਿਰਿਆ ਲਾਗੂ ਕੀਤੀ ਜਾਵੇ।
- ਇਸ ਦੇ ਐਲਗੋਰਿਦਮ ਨੂੰ ਬਦਲਿਆ ਜਾਵੇ ਤਾਂ ਕਿ ਯੂਜ਼ਰਸ ਲਗਾਤਾਰ ਕਈ ਘੰਟਿਆਂ ਤੱਕ ਇਸ ਨੂੰ ਸਕ੍ਰੌਲ ਨਾ ਕਰਦੇ ਰਹਿਣ।
- ਅਜਿਹੇ ਕਈ ਇਮੇਜ ਫ਼ਿਲਟਰ ਹਟਾਉਣ ਜੋ ਤਸਵੀਰਾਂ ਵਿਚ ਵਿਅਕਤੀ ਦੀ ਦਿੱਖ ਨੂੰ ਬਦਲ ਦਿੰਦੇ ਹਨ।
- ਵੀਡੀਓ ਕੰਟੈਂਟ ਤੋਂ ਆਟੋ ਪਲੇ ਫ਼ੀਚਰ ਹਟਾਇਆ ਜਾਵੇ।
- ਇੱਕ ਤੋਂ ਜ਼ਿਆਦਾ ਅਕਾਊਂਟ ਬਣਾਉਣ ‘ਤੇ ਰੋਕ ਲਗਾਈ ਜਾਵੇ।
- ਇੰਸਟਾਗ੍ਰਾਮ ਸਟੋਰੀਜ਼ ਜਿਹੀ ਗਾਇਬ ਹੋਣ ਵਾਲੀ ਜਾਂ ਅਸਥਾਈ ਪੋਸਟ ਨੂੰ ਬੰਦ ਕੀਤਾ ਜਾਵੇ।
ਇਹ ਸਾਰੇ ਫੀਚਰਜ਼ ਵਰਤਮਾਨ ਵਿੱਚ ਮੈਟਾ ਦੇ ਸੋਸ਼ਲ ਮੀਡੀਆ ਪਲੇਟਫ਼ਾਰਮਾਂ ਦੇ ਬੇਹਦ ਅਹਿਮ ਫ਼ੀਚਰ ਮੰਨੇ ਜਾਂਦੇ ਹਨ।
ਸੂਬਿਆਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਫੀਚਰਜ਼ ਨੂੰ ਇਸ ਤਰ੍ਹਾਂ ਡਿਜ਼ਾਈਨ ਕੀਤਾ ਗਿਆ ਹੈ ਕਿ ਬੱਚੇ, ਕਿਸ਼ੋਰ ਅਤੇ ਬਾਕੀ ਯੂਜ਼ਰਸ ਵੀ ਜ਼ਿਆਦਾ ਤੋਂ ਜ਼ਿਆਦਾ ਸਮੇਂ ਤੱਕ ਪਲੇਟਫ਼ਾਰਮਾਂ ‘ਤੇ ਟਿਕੇ ਰਹਿਣ।
ਉਨ੍ਹਾਂ ਦਾ ਦਾਅਵਾ ਹੈ ਕਿ ਮੈਟਾ ਐਪ ਨੌਜਵਾਨਾਂ ਨੂੰ ਨੋਟੀਫ਼ਿਕੇਸ਼ਨ ਜਿਹੀਆਂ ਚੀਜ਼ਾਂ ਜ਼ਰੀਏ ਵਾਰ ਵਾਰ ਇਨ੍ਹਾਂ ‘ਤੇ ਵਾਪਸ ਆਉਣ ਲਈ ਮਜਬੂਰ ਕਰਦਾ ਹੈ।
