Source :- EVARTHA NEWS
(adsbygoogle = window.adsbygoogle || []).push({});
വിഴിഞ്ഞം തുറമുഖത്തിലെ ഓഹരി കൈമാറ്റവുമായി ബന്ധപ്പെട്ട വിഷയത്തിൽ മുഖ്യമന്ത്രി വി.ഡി. സതീശന് പ്രതിപക്ഷ നേതാവ് പിണറായി വിജയൻ കത്തയച്ചു. അദാനി കമ്പനി സർക്കാരിന് നൽകിയ കത്തിന്മേൽ സ്വീകരിച്ച നടപടികൾ എന്തൊക്കെയാണെന്നും, ഇതുസംബന്ധിച്ച് നിയമോപദേശം തേടിയിട്ടുണ്ടോയെന്നും കത്തിൽ അദ്ദേഹം ചോദിക്കുന്നു.കരാർ ലംഘനം സംബന്ധിച്ച് സ്റ്റോക്ക് എക്സ്ചേഞ്ച് അധികൃതരെ സർക്കാർ അറിയിച്ചിട്ടുണ്ടോയെന്നും അതിൽ വ്യക്തത വരുത്തണമെന്നും പ്രതിപക്ഷ നേതാവ് ആവശ്യപ്പെട്ടു.
കരാർ വ്യവസ്ഥകൾ ലംഘിച്ചതിനെ നിസാരമായി കാണാനാകില്ലെന്നും, വിഷയത്തിൽ സർക്കാർ തുടരുന്ന മൗനം ദുരൂഹമാണെന്നും അദ്ദേഹം കത്തിൽ ചൂണ്ടിക്കാട്ടുന്നു. കഴിഞ്ഞ ദിവസമാണ് ഈ കത്ത് മുഖ്യമന്ത്രിക്ക് കൈമാറിയത്.കേരള സർക്കാരിനെ അറിയിക്കാതെയാണോ അദാനി ഗ്രൂപ്പ് സെബിയുമായി കരാർ ഒപ്പിട്ടതെന്ന് പിണറായി വിജയൻ ചോദിക്കുന്നു. അത്തരം നടപടി കരാർ ലംഘനമാണെന്നും, ഇതുമായി ബന്ധപ്പെട്ട് സർക്കാർ നിയമനടപടികളോ നിയമോപദേശമോ തേടിയിട്ടുണ്ടോയെന്നും അദ്ദേഹം അന്വേഷിക്കുന്നു.
അദാനി ഗ്രൂപ്പ് സർക്കാരിന് സമർപ്പിച്ച അപേക്ഷ സംബന്ധിച്ചും കത്തിൽ സംശയങ്ങൾ ഉന്നയിച്ചിട്ടുണ്ട്. ആദ്യം ഒരു അപേക്ഷയും പിന്നീട് തിരുത്തലുകൾ ഉൾപ്പെടുത്തി മറ്റൊരു അപേക്ഷയും നൽകിയെന്ന തരത്തിൽ മാധ്യമങ്ങളിൽ വന്ന വാർത്തകളിലെ സത്യാവസ്ഥ വ്യക്തമാക്കണമെന്നും അദ്ദേഹം ആവശ്യപ്പെട്ടു.ജൂൺ 29-നാണ് അദാനി ഗ്രൂപ്പ് ഓഹരി കൈമാറ്റത്തിന് അനുമതി തേടി സെബിക്ക് കത്ത് നൽകിയത്.
വിവരം അടുത്ത ദിവസം പുറത്തുവന്നിരുന്നു. ജൂലൈ 1-ന് നിയമസഭയിൽ വിഷയം പ്രതിപക്ഷം ഉന്നയിച്ചപ്പോൾ, സർക്കാരിന് ഇതുസംബന്ധിച്ച അറിയിപ്പ് ലഭിച്ചിട്ടില്ലെന്നും ഒരു അപേക്ഷയും ലഭിച്ചിട്ടില്ലെന്നുമാണ് മുഖ്യമന്ത്രി വി.ഡി. സതീശൻ മറുപടി നൽകിയിരുന്നത്. സർക്കാരിനെ അറിയിക്കാതെയാണ് അദാനി ഇത്തരമൊരു നീക്കം നടത്തിയതെങ്കിൽ അത് ഗൗരവമായി പരിശോധിക്കേണ്ട വിഷയമാണെന്നും പിണറായി വിജയൻ നേരത്തെ അഭിപ്രായപ്പെട്ടിരുന്നു.
വിഴിഞ്ഞം തുറമുഖത്തിലെ അദാനി കമ്പനിയുടെ 49 ശതമാനം ഓഹരി എം.എസ്.സി ഗ്രൂപ്പിന്റെ ടെർമിനൽ വിഭാഗമായ ടി.ഐ.എൽ ഏറ്റെടുക്കുമെന്നാണ് റിപ്പോർട്ടുകൾ. ഏകദേശം 27,000 കോടി രൂപ മൂല്യമുള്ള പദ്ധതിയാണിത്. 2028 ഡിസംബറോടെ തുറമുഖത്തിന്റെ ചരക്ക് കൈകാര്യം ചെയ്യാനുള്ള ശേഷി 57 ലക്ഷം ടി.ഇ.യുവായി ഉയർത്താനാണ് ലക്ഷ്യമിടുന്നത്. നിലവിൽ തുറമുഖത്തിന്റെ ശേഷി 16 ലക്ഷം ടി.ഇ.യുവാണ്.