ફ્લાયદુબઈ વિમાન હુમલા કેસની ‘આતંકવાદી એંગલ’થી પણ તપાસ કરશે યુએઈ- ન્યૂઝ અપડેટ

અપડેટેડ 2 કલાક પહેલા

દુબઈથી તેલ અવિવ જઈ રહેલા ફ્લાયદુબઈના વિમાનમાં બનેલી ઘટનાના પગલે સંયુક્ત આરબ અમીરાત (યુએઈ) એ તપાસ શરૂ કરવાની જાહેરાત કરી છે.

યુએઈના વિદેશ મંત્રાલયે જણાવ્યું છે કે મામલાની ઊંડાણપૂર્વક તપાસ માટે એક વિશેષ તપાસ ટીમ બનાવવામાં આવી છે.

વિદેશ મંત્રાલયના નિવેદન અનુસાર, યુએઈના એટર્ની જનરલ ડૉ. હમદ અલ શમ્સી એ લોક અભિયોજન વિભાગના નિષ્ણાત અધિકારીઓની એક ટીમ રચવાનો નિર્દેશ આપ્યો છે.

આ નિર્ણય ફ્લાયદુબઈ દ્વારા આપવામાં આવેલી માહિતી બાદ લેવામાં આવ્યો છે, જેમાં કહેવામાં આવ્યું હતું કે વિમાનના કૉકપિટમાં વિવાદ થયો હતો. પરિસ્થિતિને નિયંત્રણમાં લેવા માટે વિમાનમાં હાજર ફ્લાયદુબઈના ક્રૂ સભ્યોએ હસ્તક્ષેપ કર્યો હતો અને વિમાનને સુરક્ષિત બનાવ્યું હતું.

મંત્રાલયે જણાવ્યું કે વિમાન યુએઈમાં નોંધાયેલું (રજિસ્ટર્ડ) છે અને યુએઈનો ધ્વજ લઈને ઊડી રહ્યું હતું. તેથી લાગુ પડતા કાયદાઓ મુજબ આ ઘટનાની તપાસ કરવાનો અધિકાર યુએઈની ન્યાયિક સંસ્થાઓ પાસે છે.

યુએઈના કાયદા અનુસાર, વિમાનની અંદર થતા ગુનાઓ પર યુએઈનું અધિકારક્ષેત્ર લાગુ પડે છે, ભલે ઘટના દેશની સરહદોની બહાર બની હોય.

વિદેશ મંત્રાલયે જણાવ્યું કે તપાસ દરમિયાન ઘટનાના તમામ પાસાં અને તેનાં સંભવિત કારણોની તપાસ કરવામાં આવશે.

તેમજ એ પણ તપાસવામાં આવશે કે ઘટનાનો કોઈ આતંકવાદી પ્રવૃત્તિ અથવા આતંકવાદી ઇરાદા સાથે સંબંધ હતો કે નહીં અને શું તેની પાછળ કોઈ પૂર્વનિયોજિત યોજના અથવા સૂચનાઓ કાર્યરત હતી.

યુએઈએ આ મામલે સહકાર આપવા અને પરિસ્થિતિને સંભાળવા બદલ સાઉદી અરેબિયાના અધિકારીઓનો પણ આભાર વ્યક્ત કર્યો છે.

મંત્રાલયે લોકોને અપીલ કરી છે કે તેઓ માત્ર સત્તાવાર સ્ત્રોતો દ્વારા જાહેર કરવામાં આવેલી માહિતી પર જ વિશ્વાસ રાખે અને તપાસ પૂર્ણ ન થાય ત્યાં સુધી કોઈપણ પ્રકારની અટકળો અથવા અપ્રમાણિત માહિતી શેર કરવાથી દૂર રહે.

ગુજરાત સરકારે દુબઈથી તેલ અવીવ જઈ રહેલી ફ્લાઇટના કૅપ્ટન સ્મિત મચ્છરનું સન્માન કરવાની જાહેરાત કરી છે.