ਇਲਜ਼ਾਮ ਹੈ ਕਿ ਮੈਟਾ ਨੇ ਬੱਚਿਆਂ ਨੂੰ ਟਾਰਗੇਟ ਕਰਕੇ ਨੌਜਵਨਾਂ ਦਾ ਸੋਸ਼ਣ ਕੀਤਾ ਤਾਂ ਕਿ ਉਸ ਦੇ ਪਲੇਟਫ਼ਾਰਮਾਂ ਨਾਲ ਜੁੜ ਕੇ ਆਪਣਾ ਯੂਜ਼ਰ ਬੇਸ ਵਧ ਸਕਣ ਅਤੇ ਆਪਣੇ ਕਾਰੋਬਾਰ ਦਾ ਵਿਸਥਾਰ ਕਰ ਸਕਣ। ਅੱਜ ਸ਼ੇਅਰ ਬਜ਼ਾਰ ਵਿੱਚ ਮੈਟਾ ਦਾ ਮੁੱਲ ਤਕਰੀਬਨ 1.5 ਟ੍ਰਿਲੀਅਨ ਡਾਲਰ ਹੈ।
ਮੈਟਾ ਨੇ ਲਗਾਤਾਰ ਅਜਿਹੇ ਦਾਅਵਿਆਂ ਦਾ ਖੰਡਨ ਕੀਤਾ ਹੈ।
ਕੰਪਨੀ ਦੇ ਇੱਕ ਬੁਲਾਰੇ ਨੇ ਇੱਕ ਬਿਆਨ ਵਿੱਚ ਕਿਹਾ, “ਅਸੀਂ ਇਨ੍ਹਾਂ ਇਲਜ਼ਾਮਾਂ ਤੋਂ ਪੂਰੀ ਤਰ੍ਹਾਂ ਅਸਹਿਮਤ ਹਾਂ ਅਤੇ ਸਾਨੂੰ ਵਿਸ਼ਵਾਸ ਹੈ ਕਿ ਸਬੂਤ ਨੌਜਵਾਨਾਂ ਦਾ ਸਮਰਥਨ ਕਰਨ ਪ੍ਰਤੀ ਸਾਡੀ ਵਚਨਬੱਧਤਾ ਨੂੰ ਦਰਸਾਉਣਗੇ।”
ਰਾਜ ਆਪਣੇ ਦਾਅਵਿਆਂ ਨੂੰ ਕੈਲੀਫੋਰਨੀਆ ਦੀ ਮੁੱਖ ਫੈਡਰਲ ਜੱਜ ਯਵੋਨ ਗੋਂਜ਼ਾਲੇਜ਼ ਰੋਜਰਸ ਦੇ ਸਾਹਮਣੇ ਰੱਖ ਰਹੇ ਹਨ। ਉਹ ਹਾਈ ਪ੍ਰੋਫਾਈਲ ਏਲਨ ਮਸਕ ਬਨਾਮ ਸੈਮ ਆਲਟਮੈਨ ਮੁਕੱਦਮੇ ਦੇ ਜੱਜ ਸਨ ਅਤੇ ਲਗਭਗ ਵੀਹ ਸਾਲ ਦੇ ਆਪਣੇ ਕਾਰਜਕਾਲ ਵਿੱਚ ਉਹ ਸਾਫ਼ਗੋਈ ਲਈ ਜਾਣੀ ਜਾਂਦੀ ਹੈ।
ਸੋਸ਼ਲ ਮੀਡੀਆ ਜਨਤਕ ਪਰੇਸ਼ਾਨੀ ਬਣਿਆ
ਤਸਵੀਰ ਸਰੋਤ, Reuters
ਮੈਟਾ ਖ਼ਿਲਾਫ਼ ਹਾਲ ਹੀ ਵਿੱਚ ਦਿੱਤੇ ਗਏ ਇੱਕ ਫ਼ੈਸਲੇ ਵਿੱਚ ਨਿਊ ਮੈਕਸੀਕੋ ਦੇ ਇੱਕ ਜੱਜ ਨੇ ਕੰਪਨੀ ‘ਤੇ ਕਰੀਬ 94.2 ਕਰੋੜ ਡਾਲਰ ਦਾ ਜੁਰਮਾਨਾ ਲਗਾਇਆ ਅਤੇ ਉਸ ਨੂੰ ਆਪਣੇ ਪਲੇਟਫ਼ਾਰਮ ਵਿੱਚ ਕੁਝ ਉਸੇ ਤਰ੍ਹਾਂ ਦੇ ਬਦਲਾਅ ਕਰਨ ਦਾ ਹੁਕਮ ਦਿੱਤਾ ਸੀ ਜਿਸ ਤਰ੍ਹਾਂ ਦੇ ਬਦਲਾਵਾਂ ਦੀ ਮੰਗ ਇਹ ਤੀਹ ਸੂਬੇ ਕਰ ਰਹੇ ਹਨ।
