അമേരിക്കൻ ആക്രമണമുണ്ടായാൽ വിശാല യുദ്ധമെന്ന് ഇറാന്റെ മുന്നറിയിപ്പ്; പശ്ചിമേഷ്യയിൽ സംഘർഷം രൂക്ഷം

അമേരിക്ക വീണ്ടും സൈനിക ആക്രമണത്തിന് മുതിർന്നാൽ പശ്ചിമേഷ്യയ്ക്ക് പുറത്തേക്കും വ്യാപിക്കുന്ന വിശാല യുദ്ധമുണ്ടാകുമെന്ന് ഇറാന്റെ മുന്നറിയിപ്പ്. ഇറാന്റെ പരമോന്നത നേതാവ് ആയത്തുള്ള മുജ്തബ ഖമേനി സൈനിക കമാൻഡർമാരുമായി നടത്തിയ കൂടിക്കാഴ്ചയ്ക്ക് പിന്നാലെയാണ് ഇറാൻ നിലപാട് കടുപ്പിച്ചത്. ശത്രുക്കളുടെ ഏത് നീക്കത്തിനും ഉടനടി ശക്തമായ തിരിച്ചടി നൽകാൻ സായുധ സേന സജ്ജമാണെന്ന് അദ്ദേഹം വ്യക്തമാക്കി.

അമേരിക്കൻ അധിനിവേശ നീക്കം മുൻപെങ്ങുമില്ലാത്തവിധം വലിയ യുദ്ധത്തിന് വഴിവെക്കുമെന്ന് ഇറാൻ സൈനിക വക്താവ് ബ്രിഗേഡിയർ ജനറൽ മുഹമ്മദ് അക്രമിനിയയും മുന്നറിയിപ്പ് നൽകി. ഇറാനെ വീണ്ടും ആക്രമിച്ചാൽ അതിശക്തമായ തിരിച്ചടി നേരിടേണ്ടിവരുമെന്ന് വിദേശകാര്യ മന്ത്രി അബ്ബാസ് അരാഗ്ചിയും വ്യക്തമാക്കി. ജർമൻ ചാൻസലർ ഫ്രെഡറിക് മെർസിന്റെ ഇറാനെതിരായ മുൻ നിലപാടുകളെയും അദ്ദേഹം വിമർശിച്ചു.

അതേസമയം, സംഘർഷം ഒഴിവാക്കാൻ ഖത്തറിന്റെ മധ്യസ്ഥതയിൽ നയതന്ത്ര നീക്കങ്ങളും തുടരുകയാണ്. അമേരിക്കൻ വൈസ് പ്രസിഡന്റ് ജെ.ഡി. വാൻസ് ഇറാന്റെ സുരക്ഷാ മേധാവി മൊഹ്‌സെൻ റെസായിക്ക് ഖത്തർ വഴി കത്തയച്ചതായി റിപ്പോർട്ടുകളുണ്ട്. സന്ദേശം ലഭിച്ചതായി ഇറാൻ സ്ഥിരീകരിച്ചെങ്കിലും ഇതുവരെ മറുപടി നൽകിയിട്ടില്ല. സൈനിക മുന്നൊരുക്കങ്ങളും നയതന്ത്ര ചർച്ചകളും ഒരേസമയം തുടരുന്നതിനാൽ പശ്ചിമേഷ്യയിൽ ആശങ്ക ശക്തമാണ്.