ગુજરાતના મુખ્ય મંત્રી ભૂપેન્દ્ર પટેલે આ માહિતી સોશિયલ મીડિયા પ્લૅટફૉર્મ ઍક્સ પર આપી.

ભૂપેન્દ્ર પટેલે લખ્યું, “મૂળ ગુજરાતના આ વીર સપૂતે પોતાના શૌર્યથી સમગ્ર વિશ્વમાં ગુજરાત અને દેશનું નામ રોશન કર્યું છે. તેમની રગોમાં પહેલી ગુજરાતી ખુમારી પર આપણને સૌને અત્યંત ગર્વ છે. તેમના આ અસાધારણ શૌર્ય અને માનવતાના કાર્યનું સન્માન કરવા માટે, ગુજરાત સરકાર કૅપ્ટન સ્મિત મચ્છરને ‘વિશિષ્ઠ ગુજરાત ગરિમા ઍવૉર્ડ’થી સન્માનિત કરશે.”

ઉલ્લેખનીય છે કે, દુબઈથી તેલ અવીવ જઈ રહેલી ફ્લાઇટ ફ્લાયદુબઈમાં એક પાઇલટે બીજા પાઇલટ પર જીવલેણ હુમલો કર્યો અને સેંકડો લોકોના જીવ જોખમમાં મૂકી દીધા. ત્યાર પછી વિમાનના કૅપ્ટન સ્મિત મચ્છરનું નામ ચર્ચામાં છે.

અત્યાર સુધીમાં મળેલી માહિતી પ્રમાણે એક પાઇલટે સ્મિત મચ્છર પર ચાકુથી હુમલો કર્યો હતો અને તેનો પ્રતિકાર કરવામાં કૅપ્ટન મચ્છર ઈજાગ્રસ્ત થયા હતા. વિમાનમાં મોટા ભાગના ઇઝરાયલી પ્રવાસીઓ હતા, જેથી ઇઝરાયલે કૅપ્ટન મચ્છરની બહાદુરીને બિરદાવી છે.

આ ઘટના બુધવારે બની હતી, જ્યારે દુબઈથી તેલ અવીવ જતી ફ્લાઇટ ઉડાન ભર્યા બાદ લગભગ બે કલાકે પોતાનો માર્ગ બદલીને સાઉદી અરબ તરફ વળી ગઈ હતી અને ત્યાં ઉતરાણ કર્યું હતું.

કૉકપિટમાં એક પાઇલટે બીજા પાઇલટ પર ચાકુથી હુમલો કર્યો હતો. જેના પર હુમલો થયો હતો તે પાઇલટનું નામ સ્મિત મચ્છર છે અને તેઓ ભારતીય છે. જોકે, કથિત હુમલા પાછળનું કારણ શું હતું તેની માહિતી હજુ સુધી મળી શકી નથી.

વડા પ્રધાન નરેન્દ્ર મોદીએ પણ ફ્લાયદુબઈની ફ્લાઇટમાં સવાર ભારતીય નાગરિક કૅપ્ટન સ્મિત મચ્છરની પ્રશંસા કરતાં તેમને “હીરો” ગણાવ્યા છે.

પીએમ મોદીએ ગુરુવારે સવારે જણાવ્યું કે સ્મિતની બહાદુરી અને ધૈર્યના કારણે એક મોટી ઘટના ટાળવામાં મદદ મળી છે.

એશિયન ગેમ્સના પુરુષ ક્રિકેટ સેમિફાઇનલમાં ભારતે શ્રીલંકા સામે જીત મેળવી છે.

શ્રેયસ અય્યરની આગેવાનીમાં ભારતીય ટીમે પહેલી બૅટિંગ કરીને સાત વિકેટના ભોગે 169 રન બનાવ્યા હતા. જેના જવાબમાં શ્રીલંકાની ટીમ માત્ર 9.5 ઓવરમાં 45 રનમાં ઑલઆઉટ થઈ ગઈ હતી. આમ ગુરુવારે ભારતીય ટીમને 124 રને જીત મળી હતી.

