ઓડિશા પાસે દરિયામાં કાર્ગો જહાજ ડૂબ્યું, 24 સભ્યોમાંથી બે લોકોનો બચાવ – ન્યૂઝ અપડેટ

પનામાના ધ્વજવાળું કાર્ગો જહાજ ‘ઓસિયન વિનર’ શનિવારે બંગાળની ખાડીમાં ડૂબી ગયું.

સમાચાર એજન્સી પીટીઆઈએ અધિકારીઓને હવાલાથી જણાવ્યું છે કે આ દુર્ઘટના ઓડિશાના પારાદીપ કિનારાથી લગભગ 240 નૉટિકલ માઈલ (444 કિમી) દૂર થઈ હતી.

જહાજમાં 24 ક્રૂ સભ્યો હતા, જેમાં 20 ચીની, ત્રણ મ્યાનમારના અને એક બાંગ્લાદેશી નાગરિકનો સમાવેશ થાય છે.

અધિકારીઓએ જણાવ્યું હતું કે જહાજ ઓડિશાથી સિંગાપોર આયર્ન ઓર લઈ જઈ રહ્યું હતું.

અકસ્માત બાદ, ઇન્ડિયન કોસ્ટ ગાર્ડનો આ જહાજ સાથેનો સંપર્ક તૂટી ગયો હતો.

અધિકારીઓએ જણાવ્યું હતું કે ભારતીય કોસ્ટ ગાર્ડ અને ભારતીય નૌકાદળે બચાવ કામગીરી શરૂ કરી દીધી છે.

અમેરિકાના રાષ્ટ્રપતિ ડોનાલ્ડ ટ્રમ્પે ટ્રુથ સોશિયલ પર હોર્મુઝ સામુદ્રધુનીનો નકશો શૅર કર્યો. તે નક્શા પર “અમેરિકાનો નવો પ્રદેશ” લખેલું છે.

ટ્રમ્પે હોર્મુઝ સામુદ્રધુની પર વર્તુળ દોરીને દર્શાવતો એક ફોટો શૅર કર્યો છે. આ પોસ્ટ તેમનાં તાજેતરનાં નિવેદનો પછી આવી છે.

ટ્રમ્પે શુક્રવારે એક ચૂંટણી રેલીમાં કહ્યું હતું કે, “હું હવે હોર્મુઝ સામુદ્રધુનીને અમેરિકાના જ એક પ્રદેશ તરીકે જાહેર કરું છું.”

ટ્રમ્પનું નિવેદન અને નવી પોસ્ટ એવા સમયે આવી છે જ્યારે હોર્મુઝ સામુદ્રધુની પર અમેરિકા અને ઈરાન વચ્ચે તણાવ ચાલુ છે.

આ માર્ગ પરથી પસાર થતા ઑઇલ ટૅન્કરો અને અન્ય વાણિજ્યિક જહાજોની અવરજવર પણ ઘણી ઓછી થઈ ગઈ છે.

હોર્મુઝ સામુદ્રધુની એક આંતરરાષ્ટ્રીય દરિયાઈ માર્ગ છે, જેની એક બાજુ ઈરાન અને બીજી બાજુ ઓમાન છે. તે ખાડી દેશોમાંથી વિશ્વના બાકીના ભાગોમાં મોટા પ્રમાણમાં ઑઇલ અને ગૅસનું વહન થાય છે.

બીબીસી માટે કલેક્ટિવ ન્યૂઝરૂમનું પ્રકાશન