Source :- BBC PUNJABI
ਤਸਵੀਰ ਸਰੋਤ, PM Secretariat
ਚੀਨ ਨਾਲ ਲੱਗਦੇ ਨੇਪਾਲ ਦੇ ਰਸੁਵਾਗੜ੍ਹੀ ਇਲਾਕੇ ਵਿੱਚ ਹੜ੍ਹ ਤੋਂ ਬਾਅਦ ਕਈ ਹਾਈਡ੍ਰੋਪਾਵਰ ਪ੍ਰੋਜੈਕਟਾਂ ਵਿੱਚ ਕੰਮ ਕਰਨ ਵਾਲੇ ਲਗਭਗ 1,000 ਲੋਕਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ ਹੈ।
ਨੇਪਾਲ ਦੇ ਊਰਜਾ ਮੰਤਰਾਲੇ ਮੁਤਾਬਕ, ਇਨ੍ਹਾਂ ਵਿੱਚ 400 ਤੋਂ ਵੱਧ ਲੋਕਾਂ ਦੇ ਵੱਖ-ਵੱਖ ਪ੍ਰੋਜੈਕਟਾਂ ਦੀਆਂ ਸੁਰੰਗਾਂ ਵਿੱਚ ਫਸੇ ਹੋਣ ਦਾ ਖ਼ਦਸ਼ਾ ਹੈ, ਜਿਨ੍ਹਾਂ ਲਈ ਬਚਾਅ ਮੁਹਿੰਮ ਜਾਰੀ ਹੈ।
ਨੈਸ਼ਨਲ ਡਿਜ਼ਾਸਟਰ ਰਿਸਕ ਰਿਡਕਸ਼ਨ ਅਥਾਰਟੀ (ਐਨਡੀਆਰਆਰਏ) ਨੇ ਹਾਈਡ੍ਰੋਪਾਵਰ ਪ੍ਰੋਜੈਕਟਾਂ ਤੋਂ 933 ਲੋਕਾਂ ਨਾਲ ਸੰਪਰਕ ਨਾ ਹੋ ਸਕਣ ਦੀ ਜਾਣਕਾਰੀ ਦਿੱਤੀ ਹੈ। ਅਧਿਕਾਰੀਆਂ ਮੁਤਾਬਕ, ਫਸੇ ਹੋਏ ਲੋਕਾਂ ਨੂੰ ਬਚਾਉਣ ਲਈ ਮੁਹਿੰਮ ਜਾਰੀ ਹੈ।
ਨੇਪਾਲ ਦੇ ਊਰਜਾ ਮੰਤਰਾਲੇ ਦੇ ਇੱਕ ਬੁਲਾਰੇ ਨੇ ਕਿਹਾ ਹੈ ਕਿ ਚੀਨ ਦੀ ਸਰਹੱਦ ਦੇ ਨੇੜੇ ਰਸੁਵਾਗੜ੍ਹੀ ਵਿੱਚ ਆਏ ਹੜ੍ਹ ਕਾਰਨ ਇਲਾਕੇ ਦੇ ਕਈ ਹਾਈਡ੍ਰੋਪਾਵਰ ਪ੍ਰੋਜੈਕਟਾਂ ਵਿੱਚ ਕੰਮ ਕਰ ਰਹੇ ਕਰੀਬ 1,000 ਲੋਕਾਂ ਨਾਲ ਅਜੇ ਵੀ ਸੰਪਰਕ ਨਹੀਂ ਹੋ ਸਕਿਆ ਹੈ।
ਮੰਤਰਾਲੇ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਵੱਖ-ਵੱਖ ਹਾਈਡ੍ਰੋਪਾਵਰ ਪ੍ਰੋਜੈਕਟਾਂ ਦੇ ਪ੍ਰਮੋਟਰਾਂ ਨਾਲ ਗੱਲਬਾਤ ਤੋਂ ਬਾਅਦ ਸੰਪਰਕ ਤੋਂ ਕੱਟੇ ਗਏ ਅਤੇ ਸੁਰੰਗਾਂ ਵਿੱਚ ਫਸੇ ਲੋਕਾਂ ਦਾ ਵੇਰਵਾ ਅਪਡੇਟ ਕੀਤਾ ਜਾ ਰਿਹਾ ਹੈ।