હવે એશિયન ગેમ્સ 2026માં પુરુષ ક્રિકેટનો ફાઇનલ મુકાબલો પાકિસ્તાન સામે ત્રણ ઑક્ટોબરના રોજ યોજાશે. પાકિસ્તાને ગુરુવારે જ યોજાયેલી મૅચમાં બાંગ્લાદેશને હરાવીને ફાઇનલમાં પ્રવેશ મેળવ્યો છે.

ભારત તરફથી ઈશાન કિશને સૌથી વધુ 80 રન બનાવ્યા હતા, તેઓ ઇનિંગમાં નોટઆઉટ રહ્યા હતા. વૈભવ સૂર્યવંશીએ 38 રન બનાવ્યા હતા. અન્ય કોઈ બૅટ્સમૅન મોટી ઇનિંગ રમવામાં નિષ્ફળ રહ્યા હતા.

ભારત તરફથી જસપ્રીત બુમરાહ, અક્ષર પટેલ અને અભિષેક શર્માએ બે-બે વિકેટો મેળવી હતી જ્યારે કે વૉશિંગ્ટન સુંદરને એક વિકેટ મળી હતી.

પાકિસ્તાન સરકારે દાવો કર્યો છે કે તેની સેનાએ અફઘાનિસ્તાનમાં બે અલગ-અલગ સ્થળોએ કથિત “આતંકવાદી ઠેકાણાં”ને નિશાન બનાવી હવાઈ હુમલા કર્યા છે. સરકારના જણાવ્યા અનુસાર, આ કાર્યવાહીમાં ઘણા કથિત આતંકવાદીઓ માર્યા ગયા છે.

પાકિસ્તાનના માહિતી મંત્રાલય દ્વારા ઍક્સ પર જાહેર કરાયેલા નિવેદનમાં જણાવાયું હતું કે “ઑપરેશન ગજબ-ઉલ-હક” હેઠળ ઉગ્રવાદી સંગઠનોનાં ઠેકાણાં અને સુરક્ષિત આશ્રયસ્થાનો પર હવાઈ હુમલા કરવામાં આવ્યા. આ કાર્યવાહીનો હેતુ ઉગ્રવાદીઓ, તેમના નેટવર્ક અને તેમને મદદ કરનારાઓને નિષ્ક્રિય કરવાનો હતો.

નિવેદનમાં વધુમાં કહેવામાં આવ્યું કે, “વિશ્વસનીય ગુપ્તચર માહિતીના આધારે અફઘાનિસ્તાનમાં બે સ્થળોએ આતંકવાદી ઠેકાણાં અને તેમનાં રહેઠાણોને નિશાન બનાવવામાં આવ્યાં હતાં.”

પાકિસ્તાનનો દાવો છે કે આ ઠેકાણાંને સફળતાપૂર્વક નષ્ટ કરવામાં આવ્યાં હતાં અને આ હુમલાઓમાં 22 ઉગ્રવાદીઓ માર્યા ગયા છે.

બીજી તરફ, તાલિબાન સરકારે આરોપ મૂક્યો કે, પાકિસ્તાને ગત રાત્રે અફઘાનિસ્તાનના કુનાર અને હેલમંદ પ્રાંતોમાં હવાઈ હુમલા કર્યા હતા, જેમાં ઘણાં લોકોનાં મોત થયાં હતાં અને અનેક લોકો ઘાયલ થયા હતા.

તાલિબાન સરકારના પ્રવક્તા ઝબીહુલ્લાહ મુજાહિદે ઍક્સ પર જાહેર કરેલા નિવેદનમાં દાવો કર્યો કે, પાકિસ્તાને સામાન્ય નાગરિકોનાં ઘરોને નિશાન બનાવીને હવાઈ હુમલા કર્યા હતા.

