ഹോർമുസ്–യെമൻ സംഘർഷം; ട്രംപും എർദോഗനും ചർച്ച നടത്തി, യുഎസ് അവകാശവാദം തള്ളി ഇറാൻ

ഹോർമുസ് കടലിടുക്കിലെയും യെമനിലെയും സംഘർഷസാഹചര്യങ്ങൾ സംബന്ധിച്ച് യുഎസ് പ്രസിഡന്റ് ഡോണൾഡ് ട്രംപും തുർക്കി പ്രസിഡന്റ് റജബ് ത്വയ്യിബ് എർദോഗനും ടെലിഫോണിലൂടെ ചർച്ച നടത്തി. ഇരുരാജ്യങ്ങളും തമ്മിലുള്ള ബന്ധം കൂടുതൽ ശക്തിപ്പെടുത്തുന്നതിനും വിവിധ മേഖലകളിൽ സഹകരണം വിപുലീകരിക്കുന്നതിനുമുള്ള വിഷയങ്ങളും സംഭാഷണത്തിൽ ചർച്ചയായതായി റിപ്പോർട്ടുകൾ സൂചിപ്പിക്കുന്നു. യുഎസും തുർക്കിയും തമ്മിലുള്ള നയതന്ത്രബന്ധത്തിന്റെ നൂറാം വാർഷികം അടുത്ത വർഷം ആഘോഷിക്കാനിരിക്കെയാണ് നേതാക്കളുടെ കൂടിക്കാഴ്ച.

ഹോർമുസ് കടലിടുക്കിലെയും യെമനിലെയും സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണെന്ന് എർദോഗൻ വ്യക്തമാക്കി. പ്രതിസന്ധികൾക്ക് പരിഹാരം കണ്ടെത്തുന്നതിനുള്ള നയതന്ത്ര നീക്കങ്ങൾ തുടരുകയാണെന്നും അദ്ദേഹം പറഞ്ഞു. റഷ്യ–യുക്രെയ്ൻ യുദ്ധം അവസാനിപ്പിക്കുന്നതിന്റെ ഭാഗമായി ഇരുരാജ്യങ്ങളും തമ്മിലുള്ള ചർച്ചകൾ പുനരാരംഭിക്കാനുള്ള ശ്രമങ്ങൾക്ക് തുർക്കി പിന്തുണ നൽകുമെന്നും എർദോഗൻ അറിയിച്ചു.

അതേസമയം, ഹോർമുസ് കടലിടുക്കിലെ കടൽ മൈനുകൾ പൂർണമായും നീക്കം ചെയ്തെന്ന യുഎസ് സെൻട്രൽ കമാൻഡിന്റെ അവകാശവാദം ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) തള്ളി. മൈനുകൾ നീക്കം ചെയ്തതിന് തെളിവുകൾ പുറത്തുവിടാൻ യുഎസിനെ വെല്ലുവിളിച്ച ഐആർജിസി, സംഘർഷം ആകാശത്തും കരയിലും കടലിലുമാണ് നടക്കുന്നതെന്നും സൈബർ ഇടത്തിലല്ലെന്നും പ്രതികരിച്ചു.

ഹോർമുസ് കടലിടുക്കിലെ സുരക്ഷയും കപ്പൽഗതാഗതവും സംബന്ധിച്ച ആശങ്കകൾ തുടരുന്നതിനിടെയാണ് ഇറാന്റെ പ്രതികരണം. ആഗോള വ്യാപാരത്തിന് നിർണായകമായ ഈ സമുദ്രപാതയിലെ സംഘർഷസാഹചര്യം അന്താരാഷ്ട്ര തലത്തിൽ ശ്രദ്ധാകേന്ദ്രമായി തുടരുകയാണ്.