ਅਪਰ ਤ੍ਰਿਸ਼ੂਲੀ-1 ਹਾਈਡ੍ਰੋਪਾਵਰ ਪ੍ਰੋਜੈਕਟ ਵਿੱਚ ਕਿੰਨੇ ਲੋਕ ਫਸੇ ਹਨ
ਤਸਵੀਰ ਸਰੋਤ, PM Secretariat
ਊਰਜਾ ਮੰਤਰਾਲੇ ਦੇ ਬੁਲਾਰੇ ਮੋਹਨ ਸ਼ਾਕਿਆ ਦੇ ਮੁਤਾਬਕ, ਇਕੱਲੇ ਕੋਰੀਆਈ ਨਿਵੇਸ਼ ਵਾਲੇ ਅਪਰ ਤ੍ਰਿਸ਼ੂਲੀ-1 ਹਾਈਡ੍ਰੋਪਾਵਰ ਪ੍ਰੋਜੈਕਟ ਦੀ ਸੁਰੰਗ ਵਿੱਚ 400 ਤੋਂ ਜ਼ਿਆਦਾ ਲੋਕਾਂ ਦੇ ਫਸੇ ਹੋਣ ਦਾ ਖ਼ਦਸ਼ਾ ਹੈ।
ਸ਼ਾਕਿਆ ਨੇ ਬੀਬੀਸੀ ਨਿਊਜ਼ ਨੇਪਾਲੀ ਨੂੰ ਦੱਸਿਆ, “ਰਿਪੋਰਟ ਮਿਲੀ ਹੈ ਕਿ ਹਾਈਡ੍ਰੋਪਾਵਰ ਪ੍ਰੋਜੈਕਟਾਂ ਵਿੱਚ ਕੰਮ ਕਰ ਰਹੇ 1,000 ਤੋਂ ਜ਼ਿਆਦਾ ਲੋਕਾਂ ਨਾਲ ਸੰਪਰਕ ਟੁੱਟ ਗਿਆ ਹੈ।”
“ਸਭ ਤੋਂ ਜ਼ਿਆਦਾ ਲੋਕ ਅਪਰ ਤ੍ਰਿਸ਼ੂਲੀ-1 ਵਿੱਚ ਹਨ, ਜਿਨ੍ਹਾਂ ਨਾਲ ਸੰਪਰਕ ਨਹੀਂ ਹੈ। ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ, ਉੱਥੇ ਸੁਰੰਗ ਵਿੱਚ ਕਰੀਬ 400 ਲੋਕ ਫਸੇ ਹਨ। ਸੁਰੰਗ ਦੇ ਬਾਹਰ ਮੌਜੂਦ 176 ਲੋਕਾਂ ਨਾਲ ਵੀ ਸੰਪਰਕ ਨਹੀਂ ਹੋ ਸਕਿਆ ਹੈ।”
ਖਾਣੇ ਅਤੇ ਪਾਣੀ ਦੀ ਕਮੀ
ਤਸਵੀਰ ਸਰੋਤ, PM Secretariat
ਪ੍ਰੋਜੈਕਟ ਦੇ ਸੰਪਰਕ ਅਫ਼ਸਰ ਗਿਰੀ ਅਧਿਕਾਰੀ ਮੁਤਾਬਕ, ਪ੍ਰੋਜੈਕਟ ਦੀ 10 ਕਿਲੋਮੀਟਰ ਲੰਬੀ ਸੁਰੰਗ ਵਿੱਚ ਮਲਬਾ ਭਰ ਜਾਣ ਕਾਰਨ ਬਚਾਅ ਕਾਰਜ ਪ੍ਰਭਾਵਿਤ ਹੋਏ ਹਨ।
ਅਧਿਕਾਰੀ ਨੇ ਕਿਹਾ, “ਇਹ ਅਜਿਹੀ ਸੁਰੰਗ ਹੈ ਜਿਸ ਵਿੱਚ ਤਰੇੜ ਆਈ ਹੈ। ਆਡਿਟ ਸੁਰੰਗਾਂ (ਐਮਰਜੈਂਸੀ ਰਸਤੇ) ਬੰਦ ਨਹੀਂ ਹੋਏ ਹਨ। ਇਸ ਲਈ ਅੰਦਰ ਆਕਸੀਜਨ ਦੀ ਕਮੀ ਨਹੀਂ ਹੋਣੀ ਚਾਹੀਦੀ। ਅੰਦਰ ਖਾਣੇ ਅਤੇ ਪਾਣੀ ਦੀ ਕਮੀ ਹੈ। ਜੇ ਸਮੇਂ ਸਿਰ ਬਚਾਅ ਕੀਤਾ ਗਿਆ ਤਾਂ ਅੰਦਾਜ਼ਾ ਹੈ ਕਿ ਅੰਦਰ ਮੌਜੂਦ ਲੋਕਾਂ ਨੂੰ ਬਚਾ ਲਿਆ ਜਾਵੇਗਾ।”