ਜੱਜ ਬ੍ਰਾਇਨ ਬੀਡਸ਼ਾਇਡ ਨੇ ਆਪਣੇ ਹੁਕਮ ਵਿੱਚ ਕਿਹਾ ਕਿ ਇੰਸਟ੍ਰਗ੍ਰਾਮ ਅਤੇ ਫੇਸਬੁੱਕ ਅਠਾਰਾਂ ਸਾਲ ਤੋਂ ਸੱਠ ਉਮਰ ਦੇ ਯੂਜ਼ਰਸ ਲਈ ਲਾਈਕ ਕਾਊਂਟ ਨੂੰ ਖਤਮ ਕਰੇ। ਕਿਸ਼ੋਰਾਂ ਵੱਲੋਂ ਪਲੇਟਫ਼ਾਰਮਾਂ ਜ਼ਰੀਏ ਨਿਊਡ ਕੰਟੈਂਟ ਭੇਜਣ ‘ਤੇ ਰੋਕ ਲਗਾਵੇ ਅਤੇ ਐਪਸ ਤੋਂ ਪੁਸ਼ ਨੋਟਫਿਕੇਸ਼ਨ ਨੂੰ ਦਿਨ ਦੇ ਕੁਝ ਨਿਸ਼ਚਿਤ ਘੰਟਿਆਂ ਤੱਕ ਸੀਮਤ ਕੀਤਾ ਜਾਵੇ।
ਜੱਜ ਨੇ ਮੈਟਾ ਨੂੰ ਇੱਕ ਜਨਤਕ ਪਰੇਸ਼ਾਨੀ ਐਲਾਨਿਆ। ਜੋ ਇੱਕ ਅਜਿਹੀ ਫੈਕਟਰੀ ਦੀ ਤਰ੍ਹਾਂ ਹੈ ਜੋ ਹਵਾ ਨੂੰ ਪ੍ਰਦੂਸ਼ਿਤ ਕਰ ਰਹੀ ਹੈ ਜਿਸ ਨਾਲ ਲੋਕਾਂ ‘ਤੇ ਬਹੁਤ ਬੁਰਾ ਅਸਰ ਪੈ ਰਿਹਾ ਹੈ। ਮੈਟਾ ਨੇ ਕਿਹਾ ਕਿ ਉਹ ਇਸ ਫ਼ੈਸਲੇ ਦੇ ਖ਼ਿਲਾਫ਼ ਅਪੀਲ ਕਰੇਗੀ।
ਹਾਲਾਂਕਿ ਜੱਜ ਬੀਡਸ਼ਾਈਡ ਦੇ ਹੁਕਮ ਵਿੱਚ ਮੈਟਾ ਨੂੰ ਸਿਰਫ਼ ਨਿਊ ਮੈਕਸੀਕੋ ਵਿੱਚ ਬਦਲਾਅ ਕਰਨ ਦੀ ਮੰਗ ਕੀਤੀ ਗਈ ਹੈ ਪਰ ਜੇ ਤੀਹ ਰਾਜ ਮੈਟਾ ਖਿਲਾਫ ਆਪਣੇ ਵੱਖ ਵੱਖ ਕੇਸਾਂ ਵਿਚ ਜਿੱਤ ਹਾਸਿਲ ਕਰਦੇ ਹਨ ਤਾਂ ਮੈਟਾ ਨੂੰ ਲਗਭਗ ਨਿਸ਼ਚਿਤ ਰੂਪ ਵਿੱਚ ਪੂਰੇ ਅਮਰੀਕਾ ਵਿਚ ਪਲੇਟਫ਼ਾਰਮ ਵਿੱਚ ਬਦਲਾਅ ਕਰਨ ਦੀ ਲੋੜ ਹੋਏਗੀ।
ਇਸ ਮੁਕੱਦਮੇ ਵਿੱਚ ਸ਼ਾਮਲ ਸੂਬੇ ਦੇਸ਼ ਦੀ ਲਗਭਗ ਦੋ ਤਿਹਾਈ ਅਬਾਦੀ ਦੀ ਨੁਮਾਇੰਦਗੀ ਕਰਦੇ ਹਨ।
