‘ਨੂਰਜਹਾਂ ਨੇ ਪੰਜਾਹ ਵਰ੍ਹਿਆਂ ਤੋਂ ਵੱਧ ਸੁਰੀਲੇ ਗੀਤ ਗਾ ਕੇ ਲਾਹੌਰ ਦਾ ਕਲਚਰ ਡੈਮੇਜ ਕੀਤਾ’ – ਲਾਹੌਰ ‘ਚ ਛੋਟੇ ਸ਼ਹਿਰਾਂ ਤੋਂ ਆਏ ਲੋਕਾਂ ਬਾਰੇ ਬਿਆਨਾਂ ‘ਤੇ ਹਨੀਫ਼ ਦੀ ਟਿੱਪਣੀ

ਲਾਹੌਰ ਸ਼ਹਿਰ ਵੇਖਿਆ ਬਹੁਤ ਬਾਅਦ ਵਿੱਚ, ਲੇਕਿਨ ਬਚਪਨ ਵਿੱਚ ਪਿੰਡ ‘ਚ ਹੀ ਪਤਾ ਲੱਗ ਗਿਆ ਸੀ ਕਿ ਲਾਹੌਰ ਲਾਹੌਰ ਹੈ ਤੇ ਜਿਹਨੇ ਲਾਹੌਰ ਨਹੀਂ ਵੇਖਿਆ, ਉਹ ਜੰਮਿਆ ਹੀ ਨਹੀਂ।

ਛੋਟੇ ਸ਼ਹਿਰ ਵਿੱਚੋਂ ਲੋਕ ਪਹਿਲਾਂ ਬੱਤੀਆਂ ਵੇਖਣ ਲਾਹੌਰ ਜਾਂਦੇ ਸਨ। ਉੱਥੇ ਸ਼ਾਹੀ ਕਿਲ੍ਹੇ ਤੇ ਸ਼ਾਲਾਮਾਰ ਬਾਗ ‘ਤੇ ਫੋਟੋਆਂ ਖਿਚਵਾਉਂਦੇ ਸਨ।

ਦਾਤਾ ਦਰਬਾਰ ‘ਤੇ ਹਾਜ਼ਰੀ ਦਿੰਦੇ ਸਨ। ਕਈ ਸ਼ੌਂਕੀਨ ਲੋਕ ਸ਼ਾਹੀ ਮੁਹੱਲੇ ਦਾ ਚੱਕਰ ਵੀ ਲਾ ਆਉਂਦੇ ਸਨ।

ਕੁਝ ਲਾਹੌਰ ਦੇ ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਵਿੱਚ ਪੜ੍ਹਣ ਜਾਂਦੇ ਸਨ। ਉੱਥੇ ਹੀ ਨੌਕਰੀਆਂ ਲੱਭ ਕੇ ਉੱਥੇ ਹੀ ਰਹਿ ਪੈਂਦੇ ਸਨ ਤੇ ਲਾਹੌਰੀ ਹੋ ਜਾਂਦੇ ਸਨ।