Source :- EVARTHA NEWS
(adsbygoogle = window.adsbygoogle || []).push({});
ഹിമാചൽപ്രദേശിൽ നിന്ന് വൈദ്യുതി വാങ്ങുന്നത് സംസ്ഥാനത്തിന് 2,232 കോടി രൂപയുടെ അധിക സാമ്പത്തിക ബാധ്യതയുണ്ടാക്കുമായിരുന്നുവെന്ന് മുഖ്യമന്ത്രി വി.ഡി. സതീശൻ. ഇതേത്തുടർന്നാണ് കുറഞ്ഞ നിരക്കിൽ സ്വകാര്യ കമ്പനിയായ ജി.എൻ.എയിൽ നിന്ന് വൈദ്യുതി വാങ്ങാൻ തീരുമാനിച്ചതെന്നും അദ്ദേഹം വ്യക്തമാക്കി. എൽ.ഡി.എഫ് സർക്കാരിന്റെ ഭരണകാലത്തും സ്വകാര്യ കമ്പനികളിൽ നിന്ന് വൈദ്യുതി വാങ്ങിയിട്ടുണ്ടെന്നും മന്ത്രിസഭാ യോഗത്തിന് ശേഷം നടത്തിയ വാർത്താസമ്മേളനത്തിൽ മുഖ്യമന്ത്രി പറഞ്ഞു.
വൈദ്യുതി വാങ്ങുന്നതുമായി ബന്ധപ്പെട്ട് തന്റെ മുന്നിൽ രണ്ട് ഫയലുകളാണ് എത്തിയതെന്ന് മുഖ്യമന്ത്രി വിശദീകരിച്ചു. ഹിമാചൽപ്രദേശിൽ നിന്ന് യൂണിറ്റിന് 14.50 രൂപ നിരക്കിൽ വൈദ്യുതി വാങ്ങാനുള്ള നിർദേശവും ജി.എൻ.എ എന്ന സ്വകാര്യ കമ്പനിയിൽ നിന്ന് 8.63 രൂപയ്ക്കും 8.90 രൂപയ്ക്കും വൈദ്യുതി വാങ്ങാനുള്ള നിർദേശവുമായിരുന്നു അവ. ഇത് സർക്കാരും സ്വകാര്യ കമ്പനിയും തമ്മിലുള്ള നേരിട്ടുള്ള ഇടപാടല്ലെന്നും പവർ ട്രേഡിങ് കോർപ്പറേഷൻ വഴിയാണ് വൈദ്യുതി വാങ്ങുന്നതെന്നും അദ്ദേഹം വ്യക്തമാക്കി.
ഹിമാചലിൽ നിന്ന് വൈദ്യുതി വാങ്ങിയിരുന്നെങ്കിൽ സംസ്ഥാനത്തിന് 2,232 കോടി രൂപയുടെ അധികബാധ്യതയുണ്ടാകുമായിരുന്നുവെന്ന് മുഖ്യമന്ത്രി പറഞ്ഞു. ഈ സാമ്പത്തിക ബാധ്യത ഏറ്റെടുക്കാൻ കഴിയാത്തതിനാലാണ് ജി.എൻ.എയിൽ നിന്ന് വൈദ്യുതി വാങ്ങാൻ തീരുമാനിച്ചത്. പീക്ക് സമയങ്ങളിൽ ഹിമാചലിൽ നിന്ന് 353 മെഗാവാട്ട് വൈദ്യുതിയാണ് ലഭിക്കുകയെങ്കിൽ ജി.എൻ.എയിൽ നിന്ന് 453 മെഗാവാട്ട് ലഭിക്കുമെന്നും അദ്ദേഹം കൂട്ടിച്ചേർത്തു.