ਉਨ੍ਹਾਂ ਮੁਤਾਬਕ, ਵੀਰਵਾਰ ਨੂੰ ਚਾਰ ਕਰਮਚਾਰੀ ਖੁਦ ਸੁਰੰਗ ਤੋਂ ਬਾਹਰ ਆਏ ਸਨ। ਉਨ੍ਹਾਂ ਨੇ ਦੱਸਿਆ ਕਿ ਸੁਰੰਗ ਦੇ ਅੰਦਰ ਕਰੀਬ 400 ਲੋਕ ਹਨ। ਪ੍ਰੋਜੈਕਟ ਅਧਿਕਾਰੀਆਂ ਮੁਤਾਬਕ, ਉਸ ਦਿਨ ਸੁਰੰਗ ਦੇ ਅੰਦਰ ਕੰਮ ਕਰਨ ਲਈ ਤਾਇਨਾਤ ਕਰਮਚਾਰੀਆਂ ਦੀ ਗਿਣਤੀ ਵੀ ਕਰੀਬ 400 ਸੀ।
ਪ੍ਰੋਜੈਕਟ ਦੇ ਸੰਪਰਕ ਅਧਿਕਾਰੀ ਨੇ ਬੀਬੀਸੀ ਨਿਊਜ਼ ਨੇਪਾਲੀ ਨੂੰ ਦੱਸਿਆ ਕਿ ਸੁਰੰਗ ਤੱਕ ਪਹੁੰਚਣ ਵਾਲੇ ਸਾਰੇ ਰਸਤੇ ਰੁੜ੍ਹ ਜਾਣ ਕਾਰਨ ਹੁਣ ਚੱਟਾਨ ਦੇ ਕਿਨਾਰੇ ਹੈਲੀਕਾਪਟਰ ਨਾਲ ਲਟਕ ਕੇ ਹੀ ਸੁਰੰਗ ਵਿੱਚ ਦਾਖ਼ਲ ਹੋਇਆ ਜਾ ਸਕਦਾ ਹੈ।
ਕੁੱਲ 126 ਮੈਗਾਵਾਟ ਸਮਰੱਥਾ ਵਾਲੇ ਇਸ ਪ੍ਰੋਜੈਕਟ ਵਿੱਚ ਨੇਪਾਲੀ ਕਰਮਚਾਰੀਆਂ ਦੇ ਨਾਲ-ਨਾਲ ਕੋਰੀਆਈ, ਚੀਨੀ ਅਤੇ ਭਾਰਤੀ ਕਰਮਚਾਰੀ ਵੀ ਕੰਮ ਕਰ ਰਹੇ ਹਨ।
ਉਨ੍ਹਾਂ ਨੇ ਦੱਸਿਆ ਕਿ ਪ੍ਰੋਜੈਕਟ ਵਿੱਚ 100 ਚੀਨੀ ਕਰਮਚਾਰੀ ਕੰਮ ਕਰ ਰਹੇ ਹਨ ਅਤੇ ਉਨ੍ਹਾਂ ਵਿੱਚੋਂ ਕੁਝ ਨੂੰ ਬਚਾ ਲਿਆ ਗਿਆ ਹੈ। ਅਧਿਕਾਰੀ ਮੁਤਾਬਕ, ਪ੍ਰੋਜੈਕਟ ਵਿੱਚ ਕੰਮ ਕਰਨ ਵਾਲੇ 40 ਭਾਰਤੀ ਅਤੇ 8 ਕੋਰੀਆਈ ਕਰਮਚਾਰੀਆਂ ਦਾ ਹੁਣ ਤੱਕ ਪਤਾ ਨਹੀਂ ਲੱਗ ਸਕਿਆ ਹੈ।
ਉਨ੍ਹਾਂ ਦੱਸਿਆ ਕਿ ਕਰੀਬ 80 ਫ਼ੀਸਦੀ ਪੂਰੇ ਹੋ ਚੁੱਕੇ ਇਸ ਪ੍ਰੋਜੈਕਟ ਦੀ ਰੋਜ਼ਾਨਾ ਦੀ ਹਾਜ਼ਰੀ ਮੁਤਾਬਕ, ਹੜ੍ਹ ਤੋਂ ਪਹਿਲਾਂ ਇੱਥੇ 1,350 ਲੋਕ ਕੰਮ ਕਰ ਰਹੇ ਸਨ।
