മുണ്ടിന്റെ മടിക്കുത്ത് മടക്കിപ്പിടിച്ചതില്‍ സംശയം; ഇലന്തൂര്‍ നരബലിക്കേസിലെ മുഖ്യപ്രതിയില്‍ നിന്നും ഹെറോയിന്‍ കണ്ടെടുത്തു

Source :- SIRAJLIVE NEWS

കൊച്ചി  | കോടതിയില്‍ ഹാജരാക്കിയ പത്തനംതിട്ട ഇലന്തൂര്‍ ഇരട്ട നരബലി കേസിലെ മുഖ്യപ്രതി മുഹമ്മദ് ഷാഫിയില്‍ നിന്നും ഹെറോയില്‍ പിടികൂടി. മുണ്ടിന്റെ മടിക്കുത്തില്‍ ഒളിപ്പിച്ച നിലയിലാണ് മയക്ക്മരുന്ന് കണ്ടെടുത്തത്. നരബലി കേസിലെ വിചാരണ നടക്കുന്ന കോടതി കെട്ടിടത്തില്‍ നിന്ന് തിരികെ കൊണ്ടുപോകവെ സംശയം തോന്നി പരിശോധിച്ചപ്പോഴാണ് ഇത് കണ്ടെടുത്തത്

പനമ്പിള്ളി നഗറിലെ കേരള ഹൗസിങ് ബോര്‍ഡ് കെട്ടിടത്തില്‍ പ്രവര്‍ത്തിക്കുന്ന അഡിഷനല്‍ ഡിസ്ട്രിക്ട് ആന്‍ഡ് സെഷന്‍സ് കോടതി (ഇടമലയാര്‍ കോടതി)യിലാണ് നരബലി കേസിന്റെ വിചാരണ നടക്കുന്നത്. ഇവിടെ ഹാജരാക്കി തിരികെ ജയിലിലേക്ക് കൊണ്ടുപോകാന്‍ ഇറങ്ങുമ്പോള്‍, മുണ്ടിന്റെ മടിക്കുത്ത് മടക്കിപ്പിടിച്ചിരിക്കുന്നതു കണ്ട പോലീസ് വിശദമായി പരിശോധിക്കുകയായിരുന്നു.രണ്ട് ചെറിയ പ്ലാസ്റ്റിക് ബോട്ടിലുകളിലായിട്ടാണ് ലഹരിമരുന്ന് ഒളിപ്പിച്ചിരുന്നത്. 6 ഗ്രാം ഹെറോയിനാണ് കണ്ടെടുത്തത്.

വിചാരണ കോടതി ജഡ്ജിയുടെ നിര്‍ദേശപ്രകാരം എറണാകുളം ടൗണ്‍ സൗത്ത് പോലീസ് എന്‍ഡിപിഎസ് ആക്ട് പ്രകാരം ഷാഫിയുടെ അറസ്റ്റ് രേഖപ്പെടുത്തി. ഷാഫിയെ പിന്നീട് ജയിലിലേക്ക് മാറ്റി.

ശുചിമുറിയില്‍ പോയ സമയത്ത് രണ്ടു പേര്‍ ഷാഫിക്ക് ഹെറോയിന്‍ കൈമാറിയതായാണ് പോലീസിന്റെ നിഗമനം. കോടതി പരിസരത്തെ സിസിടിവി ദൃശ്യങ്ങള്‍ അടക്കം പൊലീസ് പരിശോധിക്കുന്നുണ്ട്.

ഇലന്തൂര്‍ നരബലി കേസിലെ പ്രധാന പ്രതിയാണ് പെരുമ്പാവൂര്‍ വെങ്ങോല സ്വദേശി മുഹമ്മദ് ഷാഫി. കടവന്ത്രയില്‍ താമസിച്ചിരുന്ന ലോട്ടറി വില്‍പ്പനക്കാരിയായിരുന്ന പദ്മത്തെ ഷാഫിയാണ് വാഹനത്തില്‍ കയറ്റി ഇലന്തൂരിലേക്ക് കൊണ്ടുപോയത്. ആലപ്പുഴ സ്വദേശിനി റോസ്ലിനെ കൊലപ്പെടുത്തി കേസിലെ വിചാരണയാണ് ഇപ്പോള്‍ നടന്നുകൊണ്ടിരിക്കുന്നത്.

Content Highlights: Elanthoor human sacrifice case prime accused Mohammed Shafi was caught with 6 grams of heroin at the Kochi court. Police found the drugs hidden in his clothing while returning from trial. Authorities have registered a case under the NDPS Act.