ઉજ્જૈન : શાહી મસ્જિદના એક ભાગને હઠાવવાનો વિરોધ, પોલીસે ટિયરગૅસ છોડ્યો – ન્યૂઝ અપડેટ

અપડેટેડ 21 મિનિટ પહેલા

મધ્ય પ્રદેશના ઉજ્જૈનમાં શાહી મસ્જિદના એક ભાગને તોડી પાડવા દરમિયાન આજે છતરી ચોક વિસ્તારમાં તણાવ વધી ગયો હતો.

હકીકતમાં આ કાર્યવાહી સિંહસ્થ કુંભ 2028ને ધ્યાનમાં રાખીને ચાલી રહેલા માર્ગોને પહોળા કરવાના પ્રોજેક્ટ હેઠળ કરાઈ રહી હતી.

રવિવાર રાતથી જ મોટી સંખ્યામાં લોકો મસ્જિદના એક ભાગને દૂર કરવાના વિરોધમાં એકઠા થયા હતા.

પોલીસે પરિસ્થિતિને કાબૂમાં લેવા માટે આંસુગૅસના શેલનો ઉપયોગ કર્યો છે.

શાહી મસ્જિદ સમિતિ અને મુસ્લિમ સમુદાયનું કહેવું છે કે રસ્તો પહોળો કરવા માટે ધાર્મિક સ્થળને દૂર કરવાને બદલે વૈકલ્પિક વ્યવસ્થા શોધવી જોઈએ.

મસ્જિદ સમિતિએ આ કાર્યવાહી સામે મધ્ય પ્રદેશ હાઇકોર્ટમાં અરજી દાખલ કરી છે, જેની સુનાવણી સોમવારે થવાની છે.

વહીવટીતંત્રનું કહેવું છે કે સિંહસ્થ કુંભ 2028ને ધ્યાનમાં રાખીને રસ્તો પહોળો કરવા અને ટ્રાફિક વ્યવસ્થા સુધારવા માટે આ કાર્યવાહી કરવામાં આવી રહી છે.

સપ્ટેમ્બરમાં મધ્ય પ્રદેશ હાઇકોર્ટની સિંગલ બેન્ચે પણ મ્યુનિસિપલ કૉર્પોરેશન દ્વારા માર્ગ પહોળો કરવા માટે મસ્જિદના અસરગ્રસ્ત ભાગને દૂર કરવાની કાર્યવાહીને પડકારતી અરજીઓ ફગાવી દીધી હતી.

હાલમાં, વરિષ્ઠ પોલીસ અને વહીવટી અધિકારીઓ ઘટનાસ્થળે હાજર છે અને વિસ્તારમાં ભારે પોલીસ દળ પણ તહેનાત કરવામાં આવ્યું છે.

એનડીએના સાથી પક્ષ લોક જનશક્તિ પાર્ટી (રામ વિલાસ)ના પ્રમુખ અને કેન્દ્રીય મંત્રી ચિરાગ પાસવાને પોતાની જ સરકાર સામે કડક વલણ અપનાવ્યું છે.

ચિરાગ પાસવાને એક મુલાકાતમાં કહ્યું છે કે, “આજે બિહારમાં કોઈ સુરક્ષિત નથી. આ આપણી સરકારની ચિંતાનો વિષય છે. પરંતુ એક સાથી અને સરકારનો ભાગ હોવાને કારણે હું આ પ્રશ્નથી ભાગી શકતો નથી. મને પોતે શરમ આવે છે કે હું એવી સરકાર સાથે છું, જ્યાં આવી ઘટનાઓ બની રહી છે. આ ચિંતાનો વિષય છે, આપણે તેને હળવાશથી લઈ શકીએ નહીં.”

“મને ગુસ્સો આવવો એ સ્વાભાવિક છે. એક પછી એક ઘટનાઓ પ્રકાશમાં આવી રહી છે. દીકરીઓ ડરી ગઈ છે. આજે દરેક છોકરી સાંજે બહાર નીકળતાં પહેલાં સો વાર વિચારે છે. આવી સ્થિતિમાં જો સરકાર સુરક્ષા નહીં આપે, તો હું તે સ્વીકારીશ નહીં.”