ਊਰਜਾ ਮੰਤਰਾਲੇ ਦੇ ਇੱਕ ਬੁਲਾਰੇ ਨੇ ਦੱਸਿਆ ਕਿ ਇਨ੍ਹਾਂ ਵਿੱਚੋਂ ਹੁਣ ਤੱਕ 254 ਲੋਕਾਂ ਨੂੰ ਬਚਾ ਲਿਆ ਗਿਆ ਹੈ। ਪ੍ਰੋਜੈਕਟ ਦੇ ਸੰਪਰਕ ਅਫ਼ਸਰ ਗਿਰੀ ਅਧਿਕਾਰੀ ਨੇ ਦੱਸਿਆ ਕਿ ਬਚਾਏ ਗਏ ਜ਼ਿਆਦਾਤਰ ਕਰਮਚਾਰੀ ਸੁਰੰਗ ਦੇ ਬਾਹਰ ਸਨ।
ਪ੍ਰੋਜੈਕਟ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਸੁਰੰਗ ਦੇ ਬਾਹਰ ਮੌਜੂਦ ਕਰੀਬ 200 ਲੋਕਾਂ ਨਾਲ ਵੀ ਸੰਪਰਕ ਨਹੀਂ ਹੋ ਸਕਿਆ ਹੈ।
ਉਨ੍ਹਾਂ ਕਿਹਾ ਕਿ ਸੰਭਾਵਨਾ ਹੈ ਕਿ ਸੰਪਰਕ ਤੋਂ ਕੱਟੇ ਗਏ ਕੁਝ ਕਰਮਚਾਰੀ ਪ੍ਰੋਜੈਕਟ ਦੇ ਉੱਪਰ ਸਥਿਤ ਪਿੰਡਾਂ ਵਿੱਚ ਚਲੇ ਗਏ ਹੋਣ ਅਤੇ ਉਨ੍ਹਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ ਹੋਵੇ।
ਕਿਸ ਪ੍ਰੋਜੈਕਟ ਵਿੱਚ ਕਿੰਨੇ ਲੋਕ ਸੰਪਰਕ ਤੋਂ ਕੱਟੇ ਗਏ?
ਨੇਪਾਲ ਦੇ ਊਰਜਾ ਮੰਤਰੀ ਬਿਰਾਜ ਭਗਤ ਸ਼੍ਰੇਸ਼ਠ ਦੇ ਸਲਾਹਕਾਰ ਗਣੇਸ਼ ਕਾਰਕੀ ਨੇ ਦੱਸਿਆ ਕਿ ਰਸੁਵਾ ਅਤੇ ਨੁਵਾਕੋਟ ਦੇ ਪ੍ਰੋਜੈਕਟਾਂ ਸਮੇਤ ਨੌਂ ਪ੍ਰੋਜੈਕਟਾਂ ਵਿੱਚ ਕੰਮ ਕਰਨ ਵਾਲੇ ਲੋਕਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ ਹੈ।
ਊਰਜਾ ਮੰਤਰਾਲੇ ਦੇ ਬੁਲਾਰੇ ਸ਼ਾਕਿਆ ਮੁਤਾਬਕ, ਰਸੁਵਾਗੜ੍ਹੀ ਹਾਈਡ੍ਰੋਪਾਵਰ ਪ੍ਰੋਜੈਕਟ ਵਿੱਚ ਕੰਮ ਕਰਨ ਵਾਲੇ 93 ਲੋਕ ਲਾਪਤਾ ਹਨ। ਇਸੇ ਤਰ੍ਹਾਂ ਅਪਰ ਤ੍ਰਿਸ਼ੂਲੀ 3ਏ ਵਿੱਚ 43 ਲੋਕ ਲਾਪਤਾ ਹਨ ਅਤੇ 30 ਲੋਕਾਂ ਦੇ ਸੁਰੰਗ ਦੇ ਅੰਦਰ ਹੋਣ ਦਾ ਖ਼ਦਸ਼ਾ ਹੈ।