ਜੇ ਮੈਟਾ ਇਸ ਤਰ੍ਹਾਂ ਦੇ ਬਦਲਾਅ ਲਾਗੂ ਕਰਦਾ ਹੈ ਤਾਂ ਇਹ ਉਸ ਦੇ ਯੂਜ਼ਰਸ ਦੇ ਪਲੇਟਫ਼ਾਰਮ ਐਕਸਪੀਰੀਐਂਸ ਵਿੱਚ ਵੱਡਾ ਬਦਲਾਅ ਹੋਵੇਗਾ।
‘ਲਾਈਕਸ’ ਨੂੰ ਲੈ ਕੇ ਸਵਾਲ
ਤਸਵੀਰ ਸਰੋਤ, Getty Images
ਉਦਾਹਰਨ ਵਜੋਂ, ‘ਲਾਈਕਸ’ ਦੀ ਗਿਣਤੀ ਸ਼ੁਰੂਆਤੀ ਸਾਲਾਂ ਤੋਂ ਹੀ ਮੈਟਾ ਦਾ ਹਿੱਸਾ ਰਹੀ ਹੈ ਜਦੋਂ ਇਸ ਨੂੰ ਫੇਸਬੁੱਕ ਕਿਹਾ ਜਾਂਦਾ ਸੀ ਅਤੇ ਉਹੀ ਇਸ ਦਾ ਇਕਲੌਤਾ ਪਲੇਟਫ਼ਾਰਮ ਸੀ।
ਅੱਜ ਸੋਸ਼ਲ ਮੀਡੀਆ ਪਲੇਟਫ਼ਾਰਮ ‘ਤੇ ਲਾਈਕਸ ਹਰ ਥਾਂ ਹਨ। ਆਨਲਾਈਨ ਦੇਖੇ ਜਾਣ ਵਾਲੇ ਟੈਕਸਟ, ਫੋਟੋ ਅਤੇ ਵੀਡੀਓ ਦੇ ਨਾਲ ਜੁੜਨ ਦਾ ਇਹ ਮੁੱਖ ਤਰੀਕਾ ਹੈ।
ਫਿਰ ਵੀ ‘ਲਾਈਕ’ ਨੂੰ ਤੇਜ਼ੀ ਨਾਲ ਨਕਰਾਤਮਕ ਭਾਵਨਾਵਾਂ ਨੂੰ ਵਧਾਵਾ ਦੇਣ ਦੇ ਇੱਕ ਤਰੀਕੇ ਵਜੋਂ ਦੇਖਿਆ ਜਾ ਰਿਹਾ ਹੈ, ਖਾਸ ਕਰਕੇ ਨੌਜਵਾਨਾਂ ਵਿੱਚ।
ਕੈਲੀ ਨਾਮ ਦੀ ਇੱਕ ਛੋਟੀ ਉਮਰ ਦੀ ਯੂਜ਼ਰ ਨੇ ਇਸ ਸਾਲ ਦੀ ਸ਼ੁਰੂਆਤ ਵਿੱਚ ਮੈਟਾ ਦੇ ਖ਼ਿਲਾਫ਼ ਆਪਣੇ ਮੁਕੱਦਮੇ ਵਿੱਚ ਜਿੱਤ ਹਾਸਿਲ ਕੀਤੀ ਸੀ। ਕੈਲੀ ਨੇ ਅਦਾਲਤ ਵਿੱਚ ਗਵਾਹੀ ਦੌਰਾਨ ਦੱਸਿਆ ਕਿ ਉਨ੍ਹਾਂ ਨੇ ਯੂਟਿਊਬ ਅਤੇ ਇੰਸਟਾਗ੍ਰਾਮ ‘ਤੇ ਦਰਜਨਾਂ ਅਕਾਊਂਟ ਕਿਵੇਂ ਬਣਾਏ ਸੀ।
