Source :- ODIA PUA
ଭଦ୍ରକ, ୩ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ମୁନିସିପାଲଟି ର ୨୫ ନମ୍ବର ୱାର୍ଡ ଅନ୍ତର୍ଗତ ଦାସ ସାହି ହନୁମାନ ମନ୍ଦିର ନିକଟରେ ରାସ୍ତା ଉପରେ ଗାଡ଼ି ରଖିବାକୁ ନେଇ ବିବାଦ ଘଟିବା ପରେ ଜଣେ ବ୍ୟକ୍ତିଙ୍କୁ ମାଡ଼ ମାରିବା ଓ ଆକ୍ରମଣ କରାଯାଇଥିବା ନେଇ ଅଭିଯୋଗ ହୋଇଛି। ଏହି ଘଟଣାକୁ ନେଇ ଭଦ୍ରକ ପୁରୁଣା ବଜାର ଥାନାରେ ଏତଲା ଦିଆଯାଇଥିବା ପରିବାର ପକ୍ଷରୁ କୁହାଯାଇଛି। ଭଦ୍ରକ ପୁରୁଣା ବଜାର ଥାନା ଅଭିଯୋଗ ଅନୁଯାୟୀ, ଘର ନିର୍ମାଣ କାମ ପାଇଁ ଚିପ୍ସ ଆଣିଥିବା ଏକ ଟ୍ରାକ୍ଟର ରାସ୍ତା ଉପରେ ରହିଥିଲା। ଏହାକୁ ନେଇ ରାସ୍ତାରେ ଯାତାୟାତରେ ସମସ୍ୟା ହେଉଥିବାରୁ ଗାଡ଼ିଟିକୁ କିଛି ସମୟ ପାଇଁ ସାଇଡ୍ କରିଦେବାକୁ କୁହାଯାଇଥିଲା। ତେବେ ଏହାକୁ ନେଇ ଉଭୟ ପକ୍ଷ ମଧ୍ୟରେ କଥା କଟାକଟି ହୋଇଥିବା ପରିବାର ପକ୍ଷରୁ ଅଭିଯୋଗ କରାଯାଇଛି। ପରିବାରର ଅଭିଯୋଗ ଅନୁସାରେ, ପରବର୍ତୀ ସମୟରେ ଅଞ୍ଜୁମ ବିବି, ତାଙ୍କ ସ୍ୱାମୀ ମୁନ୍ନା ଏବଂ ତାଙ୍କର ତିନି ଭାଇଙ୍କ ସମେତ ଅନ୍ୟ କେତେକ ବ୍ୟକ୍ତି ମିଶି ତାଙ୍କ ଭାଇଙ୍କୁ ରାସ୍ତା ଉପରେ ମାଡ଼ ମାରିଥିଲେ। ଅଭିଯୋଗରେ ଜୁନେଦ ଓ କାଲୋଙ୍କ ନାମ ମଧ୍ୟ ଉଲ୍ଲେଖ କରାଯାଇଛି। ତେବେ ଅନ୍ୟ ଜଣେ ବ୍ୟକ୍ତିଙ୍କ ନାମ ମନେ ନଥିବା ପରିବାର ପକ୍ଷରୁ କୁହାଯାଇଛି। ଆକ୍ରମଣ ସମୟରେ ତାଙ୍କ ଭାଇଙ୍କ ବେକରେ ଥିବା ସୁନା ଚେନ୍ ଛଡ଼ାଇ ନେଇଥିବା ଏବଂ ତାଙ୍କ ପାଖରେ ଥିବା ଟଙ୍କା ମଧ୍ୟ ନେଇଯାଇଥିବା ଅଭିଯୋଗ ହୋଇଛି। ଏଥିସହ ମୁଣ୍ଡରେ ଆକ୍ରମଣ ହୋଇ ଆହତ ହୋଇଥିବା ପରିବାର ପକ୍ଷରୁ କୁହାଯାଇଛି। ଘଟଣା ପରେ ଆହତ ବ୍ୟକ୍ତିଙ୍କୁ ଚିକିତ୍ସା ପାଇଁ ମେଡିକାଲକୁ ନିଆଯାଇଥିଲା। ପୋଲିସ ଘଟଣାସ୍ଥଳକୁ ଯାଇ ତଦନ୍ତ କରିଥିବା ଏବଂ ଆହତଙ୍କୁ ଚିକିତ୍ସା ପାଇଁ ନିଆଯାଇଥିବା ବୋଲି ଅଭିଯୋଗକାରୀ କହିଛନ୍ତି। ପରିବାର ପକ୍ଷରୁ ଆହୁରି ଅଭିଯୋଗ କରାଯାଇଛି ଯେ, ରାସ୍ତା ଉପରେ ଗାଡ଼ି କିମ୍ବା ବାଇକ୍ ରଖିବାକୁ ନେଇ ପୂର୍ବରୁ ମଧ୍ୟ ବାରମ୍ବାର ବିବାଦ ହୋଇଆସୁଛି। ଘରକୁ ସାମଗ୍ରୀ ନେବା-ଆଣିବା ସମୟରେ ରାସ୍ତା ଖାଲି କରିବାକୁ କହିଲେ ମଧ୍ୟ ସମସ୍ୟା ସୃଷ୍ଟି ହେଉଥିବା ସେମାନେ କହିଛନ୍ତି।ଏହି ଘଟଣାକୁ ନେଇ ପରିବାର ପକ୍ଷରୁ ପୁରୁଣା ବଜାର ଥାନାରେ ଏତଲା ଦିଆଯାଇଛି। ଘଟଣାରେ ଜଡ଼ିତ ସମସ୍ତଙ୍କ ବିରୋଧରେ ଆଇନ ଅନୁଯାୟୀ ତଦନ୍ତ କରି ନ୍ୟାୟ ଦେବାକୁ ପରିବାର ପକ୍ଷରୁ ପୋଲିସ ନିକଟରେ ଦାବି କରାଯାଇଛି। ତେବେ ଘଟଣାର ପ୍ରକୃତ କାରଣ, ଆକ୍ରମଣରେ କେତେଜଣ ସାମିଲ ଥିଲେ, ସୁନା ଚେନ୍ ଓ ଟଙ୍କା ନେଇଯିବା ଅଭିଯୋଗର ସତ୍ୟତା ଏବଂ ଆହତଙ୍କ ଚିକିତ୍ସା ସମ୍ପର୍କିତ ତଥ୍ୟ ପୋଲିସ ତଦନ୍ତ ପରେ ସ୍ପଷ୍ଟ ହେବ। ପରିବାର ପକ୍ଷରୁ ଏହି ଘଟଣାରେ ଶୀଘ୍ର ତଦନ୍ତ ସହ ନ୍ୟାୟ ପାଇଁ ଦାବି କରାଯାଇଛି।
SOURCE: ODIA PUA