ਨੇਪਾਲ ਬਿਜਲੀ ਅਥਾਰਟੀ ਨੇ ਦੱਸਿਆ ਹੈ ਕਿ ਇਸ ਪ੍ਰੋਜੈਕਟ ਵਿੱਚ 11 ਲੋਕਾਂ ਨਾਲ ਹੁਣ ਸੰਪਰਕ ਹੋ ਗਿਆ ਹੈ।
ਜਦੋਂ ਲੋਕ ਰੱਖ-ਰਖਾਅ ਲਈ ਸੁਰੰਗ ਦੇ ਅੰਦਰ ਉਤਪਾਦਨ ਕੇਂਦਰ ਵੱਲ ਜਾ ਰਹੇ ਸਨ, ਉਸੇ ਦੌਰਾਨ ਪ੍ਰੋਜੈਕਟ ਵਿੱਚ ਹੜ੍ਹ ਦਾ ਪਾਣੀ ਦਾਖ਼ਲ ਹੋ ਗਿਆ।
ਅਥਾਰਟੀ ਨੇ ਕਿਹਾ, “ਖੁਦਾਈ ਲਈ ਜ਼ਰੂਰੀ ਉਪਕਰਣਾਂ ਦੀ ਵਰਤੋਂ ਕਰਦੇ ਹੋਏ ਨੇਪਾਲੀ ਫੌਜ ਅਤੇ ਮਾਹਿਰ ਕਰਮਚਾਰੀਆਂ ਸਮੇਤ ਹੋਰ ਲੋਕਾਂ ਦੀ ਮਦਦ ਨਾਲ ਭੂਮੀਗਤ ਪਾਵਰ ਹਾਊਸ ਤੱਕ ਜਾਣ ਵਾਲੀ ਕੇਬਲ ਸੁਰੰਗ ਦੇ ਮਲਬੇ ਨਾਲ ਬੰਦ ਮੁਹਾਣੇ ਨੂੰ ਖੋਲ੍ਹਣ ਦਾ ਕੰਮ ਤੇਜ਼ੀ ਨਾਲ ਚੱਲ ਰਿਹਾ ਹੈ।”
ਊਰਜਾ ਮੰਤਰਾਲੇ ਨੇ ਇਹ ਵੀ ਦੱਸਿਆ ਹੈ ਕਿ ਅਪਰ ਤ੍ਰਿਸ਼ੂਲੀ 3ਬੀ ਦੇ 158 ਲੋਕਾਂ ਦਾ ਸੰਪਰਕ ਟੁੱਟ ਗਿਆ ਹੈ। ਬਿਜਲੀ ਅਥਾਰਟੀ ਨੇ ਦੱਸਿਆ ਕਿ ਇਸ ਪ੍ਰੋਜੈਕਟ ਦਾ ਕੈਂਪ ਜਿਸ ਇਲਾਕੇ ਵਿੱਚ ਹੈ, ਉਹ ਜ਼ਮੀਨ ਖਿਸਕਣ ਨਾਲ ਹੋਏ ਮਲਬੇ ਵਿੱਚ ਪੂਰੀ ਤਰ੍ਹਾਂ ਦਬ ਗਿਆ ਹੈ।
ਅਥਾਰਟੀ ਨੇ ਕਿਹਾ, “ਬੇਹੱਦ ਮੁਸ਼ਕਿਲ ਅਤੇ ਜੋਖ਼ਮ ਭਰੀਆਂ ਹਾਲਾਤਾਂ ਦੇ ਵਿਚਕਾਰ ਬਚਾਅ ਅਤੇ ਉੱਥੇ ਤੱਕ ਪਹੁੰਚਣ ਦਾ ਕੰਮ ਜਾਰੀ ਹੈ। ਹੈਲੀਕਾਪਟਰ ਰਾਹੀਂ ਪ੍ਰੋਜੈਕਟ ਸਥਾਨ ‘ਤੇ ਲਗਾਤਾਰ ਨਜ਼ਰ ਰੱਖ ਕੇ ਸਥਿਤੀ ਦਾ ਜਾਇਜ਼ਾ ਲਿਆ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਖੁਦਾਈ ਕਰਨ ਵਾਲੀਆਂ ਮਸ਼ੀਨਾਂ ਸਮੇਤ ਜ਼ਰੂਰੀ ਉਪਕਰਣਾਂ ਨੂੰ ਹੈਲੀਕਾਪਟਰ ਰਾਹੀਂ ਮੌਕੇ ਤੱਕ ਪਹੁੰਚਾਇਆ ਗਿਆ ਹੈ ਅਤੇ ਕੰਮ ਸ਼ੁਰੂ ਕਰ ਦਿੱਤਾ ਗਿਆ ਹੈ।”
