Source :- EVARTHA NEWS
(adsbygoogle = window.adsbygoogle || []).push({});
അമേരിക്ക–ഇസ്രയേൽ സഖ്യത്തിന്റെ ആക്രമണങ്ങൾക്കിടെ ഇറാനിയൻ സൈന്യവും ഇസ്ലാമിക് റെവല്യൂഷൻ ഗാർഡ്സ് കോർപ്സും (ഐആർജിസി) തമ്മിലുള്ള ഐക്യം കൂടുതൽ ശക്തമാകുന്നതായി ഇറാൻ. രാജ്യത്തിന്റെ പ്രതിരോധ സംവിധാനത്തിൽ യാതൊരു ഭിന്നതയുമില്ലെന്നും സൈന്യവും ഐആർജിസിയും ഏകോപിതമായി പ്രവർത്തിക്കുകയാണെന്നും മുതിർന്ന സൈനിക ഉദ്യോഗസ്ഥർ വ്യക്തമാക്കി.
ഇറാനിയൻ ആർമി ആസ്ഥാനത്ത് നടന്ന ഏകോപന യോഗത്തിലാണ് സായുധ സേനാ വക്താവ് ബ്രിഗേഡിയർ ജനറൽ മുഹമ്മദ് അക്രമി-നിയയും ഐആർജിസി വക്താവ് ബ്രിഗേഡിയർ ജനറൽ ഹൊസൈൻ മൊഹെബ്ബിയും നിലപാട് വ്യക്തമാക്കിയത്. മാധ്യമ സഹകരണം ശക്തമാക്കുന്നതിനും ഇരു സൈനിക വിഭാഗങ്ങളുടെയും ഏകോപനം കൂടുതൽ പ്രകടമാക്കുന്നതിനുമായിരുന്നു യോഗം.
ആധുനിക സാങ്കേതികവിദ്യയും അത്യാധുനിക ആയുധങ്ങളും കൈവശമുള്ള ശക്തികൾക്കെതിരെയാണ് ഇറാൻ നിലകൊള്ളുന്നതെന്നും ഏത് ആക്രമണത്തെയും നേരിടാൻ രാജ്യത്തിന്റെ പ്രതിരോധ സംവിധാനം സജ്ജമാണെന്നും അക്രമി-നിയ പറഞ്ഞു.
ഇറാനിയൻ സൈന്യം രാജ്യത്തിന്റെ ദേശീയ അഭിമാനത്തിന്റെ പ്രധാന ഉറവിടമാണെന്ന് മൊഹെബ്ബി വിശേഷിപ്പിച്ചു. സൈന്യം, ഐആർജിസി, സർക്കാർ, ജനങ്ങൾ എന്നിവർ തമ്മിലുള്ള ഐക്യവും സഹകരണവും രാജ്യത്തിന്റെ ശക്തിയാണെന്നും അദ്ദേഹം പറഞ്ഞു.
അമേരിക്ക–ഇസ്രയേൽ സമ്മർദത്തിനിടെ ദേശീയ ഐക്യം തകർക്കാനുള്ള ശ്രമങ്ങൾ പരാജയപ്പെട്ടുവെന്നും ഇറാന്റെ പ്രതിരോധ സംവിധാനങ്ങൾ ഏകോപിതമായാണ് പ്രവർത്തിക്കുന്നതെന്നും ഉദ്യോഗസ്ഥർ അവകാശപ്പെട്ടു. ബാലിസ്റ്റിക് മിസൈലുകളും ഡ്രോണുകളും ഉൾപ്പെടെയുള്ള സൈനിക ശേഷിയും വ്യോമപ്രതിരോധ സംവിധാനങ്ങളും ഉപയോഗിച്ച് രാജ്യത്തിന്റെ സുരക്ഷ ഉറപ്പാക്കുമെന്ന് ഇറാൻ വ്യക്തമാക്കി.