इम्रान खान यांच्यासाठी कपिल देव, सुनील गावस्कर यांच्यासह 21 माजी क्रिकेट कर्णधारांचं पत्र

पाकिस्तानचे माजी पंतप्रधान आणि पाकिस्तानला 1992 मध्ये क्रिकेट विश्वचषक जिंकून देणारे माजी कर्णधार इम्रान खान यांच्या आरोग्याचा प्रश्न पुन्हा चर्चेत आला आहे.

पाकिस्तानच्या सर्वोच्च न्यायालयाच्या आदेशानंतर त्यांना रावळपिंडीतील अदियाला तुरुंगातून इस्लामाबादमधील शिफा इंटरनॅशनल हॉस्पिटलमध्ये नेण्यात आलं होतं.

मात्र, काही तासांच्या वैद्यकीय तपासणीनंतर डॉक्टरांनी त्यांना वैद्यकीयदृष्ट्या तंदुरुस्त असल्याचे सांगत पुन्हा अदियाला तुरुंगात हलवण्यात आले.

या घडामोडीनंतर भारताचे कपिल देव, सुनील गावस्कर आणि इंग्लंडचे अ‍ॅलिस्टर कुक यांच्यासह 21 माजी क्रिकेट कर्णधारांनी पाकिस्तानचे पंतप्रधान शहबाज शरीफ यांना पत्र लिहिलं आहे.

इम्रान खान यांना न्यायालयाच्या आदेशानुसार योग्य वैद्यकीय उपचार, त्यांच्या वैयक्तिक डॉक्टरांकडून तपासणी आणि मानवी वागणूक मिळावी, अशी मागणी या पत्रात करण्यात आली आहे.

इम्रान खान यांना 20 ऑगस्टच्या रात्री उशिरा रावळपिंडीतील अदियाला तुरुंगातून इस्लामाबादमधील शिफा इंटरनॅशनल हॉस्पिटलमध्ये नेण्यात आलं होतं.

यापूर्वी 18 ऑगस्ट रोजी पाकिस्तानच्या सर्वोच्च न्यायालयानं दोन दिवसांमध्ये इम्रान खान यांना तुरुंगातून खासगी रुग्णालयात हलवून त्यांची वैद्यकीय तपासणी करण्याचे आदेश दिले होते.

न्यायालयानं त्यांच्या वैद्यकीय तपासणीसाठी मेडिकल बोर्ड स्थापन करण्याचे निर्देशही दिले होते.

या बोर्डमध्ये इम्रान खान यांचे वैयक्तिक डॉक्टर डॉ. फैसल आणि त्यांची बहीण डॉ. उजमा खान यांचा समावेश करण्यास सांगितले होते.

पाकिस्तान सरकारमधील मंत्री अताउल्लाह तरार यांनी एक्सवरील पोस्टमध्ये सांगितलं की, सर्वोच्च न्यायालयाच्या निर्णयानुसार इम्रान खान यांना कडेकोट सुरक्षा व्यवस्थेत रुग्णालयात नेण्यात आलं होतं.

त्यांच्या म्हणण्यानुसार, नेत्ररोगतज्ज्ञ, हृदयरोगतज्ज्ञ आणि फिजिशियन यांचा समावेश असलेल्या डॉक्टरांच्या पथकाने इम्रान खान यांची सविस्तर तपासणी केली आणि त्यांना वैद्यकीयदृष्ट्या तंदुरुस्त असल्याचे सांगितले.

सर्व प्रक्रिया पूर्ण झाल्यानंतर 21 ऑगस्ट रोजी पहाटे सुमारे 05:00 वाजता त्यांना पुन्हा अदियाला तुरुंगात हलवण्यात आलं.

तरार यांनी असंही सांगितलं की तपासणी आणि उपचारांच्या वेळी इम्रान खान यांची बहीण डॉ. उजमा खान रुग्णालयात उपस्थित होत्या.

मात्र, बीबीसी उर्दूशी बोलताना पाकिस्तान तहरीक-ए-इन्साफ (PTI) पक्षाच्या प्रवक्त्याने आणि इस्लामाबाद पोलिसांच्या एका वरिष्ठ अधिकाऱ्याने इम्रान खान यांना तुरुंगातून रुग्णालयात नेल्याची माहिती दिली होती.

त्या वेळी पाकिस्तान सरकार किंवा इस्लामाबाद प्रशासनाकडून याबाबत कोणतेही अधिकृत वक्तव्य करण्यात आलं नव्हतं.