તેમણે મીડિયા સાથેની વાતચીતમાં એમ પણ કહ્યું કે , “બિહારમાં પ્રશાસન નકામું થઈ ગયું છે, બિહારના લોકોને સુરક્ષિત રાખવું એ તેમના હાથની વાત રહી નથી. મને પોતે શરમ આવે છે કે હું આવી સરકારને ટેકો આપી રહ્યો છું.”

જોકે, ઘણા સમાચાર માધ્યમોએ ચિરાગ પાસવાનની આ વાત રજૂ કરતી પોસ્ટ્સ હઠાવી દીધી છે.

રાષ્ટ્રીય જનતા દળ (આરજેડી)નાં પ્રવક્તા પ્રિયંકા ભારતીએ ચિરાગ પાસવાન પર નિશાન સાધ્યું હતું. તેમણે ઇન્સ્ટાગ્રામ પર લખ્યું , “ચિરાગજી, તમે સત્તાનો આનંદ કેવી રીતે માણી શકો છો અને સાથે ફરિયાદ પણ કેવી રીતે કરી શકો છો? આવું કેવી રીતે ચાલશે?”

ઉલ્લેખનીય છે કે તાજેતરમાં બિહારના જમુઈ અને સમસ્તીપુરથી મહિલાઓ વિરુદ્ધના ગુનાઓના ઘણા વીડિયો સામે આવ્યા હતા. જેના પછી કાયદો અને વ્યવસ્થાની સ્થિતિ પર સવાલો ઊભા થઈ રહ્યા છે.

28થી 30 સપ્ટેમ્બર દરમિયાન થનારી ત્રણ દિવસીય દેશવ્યાપી બૅન્ક હડતાળ મુલતવી રાખવામાં આવી છે.

રવિવારે મોડી રાત્રે ઇન્ડિયન બૅન્ક્સ ઍસોસિયેશન (આઇબીએ) અને યુનાઇટેડ ફૉરમ ઑફ બૅન્ક યુનિયન્સ (યુએફબીયુ) વચ્ચે યોજાયેલી બેઠકમાં આ સર્વસંમતિ સધાઈ હતી.

યુએફબીયુએ તેના સત્તાવાર નિવેદનમાં જણાવ્યું હતું કે, “આઇબીએએ બૅન્ક યુનિયનોની માગણીઓ પર વિચાર કરવા માટે એક ઉચ્ચ-સ્તરીય સમિતિની રચના કરવા સહમતિ આપી છે, જેના પગલે યુનિયનોએ હાલ પૂરતું હડતાળ મુલતવી રાખવાનો નિર્ણય લીધો છે.”

નિવેદન અનુસાર, સ્કેલ 4 અને તેનાથી ઉપરના અધિકારીઓ માટે પર્ફૉર્મન્સ લિંક્ડ ઇન્સેન્ટિવ (પીએલઆઈ) યોજનામાં ફેરફારો અંગે આઇબીએ સાથે ચર્ચા શરૂ થવાની અપેક્ષા છે. આ પછી, યુનિયનો અને સંગઠનો દ્વારા ઉઠાવવામાં આવેલા વાંધાને દૂર કરવા માટે સરકાર સમક્ષ સુધારા પ્રસ્તાવિત કરવામાં આવશે.

આ નિર્ણયથી સામાન્ય લોકો અને વ્યવસાયોને નોંધપાત્ર રાહત મળી છે.

આજથી સોમવારથી દેશભરની તમામ જાહેર અને ખાનગી બૅન્કો સામાન્ય રીતે કાર્યરત્ રહેશે અને ચેક ક્લિયરન્સ અને રોકડ વ્યવહારો સહિતની તમામ શાખા સેવાઓ ઉપલબ્ધ રહેશે.

નોંધનીય છે કે બૅન્ક કર્મચારીઓની મુખ્ય માગ પાંચ દિવસના કામકાજ (દર શનિવાર-રવિવારે રજા) અને પર્ફૉર્મન્સ લિંક્ડ ઇન્સેન્ટિવ (પીએલઆઈ)ના નિયમોમાં સુધારો કરવાની છે, જેના પર હવે નવી રચાયેલી સમિતિ દ્વારા વિચારણા કરવામાં આવશે.

બીબીસી માટે કલેક્ટિવ ન્યૂઝરૂમનું પ્રકાશન