उदयनिधी स्टॅलिन पोलिसांच्या ताब्यात; अभिनेत्री त्रिशा कृष्णन यांच्याबाबतचं कथित वक्तव्याचं प्रकरण काय आहे?

द्रमुकचे नेते आणि तामिळनाडू विधानसभेतील विरोधी पक्षनेते उदयनिधी स्टॅलिन यांना मंगळवारी (4 ऑगस्ट) चेन्नईतील त्यांच्या निवासस्थानावरून पोलिसांनी ताब्यात घेतलं.

सोमवारी (3 ऑगस्ट) उदयनिधी यांनी त्यांच्या सभेदरम्यान तामिळ अभिनेत्री त्रिशा कृष्णन यांच्याविरोधात कथितरीत्या आक्षेपार्ह वक्तव्य केलं होतं.

तामिळनाडूचे मुख्यमंत्री जोसेफ विजय यांच्या तमिळगा वेत्री कळगम (टीव्हीके) पक्षाने या प्रकरणात पोलिसांकडे आणि राष्ट्रीय महिला आयोगाकडे (एनसीडब्ल्यू) तक्रार दाखल केली होती.

चेन्नई (दक्षिण) चे अतिरिक्त पोलीस आयुक्त नरेंद्रन नायर यांनी उदयनिधी स्टॅलिन यांच्याविरोधात प्राथमिक माहिती अहवाल (एफआयआर) दाखल करण्यात आल्याची पुष्टी केली आहे.

यापूर्वी सकाळी उदयनिधी स्टॅलिन यांच्या घराबाहेर मोठा पोलीस बंदोबस्त तैनात करण्यात आला होता.

त्यानंतर एम. सुब्रमण्यम, ई.व्ही. वेलू, एन.आर. इलंगो आणि परंथमन यांच्यासह द्रमुकचे अनेक पदाधिकारी आणि समर्थक उदयनिधी यांच्या घरी पोहोचले.

उदयनिधी यांच्या घराजवळ मोठ्या संख्येने द्रमुक कार्यकर्ते जमल्याने वातावरण तणावपूर्ण बनलं होतं.