ਆਪਣੀ ਪੋਸਟ ‘ਤੇ ਲਾਈਕ ਕਾਊਂਟ ਜਿਹੇ ਐਂਗਜਮੈਂਟ ਮੈਟ੍ਰਿਕਸ ਕਿਸ਼ੋਰਾਂ ਵਿੱਚ ਰਿਜੈਕਸ਼ਨ ਅਤੇ ਡਿਪ੍ਰੈਸ਼ਨ ਦੀਆਂ ਭਾਵਨਾਵਾਂ ਨੂੰ ਵਧਾ ਸਕਦੇ ਹਨ।
ਸੂਬਿਆਂ ਦੇ ਮੈਟਾ ਖ਼ਿਲਾਫ਼ ਦਾਇਰ ਮੁਕੱਦਮੇ ਵਿੱਚ ਕੰਪਨੀ ਨੇ ਕਿਹਾ ਹੈ ਕਿ ਉਸ ਨੇ ਵੀਹ ਲੱਖ ਤੋਂ ਜ਼ਿਆਦਾ ਦਸਤਾਵੇਜ਼ ਸੌਂਪੇ ਹਨ। ਪਰ ਵਕੀਲਾਂ ਨੇ ਮੈਟਾ ਦੀ ਆਪਣੀ ਖੋਜ ਵੱਲ ਇਸ਼ਾਰਾ ਜਿਸ ਵਿੱਚ ਦਿਖਾਇਆ ਗਿਆ ਕਿ ਲਾਈਕਸ ਵਗੈਰਾ ਦੀ ਗਿਣਤੀ ਬੇਵਜ੍ਹਾ ਤੁਲਨਾ ਨੂੰ ਵਧਾਵਾ ਦਿੰਦੀ ਹੈ ਅਤੇ ਮਾਨਸਿਕ ਸਿਹਤ ‘ਤੇ ਬੁਰਾ ਅਸਰ ਪਾਉਂਦੀ ਹੈ।
ਮੈਟਾ ਦੀ ਆਪਣੀ ਰਿਸਰਚ ਮੁਤਾਬਿਕ ਇੰਸਟਾਗ੍ਰਾਮ ਯੂਜ਼ਰਸ ਦੂਜਿਆਂ ਨਾਲ ਆਪਣੀ ਤੁਲਨਾ ਕਰਦੇ ਹਨ ਜਿਸ ਕਾਰਨ ਲੋਕਾਂ ਵਿੱਚ ਇਕੱਲਾਪਣ ਵਧਿਆ, ਆਪਣੇ ਸਰੀਰ ਨੂੰ ਲੈ ਕੇ ਅਸੰਤੁਸ਼ਟੀ ਵਧੀ ਅਤੇ ਮੂਡ ਵੀ ਖ਼ਰਾਬ ਹੋਇਆ।
ਜੱਜ ਬੀਡਸ਼ਾਇਡ ਨੇ ਆਪਣੇ ਹੁਕਮ ਵਿੱਚ ਕਿਹਾ ਕਿ ਨਿਊ ਮੈਕਸੀਕੋ ਅਤੇ ਦੂਜੀਆਂ ਥਾਂਵਾਂ ‘ਤੇ ਨੌਜਵਾਨਾਂ ਦੀ ਮਾਨਸਿਕ ਸਿਹਤ ਨਾਲ ਜੁੜੇ ਸੰਕਟਾਂ ਦਾ ਇੱਕ ਵੱਡਾ ਕਾਰਨ ਇਹ ਸੋਸ਼ਲ ਮੀਡੀਆ ਪਲੇਟਫ਼ਾਰਮ ਵੀ ਰਹੇ।
ਹੁਣ ਤੀਹ ਹੋਰ ਰਾਜਾਂ ਦੇ ਵਕੀਲ ਜੱਜ ਗੋਂਜ਼ਾਲੇਜ਼ ਰੋਜਰਸ ‘ਤੇ ਉਸੇ ਨਤੀਜੇ ‘ਤੇ ਪਹੁੰਚਣ ਲਈ ਦਬਾਅ ਪਾਉਣਗੇ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
source : BBC PUNJABI
