એવું ભયાનક વાવાઝોડું ત્રાટક્યું કે 150 કિલોમીટરની ઝડપી પવન ફૂંકાયો, ચીનમાં 10 લાખથી વધુ લોકોને ખસેડવા પડ્યા

અપડેટેડ એક કલાક પહેલા

ચીનના પૂર્વીય વિસ્તારમાં ડૉલ્ફિન વાવાઝોડું ત્રાટક્યા બાદ 10 લાખથી વધુ લોકોને તેમનાં ઘરોમાંથી સુરક્ષિત સ્થળોએ ખસેડાયા છે.

વાવાઝોડાના કારણે રાજધાની શાંઘાઈ સહિતના અનેક વિસ્તારોમાં સામાન્ય જનજીવન પર ભારે અસર પડી છે.

હવામાન વિભાગના જણાવ્યા અનુસાર, ડૉલ્ફિન વાવાઝોડું પ્રથમ રવિવારે સાંજે લગભગ 5:30 વાગ્યે ઝેજિયાંગ પ્રાંતના યુહુઆન શહેરમાં ત્રાટક્યું હતું. તે સમયે વાવાઝોડાની મહત્તમ ઝડપ કલાકના 150 કિલોમીટર સુધી પહોંચી ગઈ હતી.

અંદાજે એક કલાક બાદ વાવાઝોડું ફરી વેન્ઝોઉ શહેરમાં ત્રાટક્યું હતું.

હવામાન વિભાગના જણાવ્યા મુજબ, વાવાઝોડું હવે ચીનના આંતરિક વિસ્તારો તરફ આગળ વધી રહ્યું છે. સત્તાવાળાઓએ બુધવાર સુધી ભારે વરસાદ, પૂર અને ભૂસ્ખલનની સંભાવનાને જોતાં ચેતવણી અપાઈ છે.

ચીની સત્તાવાળાઓએ ડૉલ્ફિન વાવાઝોડાને ધ્યાનમાં રાખીને અગાઉથી સૌથી ઉચ્ચ સ્તરનું ‘રેડ ઍલર્ટ’ જાહેર કર્યું હતું. જોકે, સોમવારની સવારે વાવાઝોડાની તીવ્રતા ઘટતાં ઍલર્ટનું સ્તર ઓછું કરાયું હતું.

ચીનના શાનડોંગ, હેનાન, હુબેઈ, આનહુઈ, જિઆંગસુ અને ઝેજિયાંગ પ્રાંતો ઉપરાંત શાંઘાઈમાં પણ સોમવારે ભારે વરસાદની આગાહી કરવામાં આવી છે.

સ્થાનિક વહીવટીતંત્રે લોકોને બિનજરૂરી કામો માટે ઘરની બહાર ન નીકળવાની અપીલ કરી છે.

ચીનના સરકારી મીડિયામાં પ્રસારિત થયેલાં દૃશ્યોમાં જોવા મળે છે કે શાંઘાઈના પૂર્વ ફ્રેન્ચ કૉન્સેશન વિસ્તારમાં (જે પ્રવાસીઓમાં ખૂબ લોકપ્રિય છે) ગ્રાઉન્ડ ફ્લૉર પર આવેલી દુકાનોમાં પાણી ભરાઈ ગયાં છે.

કેટલાક સરકારી મીડિયા અહેવાલો મુજબ, ઝેજિયાંગ પ્રાંતના વેનલિંગ શહેરનો નવ વર્ષનો એક બાળક સમુદ્રના પ્રવાહમાં તણાઈ જતાં ગુમ થઈ ગયો છે. જોકે, અત્યાર સુધી ચીની સત્તાવાળાઓએ કોઈ જાનહાનિની સત્તાવાર પુષ્ટિ કરી નથી.

ચીનના સરકારી પ્રસારણકાર સીસીટીવી મુજબ, ડૉલ્ફિન વાવાઝોડું જમીન પર ત્રાટકતાં પહેલાં લગભગ 6,000 કિલોમીટરનું લાંબું અંતર કાપીને આવ્યું હતું. આ દર્શાવે છે કે તેની સમયાવધિ સામાન્ય વાવાઝોડાની સરખામણીએ ત્રણ ગણા કરતાં પણ વધુ રહી છે.

ચીન તરફ આગળ વધતાં પહેલાં ડૉલ્ફિન વાવાઝોડાના કારણે ફિલિપાઇન્સ, ઉત્તર તાઇવાનના કેટલાક વિસ્તારો અને જાપાનના ઓકિનાવા ટાપુમાં ભારે વરસાદ વરસ્યો હતો.

બીબીસી માટે કલેક્ટિવ ન્યૂઝરૂમનું પ્રકાશન