ઝબીહુલ્લાહ મુજાહિદના જણાવ્યા મુજબ, આ હુમલાઓમાં 9 લોકોનાં મોત થયાં હતાં અને 11 લોકો ઘાયલ થયા હતા. તેમના કહેવા મુજબ મૃત્યુ પામનારાઓમાં મહિલાઓ અને બાળકો પણ સામેલ હતાં.

હાલમાં બંને પક્ષોના દાવાઓની સ્વતંત્ર રીતે પુષ્ટિ થઈ શકી નથી અને ઘટનાને લઈને સ્થિતિ અંગે વધુ માહિતીની રાહ જોવામાં આવી રહી છે.

વડા પ્રધાન નરેન્દ્ર મોદીએ ફ્લાયદુબઈની ફ્લાઇટમાં સવાર ભારતીય નાગરિક કૅપ્ટન સ્મિત મચ્છરની પ્રશંસા કરતાં તેમને “હીરો” ગણાવ્યા છે.

પીએમ મોદીએ ગુરુવારે સવારે જણાવ્યું કે સ્મિતની બહાદુરી અને ધૈર્યના કારણે એક મોટી ઘટના ટાળવામાં મદદ મળી છે.

પીએમ મોદીએ સોશિયલ મીડિયા પ્લૅટફૉર્મ ઍક્સ પર લખ્યું, “કૅપ્ટન સ્મિત મચ્છર એક હીરો છે. સૌથી મોટા જોખમનો સામનો કરતી વખતે અને ગંભીર રીતે ઘાયલ હોવા છતાં તેમણે અન્ય લોકોના જીવ બચાવવા માટે અસાધારણ સાહસ અને અદમ્ય હિંમત દર્શાવી.”

તેમણે આગળ લખ્યું, “તેમની બહાદુરીને કારણે સૈંકડો લોકોના જીવ બચી શક્યા અને એક મોટી દુર્ઘટના ટાળવામાં મદદ મળી. ભારતને કૅપ્ટન મચ્છર પર ગર્વ છે. હું તેમના ઝડપથી સ્વસ્થ થવા, નવી શક્તિ પ્રાપ્ત કરવા અને સારા આરોગ્ય માટે પ્રાર્થના કરું છું.”

આ પહેલાં અમેરિકાના રાષ્ટ્રપતિ ડોનાલ્ડ ટ્રમ્પે પણ કૅપ્ટન સ્મિત મચ્છરને “હીરો” ગણાવ્યા હતા.

તે દરમિયાન, સાઉદી અરેબિયાસ્થિત ભારતીય દૂતાવાસે જણાવ્યું છે કે સ્મિત મચ્છર હૉસ્પિટલમાં દાખલ છે અને તેમની સારવાર ચાલી રહી છે. તેમની તબિયત હાલમાં સ્થિર હોવાનું જણાવવામાં આવ્યું છે.

સાઉદી અરેબિયાસ્થિત ભારતીય દૂતાવાસે ફ્લાયદુબઈમાં સવાર ભારતીય પાઇલટ સ્મિત મચ્છરની તબિયત અંગે નવી માહિતી શૅર કરી છે.

દૂતાવાસે જણાવ્યું છે કે પાઇલટ સાઉદી અરેબિયાના તાબુક શહેરની એક હૉસ્પિટલમાં દાખલ છે અને તેમની સ્થિતિ સ્થિર છે.

ભારતીય દૂતાવાસે સોશિયલ મીડિયા પ્લૅટફૉર્મ ઍક્સ પર લખ્યું, “દૂતાવાસ ફ્લાયદુબઈની ઉડાનના બહાદુર ભારતીય પાઇલટ સ્મિત મચ્છરની તબિયત પર નજર રાખી રહ્યું છે. તેઓ ઉત્તર-પશ્ચિમ સાઉદી અરેબિયાના તાબુક શહેરની એક હૉસ્પિટલમાં દાખલ છે અને તેમને જરૂરી સારવાર આપવામાં આવી રહી છે.”