ਊਰਜਾ ਮੰਤਰਾਲੇ ਮੁਤਾਬਕ, ਚਿਲਿਮੇ ਹਾਈਡ੍ਰੋਪਾਵਰ ਪ੍ਰੋਜੈਕਟ ਵਿੱਚ ਕੰਮ ਕਰਨ ਵਾਲੇ ਅੱਠ ਲੋਕ ਲਾਪਤਾ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਉਹ ਸੁਰੰਗ ਦੇ ਅੰਦਰ ਹਨ।
ਤਸਵੀਰ ਸਰੋਤ, BBC/AshokDahal/File
ਨਿੱਜੀ ਊਰਜਾ ਉਤਪਾਦਕਾਂ ਦੇ ਸੰਗਠਨ ਆਈਪੀਪੀਏਐਨ ਦੇ ਪ੍ਰਧਾਨ ਮੋਹਨ ਡਾਂਗੀ ਨੇ ਕਿਹਾ ਕਿ ਲੈਂਗਟਾਂਗ ਹਾਈਡ੍ਰੋਪਾਵਰ ਪ੍ਰੋਜੈਕਟ ਦੀ ਸੁਰੰਗ ਵਿੱਚ ਫਸੇ 62 ਲੋਕਾਂ ਵਿੱਚੋਂ 18 ਨੂੰ ਬਚਾ ਲਿਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਪ੍ਰੋਜੈਕਟ ਤੋਂ ਹੋਰ ਲੋਕਾਂ ਨੂੰ ਵੀ ਬਚਾਏ ਜਾਣ ਦੀ ਉਮੀਦ ਹੈ।
ਨੇਪਾਲ ਬਿਜਲੀ ਅਥਾਰਟੀ ਨੇ ਦੱਸਿਆ ਹੈ ਕਿ ਭੋਟੇਕੋਸ਼ੀ-ਤ੍ਰਿਸ਼ੂਲੀ ਖੇਤਰ ਵਿੱਚ ਨਿਰਮਾਣ ਅਧੀਨ ਅਤੇ ਚਾਲੂ 11 ਹਾਈਡ੍ਰੋਪਾਵਰ ਪ੍ਰੋਜੈਕਟ ਹੜ੍ਹ ਕਾਰਨ ਨੁਕਸਾਨੇ ਗਏ ਹਨ।
ਅਥਾਰਟੀ ਦੀਆਂ ਸਹਾਇਕ ਕੰਪਨੀਆਂ ਅਤੇ ਨਿੱਜੀ ਡੇਵਲੇਪਰਜ਼ ਨੇ ਦੱਸਿਆ ਕਿ ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ, ਕੁੱਲ 470 ਮੈਗਾਵਾਟ ਸਮਰੱਥਾ ਵਾਲੇ 15 ਨਿਰਮਾਣ ਅਧੀਨ ਹਾਈਡ੍ਰੋਪਾਵਰ ਪ੍ਰੋਜੈਕਟਾਂ ਨੂੰ ਨੁਕਸਾਨ ਪਹੁੰਚਣ ਦੀ ਸੂਚਨਾ ਮਿਲੀ ਹੈ।
ਇਸੇ ਤਰ੍ਹਾਂ ਅਪਰ ਮੇਲੁੰਗ ਏ ਅਤੇ ਮੇਲੁੰਗ ਖੋਲਾ ਪ੍ਰੋਜੈਕਟਾਂ ਵਿੱਚ ਸੱਤ-ਸੱਤ ਲੋਕਾਂ, ਲੈਂਗਟਾਂਗ ਭੋਟੇਕੋਸ਼ੀ ਵਿੱਚ ਦੋ ਚੀਨੀ ਨਾਗਰਿਕਾਂ ਸਮੇਤ ਚਾਰ ਲੋਕਾਂ ਅਤੇ ਸੈਂਟਰਲ ਤ੍ਰਿਸ਼ੂਲੀ ਵਿੱਚ ਦੋ ਲੋਕਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ ਹੈ।
