Source :- SIRAJLIVE NEWS
ബൊഗോട്ട | കൊളംബിയയിലെ ചോക്കോ പ്രവിശ്യയിലുണ്ടായ ശക്തമായ ഭൂചലനം വൻ നാശനഷ്ട വിതച്ചു. റിക്ടർ സ്കെയിലിൽ 7.4 തീവ്രത രേഖപ്പെടുത്തിയ ഭൂകമ്പത്തിൽ നിരവധി പേർ കൊല്ലപ്പെടുകയും നിരവധിയാളുകൾക്ക് പരിക്കേൽക്കുകയും ചെയ്തു. ദുരന്ത നിവാരണ പ്രവർത്തനങ്ങളും അടിയന്തര രക്ഷാപ്രവർത്തനങ്ങളും (Emergency Disaster Response Services) പ്രദേശത്ത് പുരോഗമിക്കുകയാണ്.
ചോക്കോയിലെ സാൻ ജോസ് ഡെൽ പാൽമർ മുനിസിപ്പാലിറ്റിയാണ് ഭൂകമ്പത്തിന്റെ പ്രഭവകേന്ദ്രം. തലസ്ഥാനമായ ബൊഗോട്ടയിൽ നിന്ന് 400 കിലോമീറ്റർ പടിഞ്ഞാറുമാറി ഭൂകമ്പമാപിനിയിൽ ഭൂഗർഭത്തിൽ 82 കിലോമീറ്റർ ആഴത്തിലാണ് പ്രഭവകേന്ദ്രം അടയാളപ്പെടുത്തിയത്. പ്രാദേശിക സമയം രാവിലെ 7.34 നായിരുന്നു സംഭവം. കൊളംബിയൻ ജിയോളജിക്കൽ സർവീസ് ആണ് പ്രകമ്പനത്തിന്റെ വിവരങ്ങൾ പുറത്തുവിട്ടത്.
ഭൂചലനത്തെ തുടർന്ന് പെരെയ്ര നഗരത്തിൽ 18 പേരും മനിസാലെസിൽ രണ്ടുപേരും മരിച്ചതായി നഗരസഭാ മേയർമാർ സ്ഥിരീകരിച്ചു. കാളി നഗരത്തിൽ ഇരുപതോളം കെട്ടിടങ്ങൾ തകരുകയും നിരവധി ആളുകൾ അവശിഷ്ടങ്ങൾക്കിടയിൽ കുടുങ്ങിക്കിടക്കുകയും ചെയ്യുന്നതായി കാളി മേയർ വ്യക്തമാക്കി. മേഖലയിലെ പ്രമുഖ വിമാനത്താവളങ്ങളായ പെരെയ്ര, മനിസാലെസ്, ക്വിബ്ഡോ, അർമേനിയ, കാർത്താഗോ, ബ്യൂണവെഞ്ചുറ എന്നിവയ്ക്കും നാശനഷ്ടങ്ങൾ സംഭവിച്ചതായി കൊളംബിയൻ ഏവിയേഷൻ അതോറിറ്റി അറിയിച്ചു.
ചോക്കോയുടെ തലസ്ഥാനമായ ക്വിബ്ഡോയിലും കെട്ടിടങ്ങൾക്ക് ഗുരുതരമായ കേടുപാടുകൾ സംഭവിച്ചു. തുടർച്ചയായ പ്രകമ്പനങ്ങൾ ഉണ്ടാകാൻ സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് ചോക്കോ ഗവർണർ നുബിയ കോർഡോബ നിർദ്ദേശം നൽകി. ഇക്വഡോർ, വെനസ്വേല, പനാമ എന്നീ അയൽ രാജ്യങ്ങളിലും പ്രകമ്പനം അനുഭവപ്പെട്ടു.
Content Highlights
A powerful 7.4 magnitude earthquake struck Choco in Colombia at a depth of 82 km. Over 20 people were killed, with dozens trapped in collapsed buildings and multiple airports damaged.