દૂતાવાસે વધુમાં જણાવ્યું, “તેમની તબિયત અંગેની સંપૂર્ણ માહિતીની રાહ જોવામાં આવી રહી છે, પરંતુ મળતી માહિતી અનુસાર તેમની સ્થિતિ સ્થિર છે. અમને આશા છે કે તેઓ તેમની ઈજાઓમાંથી શક્ય તેટલા વહેલા સ્વસ્થ થઈ જશે. અમે તેમના પરિવારના સંપર્કમાં છીએ અને તેમને વિશ્વાસ અપાવીએ છીએ કે અમે સાઉદી અધિકારીઓ સાથે સતત સંપર્કમાં રહી તેમની તબિયત અંગેની માહિતી મેળવતા રહીશું. તેમના સારવાર માટે શક્ય તમામ મદદ ઉપલબ્ધ કરાવવામાં આવશે.”

આ પહેલાં અમેરિકાના રાષ્ટ્રપતિ ડોનાલ્ડ ટ્રમ્પે સ્મિત મચ્છરની પ્રશંસા કરતાં તેમને “હીરો” ગણાવ્યા હતા.

આ ઘટના બુધવારે બની હતી, જ્યારે દુબઈથી તેલ અવીવ જતી ફ્લાઇટ ઉડાન ભર્યા પછી લગભગ બે કલાકે સાઉદી અરેબિયા તરફ વળી ગઈ હતી અને ત્યાં જ ઉતરાણ કર્યું હતું.

કૉકપિટમાં એક પાઇલટે બીજા પાઇલટ પર ચાકૂથી હુમલો કર્યો હતો. જે પાઇલટ પર હુમલો થયો હતો તેઓ ભારતીય છે. જોકે, આ કથિત હુમલા પાછળનું કારણ શું હતું તેની માહિતી હજુ સુધી સામે આવી નથી.

અમેરિકાના રાષ્ટ્રપતિ ડોનાલ્ડ ટ્રમ્પે જણાવ્યું કે, તેમણે ફ્લાયદુબઈ ઘટનાને લઈને ઇઝરાયલના વડા પ્રધાન બેન્જામિન નેતન્યાહૂ સાથે ફોન પર વાત કરી હતી.

ટ્રમ્પે બુધવારે કહ્યું કે, નેતન્યાહૂએ તેમને શું બન્યું હતું તેની માહિતી આપી હતી અને વિમાનમાં સવાર મુસાફરોએ ફ્લાઇટને બચાવવા તથા પરિસ્થિતિને નિયંત્રણમાં લાવવા કેવા પ્રયત્નો કર્યા હતા.

ટ્રમ્પે કહ્યું, “મને લાગે છે કે આ અત્યંત આશ્ચર્યજનક કહાણી છે. એવું લાગે છે કે કો-પાઇલટ કદાચ આતંકવાદી હતો અથવા કદાચ તેની માનસિક સ્થિતિ યોગ્ય નહોતી.”

તેમણે તે ભારતીય પાઇલટની પણ પ્રશંસા કરી, જેના પર હુમલો કરવામાં આવ્યો હતો. ટ્રમ્પે તેમને “હીરો” ગણાવ્યા.

વાસ્તવમાં, આ ઘટના બુધવારે બની હતી, જ્યારે દુબઈથી તેલ અવીવ જતી ફ્લાઇટ ઉડાન ભર્યા બાદ લગભગ બે કલાકે પોતાનો માર્ગ બદલીને સાઉદી અરબ તરફ વળી ગઈ હતી અને ત્યાં ઉતરાણ કર્યું હતું.

કૉકપિટમાં એક પાઇલટે બીજા પાઇલટ પર ચાકુથી હુમલો કર્યો હતો. જેના પર હુમલો થયો હતો તે પાઇલટનું નામ સ્મિત મચ્છર છે અને તેઓ ભારતીય છે. જોકે, કથિત હુમલા પાછળનું કારણ શું હતું તેની માહિતી હજુ સુધી મળી શકી નથી.

બીબીસી માટે કલેક્ટિવ ન્યૂઝરૂમનું પ્રકાશન