‘ਹੈਲੋ ਸਰਕਾਰ, ਅਸੀਂ ਸੁਰੰਗ ਦੇ ਅਖ਼ੀਰ ਵਿੱਚ ਹਾਂ’
ਤਸਵੀਰ ਸਰੋਤ, PM Secretariat
ਇੱਕ ਅਧਿਕਾਰੀ ਚੰਦਰਸ਼ੇਰ ਰਾਣਾ ਨੇ ਦੱਸਿਆ ਕਿ ਸੁਰੰਗ ਦੇ ਮੁਹਾਣੇ ‘ਤੇ ਫਸੇ ਲੋਕਾਂ ਨੇ ਮਦਦ ਮੰਗਣ ਲਈ ਪ੍ਰਧਾਨ ਮੰਤਰੀ ਦਫ਼ਤਰ ਦੇ ਅਧੀਨ ਆਉਣ ਵਾਲੇ ‘ਹੈਲੋ ਸਰਕਾਰ’ ਵਿੱਚ ਫ਼ੋਨ ਕੀਤਾ ਸੀ।
ਰਾਣਾ ਨੇ ਦੱਸਿਆ ਕਿ 216 ਮੈਗਾਵਾਟ ਦੇ ਇਸ ਪ੍ਰੋਜੈਕਟ ਵਿੱਚ ਫਸੇ ਲੋਕਾਂ ਨੇ ਮਦਦ ਮੰਗੀ।
ਰਾਣਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਕਿਹਾ, “ਅਸੀਂ ਸੁਰੰਗ ਦੇ ਮੁਹਾਣੇ ‘ਤੇ ਹਾਂ। ਅਸੀਂ ਹੱਥ ਉਠਾ ਰਹੇ ਹਾਂ।’ ਸਾਨੂੰ ਫ਼ੋਨ ਆਇਆ ਕਿ ਹੈਲੀਕਾਪਟਰ ਭੇਜਣਾ ਜ਼ਰੂਰੀ ਹੈ। ਇਸ ਤੋਂ ਬਾਅਦ ਅਸੀਂ ਸਬੰਧਤ ਅਧਿਕਾਰੀਆਂ ਨੂੰ ਜਾਣਕਾਰੀ ਦਿੱਤੀ। ਸਾਨੂੰ ਦੱਸਿਆ ਗਿਆ ਹੈ ਕਿ ਉਨ੍ਹਾਂ ਨੂੰ ਬਚਾ ਲਿਆ ਗਿਆ ਹੈ।”
‘ਹੈਲੋ ਸਰਕਾਰ’ ਕੰਟਰੋਲ ਰੂਮ ਮੁਤਾਬਕ, ਬੁੱਧਵਾਰ ਸਵੇਰੇ 11 ਵਜੇ ਤੋਂ ਸ਼ੁੱਕਰਵਾਰ ਸਵੇਰ ਤੱਕ ‘ਹੈਲੋ ਸਰਕਾਰ’ ਨੂੰ 6,600 ਤੋਂ ਜ਼ਿਆਦਾ ਫ਼ੋਨ ਕਾਲਾਂ ਮਿਲੀਆਂ ਹਨ।
ਰਾਣਾ ਨੇ ਕਿਹਾ, “ਕਈ ਲੋਕਾਂ ਨੇ ਆਪਣੇ ਰਿਸ਼ਤੇਦਾਰਾਂ ਨੂੰ ਲੱਭਣ ਦੀ ਅਪੀਲ ਕੀਤੀ ਹੈ। ਕੁਝ ਲੋਕਾਂ ਨੇ ਫ਼ੋਨ ਕਰਕੇ ਇਹ ਵੀ ਦੱਸਿਆ ਹੈ ਕਿ ਉਨ੍ਹਾਂ ਨੂੰ ਬਚਾਅ ਅਤੇ ਰਾਹਤ ਦੀ ਲੋੜ ਹੈ।”
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
source : BBC PUNJABI