इम्रान खान यांच्या आरोग्याबाबत चिंता व्यक्त करत 21 माजी क्रिकेट कर्णधारांनी पाकिस्तानचे पंतप्रधान शहबाज शरीफ यांना पत्र लिहिले आहे. हे पत्र ऑस्ट्रेलियाचे माजी कर्णधार ग्रेग चॅपेल यांनी पुढाकार घेऊन तयार केले.

पत्रावर भारताचे कपिल देव, सुनील गावस्कर आणि दिलीप वेंगसरकर, इंग्लंडचे सर अ‍ॅलिस्टर कुक, मायकेल अथर्टन, नासिर हुसेन, अँड्र्यू स्ट्रॉस आणि डेव्हिड गॉवर, तसेच ऑस्ट्रेलियाचे अ‍ॅडम गिलख्रिस्ट, स्टीव्ह वॉ, बेलिंडा क्लार्क आणि किम ह्यूजेस यांच्यासह इतर माजी कर्णधारांच्या स्वाक्षऱ्या आहेत.

पत्रात म्हटलं आहे की, ‘इम्रान खान 73 वर्षांचे असून गेली 3 वर्षांहून अधिक काळ तुरुंगात आहेत. त्यांच्या प्रकरणावर कायदेशीर किंवा राजकीय मतभेद असू शकतात, मात्र न्यायालयाने आदेश दिलेली वैद्यकीय प्रक्रिया पूर्ण होणे ही मूलभूत मानवी अपेक्षा असल्याचे या माजी क्रिकेटपटूंनी नमूद केले आहे.

माजी क्रिकेट कर्णधारांनी पत्रात तीन मागण्या केल्या आहेत. पहिली म्हणजे सर्वोच्च न्यायालयाच्या निर्देशानुसार इम्रान खान यांच्या वैयक्तिक डॉक्टरांचा समावेश असलेल्या मेडिकल बोर्डकडून त्यांची तपासणी करण्यात यावी, विशेषतः त्यांच्या उजव्या डोळ्याच्या दृष्टीबाबतच्या अहवालांची तपासणी व्हावी.

दुसरी मागणी म्हणजे न्यायालयाच्या आदेशानुसार त्यांच्या कुटुंबीयांना दर आठवड्याला भेटण्याची परवानगी कोणत्याही प्रशासकीय अडथळ्यांशिवाय देण्यात यावी.

तिसरी मागणी म्हणजे मेडिकल बोर्डाने सुचवलेले उपचार कोणताही विलंब न करता उपलब्ध करून द्यावेत. याच मुद्द्यावर बोलताना भारताचे माजी कर्णधार कपिल देव यांनी पाकिस्तानच्या कायद्यावर भाष्य करणे योग्य नसल्याचे सांगितले.

मात्र, कोणताही कैदी असो, त्याच्याशी मानवीय वागणूक दिली जावी आणि आवश्यक सुविधा मिळाव्यात, अशी त्यांनी भूमिका मांडली.

कपिल देव म्हणाले की, इम्रान खान हे पाकिस्तानचे माजी पंतप्रधान आणि जगातील मोठे क्रिकेटपटू राहिले आहेत.

“मी माझ्या त्या मित्राच्या पाठीशी उभा आहे, ज्याच्यासोबत आम्ही क्रिकेट खेळलो आणि ज्याच्या क्रिकेट कौशल्याची आम्ही प्रशंसा केली त्याच्यासोबत आम्ही उभे आहोत. आमची फक्त एवढीच मागणी आहे की त्यांना सर्वोत्तम उपचार आणि आवश्यक सुविधा मिळाव्यात,” असं कपिल देव म्हणाले.

इम्रान खान ऑगस्ट 2023 पासून तुरुंगात असून त्यांच्याविरुद्ध भ्रष्टाचारापासून ते सरकारी गुपितं उघड केल्यापर्यंत 100 हून अधिक प्रकरणे दाखल आहेत. इम्रान खान आणि त्यांचा पक्ष पीटीआय (PTI) या सर्व आरोपांना राजकीय हेतूने प्रेरित असल्याचे म्हणत आला आहे.

दरम्यान, सर्वोच्च न्यायालयाने त्यांना खासगी रुग्णालयात हलवण्याचे आदेश दिले होते. मात्र प्रत्यक्षात इस्लामाबादमधील सरकारी रुग्णालयात त्यांची तपासणी करण्यात आली. डॉक्टरांनी त्यांना वैद्यकीयदृष्ट्या तंदुरुस्त असल्याचे सांगितल्यानंतर त्यांना पुन्हा अदियालाच्या तुरुंगात हलवण्यात आलं.

बीबीसीसाठी कलेक्टिव्ह न्यूजरूमचे प्रकाशन.